Best of LFWFW 2015 (Back to Black)

ما أظن أسبوع لندن كان زي أسبوع نيويورك، لكن أعتقد بشكل عام العروض كانت كويسة، و الأهم إن مجموع العروض بلندن أقل بكثير من نيويورك، فأكيد الأشياء الحلوة بتكون أقل. الشيء الغريب بالنسبة لي كمية الفساتين السوداء الحلوة بالعروض، لدرجة أضطريت أحطها لحالها، لأنه حرام ما أتكلم عنها، و بعد حرام الفساتين و الملابس الملونة ما تآخذ مساحة هنا. 

ببدأ بالسوداء، بعدين بأرجع و أتكلم عن الملونة، أعرف إن الفساتين السوداء مو مفضلة عند كثير، أتذكر مدرسة التفصيل مرة سألتني عن ألوان ملابس السهرة اللي عندي و قتها كان كل اللي عندي فستانين، و كلهم أسود. أتذكر هاوشتني و أعطت محاضرة عن إننا صغار و لازم نلبس ملون. ما أتكلم كثير عن الملابس السوداء هنا مو لأني تعقدت من كلام المدرسة، لأني إلي الآن، أعتقد أسهل شيء إنك تطلع حلو بالأسود، اسألوا جنيفير أنيستون. و بعد إنك تسوي فستان أنيق أسود. 

هذا ما يعني أنه أبدا ما فيه فساتين مميزة لونها أسود (إذا تتذكرون فستان أنجلينا جولي الأسود من أتلييه فيرساتشي). المهم هنا أحسن الملابس السوداء عندي من لندن: أولا خلونا نتكلم عن كمية الفخامة بالتيور (القطعتين جاكيت و تنورة، الثاني من اليسار فوق) فوق من روكزندا، عجبني مرة طابع الثلاثينيات فيه،  ما ببالي أحد يلبسه بهذا الشكل، بس أحس ممكن يطلع حلو على بيونسية. أعجبني بعد الفستان (الأول من اليمين تحت) من هاوس أوف هولاند، أحسه بيكون حلو على أليكسا شونق، بعد مرة أعجبني القطعتين (تحت الثاني من اليسار) من دايفيد كوما، أحسه بيكون حلو على أيميلي بلونت. 

أول شيء خليني أقول إني كنت حاطة بالملف فستان من جوليان مكدانولد، و قبل ما أكمل كتابة الموضوع طلعت تايلور سويفت و لبسته، صراحة توقعته يلبس بس مو من تايلور، شوفوا الصورة هنا. أعجبني مرة الفستان الأحمر (فوق الثاني من اليمين) من أنتطونيو بيراردي، أحس ممكن ناومي واتس بتلبسه، ودي لوبيتا تلبس اللبس الملون من جونثان سانودرز (فوق الأول من اليسار). أعرف الجاكيتات مو شيء مهم على الريدكاربيت، بس أعجبني مرة البالطو من إيرديم، أعجبني كيف التدرج مو بس بالألوان، لكن بالأقمشة، من صوف، لشيء حرير أو ستان (ما أعرف وش القماش هنا). التنورة و الكنزة اللي تحت من برين مرة أعجبتني، أحس ممكن تكون حلوة على كلوي مورتيز. بعد عجبني اللوك اللي فوقه من ماثيو ويليمسون، أعرف إن شكله ممكن يكون قديم (أول الألفية) بس عجبني، ما أتذكر إني قد شفت بوبي دوليفان بماثيو وليمسون، بس أحس هذا بيكون حلو عليها. 

أنتم وش رأيكم بلندن لو كنتوا متابعين؟ و بالفساتين السوداء؟ 

The Amazing Emma (Again)

قلت لكم إني راح أحاول أكتب عن إيما ستون بالجولة الترويجية لفيلم The Amazing Spiderman 2. صراحة ما أعرف الجولة خلصت أو لا، بس أعتقد إنها خلصت، لأنه آخر طلعه شفتها إيما كانت بالميت قالا، و طبعا الميت قالا مالها علاقة بالترويج للفيلم، حاولت أدور بالنت إذا لسا باقي شيء بالجولة، بس ما حصلت شيء، علشان كذا بأقرر أنه الجولة انتهت P:. 

إذا تتذكرون تكلمت عن إيما بجولتها للجزء الأول من The Amazing Spiderman، و بعد حطيت لبسها اللي لبسته لبريمير الفيلم الثاني بلندن لأحسن لبس لشهر أبريل (هنا الموضوع، لو ما كنتوا صوتوا إلى الآن). صراحة مستوى إيما ما كان أقل من الجولة اللي فاتت، يمكن الشيء الوحيد اللي تغير (أكيد غير الملابس) هو لون شعرها، من أشقر لأحمر. بالمناسبة وش تفضلون؟ إيما بالأحمر أو بالأشقر؟ للي ما يعرف إيما أساسا شقراء مو جينجير/ صهباء. بالنسبة لي مرات أحس إني أحبها أكثر أحمر، و مرات أحس الأشقر ما ينمل منه، بس الأحمر يمل. ما علينا خلونا نتكلم عن الملابس.

أولا خلونا نتكلم عن الأحمر، مو قلت لكم بموضوع الفساتين الحمراء هنا، أنه فيه موضوع ثاني بيكون فيه أحمر، هذا هو الموضوع. لما شفت إيما بهذا الفستان الڤالنتينو احترت أختاره هو أو الأصفر الاتلييه ڤيرساتشي لأحسن لبس لشهر أبريل، لكن أخيرا قررت إني أختار الأتلييه، لأني أعتقد أنه مو كثير نشوف لبس بهذي الفخامة. بس من جد هذا اللبس من أحسن الفساتين الحمراء اللي شفتها مؤخرا. 

