Best of NYFWFW 2015

خلص أسبوع نيويورك، صراحة ما توقعت إنه بيكون صعب علي أختار أحسن الملابس، بس بالنهاية كان لازم أختصر القائمة لثمانية بس. حتى الثمانية كانت شوي صعبة، و أنا كل يوم أحاول أقلص علشان ما أحتاس لما يخلص الأسبوع. 

فيه مجموعات أعتقد راح ينلبس منها كثير حتى لو ما تكلمت عنها هنا، أو بأي موضوع منفصل عن عروض نيويورك، زي جي مانديل، مايكل كورس، نعيم خان و ماركيزا، بالنسبة لي ما كانت أحلى مجموعات، بس فيها ملابس واضح إنها مصممة للريدكاربيت. 

يمكن زي ما أنتم شايفين اللون العنابي يمكن ما كان كثير بالعروض، بس كثير فساتين كانت باللونين الأحمر و العنابي، و قائمتي طلعت بثلاثة: كريستيان سيريانو (فوق) أحسه بيكون حلو على كايت بلانشيت، و تحت يمين بروينزا سكولير (أعرف صعب لبسه مع كل هذي القصات، بس ودي أشوفه على لوبيتا)، و آخر شيء الثاني من اليسار تحت من عرض أوسكار دي لا رينتا (الأول بعد موت أوسكار) أحسه بيكون حلو على إيمي روسم. 

الفستان الكحلي (يسار تحت) من دونا كارين، أحسه بيكون حلو مرة على الريدكاربيت، ممكن على أحد زي إيميلي بلونت، أعجبتني بعد البدلة اللي فوق، من كارولينا إيريرا، بتطريز الوزات على الجاكيت، أعرف إن ميريل ستريب ما تلبس أشياء زي كذا، بس ودي أشوفها بهذي البدلة، إذا ما لبسته ميريل، ودي أشوفه على أوزو أدوبا، أما اللبسين الأخيرات (الأسود، من توم براون) و الأخضر من روزي أسولين، ودي أشوفهم على ثنتين بشعر أحمر، جوليان مور بتوم براون (أو حتى روني مارا)، و الأخضر على إيما ستون أو كيرا نايتلي. 

أنتم وش رأيكم بعروض نيويورك لو كنتوا متابعينها، أو الأشياء اللي شفتوها هنا، أو بأي مكان ثاني من خريف نيويورك 2015؟ 

Mash-Up

أعرف إنه أسبوع الموضة بنيويورك تقريبا خلص. لكن اللي منعني من الكتابة، إما إني ما شفت شيء مثير، أو إني ما حصلت صور كويسة، و الأغلب إنها الثانية. أمس من العروض اللي كانت قبل أمس. كان مارك باي مارك جايوكبز. و اللي إذا مو غلطانة هذا هو الموسم الثالث للمصممات البريطانيات معاه. 

المرة هذي غير المرتين اللي فاتت، حسيت إن المجموعة كأنها مارك باي مارك مع لويلا (أعرف قلت لكم قبل إن مصممة لويلا، هي وحدة من مصممات الماركة) لكن المواسم اللي فاتت ما كنت أشوف فيه أي شيء يشبه لويلا و لا حتى مارك جايكوب. أظنه أكثر بناتي/شبابي هذي المرة، مع البوكا دوتز، و بنفس الوقت الطبقات ذكرتني كثير بلويلا. 

حبيت المجموعة مرة، خصوصا هذا التوب اللي كأنه عالق بالباندو أحسه شيء مرة ظريف، بعد بموضوع الباندو، حبيت اللوك الأول اللي فيه الباندو فوق القميص، أحسه لوك يصلح مرة لأليكسا شونق. بعد أعجبتني السويتر الرمادية، أحس بنشوف نسخ تشبه لها بالهاي ستريت. 

أنتم إلى الآن وش أعجبكم من أسبوع نيويورك؟ 

What My Sister Like

لو كنتوا متابعيني من زمان (أكره أقول هذي الجملة، بس وش أسوي من زمان و أنا أكتب هنا)، بتتذكرون إني قد تكلمت مرة عن ماركة إنجليزية اسمها لويلا أفلست، كنت أحبها. المهم، و لو تتذكرون بعد قلت لكم بالكلام عن أسبوع نيويورك لخريف 2014 إن مارك باي مارك صار عنده مصممات جداد، وحده منهم هي مصممة لويلا السابقة. الأسبوع هذا نزل اللوك بوك حق مارك باي مارك ريزورت 2015، و أعتقد إن المجموعة مرة مميزة. 

لو دورتوا على لويلا قبل،  أو على مارك باي مارك أعتقد أنهم كلهم كانوا مختلفات، لويلا كان مرة بناتي (كوركي)، و و مارك باي مارك كان كأنه شيء بين جوسي كتور و مارك جايكوبز. لكن أعتقد مارك باي مارك مع المصممات الجديدات أظن إني أقدر أقو إنه "توم بوي".
ما أدري إذا أنا أعرف أذواق الناس اللي حولي أو لا ، بس أحب أقنع نفسي إني أعرف، فهذي المرة بأقول إني أعتقد إني هذي المجموعة مرة ذوق أختي. المجموعة ما فيها قطع كثيرة، لكن أعتقد إن القطع اللي موجودة باللوك بوك مرة حلوة، و إذا ما زالت أسعار مارك باي مارك زي ما هي، أقدر أشوف ناس كثير (خصوصا الطلاب) بيتوجهون لها خصوصا إنها أرخص من أكني ستوديو مثلا، أو أليكساندير وانق.

