السبت، 29 ديسمبر 2012

The good and the not so good

سيفورا عندهم شيء من زمان خاطري أستفيد منه (قصدي سيفورا أمريكا و كندا) و هو برنامج جوائز بس أهم شيء أنهم يعطون هدية بيوم ميلادك. من كثر ما أنا متحمسة للموضوع كنت أجل شراء أي شيء من سيفورا علشان أشتريه يوم ميلادي، و علشان آخذ الهدية (طبعا لازم تشترين شيء علشان يعطونك أياه عند الكاشير). 
من أكثر الأشياء اللي كنت أبغى أجربها هي ماسكارا eyeko و جت الفرصة إني أشتريها، أولا كان ببالي إني أشتري curvy لأن رموشي مستقيمة لكن ما كان موجود بالفرع اللي رحت له إلا skinny فقررت إني آخذها بكل الأحوال. 


الماسكارا مو رخيصة أبدا سعرها زي سعر مسكارات من ماركات زي لانكوم واي إس إل و ديور. لكن قررت إني أ جربها لأن كثير بالنت مدحوها، و خصوصا إن الماركة اللي تطلعها متخصصة بمنتجات العيون (كحل و ماسكارا). 
ما يحتاج أتكلم عن التغليف أو التعليب لأنه شكله مرة ظريف و هم يقولون أنه فكرة علبة المسكارا زي العصار علشان تستفيدين من آخر قطرة فيه. 
للحق ما أظن إنهم صادقين لأنه مع الريشة تطلع كمية كبيرة من الماسكارا صرت أضطر أطلع الفرشة و أنا ضاغطة على الفتحة علشان ما تطلع رموشي كلها كتل سوداء (و هذي مشكلة ثانية) أعتقد إنها تسوي كتل على الرموش. المشكلة الأخيرة رغم أنهم ما كتبوا إنها مضادة للماء، أظن إنها مضادة للماء (و هذا شيء ما أحبه) خصوصا لما أجي أنظف المكياج، لأنه بالعادة الواحد ينظف وجهة من المكياج آخر اليوم و يكون ماله خلق غثا و يبغى يخلص بسرعة علشان ينام. 


على العموم التجربة ما كانت سيئة بالكامل، أخذت هديتي و الي كانت عبارة عن حجم مصغر لمرطب شفايف من ماركة اسمها فريش. قلت لكم أكثر من مرة إني ما استخدم مرطبات الشفايف لأني ما أشوف لها معنى (على الأقل بالنسبة لي). لكن جربت هذا (لأنه هدية) و عجبني بالذات الروز. ما استخدمه دايم بس لما تتشقق شفايفي مو بس شكله و طعمه حلوات لكن جد يفيد و يمنع شفايفي من إنها تلتهب. من كثر ما أعجبني سيفورا شكلهم يبغون يتخلصون من هذي العينة قبل نهاية السنة، فأرسلوا لي أنه ممكن أخذه مرة ثانية لو شريت منهم كنت ناوية أشتري بكل الأحوال فقررت أطلبه "هدية" من جديد و أعطيه أمي خصوصا أنه شفايفها دايم جافة و متشققة. 
لو حصل لكم تجربون أي واحد من هذي المرطبات لا تفوتون الفرصة (صح سعرها مو رخيص) لكن أعتقد أنه من الأشياء اللي تستحق الواحد يدلع نفسه علشانها.