Best Dressed: March 2014

الشهر هذا كان مرة صعب، خصوصا مع الأوسكار، و الحملة الترويجية لفيلمين نوح و سبايدر مان. لكن بالأخير، قررت إني ممكن أتكلم عن جينفير كونللي بعدين بحملتها لفيلم نوح بتدوينة منفصلة، لأني صراحة أحس باظلم الناس و باظلمها لكن بالنهاية اخترت لبس واحد بس، أكثر لبس حبيته. ما علينا خلينا نتكلم عن أحسن ملابس هذا الشهر مارس 2014. 

خلونا نبدأ من لوپيتا، لوپيتا موجودة بالقائمة خمسة مرات بالستة شهور الأخير. برأيي كل مرة شكلها مختلف، هذي المرة بمايكل كورس، أحس شكلها كأنه لبس مكتبي/رسمي بتحوير شوي، مع الكروب توب ما أعرف الكت أوت، زيادة اختيارها للجزمة و الشنطة. نفس الشيء أعجبني شكل نايومي واتس بالجمب سوت من إيلي صعب، أعجبني اللون، و أعجبني مكياجها، و تسريحتها. طبعا ما يحتاج أقول شيء عن دايان، كل اللي أقوله، أظن أي مصمم إذا عنده لبس يعتقد ما فيه أحد يقدر يخليه حلو بسهولة، يعطيه دايان كروقر، دايان لابسة من المجموعة الأخيرة لثيوري. مرة عجبني شكل جايمي كينچ بيوليانا سيرچينكو كتور، ما أعرف ليه، انبسط لما أشوف ناس أكثر يلبسون لها، أحس تستاهل إنه تعطى وجه. مرة عاجبني شكل إيما واتسون بجي مانديل، أعجبني شكل ماكرينا قارثيا بألبيرتا فيراتي، أكثر شيء عجبني، اختيارها للحلق البرتقالي أو الأحمر، مع الأخضر، جنيفير كونللي لابسة أوت كتور من جيفنشي أعتقد 2010، و إيمي أدمز باللوك الوحيد اللي اخترته من الأوسكار بچوتشي بريمير، عجبني مرة شكلها، مرة أنيق و نظيف، و مرة ثانية عجبني اختيارها للون الحلق. 

أحسن لبس لشهر مارس 2014؟

لوبيتا ناينقو بمايكل كورس

نايومي واتس بإيلي صعب

دايان كروقر بثيوري

جايمي كينق بيوليانا سيرقنكو أوت كتور

إيما واتسون بجي مانديل

مكرينا قارثيا بألبيرتا فيراتي

جنيفير كونللي بجيفنشي أوت كتور

إيمي آدمز بقوتشي بريمير

make a poll

Elie Saab Takes Over the Red Carpet

ما أعرف ليه هذي السنة أحس بفخر بإيلي صعب، صحيح أنه لبناني و مالي شغل فيه، بس جالسة أتذكر كيف قبل أكثر من عشر سنوات لما كنت أقلب كتالوقات الأزياء مع خالاتي، علشان زواج وحده منهم ... أتذكر كيف كانت تصاميمه، و كيف الحين صار. 

أتذكر بعد صدمتي الأولى لما كنت أتابع الأوسكار 2001 و اللي فازت فيه هالي بيري، أنه فستانها من تصميم إيلي صعب... ذاك اليوم ما كنت مصدقة أنه مصمم عربي فيه أحد يعرفه، طبعا ما كنت أعرف عاليا، لكن الفرق بينه و بين عليه، إن أيلي صعب بدأ بلبنان بعدين طلع لباريس، لكن عليه أعتقد حتى ما رسم رسمه بتونس. 

المهم السنة هذي أعتقد ما فيه مناسبة صارت، إلا و كان على الأقل واحده من الحاضرين لابسة لإيلي ... ما أعرف لازم يشكر الناس اللي تشتغل بالعلاقات العامة معاه، أو يشكر إيلي على فساتينه اللي إذا ما كانت حلوه، على الأقل ما قد صار أي فستان على أي أحد شين :). 

زي ما قلت لكم قبل، السنة هذي قررت إني أجمع الفساتين اللي أعجبتني من بداية السنة، علشان ما أنساها لما تجي نهاية السنة، لو بغيت أكتب عن أحسن الفساتين بالسنة اللي بتخلص ... المهم، بعد فترة لما شيكت على قائمتي اكتشفت إن القائمة مليانة فساتين من إيلي صعب، ففكرت إني أشارككم، باللي أشوف إنها أحسن، و أشوف تصوتون على أحسن واحد بالنسبة لكم ... من المجموعة اللي قدامي، بالنسبة لي الفستان اللي على اليمين من مجموعة أوت كتو خريف 2011 اللي لابسته كيرا نايتلي، أعجبني مرة، أعترف إني يمكن حتى ما انتهبت له لما كنت أقلب المجموعة، لكن لما لبسته كيرا عجبني مرة، خصوصا أكمامه. 

قلت لكم قائمتي كانت طويلة، حتى أطول من هذي الثمانية فساتين، لكن قلصت المجموعة بمساعدة خواتي :) ... المجموعة هذي أعجبني فيها الفستان الأخضر اللي على زوي سالدانا من مجموعة ربيع 2012، للحق ما شفت المجمعة زين، لأني عجازة، لكن بشكل عام قلبتها، عجبتني الألوان القوية فيها (فيها أخضر و أزرق نيلي، و أصفر) لأنها ألوان ما أتذكر إن إيلي قد استخدمها (بهذي القوة)، لما شفته زي ما قلت لكم على زوي، عجبني خصوصا مع لون بشرتها. لكن المفضل عندي من هذي المجموعة (مو كفستان) كشكل عام هو ليا سيدو (يسار) بالفستان الأوت كتو ربيع 2011، ما أحس إني من فترة طويلة اهتميت كيف جسم أي وحده، مادامها تلبس لبس يناسبة و يطلعه حلو، لكن أظن جسم ليا هو اللي أعطى شكل للفستان، أحب كيف إنها مليانه برشاقة (ما أعرف كيف آصفه)، لكنه يعطي الملابس شكل مختلف. 