أنتم وش رأيكم؟ أعجبتكم أو تفضلون مارك باي مارك قبل لويلا بارتلي و كايتي هيلير؟ 

Tacky is the New Class.

لفترة طويلة كنت أقول، لما شفت هذا الإيديتوريال، عرفت وش ستايلي بالضبط، لأن هذا كل شيء أتمناه بلبسي، بس شيء واحد مو مضبوط، إني ما ألبس أبيض كثير، مو لشيء بس لأني أحب الأسود أكثر. باقي الأشياء كلها أحس تقولي خوذيني (عندي احساس لو الملابس تحس، كان جت عندي من دون ما أدفع فيها فلوس، مو لأني استاهل أو أي شيء زي كذا، بس أحس رحمة فيني، من كثر ما أمدح فيها). 

الشيء اللي أعتقد إني أحبه، غير تخليط الأشياء، و هو هنا موجود، مع خلط أشياء مو فخمة أبدا زي الكولا، مع ملابس غالية، أو خلط الترتر مع خطوط و ألوان نظيفة و محايدة.

ثلاثة من الصور اللي اخترتها فيها شيء له علاقة بالكولا، مع إني ما أشربه، بس دايم أحس شعار الكولا و طبعاته مرة حلوة، تعطي شعور ڤينتاج. و ألوانه حلوة. طبعا تعرفون إني أحب الترتر، علشان كذا بعد ثلاثة من الصور الأربعة اللي اخترتها فيها ترتر، ليچينچ أو ما أعرف وش ممكن يوصف من لوي فيتون (أعجبني كيف نسقوه مع شيء بسيط مرة) صار مرة أنيق و مو مبالغ فيه، شنطة أشيش اللي على شكل كيسة مكتوب عليها كوك، و سويتر مارك جايكوب الحمراء. (لو بغيتوا شيء يشبه لها أو علي الأقل يشبه للثانيات منها (مو مرة، بس نفس الفكرة) هنا و هنا تلقونها ب39 دولار، أما شنطة أشيش أرخص شيء لقيته ب 460 دولار. 

هنا تلقون باقي الإيديتوريال من مجلة i-D، ما أعرف إذا حتى أنتم معجبين بهذا الإيديت زيي، أو تشوفنه بايخ، و لا فيه شيء مميز؟ 

Best Dressed: November 2013

زي ما قلت لكم اليوم راح يكون عن أحسن لبس لشهر نوفمبر. إلى الآن أفكر بطريقة لترشيحات أحسن لبس، أعتقد إني بأخليها بالأسبوع الثالث من يناير، و طبعا بيكون فيها الفساتين الإثناعشر اللي فازت بترشيحات الشهور اللي أخترتوها. 

ما علينا من أحسن فساتين السنة، خلونا نشوف فساتين نوفمبر. 

أولا خلوني أقولكم إني مبسوطة، فستانيين من اللي قلت إنها راح تكون بالريدكاربيت انلبست، فيه فساتين ثانية انلبست بس النتيجة ما عجبتني، المهم هنا اليوم معانا روني مارا ببلانسياقا و شو كي بفالنتينو كتور. كل الثنتين أعجبوني مرة. بعد أعجبتني كايت بيكنسيل بالقوتشي، من زمان ما أعجبتني هذي الطريقة باللبس "هوليوود قلامور" بس مع لون الفستان أحس شكلها طالع مرة حلو. من زمان عن ليتون ميستر، بس عجبني شكلها هنا، أحسه مرة مرتاح، لكن لو سألتوني وشو اللوك المفضل عندي (اللي ممكن ألبسه على طول) من دون كلام أليكسا شونق (مو مفاجأة إني صايرة أحبها أو أحب ستايلها مرة). 

أنتم وش اللبس الأحسن عندكم؟ الأسماء محطوطة عكس عقارب الساعة. 

Create your free online surveys with SurveyMonkey , the world's leading questionnaire tool.

Editors' Favorite?

آخر مجموعة أبهرتني صدق لمارك جايكوب كانت خريف 2010. بآخر يوم لأسبوع نيويورك، بعد مجموعة مارك باي مارك جايكوب اللي أعجبتني و تكلمت عنها بالبوست اللي قبل هذا، مارك جايكوب يجي بمجموعة لماركته الأساسية مارك جايكوب و أعتقد أنه قدم وحدة من أحلى عروض نيويورك و أكثره ابتكار (برأيي).

العرض المجموعة ما أخذت تأثير من القرن اللي فات (زي أكثر العروض)، لكن راحت أبعد و كان فيها وحي فيكتوري (اللوك اليسار فوق مثال) شكل الأكمام، و الياقة هذي اللي ما أعرف وش تسمى و الشيفونات بنفس الوقت أحس فيه شيء قوثيك (الألوان الغامقة و بعض النقشات). زي ما قلت لكم أعجبتني المجموعة مرة، لكن ما أعتقد إنها مجموعة بنشوفها على الريدكاربيت (على الأقل بشكلها هذا من دون تعديلات) لكن أظنها بتكون مفضلة عند المحررين و بتطلع بإديتوريال كثيرة. لولا إن ميت قالا بعيد مرة كان قلت أتوقع كثير من اللي راح يجون بيلبسون منه. 

الشيء اللي انتبهت له بعد ما بديت أكتب إن المجموعة أعطتني شعور خريفي قوي، لولا إني شخص ما تفرق معاه موضوع الألوان (ىمكن تفرق شوي) لكن كان قلت إنه هذي المجموعة جت بالوقت الخطأ. 

