Red Carpet Worthy: Milan Edition

أعتقد أنه خلص أسبوع ميلانو، بالنسبة لي أعتقد أنه "أضعف الأسابيع إلى الآن (باقي باريس) و بصراحة بالنسبة لي كانت خيارات الملابس اللي ودي أشوفها على الريدكاربيت جدا قليلة (غير الثلاثة عروض اللي تكلمت عنها من ميلانو: ألبيرتا فيراتي، برادا، و فاوستو بوقليزي). حتى الخيارات اللي اخترتها، أظن إنها من الماركات الأقل شهرة بميلانو. 

من اليمين لليسار العروض: (فرانشيسكو سوكوناميليو، بورتز 1961، سبورتامكس و أيسبرق)

بشكل عام أقدر أقول إن الخيارات ما كانت الخيارات التقليدية للريدكاربيت، الفستان الأبيض اللي من بورتز مثلا أعتقد أنه ماله إلا مكانين: فوتو كول لفيلم، أو سبيريت أوارد. اللبس اللي من أيسبيرق حبيته مرة، و لا بغيت ما أتكلم عنه أبدا، أشخص الوحيد اللي ممكن أشوفه لابس هذا اللبس هو ريانا، و صراحة أتمنى تلبسه لأن السويتر عاجبني مرة. 

 من اليمين لليسار العروض: (موذير أوف بيريل، جيل ساندير، كستم ناشوينال، و No. 21)

حبيت مرة الفستان هذا اللي من موذير أو بيريل، أول ما شفته تمنيت أشوفه على كيري واشنطن أو حتى ممكت جيسيكا شستاين، اللبس اللي من كستم ناشيونال حسيته ريانا (ريانا هي الوحيدة المستفيدة من أسبوع ميلانو P:) أما اللبس اللي من No. 21 ما قدرت ما أختاره، شورت أسود مشكوك و قميص أبيض، وش أكثر بساطة و جمال من كذا؟ أتمنى أشوف ميشيل وليمز فيه. 

أنتم وش أكثر شيء أعجبكم من ميلانو؟

Jil Sander: Great show, great venue

اليوم كان عرض لواحد من أحب الماركات لي اللي تعرض بميلانو ... عرض جيل ساندير اللي فيه عرض مصمم الماركة تقريبا من 6 سنوات راف سايمونز مجموعته الأخيرة للماركة، بعد ما أعلن أنه بيتركها، و بترجع المصممة الأصلية للماركة جيل ساندير (فيه إشاعات أنه بيصير مصمم ديور). 

راف بالسنتين الأخيرة (على الأقل بالنسبة لي)، سوى عروض من أحسن العروض بالنسبة لي (شيكوا هنا على بعض تصاميمه للماركة بالستة سنوات اللي فاتت من 2006). 

غير أنه المجموعة مرة حلوة (ما تقل جودة عن مجموعاته اللي فاتت) فيها ألوان فاتحة كثير، مع ذلك فيها دفى ... فيها شيء شتوي باهت و كئيب بس مو بقبح ... ما راح أتكلم أكثر عن المجموعة اللي أعجبتني (شيكوا عليها هنا). لكن الفنيو اللي سوا فيه العرض كان خيالي بالنسبة لي، قريت أنه عنوان العرض كان "الحديقة السرية" مو متأكدة، لكن الديكور سحرني بشكل غير طبيعي، جدران و أرضية بيضاء، و عواميد بيضاء زي ما أنتم شايفين، فوقها مزهرية الورود اللي فيها تقتل (ألوانها، أشكالها، ترتيبها ... كل شيء)، و أكثر شيء عاجبني أنه كل مزهرية لها شكل مختلف عن الثانية (ودي أعيش هناك :). 

أتمني أشوف هذي المجموعة تنجح (يعني على الريدكاربيت)، و متحمسة أشوف جيل ساندير وش راح تسوي لماركتها اللي تركتها 6 سنوات؟!!

In Grieving

شفت قبل يومين فيلم نادين لبكي الجديد "و هلأ لوين؟" ... ما يحتاج أقول إني حبيته، يكفي إن نادين هي اللي مسويته P:، بس بجد مع أنه لبس النساء بأفلام نادين مو شيء ممكن ألبسه، لكن فيها شيء يخلي الواحد يشتهي "يخلقن"زيهم :) ... المهم بالفيلم هذي المرة، المشهد الأول كان هذي الصورة. 

