الجمعة، 24 ديسمبر، 2010

Ballerina

ما أعرف إذا فيه أحد بالعالم ما يحب شكل البالارينا (راقصة البالية)، بس أنا ما أشوف فيه شي بالعالم أكثر سحر و غموض من حركات البالية ... طبعا ما يحتاج ألوم أهلي أنهم ما علموني، لأنه العزاء أنه هنا ما فيه مدارس تعليم بالية ... بس لسا أحب أشوفة.
إن كنتوا مهتمين بالسينما أكيد كلكم تعرفون الحين عن فيلم نتالي بورتمان The Black Swan أو البجعة السوداء ... الفيلم للي ما يهتمون بالأفلام هو عن بالارينا ما أعرف وش يصير لها، لأني ما ودي أخرب الفيلم على نفسي بس شكلها مجنونة ... أظن ما فيه الحين مدونة تهتم بالسينما أو بالفاشن إلا كتبت عنه، بس أنا ما راح أكتب عنه إلا لما أشوف الفيلم ... طبعا ليه الفاشن؟ لأن الأزياء فيه مصممتهم رودارتي.
اللي اليوم خلاني أجيب طاري البلارينا لأني شارية لي كورسيت (كورسيه، أو مشد) كفالي فنتاج، و وصلت معاه للحالة ما أعرف إذا تعرفونها أو لا ... الي كل شوي طالع معاي طلعة أبغى أختار لها تنورة ...
آخر ما طلع ببالي أنه أختار تنورة بالية.


صح أول ما جات فكرة تنورة بالية جا ببالي بلاك سوان، بس لأني فكرت بشي أقدر ألبسه مو شي حق عروض (تراي أحب مره ملابس المسرحيات، بذات الغنائية، ودي لو أعرف مكان يبيعون فيه الملابس حقاتهم) كني جلست أفكر بشي أنعم، شي ما يغطي على الكورسيت ... تذكرت عرض كلوي للربيع 2011 و تذكرت أنه الثيم حقهم كان بالارينا (شوفوا الصورة، حتى الجزم بالية). رحت أدور عليها، و طبعا ما لقيت بمواقع كثيرة لأنه لسا ما نزلت مجموعة الربيع عند كل المواقع، ما لقيت إلا تنورة وحدة رمادية (ما تناسب مع الكورسيت حقي) بتقريبا 8000 ريال (هين) ...
كالعادة رحت لموقعي المفضل لما أدور على أشياء handmade أو فينتاج etsy و لقيت هذا المحل ... صح مو رخيص مره بس عجبني قوه
عدنها أشياء بالية مرة حلوة.
عندكم أقتراحات لوش يلبس مع كورسيت؟