لوك ثاني عجبني بعد، الفستان الأسود من چوتشي عند جيمي فالون، أعجبني مرة إن الفستان من قدام شكله عادي، بس من جمب يطلع مختلف مع الفتحة (الجزء الأسود جزء من الفستان مو برا)، على الأقل كذا كان بالرانواي. (لاحظتوا إني أحب إيما بالقصير أكثر؟) ما أعرف أحسها تكون مرتاحة أكثر. باقي الملابس من فوق يمين (ڤالنتينو (غير الأحمر)، إيرديم، ڤالنتينو (ثاني)). تحت من اليمين بعد چوتشي: (برادا، شانيل). 

أنتم وش رأيكم بشكل إيما بجولتها لفيلمها الأخير؟ أنا شخصيا دايم أنبسط على حضورها، أحسه حلو من دون تكلف. 

True Romance

اليوم الأسماء الكبيرة بأسبوع لندن كلها عرضت من بوربري لكاين و حتى أنتظونيو بيراردي، العرض المفضل بالنسبة لي كان إيرديم، ما أتذكر متى آخر مرة حبيت عرض لإيرديم، لفترة حسيته يدور بنفس الدائرة، و أكثر ملابسه حلوة، بس مو مميزة. 

صراحة ما أعتقد بنشوف كثير من العرض هذا على الريدكاربيت بس أشوف أشياء كثيرة منه تصلح لأليكسا شونق، و عندي أحساس أنه (بحسب ثيم الميت قالا) بنشوف ملابس منه بالميت قالا. أعجبتني البالطوات بذات الأسود، الأبيض أتمنى أشوفه على أحد أبغى أشوف كيف بينسق الملابس معه (بشكل عام مو كل جاكيت/بالطو كمه قصير يعجبني تنسيق الملابس معه)، بعد عندي أحساس بنشوف نسخ منه بالهاي ستريت. الفستان الأزرق هو أكثر قطعة بالعرض متحمسة أشوفه على الريد كاربيت من لوبيتا نايونقو أو فلاستني جونز أو حتى أليكسا شونق. 

Red Carpet Worthy: London Edition

أمس خلص أسبوع لندن للموضة، يمكن العرض الوحيد المهم بالنسبة لي هو عرض ميديم كيرشوف، أعجبتني المجموعة، بالذات الشنط، بس ما شفت شيء ممكت أتكلم عنه هنا. أو يمكن ما كنت متحمسة أكتب عن أي شيء، لأن أغلب وقتي أمس ما كنت عند الكمبيوتر. ما علينا، خلونا نحط الملابس اللي أعتقد إنها تستاهل الريد كاربيت من أسبوع لندن. 

من اليمين العروض ل: إيرديم، لورين سكوت، برين و هاوس أوف هولاند

ما أقدر أقولكم قد إيش عاجبني الفستان البنفسجي من هاوس أوف هولاند، أتمنى بجد أشوف على الريد كاربيت (سيينا ميلر مثلا) عرض هاوس أوف هولاند عجبني بشكل عام، أعتقد أنه أحسن من مجموعة الخريف، أتمنى أشوفه بهوليوود أكثر، لأني ما أشوف إلا البريطانيين يلبسون له. أعجبني بعد عرض إيرديم، اخترت هذا الفستان ما أدري جمب سوت أعتقد بنشوفها على الريدكاربيت يمكن بوبي دولفين. لورين سكوت كان عرضها بتأثير آسيوي شرقي واضح، أحس بنشوف هذا اللبس على الريدكاربيت (أعتقد معدل) يمكن على نيكول كيدمان، لأن لورين سكوت هي ستايلست نيكول. 

من اليمين: تمبرلي لندن، بيتير بلوتو، ماريوس شواب و كريستوفر كاين

تمبرلي لندن له حضور مو قليل على الريد كاربيت، كانت بهذي المجموعة فيه أكثر من لبس عليها طبعات الحيوانات هذي، حبيت إنها حاطتها هنا مع طبعات زهور، أتمنى أشوف كيري واشنطون بهذا اللبس من بيتير بلوتو، أعتقد بنشوف ملابسهم أكثر خصوصا مع تعاونهم مع تارقيت (قصدي يمكن بحفلة إطلاق المجموعة). الفستان اللي من كريستفور باختصار لو ما شفت أحد لابسه بأموت، لأنهم أغبياء يشوفون فستان زي كذا و الأغلب أنهم يقدرون عليه، و لا يلبسونه (قصدي السلبيرتي). 

إذا كنتوا تابعتوا عروض لندن، وش أكثر شيء عجبكم؟ 

K^3

أعرف إن العنوان بايخ، بس لما جيت أحفظ الصورة، و بالعادة أحفظ الصور على أول حرف من أسم الشيء اللي موجود بالصورة، فاكتشفت أنهم كلهم أساميهم تبدأ بحرف K. ما علينا الموضوع ماله شغل بأساميهم، بس أنه الشيء اللي يشترك فيه هذولي الثلاثة، إني ما أحبهم :). 

