الخميس، 26 سبتمبر، 2013

Crystal Clear

بالنسبة لي حدث غير عادي إني أكتب عن عرض غير عرض دريس فان نوتين، باليوم اللي عرض فيه دريس مجموعته، لكن أعتقد المجموعة اللي لازم أتكلم عنها هذي المرة هي مجموعة روشا. صراحة مجموعة دريس أعجبتني (كالعادة) على أنه فيها شيء خريفي، بنفس الوقت أحس إنها دفاية و شغل كأنه سدو و فيها تأثير "بدوي" إذا كان اللي أشوفه صحيح. بس بما إني لي أكثر من موسم و أنا تعجبني ملابس روشا، قررت إني أكتب عن روشا خصوصا إني أعتقد إنه "أكثر" صيفية و خفيفة، و أحس أنه ممكن نشوف منها شيء على إيما ستون أو أوليفيا باليرمو مثلا. 


أولا خلونا نتكلم عن العقد الكريستال الموجود باللوك اللي بالوسط، هو ما كان بس بهذا اللوك، كان على أكثر من عارضة، بس ما اخترت إلا هذا اللوك. العقد يذكرني بالألعاب اللي على شكل مجوهرات أظن وصلني بيحاتي عشرة منها (طبعا يوم كنت طفلة). ما أتذكر إني كنت أحبها، أنا كذا دايم أسوي نفسي أكبر من هذي الألعاب، الحين بعد ما كبرت (للأسف، مو لأني كبرت لأني صرت أحب هذي الأشياء بعد ما كبرت) المهم صرت أحب الأشياء اللي كأنها لعبة خصوصا بالمجوهرات. أحب فكرة شيء غالي أخليه رخيص مو صدقي، أعتقد هذا السبب اللي يخلي ثلاثة أرباع مجوهراتي بهذا الشكل، و اللي شكلها فخم و كلاسيكي في الواقع رخيصة. 
خلونا نرجع للمجموعة، حبيت الألوان، أكيد حبيت الأشياء اللي تلمع، الفستان المفضل بالنسبة لي (اللي ودي ألبسه أنا) هو الأبيض (يسار، تحت). ما أعرف كيف آصفه، الشيء الوحيد اللي أقدر أقول عنه، أنه فخم من غير تعب.