قد كتبت أكثر من مرة عن ناس بجنازات، ما أعرف ليه صور النساء بالجنازات تثيرني، أتذكر من أول الصور اللي وعيت فيها إن الجنازات تعجبني، هي صورة لمغنية صربية بجنازة زوجها، أظن أنه واحد من جنرالات الجيش الصربي. 

إلى الآن زي ما قلت لكم أحب هذي الصور، أحب أشكال النساء وهم "متكشخات" و لا هم متكشخات (صحيح أتنرفز لما أروح لعزاء أهله محولينه لزواج من كثر ما هم جالسين يستعرضون فيه. لكن للمرة المليون ما يمنع إني أحب أشوف الصور ... علشان كذا المشهد أعجبني ... 

لأنه الأسود بهذا الصيف، كان تقريبا موجود بكل عرض، فكرت إني أدور على الملابس اللي ممكن تطلع حلوة، بجنازة، للمرة بعد المليون بجنازة أو عزاء "بالصور" :) ... بس هذا ما يعني إنه اللوك هذا ماراح ألبسه إلا لعزاء (لأني على الأغلب ما راح ألبسه لعزاء)، علشان كذا لو أحد شافني هذا الصيف مقررة إني أسوي نفسي ولو مرة كأني طالعة من عزاء بفيلم أو بصورة بجريدة، لا أحد يقول لي: ليه كأنك جاية من عزاء :) 

بيعد عن سواليف العزاء و الموت (جالسة أناظر "ذا بيق سي" وشوي موضوع الموت مأثر فيني)، لو كنتوا ببلد فيه سينما، شيكوا على سينمات البلد، و روحوا ناظروا "و هلأ لوين؟" قلت لكم الفيلم يستاهل، لو كنتوا قراب من البحرين بهذي الإجازة، تراه يعرض بسينما الدانة. 

آخر شيء، شرايكم بلوك "العزاء"؟ و قد عجبتكم صور الجنازات زيي؟

A Collection for Hipsters

أمس نفس قبل أمس كان يوم مزحوم بجدول عروض نيويورك، أكثر عرض أعجبني مو جيل ساندير نايفي (أول مرة أشوف عرض لهم، أو لوك بوك)، لكن حسيت فيه شيء جديد و شاب، شيء مع إني أكره المدارس، و الدراسة، بس شيء فيه روح أو إذا ممكن أسميه أناقة مدرسة. 

يمكن هبيستير شيك أو سكول شيك مو الستايل اللي أحبه، ما يعني أني ما أقدره أو أكرهه، لكن مو الشيء اللي أرتاح له، و لا أحسه أصلا مريح، لكن مع هذا العرض عجبني مرة، عجبني كيف دخلت الألوان الميتاليك (المعدنية)، على ملابس بألوان باهتة، القصات حلوة خصوصا بالقميص الأول (الصف الأول من اليسار)، أكثر شيء حبيته كيف دخل القميص على الفستان الأخير (الصف الثاني يمين). من الأشياء اللي حبيتها بعد، الشنطة الجلد الصغيرة (كأنها شنطة كاميرا) بالصف الأول يمين. 

فيه شيء أعجبكم من العرض؟ تحبون ستايل الهبيستير، أو تكرهونه أو ما تفرق معاكم؟

PP: Printed Pants

من أهم موضات الخريف الجاي، اللي انتبهت لها كانت البناطيل المنقشة، الشيء هذا كان عاجبني من فترة، حتى أنه زارا كان عندهم بنطلون حرير مطبع عليه، فيه منه برتقالي و أخضر، كان عاجبني مرة، دورت بكل فرع أقدر أروح له علشان ألقى مقاسي، و يوم أخيرا لقيته و شريته ما أعجبني شكله علي، و رجعته، بس إلى الآن عاجبتني الفكرة. 

زي ما قلت لكم البناطيل المنقش عليها أو المطبع عليها كانت بعروض كثيرة، علشان كذا سويت من نفسي تقسيمات لها، على حسب شكل النقشات اللي عليها. 