 زي ما قلت لكم صحيح إني ما أحب الثلاثة بدرجات مختلفة، و بعد لأسباب مختلفة (ما يهم إني أشرحها هنا) لكن للحق (و علشان تعرفون إني موضوعية، و لا تعميني المشاعر P:) أعتفد أنهم أكثر ثلاثة أشكالهم أو على الأقل (لوك واحد) لهم أعجبني بالفترة الأخيرة. 

كيرستين ستيوارت صايرة بكل مكان لأنها تروج لفيلمين لها On The Road و أعتقد آخر حلقة من Tewlight (وش أسوي ما أحب الفيلم). المهم إن كريستين طلعت بأكثر من لوك عجبني هذا البلانسياقا واحد منهم، أعجبني كل شيء باللوك من الأكسسوار للمكياج (المكياج مرة حلو) و أصلا قلت لكم قبل إن المجموعة الأخيرة لبلانسياقا كانت عاجبتني مرة، و يمكن أكثر شيئ حبيته إنه و أخيرا ابتسمت :). 

اللوك الثاني من كيرا نايتلي اللي رجعت تروج لفيلم آنا كارنينا، هذي المرة بأمريكا (الفترة اللي فاتت كانت ببريطانيا). و طلعت بهذا الفستان (اللي أعتقد أنه بس مصمم لها) من إيرديم بعد مجموعة ربيع 2013 الأخيرة (فيه فستان يشبه له بالمجموعة). عجبني لونه مع إني ما قد تحمست لهذا اللون على فساتين سهرة، أعجبتني النقشات، و أعجبني بعد شعرها، و أهم شيء لون الروج اللي أعتقد أنه عاطي حياة للبس.

آخر وحدة هي كايت موس. صراحة ما أعرف متى آخر مرة كان شكل كايت موس محترم (حتى بزواجها كان شكلها تعبان) بس بحفل توقيع كتاب لها جت بهذا الفستان من بعد مجموعة مارك جايكوبز الأخيرة. كل شيء فيها أحسه "طازج" أعجبني إن مكياجها ما كأنه مكياج (طبعات اللابورد كثير مرات تصير رخيصة) و مع مكياج ثقيل أحس إني على طول يجي ببالي بأحسن الأحوال الكرداشيانز (أعتذر للي يحبهم) بس أشكالهم بالنسبة لي دايم رخيصة :). 

المهم ما فيه شيء ثاني أقوله لكم، إلا إني أوصل لكم رسالة إني أقدر أقول كلام زين عن أحد ما أحبه P:. أنتم شرايكم بالثلاثة؟ بهذي الملابس و بشكل عام. 

* عدلت العنوان اللي كان عبارة عن 3 حرف K جمب بعض، لأني تذكرت أنه الاختصار هذا هو اختصار لمنظمة إرهابية أمريكية مسيحية عنصرية (لو متحمسين تعرفون عنها تلقون هنا كلام أكثر عن المنظمة). 

Pastel/Neon

مثل ما أنتم شايفين من التدوينة اللي قبل هذي، إن أسبوع لندن للموضة بدأ، تقريبا من ثلاثة أيام أو أكثر قلت لكم إلى الآن مو مستوعبة أكثر العروض، شيء يحسسني الخريف، وشيء يحسسني إني شفته من قبل، وشيء ثالث يحسسني أنه الملابس ما كأنها ملابسهم، كأنها من عروض ماركة ثانية. ما علينا، قبل عرض ميديم كيرشوف يمكن بيوم كان فيه كالعادة مجموعة عروض من بينها كان فيه إيرديم. على أنه كثير عروض كانت رايحة لألوان أقوى أو من دون ألوان (إذا اعتبرنا الأسود و الأبيض مو ألوان) إيرديم كانت مجموعته نيون (فسفورية)، بس شوي باستيل (ما أعرف كيف آصفة) لكنها أعجبتني. 

بداية الأسبوع هذا مريت على سيفورا (زيارة روحية) معناها إني ما ببالي شيء أشتريه، بس أمتع نفسي بالمكياج و مستحضرات التجميل :). المهم كان بالفرع فيه ستاند كامل للمناكير، لفت نظري ألوان الصف الأول منها لما قربت طلعت إيلاماسكا (ما أتذكر إنها موجودة بالسعودية، بس لو حصلتوا عليها شيكوا على المناكير). بجد ما عمري شفت ألوان زي كذا كانت فسفورية بشكل غير طبيعي، حتى لما رجعت وشفت صور لها بالنت، ما لقيت صور تعطيها حقها.رغم إني للمرة المليون أقول لكم إني ما أشتري مناكير، لأني أساسا ما أحطها، أظن هذي المناكير أغرتني، و أحس من دون وعي (يمكن و أنا نايمة، بامشي لسيفورا و أشتري واحد منهم).  المهم سعر القارورة 14 دولار تقريبا 50 ريال يعني بسعر أنقلوت. هنا تلقون فيديو عنه شوفوا كيف ألوانه وشكله. و هنا باقي مجموعة إيرديم ربيع 2013.

طبعا وش العلاقة بين إيرديم و إلاماسكا، ما فيه علاقة بس كلهم ألوانهم فسفورية حلوة :). 

شرايكم بالألوان الفسفورية؟ متحمسين تشوفونها بصيف ثاني أو طفشتوا منها؟

A New Beginning

قبل سنوات كانت لندسي لوهان هي الشخص اللي أتمنى لو أصير زيه :)، أتذكر إني لما شفت بوستر و صور مين قيرلز عجزت أوقف بحث عن صور لها بالفيلم، و برا الفيلم، تمنيت  لو أقدر أشوف الفيلم، لكن ما شفت الفيلم إلا بعد سنوات على 4. بس وقتها طفشت من لندسي و مشاكلها. 

