وصلنا لنهاية آخر أسبوع، صحيح بعض الأشياء عديتها، لأنه كانت لوك بوك و لا طلعت إلا بعد ما خلص الأسبوع، بس لو حصل لي أتكلم عنها بوقت ثاني راح أتكلم، بس خلونا نحط أحسن الملابس بالنسبة لي من باريس، و كلام عن العروض بشكل عام.
زي دايم قبل ما أتكلم عن الملابس، باتكلم عن العروض بشكل عام، و للي ما أنتبه بس أوضح لكم إن أسبوع باريس تقريبا أسبوعين، أظنه أطول أسبوع بعده يجي أسبوع نيويورك. المهم خلونا نتكلم عن العروض.
- آخر يوم من العروض عرض لوي فيتون بعد ما تركه مارك جايكوب، و صار مصممه نيكولا قاسكيه (مصمم بلانسياقا السابق). للي ما يعرف إن نيكولا هو اللي طلع شنط بلانسياقا متروسايكل و سيتي، و شكله تخصصه الشنط، لأنه بالنسبة لي كانت الشنط بالعرض مرة حلوة (يمكن أتكلم عنها بوقت ثاني).
- كان فيه لبس رمادي، بس إذا كان فيه لون لعروض باريس فهو اللون الأحمر و درجاته.
- أعجبتني كثير من ملابس ديور و أعتقد أنه بيكون كثير على الريد كاربيت (من كذا مجموعة قبل ما أعجبني عنده شيء كثير، ريزورت و أوت كتور)، لكن ما أعرف وش السبب اللي خلاني ما أكتب عنه يمكن لأن فيه اتجاهات كثيرة بالملابس، بس واحد من أكثر الملابس اللي أعتقد بتلبس هي الأشياء اللي عليها بروش أو ما أعرف إيش (مثال الثاني فوق من اليمين).
- صحيح اختياراتي مو كلها أكمام طويلة، لكن بنشوف فساتين بأكمام طويلة أكثر على الريد كاربيت
طيب خلونا نتكلم عن الملابس، قلت لكم ديور كان فيه فساتين عندي شعور إنها بتكون على الريد كاربيت كثير، يمكن بكثرة مجموعته للصيف اللي فات 2013 للي ما يعرف وش قصدي، هي المجموعة اللي فيها أقمشة لماعة، أعتقد ماريون بتلبس الفستان اللي فوق، هي أكيد بتلبس ديور، بس أحس الفستان اللي فوق بنشوفه عليها. أعجبني اللبس الأسود اللي من إيلي (تحت أول من اليسار) ما أتذكر إني شفت شيء زيه قبل، اللي عجبني فيه، لما تشوفه تحسه شيء تقليدي، بس كونه بنطلون، و بكم واحد طالع شكله مختلف، أحسه بيكون حلو على هيلاري سوانك. اللبس الأول من اليمين فوق أحس ممكن نشوفه على سارا جيسيكا باركر، صراحة ودي أشوفه على أحد ثاني بس ما أعرف مين؟ فستان أليساندرا ريتش (الثاني من اليمين تحت) أحسه يصلح للي دايم يصلح عليها كل شيء، دايان كروقر، بس ودي أشوفه على ليا سيدو.
أفكر لما ينتهي الموسم، لو كنت فاضية و ما عندي شيء أتكلم عنه راح أتكلم عن الملابس اللي أعجبتني كانها لبست أو لا، ما راح أتكلم عن الأوت كتور، لأنه ما يعتمد على الموسم، ممكن بعد عشر سنين أحد يلبس منه.
وش رأيكم بباريس؟