(يسار: دولتشي آن قابانا، بروينزا سكولير، فيرسيس). أعتقد أنه النجوم مع مجموعة دولتشي آن قابانا للخريف هذا، صارت بكل مكان، حتى كان فيه أكثر من محل هاي ستريت (زارا مثال) كان عندهم شيء عليه نجمات. بروينزا سكولير عرضهم كان مليان بالنقشات الهندية الحمراء، و اللي كلها أشكال هندسية، و هذا البنطلون واحد من بناطيل كثيرة بالعرض كان عليه هذي النفشات. بنطلون فيرسيس (يمين) عاجبني مرة، يمكن من زكثر الأنواع اللي عجبتني من هذي البناطيل هي البناطيل اللي قماشها واقف (كأنه تافتا)، و فيه أشياء تلمع. 

المجموعة هذي هي مجموعة البناطيل بنقشات الورود (يسار: جيل ساندير، ماري كاترنتزو و روشا). بالنسبة لي أشوف أنه الورود بكل وقت تفتح النفس، مو لازم تكون ملابس الربيع أو الصيف، أعجبتني الورود مع الألوان الغامقة (جيل ساندير و روشا)، بعد أعجبني مرة البنطلون اللي من ماري كاترنتزو على أنه ألوانه فاتحة، لكن لون الورود و قماشة، تمشي مرة مع ألوان الشتاء.

المجموعة الأخيرة ما أعرف نقشاتها تدخل تحت أي تصنيف، علشان كذا حطيتها بمجموعة وحدة :). (اليسار: إيرديم، روبيرتو كافلالي و جان بول قوتييه). 

ما عندي تعليق على المجموعة هذي بشكل خاص، بس حلو إننا نشوف بناطيل منقشة، بكل الألوان، بكل النقشات، و الأهم أنه قصات و موديلات البناطيل تختلف كثير، يعني اللي ما يصلح لها أو ما تحب قصة بنطلون أو نوعية بنطلون معينة، بتلقى خيارات ثانية، لو كانت تدور على بنطلون منقش. 

لا تنسون، دائما، تقدرون تضغظون على الصور، و تشوفونها بحجم أكبر، و أهم شيء أي تعليق، أكيد أنا مهتمة إني أسمعه، زي دايم وش رايكم بالبناطيل المنقشة، فكرتوا فيها أو عندكم، أو الحين تفكرون فيها؟ 

Cover Girl

نبعد شوي عن العروض، و نرجع للسلبرتي من جديد ... من فترة كنت من مؤيدين بلايك لايفلي، الفترة الأخيرة حولت شكلي على لايتين ميستير، ما أعرف عاجبني شكلها من فترة أحس فيها شيء فرش ما أعرف وشو.

لايتين طلعت علي غلاف مجلة لوفيسال اللتوانية. بالنسبة لي هذا أحسن غلاف شفته من بدأت أعداد مجلات الأزياء الي تطلع ملابس الربيع. يعني الغلاف مو بس أهم شيء إننا جبنا لايتين ملبسينها ملابس حلوة. أساسا من زمان أحب اللون الأخضر بس الأختيار اللي أختاروه للبس كامل طالع حلو، يعني هذي التنورة الخضراء من جيل ساندر و التوب من لانفين مع الشعر المشدود و الحزام الجلد و المجوهرات الفخمة عاطي اللوك فخامة أنيقة و راقية تحسون فيها برجوازية. لما كان كل شيء لحال التنورة لحال و التوب لحاله ماكانوا كذا فخمات بس مع هذا الإكسسوار الغالي (الحزام جلده كويس) و المجوهرات صار بهذا الشكل من الفخامة من دون جفاسة. 

للي يبغى يشوف باقي الإيديتوريال، هنا صور بس سكان مو ذاك الزود. و كله على نفس الطريفة ملابس بسيطة، و إكسسوار و مجوهرات فخمة.

DejaVu

زحمة أحداث اللحين، و لا ببالي شي أكتب، و لا أحس فيه شي يحفز ... علشان كذا لما ينشف راسي أروح أدور على إيدتوريالز علشان تعطيني أفكار. بس شفت هذي الصورة من إيديتوريال قديم لناموي كامبل و على طول جا ببالي مجموعة جيل ساندر للربيع إلي تكلمت عنها و قطعت فيها، بس مو بس أنا اللي قطعتها تقطيع، كل مجلة اللحين تقريبا عارضة على الأقل فستان من المجموعة.

أول ما شفت الصورة و هي صغيرة حسبتها جديدة، بس لما كبرتها حسيت فيه شي مو جديد، رجعت أشوف تاريخ الصورة و ألقاه من عدد مارس لفوق الأمريكية عام 1998.