وش أحسن عرض من نيويورك بالنسبة لكم لو كنتوا متابعين؟

Season of Youth

بمرور اليوم الخامس (أظن) من أسبوع نيويورك للموضة (الأسبوع الأول من شهر بين أهم مدن الموضة بالعالم) عارفة إنها معلومة بايخة، بس علشان أقول لكم إنه لحد ما أسبوع نيويورك يعطي إشارة على وش راح نشوف بباقي المدن، و كيف بتكون الموضة للموسم الجاي. المهم بالنسبة لي أعتقد أنه الموضة تمر بحالة "بحث عن ذات" (أعرف كلام كبير و ... و .. ) بس تحملوني شوي. اللي أشوفه، بعد ما استرجعت أكثر الموضات بالثلاثة سنوات اللي فاتت (من الأربعينيات إلى التسعينيات) المصممين جالسين يدورون خط جديد للموضة، صح الحين صاير كأنه كل واحد جالس يخربط كأنه يدور على شكل، بس أظن مع الموسمين الجايات بيكون فيه ملابس و موضات حلوة. 

يكفي كلام فاضي، خلوني أتكلم عن المجموعة اللي قدامي من مارك باي مارك جايكوبز. صحيح إنها مو الماركة الأساسية لمارك جايكوب، و لا حتى ثاني ماركة له تآخذ اهتمام (إذا اعتبرنا أكثر اهتمام يروح للوي فيتون بعدها مارك جايكوب)، لكن أعجبتني مجموعته لهذا الموسم. 

فيها الشيء اللي حسيته بملابس أليكساندر وانق (شيء شبابي فيه حيوية). إذا كانت ملابس وانق زي ما قلت إنه كأنه ملابس مدرسة صارت ملابس نوم، ملابس مارك باي مارك كأنه وحدة تلعب و تمشي طول اليوم (لابسة سنيكرز) بعدين قررت إنه تحط شيء لمّاع لأنها بالليل بتروح لحفلة (من دون ما تغير الجزم أو حتى تفسخ التي شيرت اللي كان عليها طول اليوم). 

تعرفوني أحب الملابس الخفيفة المريحة، و لا أوافق اللي يقول لازم اللبس الحلو ما يكون مريح، بالنسبة لي ما أقدر أكون مبسوطة و راضية عن لبس أنا مو مرتاحة فية. 

My Idol Summer

أعرف إني بعض المرات أتحمس للأشياء قبل وقتها بفترة طويلة، بس عندي قناعة إن حماسي هذا لو ما نفع ما ضر. المهم الشيء اللي من الحين جالسة أدور له هو أشياء عطلة صيفية (لبس و إكسسوار و غيره)، و طبعا لما أقول عطلة، قصدي مكان حلو أسافر له، و أشتري أشياء حلوة له. (ما أعرف ليه) صحيح أنبسط بالسفر، بس ما أعرف ليه، أحس إني بعض المرات أتحمس لأشياء مالها معنى (تحملوني شوي). 

أولا لازم أقولكم إني من فترة طويلة و أنا أدور زيت يعطي لمعة ذهبية للجسم، دورت كثار منهم زيت بودي شوب و أشوف أنه لما يفرك يروح اللون ما يبقى غير قليتر على الجسم، و لو بغيت التأثير هذا كان حطيت قليتر من البداية ما يحتاج أتعب نفسي و أدور على زيت للجسم. فتقريبا كل فكرة التدوينة هذي تدور حول الزيت. 

أخيرا حصلت زيت يعطي اللون واللمعة الي أبغاها و أعتقد أنه زين، صحيح أنه مو رخيص أبدا، لكن أعتقد أنه "الإكسسوار المناسب" لأي مناسبة كبيرة بهذا الصيف، أو أي صيف، ما دامت الناس تعتقد أنه البشرة اللي فيها لمعة ذهبية شيء حلو. 

الفستان اللي كأنه شيرت من زارا (تقريبا ب 200 ريال، و منه لونين غير هذا)، شفته قبل فترة و أعجبني، حبيت أنه أطول من ورا، حبيت بعد خفته، شكله، أعتقد أنه من نوعية الفساتين  اللي تطلع حلوة على نوعية أجسام مختلفة، و تخلي أي أحد يلبسها ذوق. 

الشنطة من ريتشيل زو، هي شنطة/ حزام، عاجبتني من شفتها بعرضها لربيع و صيف 2013، أحس فيها شيء ما أعرف كيف بس ذوق براحة، شيء هيبي. الربطة بعد من واحد من عروض ربيع و صيف 2013، تكلمت عنها قبل هنا، هي من عرض مارك باي مارك جايكوبز (أعتقد إني لازم أدور أو أسوي لي ربطة ملوية زي هذي) أحسها تصرخ عطلة. 

الجزمة أو الصندل الجلي (هم كذا يسمونه) من توب شوب، عاجب أختي مرة، أتذكر إنه هذي النوعية من الصنادل كانت المفضلة عند أمي و أنا صغيرة (ما أعرف كم شرت لي فردة)، بس أتذكر آخر وحدة كانت سوداء، و مرة باستراحة بالظلام كنت لابستها، بس ما ربطت الحزام، قعدت أصارخ أحسب أنه عقرب علق برجلي :S. آخر شيء، الحلق من أيسوس، تلقونه هنا لو كان عاجبكم. 

K^3

أعرف إن العنوان بايخ، بس لما جيت أحفظ الصورة، و بالعادة أحفظ الصور على أول حرف من أسم الشيء اللي موجود بالصورة، فاكتشفت أنهم كلهم أساميهم تبدأ بحرف K. ما علينا الموضوع ماله شغل بأساميهم، بس أنه الشيء اللي يشترك فيه هذولي الثلاثة، إني ما أحبهم :). 