من فترة و قصص لندسي كلها عن إنها دخلت السجن، أو لقوا معاها مخدرات، أو إنها بالمحكمة. باختصار ما فيه شيء يخليني أتمنى إني أصير أي شيء يشبه لها. 

غير مشاكلها، ما أتذكر إني مرة حبيت ستايل لندسي، يمكن أكثر شيء كان ينرفزني فيها (من ناحية ستايلها قصدي)، إن شعرها دائما كان طوله، أو قصته أو لونه مرة شينات. 

قبل فترة قصيرة (مو متأكدة لأني مو مهتمة)، المحكمة قالت إن لندسي "عاقلة"، لأنهم سوو لها أكثر من أختبار لكشف المخدرات و طلعت النتائج سلبية. قبلها قدمت لندسي برنامج SNL، و قالت إنها ترجت مدير القناة علشان يسمح لها تطلع علشان تحسن صورتها. بعدها أي بعد القرار حق المحكمة، شفت لندسي بشعر أحمر من فترة طويلة ما أنبسطت على شيء سوته لندسي قد إني أشوفها بشعر أحمر، مو لأني أحب الشعر الأحمر، لكن لأنه هو اللون الأصلي لشعرها. 

اليوم و أنا جالسة أشوف صور بعض المشاهير بكوتشيلا (أعتقد أنه خلص أمس)، شفت الصورة هذي لندسي، و ما أعرف ليه أنبسطت إني شفت شكلها زاين، مع أني من فترة طويلة ما تمنيت لها خير، لأني ما كنت أشوف إنها تستاهل أحد يهتم فيها، و هي أصلا ما أهتمت بنفسها، علشان كذا فكرت بهذا الموضوع عن بداية جديدة للندسي، تلبس فيه لبس محترم، و تبطل عن الشكل الرخيص اللي كانت عليه. 

(من اليمين: بالمان، جامباتيستا فالي، إيف سان لوغان، إيرديم)

رحت أشوف لندسي ملابس بمجموعات خريف 2012 اللي أعجبتني بس ما تكلمت عنها، كان أول شيء جاء ببالي مجموعة بالمان، أعجبتني المجموعة مرة مع مصممها الجديد أوليفية روستينق، و أتمنى لو لندسي بتتعدل صدق، إنها تطلع بهذا اللوك. الشيء الثاني هذا الفستان من جامباتيستا فالي، الشيء اللي أتمناه أنه بالفترة الجاية ما أشوف لندسي أبدا بفستان طويل، خصوصا بعض خياراتها السابقة كانت سيئة جدا. الشيء اللي بعد أتمناه بأختياراتها للفساتين إنها أبدا ما تلبس ملابس واسعة، على الأقل الفترة هذي، ما أعرف ليه أحس جسمها مترهل، و الملابس الضيقة بتعطيه شكل. آخر شيئ شفت صور لها بالمحكمة و كانت لابسة بدلة أعجبني شكل لندسي بالبدلة، البنطلون طالع عليها حلو خصوصا إنها مو قصيرة، الشيء اللي بعد أتمنى ما أشوفه من لندسي، إنها أبدا أبدا ما تطلع صدرها لأن شكله جدا سيء، كأنه صدر وحده عمرها 60 مو 26. 

Clash of Prints

من فترة طويلة ما حسيت إني شفت إيديتوريال مفيد، يعني فيه صور و أفكار حلوة، بس ما فيه أفكار حلوة للملابس، كل اللي أشوفه ملابس نفسها تنعاد بخلفيات مختلفة.

قبل أسبوع تقريبا شفت سكان، ما كان مرة واضح لإيديتوريال من عدد فوق يو إس لشهر مارس الجاي. عجبني مرة الإيديتوريال. مو لأن الصور فيه حلوة، لكن حبيت الملابس فيه مرة. ما أعرف كم مرة قلت فترة عروض ملابس صيف 2012 بسبتمبر اللي فات، إن الطبعات كانت موجودة بكل مكان، بكل الأشكال، و الأحجام و الألوان. لكن ما جاببالي أنه ممكن أحد يلبس طبعات بهذي الكثرة و إنها ممكن تطلع حلوة. حبيت كيف منسقين الملابس بهذا الإيديتوريال، خصوصا بهذي الصورتين (تلقون باقي الإيديتوريال هنا). عجبني مرة شكل كارا دوليفين بهذي البدلة من مجموعة ربيع 2012 ماري كاترنتزو. أكثر شيء عجبني بالإيدتوريال هذا كأنه يقولك خلط كل الطبعات اللي عندك مع بعض و لا تخافين إنها بتكون مبالغة، أو بتصير غلط على بعض.

الإيديتوريال مليان طبعات من كل الألوان كل شيء مخلط مع كل شيء، أعجبتني الألوان الصارخة (زي اللي على كارا مرة ثانية). و عجبتني الألوان الفاتحة مرة زي اللي على كارا (تحت)، و على سن فيفي (يمين تحت)، و طبعا التيور اللي بعده اللي من دريس فان نوتين (قد تكلمت لكم عنه قبل). من أحسن القطع بكل الإيديتوريال بالنسبة لي كانت الكعب الإيرديم، اللي لابستها العارضات (تحت). 