طبعا المينماليزم أو البساطة قلت لكم أكثر من مرة هي كانت موضة منتشرة بقوة بالتسعينات. فيعني مو غريب لو شفت صور من التسعينات راح تحس أنه اللبس يتشابه كثير مع لبس الموسم هذا.

قلت لكم أنا من بعيد حسبت ناومي لابسة من جيل ساندر، خصوصا التنورة الليمونية هذي .. بس لما كبرت الصورة شفت النفشة اللي ورا، و الجيبون اللي طالع من تحت التنورة. 

Straight Orange

من فترة ما تكلمت عن ملابس أحد، جت الأعياد و رأس السنة، و دخلوا الناس ببيات شتوي. بس أمس كان فيه جوائز اختيارت الناس people's choice award كان فيه ناس لابسه لبس حليو، بس قررت إني أكتب عن درو باريمور اللي كانت جاية لحفلة ثانية لمجلة Covergirl لابسه برتقالي من جيل ساندر.

ما أعرف أنا توي أنتبه، أو صدق السلبرتي كاثر لبسهم لمصممين مختلفين و منهم جيل ساندر ... تستاهل جيل طلعت بمجموعة حلوه مره، و أنا وقتها تكلمت لكم عن الشنط الي كانت بالمجموعة، و فيه بعد لوك اخترته لقائمتي لأفضل أشياء ميلانو ...

الي باتكلم عنه اليوم أهم شي اللون البرتقالي اللي لابسته درو، عجبني اللون، عجبني شعرها هذا اللي كأنه مجبص، ما أعرف كيف، بس مو أول مره تطلع فيه ....

المهم اللون البرتقالي أتوقع بيكون كثير بملابس الصيف هذي السنة، و شفناه بكثير عروض لربيع 2011.

من كثير ملابس كان لونها برتقالي ... هذي أكثر الملابس الي أعجبتني، أولا مع الفستان الي على اليسار من كريستوفر كين دانتيل وردي، مع خطوط برتقالية، غير القماش، أكثر شي أعجبني طول الأكمام.

الوسط تنورة من جيل ساندر بعد، التنورة أحسها خطرة شوي، ممكن تطلع مره قبيحة، أو مره حلوه ... آخر لبس من هيدر أكيرمان، حبيت هذا الفستان، حسيته مصمم على الموديل نفسها، يعني المصمم كان يربطه و يخيطه على العارضة، مع عقد ذهبي طويل مع تعليقة كبيرة، أحسه بيطلع هيت لأي ريد كاربيت.

Jil Sander's Plastic Bag

وقفت اليومين الي فاتت كانت معاي زكمة شينة، و هالشي خلاني مالي خلق أسوي أو أشوف شي ... رجعت اليوم أشوف العروض الي فاتتني من ميلانو.

ما أقول إن العروض كانت بايخة و لا تستاهل أنه ينكتب عنها، بس لاحظت بميلانو أحسن القطع هي الفساتين السوداء، و ما أعرف شي داخلي يحسسني أنه ما فيه داعي أعرض فساتين سوداء لأني أحس أنه أكثر الفساتين السوداء حلوه أساسا، و لا تثيرني لما أشوفها، تطلع حلوه، و الي يعرف يلبسها صح يطلع ما أعرف بس ما جت ببالي إلا كلمة فخم.

من العروض الي أعجبتني و ما كنت فساتين سوداء هو عرض جيل ساندير. بس بعيد عن الملابس لفتت نظري الشناط الي حاطتها بأكثر من لوك.

الشنط زي ما تشوفون كأنها أكياس بلاستيكية، بصراحة أعجبتني خصوصا السوداء و الحمراء أحس فيها بساطة و أناقة بنفس الوقت. مشكلتي معها بتكون سعرها، أعرف أنه سعرها بيكون غالي، و مع إني حابتها بس يعني للحق ما راح أدفع فيها أكثر من 15 دولار، و لأني أدري أنه ما راح تكون بهذا السعر، أتمني أنه يكون فيه نسخ منها عند ماركات الهاي ستريت، و بألوان و نقشات أكثر ...

شرايكم أنتم بالشنطة، يعني ممكن تشترون شنطة كأنها كيس بلاستيك؟ ولو كنتوا مستعدين تشترونها وش السعر المناسب لكم؟