 زي ما قلت لكم صحيح إني ما أحب الثلاثة بدرجات مختلفة، و بعد لأسباب مختلفة (ما يهم إني أشرحها هنا) لكن للحق (و علشان تعرفون إني موضوعية، و لا تعميني المشاعر P:) أعتفد أنهم أكثر ثلاثة أشكالهم أو على الأقل (لوك واحد) لهم أعجبني بالفترة الأخيرة. 

كيرستين ستيوارت صايرة بكل مكان لأنها تروج لفيلمين لها On The Road و أعتقد آخر حلقة من Tewlight (وش أسوي ما أحب الفيلم). المهم إن كريستين طلعت بأكثر من لوك عجبني هذا البلانسياقا واحد منهم، أعجبني كل شيء باللوك من الأكسسوار للمكياج (المكياج مرة حلو) و أصلا قلت لكم قبل إن المجموعة الأخيرة لبلانسياقا كانت عاجبتني مرة، و يمكن أكثر شيئ حبيته إنه و أخيرا ابتسمت :). 

اللوك الثاني من كيرا نايتلي اللي رجعت تروج لفيلم آنا كارنينا، هذي المرة بأمريكا (الفترة اللي فاتت كانت ببريطانيا). و طلعت بهذا الفستان (اللي أعتقد أنه بس مصمم لها) من إيرديم بعد مجموعة ربيع 2013 الأخيرة (فيه فستان يشبه له بالمجموعة). عجبني لونه مع إني ما قد تحمست لهذا اللون على فساتين سهرة، أعجبتني النقشات، و أعجبني بعد شعرها، و أهم شيء لون الروج اللي أعتقد أنه عاطي حياة للبس.

آخر وحدة هي كايت موس. صراحة ما أعرف متى آخر مرة كان شكل كايت موس محترم (حتى بزواجها كان شكلها تعبان) بس بحفل توقيع كتاب لها جت بهذا الفستان من بعد مجموعة مارك جايكوبز الأخيرة. كل شيء فيها أحسه "طازج" أعجبني إن مكياجها ما كأنه مكياج (طبعات اللابورد كثير مرات تصير رخيصة) و مع مكياج ثقيل أحس إني على طول يجي ببالي بأحسن الأحوال الكرداشيانز (أعتذر للي يحبهم) بس أشكالهم بالنسبة لي دايم رخيصة :). 

المهم ما فيه شيء ثاني أقوله لكم، إلا إني أوصل لكم رسالة إني أقدر أقول كلام زين عن أحد ما أحبه P:. أنتم شرايكم بالثلاثة؟ بهذي الملابس و بشكل عام. 

* عدلت العنوان اللي كان عبارة عن 3 حرف K جمب بعض، لأني تذكرت أنه الاختصار هذا هو اختصار لمنظمة إرهابية أمريكية مسيحية عنصرية (لو متحمسين تعرفون عنها تلقون هنا كلام أكثر عن المنظمة). 

Eliza Doolittle

من أمس و أنا أحاول أنزل هذا الموضوع، المشكلة لما يكون عندك أنترنت خايس ... قبل أمس كان فيه عرض مارك جيكوبز، ما يحتاج أقول أنه من أهم عروض نيويورك، لكن الأهم من العروض القليلة اللي قدرت أشوفها، بسبب النت الخايس :S

أول صور للعرض شفتها، كانت صور لقبعة فرو كبيرة كانت موجودة بالعرض، لما شفت العرض ما أعرف ليه حسيت كأنه من فيلم My Fair Lady ... بالمناسبة هذا ثاني فيلم شفته لأودري هابيرون، فله معزة خاصة بقلبي، حتى لو إنه في ناس تطنزوا فيني بعد ما أقترحته عليهم :)

الصورة الأولى من اليمين ما أعرف ليه هي اللي خلتني أحس أنه صدق كأنه ماي فير لايدي، خصوصا و هي شايلة وردة (للي ما يعرف قصة الفيلم، أودري هابيرون كانت فيه تبيع ورد)، مو بس هذا الشيء اللي خلاني أكتب عن العرض، الفستان نفسه (أول واحد من اليمين) عجبني مرة، أتمنى الحين أشوفه على أحد (يمكن كيرستين دونست)، مع إني ما أتذكرها بشيء من مارك جايكوبز. أو زوي سالدانا. اللوك الأول من اليسار، علي طول ذكرني بشكل أودري بالصورة اللي فوق، بالمناسبة عجبتني خطوط الملابس هذي (المنتفخة)، شفتها بأكثر من عرض، بعد عجبني الفستان اللي تحته قميص أبيض، أحس راح نشوفه على أليكسا شونق. اللبس الثاني من اليمين ما يشبه ماي فير لايدي، بس حبيت ألوان التنورة، و بعد عجبني المشبك الكبير، و أهم شيء عجبني بالمجموعة هذي الجزم، أحس ودي لوعندي وحده منها، و أظن إننا بنشوف نسخ رخيصة منها بالهاي ستريت.

 مرة ثانية الفرو، و الخلقنة، و القبعات الكبيرة، و أهم شيء الوردة حسستني إن مارك كان يفكر بماي فير لايدي، لما صمم هذي المجموعة. 

