الجمعة، 25 يناير، 2013

Red Carpet Race

للحق قبل سنوات كنت أهتم بالأوسكار علشان الأفلام، و مين أحسن ممثل و أحسن مخرج و الكلام الفاضي. إلى الآن أحب الأفلام، بس ما عاد يهمني كثير من يفوز بالأوسكار و مين لا، لأني أحس أنها كلها حملة دعائية كبيرة يفوز فيها اللي يسوق لنفسه، مو اللي مسوي أحسن فيلم.
ما علينا، لسا أتحمس لحفل الأوسكار علشان أشوف الملابس، و مع أنه باقي شهر كامل على الحفل، قبله فيه ساق و بافتا إلى إني بغيت أسوي تصويت على مين تتوقعون المصمم اللي راح ينلبس لمجموعته أكثر بهذا الأوسكار، خصوصا أنه عروض الأوت كتو لربيع 2013 بس أمس خلص.


بالنسبة لي المجموعات بشكل عام ما كانت أحسن مجموعات أوت كتو قد شفته، لكن فيه فساتين بتقريبا كل مجموعة حلوة مرة، و أتمنى أشوفها على الريدكاربيت. أحسن عرض بالنسبة لي كان عرض يوليانا سيرقينكو أعجبني مرة، خصوصا التفاصيل (النظارة و بعض الشنط).
من أكثر الفساتين اللي أتمنى بجد أشوفها بالأوسكار هو الفستان الموف اللي من جامباتيستا فالي، أعجبتني مرة فكرة البنطلون/الفستان.
حبيت فستان إيلي صعب النص كم. أحس قليل مرة نشوف هذا الكم على الريد كاربيت، علشان كذا ودي أشوف أحد لابسه.
بشكل عام أعتقد أنه بحفل هذي السنة بنشوف أكثر من فستان أحمر، لأنه الفساتين الحمراء كانت بأكثر من عرض، و عند أكثر من مصمم.

للأسف إني جالسة أحاول أحط تصويت بس رافض يركب معاي، فممكن تكتبون رأيكم بالتعليقات لحد ما ألقى حل.