MFWFW 2015

من بين الثلاثة أسابيع اللي خلصوا، أعتقد إن الملابس بميلانو كانت الأقل إثارة، فيه مجموعات حلوة، بس من المجموعات اللي اللي ما تكلمت عنها، الملابس اللي أعجبتني فيها قليل، يمكن الإستثناء كان برادا و بوتشي، عجبني فيها أكثر من لبس، بس مو أكثر من أربعة فما شفت إنها تستاهل موضوع لحاله.

ما أعرف ليه من ميلانو أختار أكثر لبس بالعادة مستحيل ألبسه، أو حتى أفكر، زي الفستان اللي كأنه شرايط (فوق الثاني من اليمين) من إيميلو بوتشي، مع إنه أبدا مو ستايلي، لكن أحس إذا لبس الشخص المناسب بيكون حلو، يمكن زوي سالدنا، أو سلينا قوميز أو كايلي مينوق، يمكن الأشخاص اللي ما ودي يلبسونه: بيونسية، جي لو، و كيم كرداشيان، بس خلونا نشوف.
من أكثر الملابس اللي أعجبتني هو اللبس اللي من فاوستو بولقيزي (تحت الأول من اليمين)، عجبتني مرة الألوان الصارخة، و عجبني البروش أو ما أعرف وش تكون القطعة اللي بالوسط، أحس اللبس هذا بيكون حلو على زندايا. أعجبتني البدلة اللي فوق من أكويلانو رايموندي، ما أتذكر إن روني مارا تلبس بدلات، بس أحس هذي بتكون حلوة عليها، أعجبني القطعة الترتر اللي طالعة من تحت. الفستان اللي بعده من جورجيو أرماني، أحسه ذوق ممثلة كبيرة (نايومي واتس أو جوليان مور أو حتي جودي فوستر)، لكن أحس بيكون حلو على إيما واتسون.
البدلة برادا تحت (صفراء ليموني) أحسه مصنوعة لإيل فانينق، بس ما عندي مانع أشوفها على أيد أحد على الريدكاربيت، اللوك اللي بعده من روبيرتو كفالي، أعجبني إن الجاكيت من دون أكمام و مبطن بقماش مشجر، أعرف إن لبس زي كذا ما يكون كثير على الريدكاربيت، بس أحسه بيكون حلو على بوبي دوليفان.
* باقي الملابس الجاكيت اللي فوق الأول من اليمين من No. 21 و اللبس الأخير تحت من جست كافالي. 

Dazzling Grunge

من أهم العروض (بالنسبة لي) من ميلانو، و أظن كل موسم أتكلم عن هذا العرض هو عرض No. 21، لسبب ما ما أعرف ليه، أشوف أنه ما أخذ مكان أعتقد أنه يستحقه بالريدكاربيت، أتذكر دايان كروقر لبست منهم قبل كم سنة، مع أنه شكلها كان مرة حلو، ما عاد شفته على الريدكاربيت. 

على أني ما شفت عروض إلى الآن عندها ملابس متأثرة بالتسعينات و موضة الچرنج، إلى إنه أليساندرو ديل أكوا، مصمم No. 21 شكله ما زال حب هذي الملابس، و عنده شيء جديد لها. من موسمين من رجعة موضة الچرنج، ما شفت ملابس ممكن تكون ملابس سهرة، لكن أليساندرو شكله قرر أنه يرقيها، و شخصيا أعجبتني النتيجة. 

عجبني اللوك الأول من اليمين، أعتقد أول مرة أشوف قماش شفاف كذا أولا مخيوط، و محافظ على قوامه ودي أشوف هذا اللبس على ريانا، أحسه مع روجها الأحمر بيطلع مرة حلو، أو لو حتى دايان كروقر. اللبس الأسود كامل (الثالث من اليمين) ودي أشوفه على زوي كرافتز. أما الأخير أظن أنه بيطلع مرة حلو على جون سميلز، شخصيا أنا ودي ألبسه.  

كيف تشوفون الچرنج وهو يصير لبس سهرة؟ و أصلا تحبون الچرنج؟

Simple Yet Elegant

بدأ أسبوع ميلانو كالعادة بقوتشي، ما عجبني العرض كثير، فيه تأثير ستينيات واضح، بس المكياج كان حلو، ستينيات بعد، بس بشكل عصري شوي. العرض اللي أعجبني من اليوم الأول، هو عرض No. 21 تعرفون مو أول مرة يعجبني نمبر 21 بس هذي المرة حسيته ماشي بنسق ملاحظته من فترة، و هو الملابس أنيقة، أميل للرسمية، بس فيها لمسة فخمة. 

أحب هذي النوعية من اللبس، يمكنها أكثر شيء يمثلي ذوقي الفترة هذي، قطع رسمية بسيطة، مع شوية بلينق بلينق (يعني شيء ترتر أو مجوهرات أو أي شيء زي كذا). من فترة و أنا حابة اللون الكاميل و زاد حبي بعد ما شفت مجموعة مايكل كورس بري فول 2014 (يمكن أتكلم عنها بعدين، أو إذا تبغون روحوا شيكوا عليها). بس لفترة ما أعرف وش ممكن ألبس كاميل، لأني مو تحمسة لجاكيت أو بالطو، أحسه مرة رسمي، بس عجبتني فكرة سويتر. أحسها ما فيها مبالغة، و تمشي مع طريقة اللي أرتاح فيها بالبس.  كان فيه بالعرض كثير شيء عليه شك على الكتوف (ما أعرف إذا هي باك باك مشكوكة أو بس حركة)، بس لو كانت باك باك مشوكوكة أحس بتكون حركة حلوة لو شريتي باك باك سوداء سادة، و ركبتي عليها فصوص، أو شكيتيها (أنت أو أحد غيرك). قلت لكم بشكل عام أحب هذا اللبس، الكول البسيط، بس رسمي شوي بنفس الوقت. 