 لو كنتوا مشيكين على المجموعة، وش رأيكم فيها؟

The Backpack

الشنطة اللي ما تخونك بأي مكان (إلا الحفلات :) هي الباك باك ... ما عندي وحده، بس أختي تحبها كثير، و أما أفكر فيها بجدية، الشيء الوحيد اللي يخليني أتراجع عن الفكرة هي إني ما أنزل الشنطة مني طول ما أنا لابستها، بجامعة، أو بسفر، فصعبة شوي إن أجلس و على ظهري باك باك، إلا لو أخترعوا كراسي محدبة :)

من قبل ما أفكر بباك باك، هذا الصيف ذا رو إذا تتذكرون نزلوا خط الشنط حقهم، ذا رو ما يمزحون أبدا، أول ما شفت الشنطة هذي (السوداء اللي على اليسار)  على وحده من الأولسينز عجبتني على طول، لكن يوم شفت كم سعرها، كالعادة كأنه فيه أحد أعطاني كف ... لكن على الأقل هذي بـ 14 ألف، مو اللي جلد تمساح اللي سعرها تقريبا بـ 122 ألف ريال!!!.
الشنطة الثانية من مادويل تلقونها هنا.

الصف الثاني يمكن فيها أكثر ثنتين حبيتهم ... الأولي (السوداء) من مارك باي مارك جايكوب، حبيت هذي الشنطة اللي موجودة عند ساكس، بالسعر اللي تشوفونه، عجبتني مرة، أحسها ظريفة :) 

الثانية يمكن صورتها هنا مو حلوة مرة، لكن شوفوها هنا عند بلومينق ديلز، عجبني لونها، و أهم شيء أحس إنها تضف أشياء كثيرة، فلو كانت عندي ممكن يوم من الأيام ألقى البيت كله فيها، خصوصا و إن الشنطة عندي مستودع، اللي يدخل فيها ما يطلع. 

إذا أنتم ملاحظين، ترتيب الشنط على حسب سعرها، طبعا لو كان الوضع طبيعي، كان ذا رو صارت بتدوينة لحالها، (مو لأنها حلوة، لأنه سعرها غير طبيعي). الشنطتين الأخيرات، أشكالها حلوة، و رخيصة، و تصلح كثير للجامعة.
اللي على اليسار من مودكلوثز، و اللي على اليمين من أوربان أوتفيتير، فيه منها ألوان كثيرة حلوة.

شرايكم بالباك باك، و إذا عندكم وحده مفضلة وش هي؟

Bad Week for Marc Jacobs

الصورة هذي لمارك جايكوبز مالها شغل باللي راح أكتبه، صحيح شكله مبهذل، حتى وهو جمبه شنطته الإيرميس بركين :) و الشيء الثاني إنها من أكثر من سنة. لكني حسيت لو أحد بيصور مارك اليوم، بيكون شكله زي كذا.

الإسبوع اللي فات منع إعلان عطر مارك جايكوب أوه لولا اللي وجهه داكوتا فانينق من بريطانيا، لأنه زي ما تقول الجهة اللي منعته أنه فيه "جنسنة" للأطفال، تبرير منع الإعلان كان طويل، تكلموا عن جلسة داكوتا، طول فستانها، و وجهها اللي شكله طفل، و أهم شيء وضعية القارورة (هنا الإعلان أنتم شوفوا كيف).

الأخبار الشينة، ما وقفت هنا بالنسبة لمارك، أمس طلع خبر أنه مجموعة الربيع 2012 اللي عرضت قبل شهرين بنيويورك، سرقت كاملة بباريس :) خواتي مبسوطات، يقولون أنه شيء "يونس"، أنا مبسوطة و أقول أنه يستاهل، مو لأني ودي أسرق شيء زي كذا، بس أحس المصممين يستاهلون هم و ملابسهم اللي أسعارها مو معقولة. 

إذا كان صحيح المجموعة انسرقت، مو هم اللي طلعوا الخبر (يعني كجزء من الدعاية، لأنه قبل أسبوع طلعت صور لبوتيك سلين بباريس بعد و فيه واحد باخ عليه بالوردي، عن أنه واحد زعلان من أنهم استخدموا القرافيتي بحملتهم الدعائية لخريف 2011، صراحة ما صدقتهم، و أحس إنها دعاية) لكن ما أعرف عن مارك جاكوبز، و لو كان الكلام حقيقي، أعتقد أنه راح تنباع القطع المسروقة على الإنترنت قبل لا تنزل للأسواق بفبراير. 

Last Days of Summer

بدأت أسابيع الموضة لربيع و صيف 2012، زي دايم نيويورك، لندن، ميلانو و باريس ... إن شاء الله راح يكون فيه كلام كثير عن العروض، و أشياء ثانية تجي دايم مع العروض، يعني حفلات، أو سرتيت ستايل للي حاضرين للعروض، أو حتى أي شيء مهم ماله علاقة بالعروض. قبل ما ندخل للعروض، شفت هذي الصورة لداكوتا فانينق قبل يومين و حبيت شكلها فيه، بغض النظر عن تعابير وجهها بهذي الصورة، بالنسبة لي هذي أحسن صورة تطلع اللوك حقها كامل.

Heavy Accessorizing by alorwa featuring a gold plated necklace

Acne cap sleeve t shirt, $120
Skirt, ¥21,000
Marc by Marc Jacobs lace up booties, $350
Cath Kidston flower handbag, $124
Yves Saint Laurent gold plated necklace, $1,595
Yves saint laurent sunglasses, $275

زي دايم كل الأشياء موجودة تحت الصورة، لو أعجبكم شيء منها، لما شفت الشنطة/ الكيسة الفلورال اللي مع داكوتا خلتني أحب اللوك على طول، ما توقعت إلى الآن باحب الفلورال، بس يمكن أكثر شيء عجبني، أنه ملابسها (التنورة و التي) كلها سادة، بعدين أختارت شنطة فلورال. 