ما أعرف مين يقدر يلبس كل هذي الطبعات و يطلع شكله حلو و لا هو مكركب (غير الموديلز طبعا :)، يعني أحس أنه شيء ماله قوانين يعتمد على حدسك أنت، لكن يمكن الشيء الوحيد اللي أعتقد أنه لازم لازم تسوينه لو لبست لبس كله طبعات، أنه شعرك و مكياجك يكون أبسط شيء ممكن تسوينه، أو بيصير شكلك شوي مهرج D: 

 شرايكم بلبس طبعات على طبعات؟

Best Dressed: January '12

السنة اللي فاتت 2011 قررت إني أسجل عندي أي لوك عجبني، علشان نهاية السنة أحط قائمة لأفضل الملابس و لا أنسى شيء ... بالآخر طلعت بمجموعة كبيرة مرة، و بطلت أكتب لأني عجزت أقلص القائمة.السنة هذي سويت نفس الشيء، لكن قبل يومين قررت بدل ما أجمعها كلها للأخير، و أبطل زي السنة اللي فاتت، قلت أحط استفتاء لكم كل شهر أنتم تقررون وش أحسن لبس لهذا الشهر، خصوصا يناير ما خلص.

إيل فانينق برودارتي:

فستان عباد الشمس كان عاجبني مرة من العرض، توقعت كريتسن دونست تلبسه، لكن إيل هي اللي لبسته، و طلعت بشعر مرة حلو، و وجه فريش.

كيري موليقان بلانفين:

للأسف ما فيه صور كثيرة لكيري بهذا الفستان، لكن فيه فيديو لها، يوريك قد إيش كان شكلها حلو، الفستان شكله غير الأشياء اللي بالعادة تلبسها كيري، أهم شيء عجبني كيف متموج.

روني مارا بفالنتينو:

تلكمت عن هذا اللوك قبل، بالنسبة لي ما زال أحسن لبس طلعت فيه روني، و هو أكثر لبس ملون لبسته لحد الآن.

رامولا قاراي بأليساندرا ريتش:

قلت قبل إن أليساندرا ريتش صايرة فساتينها مفضلة على الريد كاربيت. ما ألوم اللي يلبسها بأغلب الحالات طلعت أشكالهم حلوة، رامولا مو استثناء، لون لافستان مناسب لون بشرتها ... و شكله طالع حلو على جسمها.

تيلدا سوينتين بحيدر أكيرمان:
هذا اللوك بالنسبة لي كان من أحسن الأشياء اللي لبستها تيلدا سوينتين، لونه علي بشرتها مرة حلو، ذكرني بفستان من جان بول قوتييه تقريبا بنفس اللون لبسته كايت بلانشيت بعد لقولدين قلوب 2005.

كايت بوسورث بأنتطونيو بيراردي:
كل شيء بهذا اللوك يخليني أختاره، أولا الفستان، ثانيا الشعر (عجبني أنه مشدود على ورا)، أكثر شيء عجبني أنه كل شيء أحمر بهذا اللوك من الفستان للروج، و آخر شيء الجزم.

دايان كروقر بإرديم:
كثير أقول صعبة على ديان إنها تطلع بشكل مو حلو ... الفستان هذا من أكثر الأشياء اللي أعجبتني بعرض إرديم، لكن بالنسبة لي دايان حلته أكثر خصوصا مع شعرها، و كيف ماسك على جسمها.

روز بيرن بإيلي صعب:
تكلمت عن روز بالبوست اللي قبل هذا، عن أحسن ملابس جوائز ساق ... رجعت أكثر من مرة أشوف اللي جوا، و ما زلت أظن أنه روز كانت من أحسن من لبس بالجوائز، و بكل شهر يناير.

Wearing Collage

بعروض الربيع اللي كانت بالخريف اللي فات، كالعادة كان بعرض كريستوفر كاين بلندن شيء مختلف، و هي ملابس شيفون أو أورقانزا، عليها ورود، مو مطبوعة عليها، كأنها مقصصة من قماش ثاني و محطوطة عليها. أكيد أعجبتني، لكن ما توقعت أنه بتكون بمكان ثاني غير بملابس كريستوفر كاين. 

نهاية الإسبوع اللي فات طلع اللوك بوك لعروض بري فول 2012 إيرديم. العرض بالنسبة لي ما كان مميز، مثل دايم مليان طبعات ... لكن و أنا جالسة أتفرج تقريبا من آخر الأشياء اللي كانت باللوك بوك، هو هذي التنورة الرمادية اللي على اليمين. أعجبتني مرة التنورة، و تذكرت عرض كريستوفر كاين اللي قلت لكم عنه (على اليمين وحده من الملابس اللي كانت عليها ورود). 

أعجبتني الفكرة بكل المرتين مرة، يمكن حبيت ألوان كريستوفر كاين أكثر، لكن عجبتني تنورة إيرديم. الشيء اللي أتمناه الحين، بعد ما شفنا أحد غير كاين مسوي هذا الشيء، هل ممكن نشوف هذي الأشياء إن شاء الله بمحلات الهاي ستريت؟ إن كان فيه محل راح يسويها أرشح توب شوب. 

The few pieces aren't for the duchess

توقعت إمي ماراح أكتب عن لندن، بس توي أشيك على مجموعة إيرديم، خصوصا إني إلى الآن ما شفت شيء مميز من ميلانو، بصراحة المجموعة مو سيئة، لكن أعتقد لو إيرديم كان مصمم كايت ميدلتون كنت راح أحبها، لكنه مصمم يشتري له كل الناس، فما أعرف على أي أساس يصمم مجموعة كاملة، تقريبا كل القطع مسوية علشان تلبسها كايت. 