Red Carpet Worthy: Milan Edition

أعتقد أنه خلص أسبوع ميلانو، بالنسبة لي أعتقد أنه "أضعف الأسابيع إلى الآن (باقي باريس) و بصراحة بالنسبة لي كانت خيارات الملابس اللي ودي أشوفها على الريدكاربيت جدا قليلة (غير الثلاثة عروض اللي تكلمت عنها من ميلانو: ألبيرتا فيراتي، برادا، و فاوستو بوقليزي). حتى الخيارات اللي اخترتها، أظن إنها من الماركات الأقل شهرة بميلانو. 

من اليمين لليسار العروض: (فرانشيسكو سوكوناميليو، بورتز 1961، سبورتامكس و أيسبرق)

بشكل عام أقدر أقول إن الخيارات ما كانت الخيارات التقليدية للريدكاربيت، الفستان الأبيض اللي من بورتز مثلا أعتقد أنه ماله إلا مكانين: فوتو كول لفيلم، أو سبيريت أوارد. اللبس اللي من أيسبيرق حبيته مرة، و لا بغيت ما أتكلم عنه أبدا، أشخص الوحيد اللي ممكن أشوفه لابس هذا اللبس هو ريانا، و صراحة أتمنى تلبسه لأن السويتر عاجبني مرة. 

 من اليمين لليسار العروض: (موذير أوف بيريل، جيل ساندير، كستم ناشوينال، و No. 21)

حبيت مرة الفستان هذا اللي من موذير أو بيريل، أول ما شفته تمنيت أشوفه على كيري واشنطن أو حتى ممكت جيسيكا شستاين، اللبس اللي من كستم ناشيونال حسيته ريانا (ريانا هي الوحيدة المستفيدة من أسبوع ميلانو P:) أما اللبس اللي من No. 21 ما قدرت ما أختاره، شورت أسود مشكوك و قميص أبيض، وش أكثر بساطة و جمال من كذا؟ أتمنى أشوف ميشيل وليمز فيه. 

أنتم وش أكثر شيء أعجبكم من ميلانو؟

Sparks

نرجع مرة ثانية لموضات الخريف و الشتاء الجايين 2012. طبعا لما أجيب الموضات مو شرط معناها أنه لازم كل موسم يصير لنا شكل جديد، الفكرة الأهم إن هذي الموضات اللي تطلع كل موسم، تكون جزء من طريقتنا باللبس مو كأننا منيكان يلبس و يفسخ من دون ما يكون له هو شكل أو بصمة على اللبس (على الأقل هذا الشيء اللي أعتقده)، يعني مو شرط كل موضة تعجبني، أو لازم ألبسها. هذا ما يعني إن الموضة اللي باكتب عنها اليوم ما تعجبني، بس كلام بغيت أقوله :)

أعتقد هذا الموسم ما فيه مجموعة ما حطت شيء يلمع. الشيء الحلو بالأشياء اللي تلمع ترتر أو أي شيء ثاني يسوي نفس التأثير، إنها بسهولة تحول لبس عادي، يعني لو حتى كان جينز لشيء يصلح حفلات أو سهرات. و أهم شيء أنه ما أعرف ليه أحس أنه "ينعش" اللبس. زي كل مرة أعتقد إننا بنشوف أشياء تلمع كثيرة بالهاي ستريت، و أعتقد بيكون فيه ملابس كثيرة بأسعار معقولة، تصلح سهرات و حفلات (أحس توب شوب و ريفير أيلاند بيطلعون أشياء حلوة). 

Dress with Pockets

بالمجموعات الأخيرة (بري فول و كتو ربيع 2012) شفت كثير فساتين بجيوب ... ما أعرف هذي بتكون موضة بتنتشر حتى عند محلات الهاي ستريت، أو ممكن نشوفها على الريدكاربيت، لكنها تستاهل إننا نتكلم عنها. 

من مجموعة برابل قرونق بري فول (اللي بالمناسبة أتوقع بينلبس منها كثير على الريد كاربيت)، لعرض شانيل أوت كتو ربيع اللي كله فساتين بجيوب ... لعرض فالنتينو بعد أوت كتو ربيع 2012 و حتى مجموعة بري فول 2012 نمبر 21 كلها كان فيها فساتين فيها جيبوب ... بصراحة أنا ما أعرف إذا ممكن ألبس فستان لزواج مثلا بجيوب (إلا إذا كان شانيل طبعا :P) (الثاني من اليسار) ... لكن لحفلة يعني شيء زي فستان برابل قرونق (الأول من اليسار)، أعتقد إني ما راح أصلا أفكر بالجيب ... 

بالعموم الفكرة مو خطيرة للدرجة هذي، يعني علشان أسأل سؤال مثل ممكن تلبسونه أو لا، لكن ما أعرف بالنسبة لي أحس إن جيوبي بتمتلي بمناديل، و يمكن جوالي و قراطيس من الشوكولاته اللي وزعوها بالزواج، و بالنهاية باطلع بفستان منفخ بشكل غريب (لي تجارب سيئة مع جيوب المريول، علشان كذا أحس إني من دون جيبوب أسلم :)  

شرايكم بالجيوب بالفساتين؟ 

* بالمناسبة الليلية حفلة توزيع جوائز SAG أتمنى نشوف شيء حلو.