باللوك الأصلي داكوتا لابسة عقد بسلسال طويل، و تعليقة مو كبيرة مرة، لكن أنا بغيت شيء أكبر ، و أوضح، و اخترتهذا العقد من إيف سان لوغان، اللي على شكل سلسلة، خصوصا و إني حابة هذي الفترة المجوهرات اللي على شكل سلسلة (أساور و عقود). 

نفس الشيء النظارات هذي اللي شكلها "عيون البسة" (كذا يسمونها، طبعا بعد الترجمة:) كانت عاجبتني من فترة طويلة، و لقيتها فرصة إني أدخلها للوك، خوصا و إني أحس إن التصميم هذا فيه رقي، ما أعرف ليه بس كذا دائما أحسه. 

آخر شيء أخترت هذا البوت، لأنه بخاطري من زمان شيء بناتي مرة، أدخل عليه بوت بدبابيس، و حبال. 

وش رايكم بداكوتا و باللوك الثاني اللي سويته؟

Things to Invest in

كل يوم تقريبا من أسبوع يجيني إيميل من net-a-porter.com يذكروني بتخفيضات نهاية الموسم. بالسنوات اللي فاتت لاحظت أنه بالإنترنت تخفيضات نيت أي بورتيه زي العيد عند الناس الي يحبون الفاشن و الماركات الغالية. 

الصيف اللي فات خربت سيرفرات الموقع تقريبا و أنا أدور على فستان أقدر ألبسه لزواج ولد خالتي، و لا حصلت شيء يناسبني. السنه هذي للحق ما دورت على شيء و لا فكرت، لأني ما أحس أني أبغى أشتري أي شيء منهم. بس فيه أشياء عاجبتني لو قالوا لي خوذي أربع قطع من دون ما تدفعين و لا ريال، باختار هذولي. 

هو صراحة مو هذي الأشياء اللي أختارها، لأن عنوان التدوينة للأشياء اللي ممكن تشترينها بسعر غالي، و لا تطيح موضتها بكرا، و تقريبا تصير "قديمة" و لا تستاهل إنها تنلبس. فيعني من الآخر شيء تقريبا نقدر نقول أنك تستثمرين سعرها. (الأسعار اللي خاطتها فوق كلها بعد التخفيض).

البالطو، ما أعرف الكارديقان الملون هذا من ميسوني عاجبني مرة من العرض، ألوانه مرة حلوة، و أكثر شيء يعجبني بميسوني أن كثير من القطع، مو سهل تعرفين من أي موسم، فهي تقريبا أكثر قطعهم ما تصير "قديمة" أبدا. بصراحة النسخة اللي عاجبتني هي النسخة القصيرة (شوفوها هنا) بس هذي بعد حلوة.

الشيء الثاني اللي أكيد بانصح أي وحدة لو بغت تشتري شيء غالي تشتريه، هو كعب أسود، الكعب الأسود أظن أنه أقدم شيء بالتاريخ، و لا يطلع أبدا من الموضة، و يصلح من ملابس كثيرة (سهرة، و صباح)، الكعب هذا اللي من فونيه، عجبني مرة، خصوصا على عارضة الموقع (شيكوا عليه من الرابط). شكل الجزمة حلو، خصوصا أنه تقليدي تقريبا من قدام، بعدين من ورا جاي بكعب أبيض. 

يقولون الجزم هي الشنط الجديدة، مو يعني أنه يحط فيها شيء، بس تتذكرون قبل 3 سنوات و أكثر كل العالم كانت هابة بالشنط، الوقت هذا جا دور الجزم، علشان كذا أقترحت عليكم أكثر من جزمة. الشبشب هذا من ميو ميو عاجبني مرة، أحسه يجيب الانتعاش، الأهم و اللي أنا أحسه، أنه يتحمل كثير (خصوصا قاعدته خشب)، و يصلح ينلبس مع أشياء كثيرة، من طلعة عادية، لحفلة نهارية بسيطة، و بجو زي جونا تقريبا كل السنة صيف، ما راح أتحسف أجيبه.

آخر شيء الشنطة هذي من مارك جايكوبز، أعتقد أنه هذا الشكل من الشناط (سلسلة، و جلد أسود، و صغيرة) ماراح ينقرض أبدا، و الدليل شنطة شانيل مودموزيل، فإذا كانت شانيل بخاطرك، بس ما تقدرين على سعرها، بالنسبة لي هذي خيار مرة حلو، و عن ذوقي، أشوف إنها أحلى.

آخر شيء، على أنه نيت آي بورتيه ما يبيع أشياء رخيصة، بس الموقع هذا من أسهل المواقع الي تعاملت معها، يغلفون لك الشيء اللي شريتيه مجانا، يوصلون بسرعة، و أهم شيء أنه جدا متعاونين، مرة وصلني منهم عقد مكسور، بدلوه لي بسهولة، و من دون ازعاج. 

PINK: Day & Night

منشغلة الفترة هذي إنس أشوف لي ملابس و أغراض جديدة، أحس من زمان ما شريت لي شيء، و تراي صادقة لما أقول من زمان، يمكن أكثر من 3 شهور، حتى ما أتذكر وش آخر شيء شريته.

من الأشياء اللي ملاحظتها على السلبرتي هذا الصيف، و من الأشياء اللي صايرة تغريني أني أشتري شيء زيها، هو شيء وردي، الصيف هذا كل تقريبا سلبز طلعت بشيء وردي: ناومي واتس، كيت باسورث، كايتي هولمز، ديان كروقر ... و القائمة تطول 

قبل يومين شفت هذي الصورة لسلمى بلير، و عجبني شكلها، مرة، و حمسني أكتب عن الوردي، للي بخاطري من فترة أكتب عنه خصواصا و أنه تقريبا كل مجموعات الريزورت كان فيها وردي. 