Questioning a Stylist

من فترة و أنا مو عاجبني ستايل إيما واتسون، خصوصا بعد ما قصت شعرها، بس صايرة أحط لنفسي نظام إني ما راح أهزأ أحد هنا، على الأقل من دون سبب، اللي ما يبغى يلبس زين لا يلبس زين هو حر. 

اللي خلاني أكتب عنها اليوم هو أنه الستايلست حقتها هي كارولين سيبر (على خبري)، و اللي أشوفه إن كارولين تلبس أحسن من لبسها، الشيء اللي بأقوله، إذا كارولين تفضل إن شكلها يطلع أحسن من زباينها، تترك الشغل، و تصير زي كثير من السلبرتي، اللي مالهم وظايف بس بكل مكان طالعين و يلبسون ملابس غالية و الناس تصورهم زي أوليفيا باليرمو و أليكسا شونق. 

الفترة هذي هي فترة الترويج للجزء الأخير من هاري بوتير، إلى الآن ما شفت شيء على إيما خلاني أقول واااااو أو على الأقل، أفكر إن شكلها حلو. البنت كيوت، جسمها طبيعي بسهولة تقدر تكون حلوة أو على الأقل أحلى من كذا. 

اليوم كانت إيما عند دايفيد ليترمان، لبست له لبس من بليمان خريف 2011، الفستان معدل، بس حتى بعد التعديل ما عجبني عليها. الأكتاف الكبيرة ما لبقت لها، خصوصا و إن رأسها صغير (هنا من زاوية ثانية  و بتعرفون وش أقصد). 

الشيء الثاني اللي ما عجبني أبدا أبدا أبدا ... هي الجزم ويجز؟!! يعني فستان زي كذا غريب، و ترتر الظن المفروض تختار له خيارات أكثر فخامة و تطرف و تناسب اللبس مو وجز تصلح مع فستان صيفي فلورال أو جينز و تي شيرت. 

الصورة اللي على اليسار زي ما تشوفون هي الصورة الأصلية، الصورة اللي على اليمين تعديلاتي، و سامحوني على البربسة هذي، بس ما عندي فوتوشوب، فالشغل على قد الحال و الشكوى لغير الله مذلة P:. 

لأنه ما عجبتني الأكمام شلتها من الطرف الثاني مع إن شكل الفستان عاجبني كذا، بس مو عليها، أعرف أنه تقريبا راحت فكرة الفستان، بس على الأقل أظن أنه كذا بيطلع مناسب لها. 

الجزم من أليكساندير ماكوين حلوة مرة، صحيح أنا شوهتها بالشغل حقي، بس تلقونها هنا عند net-a-porter.com بـ 2731 ريال تقريبا. 

شرايكم بشكل إيما، و وشرايكم بالتعديل؟

Like a Boy

من أكثر الأشياء اللي أنبسط عليها لما أشوف وحدة أحس إنها حلوة و تستاهل، بشكل حلو. أمس و أنا زي كل مرة أقلب بمواقع القوسب علشان أشوف صور شفت صور جديدة لإيما واتسون و هي تصور دعاية للانكوم.

من قصت شعرها إيما قصير مرة (بيكسي) و أنا مو كل شيء تلبسه يعجبني مرة، أحس بعض المرات قصتها تنزل اللوك بالأرض، مو دايم، بس ما أعرف وش الشيء اللي خرب عليها.
زي ما قلت لكم أمس إيما كانت جالسة تصور إعلان للانكوم، و أخذوا لها هذي الصورة، من وسط المكان اللي تصور فيه، فيعني اللبس اللي هي لابسته مو من اختيارها، هذا اللبس اللي بيطلع بالإعلان. أعجبني مرة، حسيت أنه هذا الستايل اللي لازم تعتمده لها، يعني شيء شوية ولادي. أكثر شيء حبيته باللوك، هو الشورت، عجبني أنهم ما حولها ولد جابوا شورت دانتيل كسر من جمود الفكرة، بعدين اللي خلاني أحبها أكثر، إني لما أشوف كثير من البنات اللي عندنا لما يقصون شعورهم قصيرة، يروحون يلبسون لي تي شيرتات حقات أولاد و يمشون و هم مفحجين؟!!!

اللوك الولادي أو الرجالي، كان من أهم الأشياء اللي ميزت عروض خريف 2011 الحلو بالخيارات أنه متنوعة، و فيها ابتكار كثير، يعني مو بس لبس رجال لبسناه بنات. الأشياء الموجودة تصلح للستايل اللي أقترحته لإيما.
العروض كانت مليانة بناطيل رجالية، بس زي ما قلت لكم، فيها لمسات كذا أنثوية بقوة، زي مثلا التطريز اللي على القميص اللي بعرض جايسون وو (الأول من اليسار). بعرض دولتشي آن قابانا كان اللوك الولادي هذا كثير مرة، أعجبني هذا اللوك (اللي بالوسط) مع الجاكيت الأصفر الأوفر سايز، و البنطلون الضيق (ولادي بعد)، و أهم شيء القبعة.
آخر لوك و اللي هو من عرض شانيل، و نفس الشيء شانيل كان فيه ملابس كثيرة فيها الطبع الولادي هذا، أعجبني أنه مع اللوك مختار كعب كتين، حبيت الحزام بعد، و أهم شيء فيها حبيت أنه كل شيء كأنه مبهذل.