الخميس، 20 فبراير، 2014

Simple Yet Elegant

بدأ أسبوع ميلانو كالعادة بقوتشي، ما عجبني العرض كثير، فيه تأثير ستينيات واضح، بس المكياج كان حلو، ستينيات بعد، بس بشكل عصري شوي. العرض اللي أعجبني من اليوم الأول، هو عرض No. 21 تعرفون مو أول مرة يعجبني نمبر 21 بس هذي المرة حسيته ماشي بنسق ملاحظته من فترة، و هو الملابس أنيقة، أميل للرسمية، بس فيها لمسة فخمة. 


أحب هذي النوعية من اللبس، يمكنها أكثر شيء يمثلي ذوقي الفترة هذي، قطع رسمية بسيطة، مع شوية بلينق بلينق (يعني شيء ترتر أو مجوهرات أو أي شيء زي كذا). من فترة و أنا حابة اللون الكاميل و زاد حبي بعد ما شفت مجموعة مايكل كورس بري فول 2014 (يمكن أتكلم عنها بعدين، أو إذا تبغون روحوا شيكوا عليها). بس لفترة ما أعرف وش ممكن ألبس كاميل، لأني مو تحمسة لجاكيت أو بالطو، أحسه مرة رسمي، بس عجبتني فكرة سويتر. أحسها ما فيها مبالغة، و تمشي مع طريقة اللي أرتاح فيها بالبس.  كان فيه بالعرض كثير شيء عليه شك على الكتوف (ما أعرف إذا هي باك باك مشكوكة أو بس حركة)، بس لو كانت باك باك مشوكوكة أحس بتكون حركة حلوة لو شريتي باك باك سوداء سادة، و ركبتي عليها فصوص، أو شكيتيها (أنت أو أحد غيرك). قلت لكم بشكل عام أحب هذا اللبس، الكول البسيط، بس رسمي شوي بنفس الوقت.