من بين كل السليبز اللي لبسوا وردي (أكثرهم أشكالهم حلوة) حبيت إني أحط هنا صورة سلمى، لأني أحب كثير شكل الحوامل المرتبات و النظيفات، و اللي يعرفون كيف تطلع أشكالهم مو كأننا غاصبينهم على الحمل، و يعاقبونا بشكل يجسب سدة النفس.

زي ما قلت لكم أنه مجموعات الريزورت 2012 تقريبا كلها فيها علي الأقل قطعة وردي، و لحد الآن فستانين (أكيد ورديات) من هذي المجموعات أنلبست من سلبز: 

الأول لبسته العارضة بروكلين ديكر للميت قالا من مايكل كورس، حتى قبل لا يطلع المجموعة للعالم، أول ما شفت الفستان حفظته عندي لأني توقعت أنه أحد من السلبرتي بيلبسه، و نبهتني أختي أن بروكلين لبسته و خلصت. 

الفستان الثاني لبسته كايت بسورث من ريتشارد نيكل، الفستان هذا توقعت (إن أخوه) فستان نفسه بالضبط بس بكم، راح ينلبس، بس كايت لبست هذي النسخة بأسرع من ما توقعت. 

زي ما قلت لكم، الوردي كان بكل مكان، و يصلح لكل وقت ملابس صباح، أو ملابس سهرة. 

الصباح:

الملابس من اليسار لليمين: (نرسيسو رودريقز، مارك جايكوبز، سلين). من بين الثلاثة هذي أكثر شيء حبيت بقوة يعني ودي أسرقه الحين، هو البالطو اللي من نرسيسو عجبني بشكل غير طبيعي، لونه، شكله، شكل قماشة كلها تخليه حلو، و أهم شيء أنه مو ثقيل و لا ضيق يعني ممكن ينلبس لأكثر من جو، يعني لو لبستي تحته كل دولابك للجو البارد ما يطلع بايخ و متنفخ، و لو كان الجو "بويرد" ينفع بس تحته ملابس ربيعية خفيفة. 

أتمني أشوفه على أحد، بانبسط بجد أن فيه ناس قدرت هذا الشيء.

عجبني اللوك حق مارك جايكوب بشكل عام، تنورة وردية نفاشة (بناتية مرة) و معها سويتر رمادي (ناضح مرة). نفس الموضوع على سلين أعجبني لوك كامل، و أتوقع إني أشوفه بالضبط على أحد بالشارع أو بأي مكان زي ما هو بحزامه و قميصة و جزمته.

ليل:

من اليسار لليمين: (أوسكار دي لا رينتا، بوتشي، برابال قورنق). من الثلاثة ذولي أكثر شيء عجبني مرة هو اللوك اللي من بوتشي، أعجبتني التنورة الترتر المنفشة، مع التوب الشيفون ... مع أنه أكثر شيء أعجني، و نفس قصة البالطو اللي من نرسيسو ودي أسرقه كامل الحين، بس أعتقد أنه فستان أوسكار و برابال هم اللي راح ينلبسون للريدكاربيت و أحسهم بيطلعون حلوت. بخاطري بجد أشوف بوتشي على أحد، و خصوصا أحد بيلبق عليه هذا اللبس مثل تيلدا سوينتن أو كايت بلانشيت.

It did clash with her hair

ما أعرف ليه مؤخرا أحس إني انبش تنبيش عن شي أكتبه ... :) ما علينا من كثر ما نبشت ضاقت فيني و قلت راح اتكلم عن لوك طلعت فيه كارين إيلسون للي ما يعرفونها هي عارضة بريطانية، ما أعرف و ين كانت رايحة، بس كارين زي كثير من السلبرتيز ما قدروا ينتظرون لآخر الشتاء علشان يشترون من ملابس الربيع حقت 2011، و علشان يعلموننا أنهم مو زينا P:


كارين كانت لابسه من مجموعة مارك جايكوبز الأخيرة فستان أساسا بالعرض كان لونه بنفسجي، ما أعرف وش قردها و خلاها تلبس الأحمر، بس شكلها ما تشوف 30 Rock، للي يشوفون المسلسل بالموسم الرابع جاك دونقي (أليك بولدوين) كان يتكلم عن جوليان مور و اسمها كان نانسي أنها لبست لانجري أحمر فهو جالس يقول لليز لمون: "بتفكرين أنه بيتصادم مع لون شعرها؟ ... بس لا"،

you would think it would clash with her hair ... but it didn't

أعرف بعضكم بيقول وش هالكلام، بس حسيته بالضبط يصلح لكارين بس بالعكس، يعني عليها الأحمر ما مشى مع لون شعرها الأحمر ... هو الفستان من الأساس مو أحسن شي بالمجموعة بالنسبة لي، بس فكرة أحمر على أحمر ما عجبتني أبدا، أتوقع أنها بتصير أحلى بكثير ببنفسجي، يعني يطلع فيه تباين باللوك ... أما الجزم حسيتها جايبتها من محل لانجري مع الريش الي عليها ... من بين كل الأحمر الي هي مختارته أظن الشنطة هي الشي الوحيد الي كان أختيار صحيح.


هذي هدية لكم جلست عليها من قمت الصباح أحاول أسويها، و يالله طلعت معي بالحجم الصغير هذا. جيف لجاك دوناقي (إليك بولدوين) و جوليان مور (نانسي دونفان) من الحلقة الي قلت لكم عنها قبل ... :) مناسبة الهدية أنه هذا إن شاء الله الويك إيند الأخير قبل الإجازة.