كايت لبست لإيرديم مرتين كلها بكندا لما راحت لها بالصيف، لكن هذا ما يعني أنه إيرديم صار لكايت ميديلتون، صحيح أنا توقعت أنه راح تطلع ملابس تصلح لكايت خصوصا من إيسا لأنها لبست لها كثير، واحد منهم فستان الخطوبة الأزرق، لكن مو من إيرديم. 

صراحة ما أفهم طيران الناس بكايت ميديلتون، يعني لما كانت بنت عادية تتزوج أمير فهمنا الموضوع، لكن أنه يجلسون الناس يقولون لي أنه لبسها رهيب، مانيب مقتنعة، ممكن يعجب أذواق، لكن بالنسبة لي لبسها ممل جدا، و لا أنتظر منها إنها تونسني، فيه ناس كثير بالعالم يقومون بهذا الدور، و بعد ما أنتظر منها إنها تصير ديانا ثانية، علشان كذا أعتقد أنه "يغصب" الناس على أنهم يحبون ذوقها موضوع سخيف جدا. 

قلت لكم العرض مو سيء، بس رغم إني ما ألبس من إيرديم (لأن ما عندي فلوس:)، ما أبغس أشتري شيء فوق 800 جنيه علشان أطلع زي كايت، أروح أشتري من زارا أو مانقو أوي أي شيء ثاني لو بغيت أكون زيها، علشان كذا أظن أنه القطع اللي صدق كانت حلوة (من وجهة نظري) هي القطع القليلة اللي أعتقد أنه مستحيل كايت ميدلتون تلبسها. (هنا باقي المجموعة). 

شرايكم بالمجموعة؟ و ستايل كايت ميدلتون، تعجبكم، أو تطفشون منها زيي؟

PP: Printed Pants

من أهم موضات الخريف الجاي، اللي انتبهت لها كانت البناطيل المنقشة، الشيء هذا كان عاجبني من فترة، حتى أنه زارا كان عندهم بنطلون حرير مطبع عليه، فيه منه برتقالي و أخضر، كان عاجبني مرة، دورت بكل فرع أقدر أروح له علشان ألقى مقاسي، و يوم أخيرا لقيته و شريته ما أعجبني شكله علي، و رجعته، بس إلى الآن عاجبتني الفكرة. 

زي ما قلت لكم البناطيل المنقش عليها أو المطبع عليها كانت بعروض كثيرة، علشان كذا سويت من نفسي تقسيمات لها، على حسب شكل النقشات اللي عليها. 

(يسار: دولتشي آن قابانا، بروينزا سكولير، فيرسيس). أعتقد أنه النجوم مع مجموعة دولتشي آن قابانا للخريف هذا، صارت بكل مكان، حتى كان فيه أكثر من محل هاي ستريت (زارا مثال) كان عندهم شيء عليه نجمات. بروينزا سكولير عرضهم كان مليان بالنقشات الهندية الحمراء، و اللي كلها أشكال هندسية، و هذا البنطلون واحد من بناطيل كثيرة بالعرض كان عليه هذي النفشات. بنطلون فيرسيس (يمين) عاجبني مرة، يمكن من زكثر الأنواع اللي عجبتني من هذي البناطيل هي البناطيل اللي قماشها واقف (كأنه تافتا)، و فيه أشياء تلمع. 

المجموعة هذي هي مجموعة البناطيل بنقشات الورود (يسار: جيل ساندير، ماري كاترنتزو و روشا). بالنسبة لي أشوف أنه الورود بكل وقت تفتح النفس، مو لازم تكون ملابس الربيع أو الصيف، أعجبتني الورود مع الألوان الغامقة (جيل ساندير و روشا)، بعد أعجبني مرة البنطلون اللي من ماري كاترنتزو على أنه ألوانه فاتحة، لكن لون الورود و قماشة، تمشي مرة مع ألوان الشتاء.

المجموعة الأخيرة ما أعرف نقشاتها تدخل تحت أي تصنيف، علشان كذا حطيتها بمجموعة وحدة :). (اليسار: إيرديم، روبيرتو كافلالي و جان بول قوتييه). 

ما عندي تعليق على المجموعة هذي بشكل خاص، بس حلو إننا نشوف بناطيل منقشة، بكل الألوان، بكل النقشات، و الأهم أنه قصات و موديلات البناطيل تختلف كثير، يعني اللي ما يصلح لها أو ما تحب قصة بنطلون أو نوعية بنطلون معينة، بتلقى خيارات ثانية، لو كانت تدور على بنطلون منقش. 

لا تنسون، دائما، تقدرون تضغظون على الصور، و تشوفونها بحجم أكبر، و أهم شيء أي تعليق، أكيد أنا مهتمة إني أسمعه، زي دايم وش رايكم بالبناطيل المنقشة، فكرتوا فيها أو عندكم، أو الحين تفكرون فيها؟ 

The White Tee

أمس لما وقت زي دايم بصندوق البريد، لقيت شيء أسود مغطي، و قريت مكتوب بالأبيض Net-a-Porter.com المهم شوي لأكسر الصندوق من الحماس، و لما فتحته لقيت مجلة الموقع مرسلينها لي، و أنا ما طلبتها (شكرا يا نيت آي بورتيه) هذا اللي قدرتوا عليه P:.
مع أني مو مرة مع مجلات الأزياء (يعني مطبوعة) أحسها تشتتني بكبر و كثر صورها، بس شفت هذا الشيء و عجبني.

لقيت هذي الصفحة، طبعا هذي شكلها عقب ما قصصتها، بس هي (يعني الأساسية) بس مرسوم عليها هذي البنت و هي لابسة هذا التي، و حاوليها هذي الخيارات من التنانير. و أنا أخترت هذي.
قبل لا أدخل معكم بتفاصيل اختياري، التي شيرت الأبيض السادة، صار من أهم موضات ربيع و صيف 2011 و شكرا لمجموعة جيل ساندر (اللي بنظري أظن إنها أنجح المجموعات لهذا الموسم).

نرجع لخياراتي، أخترت هذي التنورة من روكساندا لينشيشلأن لونها حلو، و شكلها حلو، بالنسبة لي بتعطي التي الأبيض شكل حلو، صحيح مو عاجبتني يعني فوشيا على فوشيا بايخ شوي، بس لو كان عندي فلوس، راح زختار هذي الجزم من عليه، من زمان عاجبتني عزالدين عليه أحسها تحفة، و هذا الكعب الصندل الرمادي بيكون حلو مع اللبس.
 نجي للتنورة الموسكينو، ودي أقول للي سواها إحلف ... يعني ببساطة، ألقى تنورة زي هذي عند Forever 21، معقولة أدفع حوالي 4000 ريال على تنورة زي كذا؟ ما أدري بس فيه مثل يقول رزق الهبل على المجانين، ما سوو شيء زي كذا، إلا لاقين أحد يشتري.
التنورة جيل ساندر، حلوة نقشاتها بس طفشت من التنانير البنسل (اللي ناس يسمونها "سكني")، بالنسبة لي أفضل الشنطة اللي زي النقشات، يعني ممكن ألبسها مع اللوك هذا.
التنورة اللي من إيرديم حلوة، بس هذا الشكل مليته شوي، و بعد أحسه بناتي على ذوقي، التنورة مو موجودة إلا على أي نيت بورتيه الأمريكي.
التنورة اللي يمكن أختارها بعد تنورة روكسندا، هي هذي التنورة اللي من كريستفور كين، لونها حلو، و يكفي إنها دانتيل، بس خلاص إنا قررت إني أبغى روكسندا، يعني روكسندا P:.

شرايكم بهذا اللبس؟ يعني بس روحي لأقرب زارا خوذي تيشيرت أبيض، و ألبسي التنورة اللي تحبينها.

The other options

أعرف إني قديمة بالنسبة لبعض الناس بس توي أشوف Glee لأسباب كثيرة، أهمها إني أحب أشوف المسلسلات السيزين كامل مرة وحدة ... و للحق ما كنت أعرف من حقين المسلسل إلا ليا المهم لما شفته عرفت ديانا أقرون و صرت انتبه للبسها بالبريمرات ...

هذي صور لها بأكثر من مناسبة، أنا ما عرفتها إلا بالمناسبتين الآخيرتين ... تشوفون لبسها كثير أصفر، و فساتين بعد. بالنسبة لي ذوقها ممل، و لولا إنها حلوة كان صار اللبس بايخ مرة، يمكن أحلى الثلاثة فساتين هو الأخير (الي على اليمين) من كارلولينا إيريرا ...

و لأن البنت عجبتني مرة قلت و قبل ما تبدأ أسابيع الموضة من نييورك لباريس أعرض آخر شي عن كوليكشينات الريسورت، و الي ودي لو أشوف ديانا لابسه شي منها ...

قلت لأختي صح إنها كيوت بس أنا ما أحب أبدا لوك البنت الدلوعة، يعني هي يكفي شكلها و حركاتها، بالمقابل ما راح أختار لها شي هبال يعني روك ستايل أو متروسايكل ستايل أو حتى اللوك الي مخترعته تايلور مومسين (هاي كلاس هور) S: !!!!

كل الي فكرته لها لبس بخطوط جديدة، مو ملابس كأنها ملابس باربي بس كبيرة :)

من اليسار لبس من إيرديم (أنا أحب إيرديم) أحب خطوطه النظيفة، و أحب أقمشته المطبعة ... ودي أشوف على ديانا شورت، مو بس هذي الفساتين النافشة، شي من دون أي حركات دلع (أنا حتى ما أعرف وش هذا الشي، بس بتفهمون إني اللوك الي تراني كيوت، و هي كيوت جد، بس يعني ما أحبه) فهذا اللبس من إيرديم بنقشاته بيطلع مع وجهها و شعرها مرة حلو، من دون أي شي من هذي الملابس الي زي ما قلت ملابس (أنا دلوعة).

الي بالوسط من بروينزا سكولير يمكن الفستان مو أحسن خيار لها، يعني لو أشوفه على كيرا نايتلي أظن بيكون أحسن، بس الفستان حلو، و دي أشوفها بشي وسيع مو مخصر، يعني لو أعجنها مع أختي ممكن يتعدلون (أختي تكره أي شي له خصر، و أكثر خياراتها ملابس مستقيمة).

الفستان الأخير من بيرن، دايانا مو قصيرة، و نحيفة، يعني هذا اللبس بيمشي مرة عليها، أولا فستان، ثانيا فيه أصفر :) و له خصر بعد، بجد الفستان الأخير ودي أشوفها لابسته لحفلة أو شي، ممكن صعب تلبسه للقولدين قلوب، بس أعتقد بيكون مناسب لساق.

Layering

من زمان (يعني مو مره) بس كنت أحب هذا الشي، إني ألبس قطع كثير على بعض، أما الحين فأسلوبي باللبس ما قل و دل :) ... المهم الي بأقوله أنه هذا كا يعني إني ما أحب اللبس الطبقات لا أحبه خصوصا للبس الشتاء (أعرف إني غثيتكم بالشتاء و هو و لا حتى شمينا ريحته، بس وش أسوي كل المواقع و كل شي صار عن الخريف و الشتاء) طيب خلونا نرجع على اللبس نفسه ... اللبس الطبقات زي ما قلت لكم حلو للشتاء ما أعرف ليه، بس يعطيني شعور دفا، غير كذا، تغطي بشي علي شي ...

باللبس الي فوق لو كبرتوا الصورة بتلاحظون أنه أنا الي مركبة كل شي على بعض ... أساسا هم العارضات من عرض دولتشي آن قابانا للخريف بس جيت و لبستهم هذي الملابس عشانهم متفسخات قليلات الأدب P: لا بجد لأنه المايك آب من زمان عاجبني، و لأنهم لابسين بس بودي سوت فسهل إني أحط عليهم شي ثاني :)

كل اللكوين (يصلح كذا؟) يعني أزعم أنه ما فيه أحد يقرأ لي يقدر عليهم بس يعني هي الواحد هذي فرصته، أنه يتخيل من بعيد لبعيد .. :) هم كلهم أخذت قطعة من هذا اللوك لمارك جايكوب لمجموعة الخريف، طبعا قلت لكم قبل إني حابة هذا اللوك مرة، و لا عندي مانع آخذه بالضبط زي ما هو من فوق لتحت :) يعني لو مارك يقرأ ودي يتطمن ....

نبدأ من اليمين ... اليمن أخذت من اللوك حق مارك السويتير هذي، قلت لكم عجبتني مره كلاس، ألوانها حلوة، فتحة الرقبة جميلة ... و أهم شي إنها متمططة من تحت (لو كان عندي سويتير قديم كان خربتها بالموية و خليتها كذا، شكلي بافتش عند أمي)

بحياتي ما قد لبست تنورتين فوق بعض ... بس شكلي مستقبلا راح أفكر ... التنورة التحتية الدانتيل من بوربري برورزم ... التنورة حلوة، حلو يلبس معاها هوت بانت (لو أمك ما تهاوش) أو حتى ليقنق ... بس أنا فكرت إني أحطها تحت هذي التنورة الإرديم الي ما أقول إلا حسبي الله و نعم الوكيل ... طبعا الجزم و الشربات و الشنطة من دولتشي آن قابانا.

اليسار أخترت له من مارك التنورة ، لأنه ببساطة تجنن، مع التنورة فكرت له هذي البلوز من إيف سان لوغان ... نفس الشي شكلها و لونها و فتحتة الرقبة عاجبتني فوقها حطيت هذا الكارديقان الي من ميزوني (يالله الجنة بس) و كملت اللوك بالجزم الليبورد من كغيستيان لوبتين ...

إن شاء الله عجبتكم الطبقات ... و إن كان ممكن تلبسون زي كذا (طبعا مو زي الماركات بس فكرة الطبقات أو لا) :)

Shoes Era

قبل سنتين و أكثر كانت الشناط هي السالفة ... قيمة الواحد تتحدد من شنطته، و الكل يحاول يجسيب شنطه ما فيه أحد ممكن يجيبها، و الكل لازم عنده يا لوي فيتو يا بوربري أو قوتشي ... الشي هذا التغير و المصممين هالمره لفوا على الجزم و طلعوا بجزم غريبه و مجنونه ... من الموسم هذا فيه جزم كثير حبيتها، بس قلصت القائمة ل 12 جزمة ... و كل ثلاثه حطيتهم مع بعض بتصنيف من راسي ...

التصنيف الأول خليته جزم الشارع، ما أعرف على أي أساس .. بس حسيت لو وحده عندي، و لبستها لطلعه بأمشي فيها كثير ما راح أتنكد ...أنه يمكن تخرب. من اليسار لليمين:

أيرديم، روبيرتو كفالي، و إيرميس

pollcode.com free polls

What is your favorite?

Erdem Roberto Cavalli Hermes

هذي جزم نص، نص، يعني تلبس بمناسبات عادية، بس يمكن ما أمش، عشان ما تتوسخ أو تتمخش :p و غير كذا كلها ألوان تقليدية أسود، رمادي، أبيض ... من اليسار لليمين:

فندي، لانفين، شانيل

pollcode.com free polls

What is your favorite?

Fendi Lanvin Chanel

هذي المجموعة الملونة زي ما أحب أسميها ... كذا لما جمعتهم على بعض اكتشفت أنهم كلهم ألوان، كل الجزم هنا ما تلبس للشارع، تلبس عشان تقولين للناس لا تشوفون إلا رجولي : ) من اليسار لليمني:

برادا، بلانسياقا، جان بول قوتييه

pollcode.com free polls

What is your favorite?

Prada Balenciaga Jean Paul Gaultier

هذولي جزم الحفلات، الي ما تلبس أبدا بغير الحفلات الكبيرة ... لامعه .. فخمة و تحتاج فساتين حلوه، من اليسار لليمين:

فيرساتشي، كريستيان ديور، ميو ميو

pollcode.com free polls

What is your favorite?

Versace Christian Dior Miu Miu