Layering

من زمان (يعني مو مره) بس كنت أحب هذا الشي، إني ألبس قطع كثير على بعض، أما الحين فأسلوبي باللبس ما قل و دل :) ... المهم الي بأقوله أنه هذا كا يعني إني ما أحب اللبس الطبقات لا أحبه خصوصا للبس الشتاء (أعرف إني غثيتكم بالشتاء و هو و لا حتى شمينا ريحته، بس وش أسوي كل المواقع و كل شي صار عن الخريف و الشتاء) طيب خلونا نرجع على اللبس نفسه ... اللبس الطبقات زي ما قلت لكم حلو للشتاء ما أعرف ليه، بس يعطيني شعور دفا، غير كذا، تغطي بشي علي شي ...

باللبس الي فوق لو كبرتوا الصورة بتلاحظون أنه أنا الي مركبة كل شي على بعض ... أساسا هم العارضات من عرض دولتشي آن قابانا للخريف بس جيت و لبستهم هذي الملابس عشانهم متفسخات قليلات الأدب P: لا بجد لأنه المايك آب من زمان عاجبني، و لأنهم لابسين بس بودي سوت فسهل إني أحط عليهم شي ثاني :)

كل اللكوين (يصلح كذا؟) يعني أزعم أنه ما فيه أحد يقرأ لي يقدر عليهم بس يعني هي الواحد هذي فرصته، أنه يتخيل من بعيد لبعيد .. :) هم كلهم أخذت قطعة من هذا اللوك لمارك جايكوب لمجموعة الخريف، طبعا قلت لكم قبل إني حابة هذا اللوك مرة، و لا عندي مانع آخذه بالضبط زي ما هو من فوق لتحت :) يعني لو مارك يقرأ ودي يتطمن ....

نبدأ من اليمين ... اليمن أخذت من اللوك حق مارك السويتير هذي، قلت لكم عجبتني مره كلاس، ألوانها حلوة، فتحة الرقبة جميلة ... و أهم شي إنها متمططة من تحت (لو كان عندي سويتير قديم كان خربتها بالموية و خليتها كذا، شكلي بافتش عند أمي)

بحياتي ما قد لبست تنورتين فوق بعض ... بس شكلي مستقبلا راح أفكر ... التنورة التحتية الدانتيل من بوربري برورزم ... التنورة حلوة، حلو يلبس معاها هوت بانت (لو أمك ما تهاوش) أو حتى ليقنق ... بس أنا فكرت إني أحطها تحت هذي التنورة الإرديم الي ما أقول إلا حسبي الله و نعم الوكيل ... طبعا الجزم و الشربات و الشنطة من دولتشي آن قابانا.

اليسار أخترت له من مارك التنورة ، لأنه ببساطة تجنن، مع التنورة فكرت له هذي البلوز من إيف سان لوغان ... نفس الشي شكلها و لونها و فتحتة الرقبة عاجبتني فوقها حطيت هذا الكارديقان الي من ميزوني (يالله الجنة بس) و كملت اللوك بالجزم الليبورد من كغيستيان لوبتين ...

إن شاء الله عجبتكم الطبقات ... و إن كان ممكن تلبسون زي كذا (طبعا مو زي الماركات بس فكرة الطبقات أو لا) :)

Red Striped = Summer

Sun & Sand by alorwa featuring Calypso

الأحمر المقلم يمكن من أقدم أقمشة الصيف، هذا الي عجبني بلوك شارليز ثيرون، الأشياء الي حبيت أسويها أني أفتح لون البنطلون لأن الرصاصي شوي غامق على الصيف، فاخترت رمادي، و بعد ما حبيت أن البنطلون يكون سبور، فاخترت له هذا القماش الخفيف و واسع. لأن الأحمر المقلم كلاسيكي بغيت ادخل عليه لون كلاسيكي مثل الذهبي، و نظاره كلاسيكية، طبعا اخترت فلات ما اخترت شبشب، مع أنه ممكن يكون انسب للشاطي، بغيته يكون للصيف مو للشاطي بس، يعني ممكن تلبسه بأي مكان بشارع، بحديقه، على البحر ...

ا خترت عقد اسود، عشان يصير كاجول أكثر ما بغيت يكون العقد ذهبي بيعقد اللوك شوي، أما التوت الحمراء من مارك جايكوب، فحسيت أن ما اختيرت للبس صيفي كذا، فماراح تقدرين تلبسينها مع زي شي ثاني

My Gift For You ..

صديقتي بتتزوج، و لما قلت لها وش تبغى هدية عطتني قائمة بالأشياء الي ممكن أجيبها لها هدية، جزم كرستيان لوبتين p: شنطة من أي ليبل، نظارات شمسية، مجوهرات، و بالطو تلبسه لما تسافر ..

طبعا جلست أدور بكل الأشياء الي قالت لي عنها، حتى لو ماكنت أقدر أجيبها D: .. وكن أفكر بين ستايلين يلبقون عليها:

الأول كلاس مرة، و أعرف أنها تحب الكلاس تحب تكون كأنها غرايس كللي أو بنتها كارولين دو مناكو ..

النظارات : بلانسياقا
الجزم: غوتشي
الشنطة: إيرمس (فينتاج)
البالطو: 3.1 Phillip Lim
الحلق: فينتاج

الثاني شوي كونتيمبروري ، و نفس الشي تحب هذا الشكل بعد..

الشنطة: مارك جايكوب
السوارة: فينتاج
البالطو:Ports 1961 Long
الجزمة:

ترا و الله ما يغلن كل الثنتين (لو عندي فلوس) p: