In Love, Again

من عروض اليوم/أمس كان كريستوفر كاين، إذا تتذكرون قبل كم موسم  كان كريستوفر كاين واحد من المصممين المفضلين عندي، خصوصا مجموعات الصيف. المجموعات الأخيرة صرت أحس إنه صار يستعرض بالتقنيات، أكثر من إنه مهتم يصمم ملابس حلوة، لكن هذي المرة (و مع إنه مجموعة خريف) أعتقد إني رجعت أحب كريستوفر كاين. 

تقريبا كل شيء بهذي المجموعة حبيته من الأقمشة الخفيفة، للألوان، و حتى الدانتيل اللي على شكل أجسام بشر، كثير من الملابس من العرض ودي أشوفها على الريدكاربيت، الفستان الأول من اليمين حبيت مرة شفافيته، حسيته خفيف مرة، على إن فالنتينو يسوي فساتين شفافة، لكن هذا أحس لو حطوا بطانة تحته على الريد كاربيت، أعتقد بيظل شكله خفيف. ودي أشوفه على كايت بلانشيت. الفستان الأحمر أظن مكتوب عليه لوبيتا، أتمنى إن لوبيتا تلبسه، أحس هي الشخص الوحيد اللي ممكن يعطيه حقه. أما الفستان الأخير أظن جينا ميلون تقدر تلبسه بسهولة. 

وش رأيكم بكريستوفر كاين؟ أنتم زيي بعلاقتكم مع كريستوفر كاين؟ 

Dark Summer

لندن ما أعرف كم صار له يوم، بس إلى الآن من وجهة نظري ما شفت شيء مثير من مصممين لندن. حتى اللي بالعادة أنتظر منهم شيء مثير. لو كنتوا متابعين من زمان (أسطوانتي كل مرة) بتعرفون إني "كنت" أحب كريستوفر كاين مرة، مو بالمواسم الأخيرة، ما أعرف ليه صرت أحس أنه ما عاد يهمه شكل الملابس، أهم شيء يكون شيء غريب. و كونه غريب ما يعني دايم أنه حلو. 

هذي المرة و أنا أقلب المجموعة ما حسيت إنها مثيرة أبدا (يمكن علشان الألوان)، يعني حطوا ببالكم إنه هذي الألوان اللي اختارها لملابس الصيف! لو ما كنت متابعة و أحد وراني هذي المجموعة، ببساطة بأقول إنها مجموعة خريف. حتى المرة الأولى و أنا أشوف الصور ما أثارني إلا فستان واحد (الأخير، يسار).  رحت آخر اليوم باشيك على المجموعة من جديد و أشوف وش أعجبني، انتبهت أنه فيه أشياء كثيرة حلوة، (إلى الآن أعتقد المجموعة مو مثيرة). لكن فيه ملابس كثيرة ودي أشوفها على الريدكاربيت، حتى لو كانت ألوانها غامقة. (ما أعرف كريستوفر قرر أنه يختار هذي الألوان لأنه السليبريتي ما عاد صاروا يقدرون ينتظرون لحد ما الملابس تنزل على الصيف؟). يعني أعتقد هذي المجموعة بنشوفها على الريد كاربيت طول الخريف و الشتاء هذولي. 

البدلة السوداء ودي أشوفها على جوليان مور، أو كايت بلانشيت، الفستان اللي عجبني أول مرة، أحسه بيكون حلو على لوبيتا أو فليستي جونز. الفستان الثاني من اليمين أحسه بيكون حلو على أليكسا شونق، مع إني أحس إنها بتلبس الأخير، لو لبست من هذي المجموعة. 

أنتم وش رأيكم بالمجموعة؟ أو بهذي الألوان للصيف؟ 

Red Carpet Worthy: London Edition| F.W 2014

بصراحة باستثناء ماري كاترونتزو (تكلمت عنها تحت) ما فيه أحد بأسبوع لندن أثارني، ما أعرف ليه كنت أنتظر شيء مختلف، اللي شفته كأنها مجموعات، تكملة لمجموعات قديمة، مو شينة، بس ما فيه جديد. من دون ما أطول بالكلام، هنا أحسن الملابس بالنسبة لي من أسبوع لندن، و بعض الأشياء اللي شفتها فيه. 

• على عكس مصممين نيويورك اللي تقريبا كلهم تجاهلوا الطبعات، أكثر مصممين لندن، إلى الآن ملابسهم كلها طبعات ما عادا مصمم أو اثنين (منهم ماري اللي كانت هي ملكة الطبعات). 
• كان فيه أسود كثير، و أحمر و درجاته، الرمادي و الرصاصي كان موجود بس مو بكثرة عروض نيويورك

أول شيء أعرف إن اللبس الأول اللي على اليمين من هاوس أوف هولاند ما راح أحد يلبسه، لكن حبيته، و بغيت أحطه. من المجموعات اللي أعتقد إنها كانت مختلفة مجموعة ماثيو ويليمسون، خصوصا الجزء الأخير منها، حسيت كأنها فيقاس، أعجبني لبسين جمب سوت لبستها اليوم إيلي قولدنق و لا عجبتني عليها، لكن الثاني الفستان الأسود القصير، كتف واحد و فرو أحمر و أزرق، أحسه بيكون حلو على سيينا ميلر. فستان بيتر بلوتو (فوق الثاني من اليسار) أتمنى أشوفه على جينفير كونلي، مع أني عارفة إنها ما راح تلبسه. 

الفستان الباذنجاني اللي من أنتطونيو بيراردي، يمكنه أقل واحد مفضل عندي، لكن أعتقد إلى تسعين بالمية فيه أحد راح يلبسع للريدكاربيت، يمكن قوينث بالترو. 

اللبس اللي من كريستوفر كاين، ودي أشوفه على كايت بوسورث أو آن هاثواي، مع إني ما أعرف إذا هي ناوية تطلع بمناسبات أو لا. اللبس الأحمر من توم فورد أعرف أنه ما راح يعجب كثيرين، لكنه أعجبني كثير، ودي أشوفه على أحد عنده ستايل زي بوبي دوليفان أو وحدة مرة حلوة زي أجاك دينج. 

وش أعجبكم أنتم من عروض لندن، وش تنتظرون من ميلانو اليوم؟ 

Red Carpet Worthy: London Edition

أمس خلص أسبوع لندن للموضة، يمكن العرض الوحيد المهم بالنسبة لي هو عرض ميديم كيرشوف، أعجبتني المجموعة، بالذات الشنط، بس ما شفت شيء ممكت أتكلم عنه هنا. أو يمكن ما كنت متحمسة أكتب عن أي شيء، لأن أغلب وقتي أمس ما كنت عند الكمبيوتر. ما علينا، خلونا نحط الملابس اللي أعتقد إنها تستاهل الريد كاربيت من أسبوع لندن. 

من اليمين العروض ل: إيرديم، لورين سكوت، برين و هاوس أوف هولاند

ما أقدر أقولكم قد إيش عاجبني الفستان البنفسجي من هاوس أوف هولاند، أتمنى بجد أشوف على الريد كاربيت (سيينا ميلر مثلا) عرض هاوس أوف هولاند عجبني بشكل عام، أعتقد أنه أحسن من مجموعة الخريف، أتمنى أشوفه بهوليوود أكثر، لأني ما أشوف إلا البريطانيين يلبسون له. أعجبني بعد عرض إيرديم، اخترت هذا الفستان ما أدري جمب سوت أعتقد بنشوفها على الريدكاربيت يمكن بوبي دولفين. لورين سكوت كان عرضها بتأثير آسيوي شرقي واضح، أحس بنشوف هذا اللبس على الريدكاربيت (أعتقد معدل) يمكن على نيكول كيدمان، لأن لورين سكوت هي ستايلست نيكول. 

من اليمين: تمبرلي لندن، بيتير بلوتو، ماريوس شواب و كريستوفر كاين

تمبرلي لندن له حضور مو قليل على الريد كاربيت، كانت بهذي المجموعة فيه أكثر من لبس عليها طبعات الحيوانات هذي، حبيت إنها حاطتها هنا مع طبعات زهور، أتمنى أشوف كيري واشنطون بهذا اللبس من بيتير بلوتو، أعتقد بنشوف ملابسهم أكثر خصوصا مع تعاونهم مع تارقيت (قصدي يمكن بحفلة إطلاق المجموعة). الفستان اللي من كريستفور باختصار لو ما شفت أحد لابسه بأموت، لأنهم أغبياء يشوفون فستان زي كذا و الأغلب أنهم يقدرون عليه، و لا يلبسونه (قصدي السلبيرتي). 

إذا كنتوا تابعتوا عروض لندن، وش أكثر شيء عجبكم؟ 

Best Dressed: July '13

ما أعرف ليه أحس شهر يوليو مر ببطء، على الأقل بالنسبة لي، يعني فيه ملابس انتبهت لها بداية الشهر، يوم رجعت أناظرها من جديد حسيت إنها أقدم من شهر يوليو. بداية الشهر كان فيه عروض الأوت كتور، غير كذا ما أتذكر فيه أحداث مهمة، غير بريمرات متفرقة. بشكل عام أقدر أقول الملابس الحلوة كانت قليلة، بس بالنسبة لي كانت تستاهل. 

بالنسبة لي أعتقد إن هذي القائمة أكثر القوائم اللي سويتها تنوع. الشيء اللي مستغربته (على نفسي) على إني أحب تيلدا، أظن إن هذي أول مرة تكون بقائمة أحسن لبس للشهر. 

أعتقد أول لبس تأكدت إني ما راح أشيله من القائمة المقترحة لأحسن لبس، هو كايت بلانشيت بالفستان الوردي من بلانسياقا. مع إنه لذوقي الخاص بأفضل ألبسه من دون القطعة اللي فوق زي هنا، لكنا قدرت تطلع فيه بشكل حلو. لي لي  سوبايسكي ترجع بديور مرة ثانية لقائمة أحسن لبس، هذي المرة بجمب سوت. أعجبني فستان كريستوفر كاين على كايت بوسورث (فوق يسار) صراحة لما شفت مجموعة كاين للخريف، كانت شاكة أنه فيه أحد ممكن يلبس بذات الفساتين بشكل حلو، لكن كايت بالنسبة لي قدرت، خصوصا مع مكياجها و تسريحتها. 

حبيت مرة شكل هيلين ميرين (يسار تحت) حسيته مناسب لعمرها، بنفس الوقت مو لبس جدات. آخر شيء بأعلق عليه هو نتاليا بشانيل، أظن أنه هذا اللبس أكثر لبس تقليدي، لكن بالنسبة لي، شكل الجاكيت و شكل التنورة (من تحت) شوي أعطت للبس شكل مختلف، خصوصا مع وجه نتاليا اللي مرة "فريش". 

Create your free online surveys with SurveyMonkey , the world's leading questionnaire tool.

Best Dressed: March '13 Winner

أعرف إني متأخرة شوي، (بالعادة أحط النتائج قبل يومين من النهاية) ما أعرف إذا يعجبكم كذا أو لا، يعني أحط النتيجة بآخر يوم من الشهر، و أول يوم من الشهر اللي بعده أحط التصويت؟ قولوا لي إيش يعجبكم.

نروح الحين لنتائج تصويت شهر مارس (و ترا ما لقيت خدمة تصويت أحسن من هذي لحد الآن).

اللبس اللي اخترتوا و فاز ب 30  بالمية من أصواتكم، كان شكل أولقا كوريالينكو بكريستوفير كاين. على أنه اللبس عاجبني إلا إني بصراحة كان ودي بفستان وردي ثاني يفوز، هو فستان بوني شين من كلوي. ما علينا، نرجع لأولقا و لبسها من كريستوفر كاين. أولا أبغى أقول أكثر من الفستان حبيت طريقة تنسيق اللبس. من الصنادل اللحمية، للنظارات الشمسية اللي إطارها وردي بعد (تقريبا نفس الدرجة)، و أكيد المكياج و الشعر. 

أعتقد هذا اللوك مناسب لمناسبة شبه رسمية صباحية مره، خصوصا أنه ما فيه شيء تقريبا بلون فاقع أو قوي. 

بكرا إن شاء الله بتكون فيه أحسن لملابس لشهر أبريل. زي ما قلت لكم قبل لو تعرفون خدمة جيدة للتصويت، بأكون شاكرة لو دليتوني عليها. 

Best Dressed: March 2013

زي ما قلت لكم راح أحط لكم خيارات أحسن لبس لشهر مارس. على عكس شهر فبراير، شهر مارس كان مرة فقير لكن مو سيء بس بصعوبة جمعت 8 ملابس للشهر، و لا احترت كثير لمين يجلس و مين يروح.

حاولت إني أنوع بالاختيارات لهذا الشهر، لكن لما جمعتها اكتشفت إن أكثرها أشياء "دلوعة" بس مو دلوعة مرة، لكن ألوانها باستيل أو قصاتها "دلوعة".

من أهم الأشياء أنه غير فيه فستانين ورديات هذي المرة، هذا الشهر الثالث اللي أختار فيه فستان وردي (من فترة و أنا حابة لأشياء اللي باللون الوردي/ اللحمي). من الأشياء اللي حبيتها هذا الشهر، حبيت إن إيما ستون لابسة تي شيرت تحت فستان سترابليس (ما أعتقد إني ممكن أسويها، لكن أظن إنها فكرة حلوة و فيها إضافة مختلفة للفستان "تقليدي"). 

بعد حبيت اختيار دايان كروقر للجزم، فيه كثير ما أعجبتهم لكني حبيتها أحس إنه أعطت الفستان حدة شوي. من الأشياء اللي بعد لازم أقولها، إن شعر نيكول كيدمان عجبني مرة، من زمان ما شفت شعرها كذا حلو. 

المهم نجي للتصويت، اخترت خدمة جديدة، بس ما أعجبني تصميمها (لو تعرفون خدمة ثانية قولوا لي باكون شاكرة). 

Create your free online surveys with SurveyMonkey , the world's leading questionnaire tool.

RED

نرجع مرة ثانية لأهم موضات الشتاء اللي جايي ... من أكثر الثيمات اللي استخدمت لعروض شتاء 2012 كانت (الظلام، السواد، القتامة) أي معنى مقابل لكلمة dark بالإنجليزي. الظلامية أو القتامة ما كانت بس بالألوان، لكن حتى بشكل الملابس نفسها، أكثر من عرض كان مستوحى من العصر الباروكي و القوطي. مع ذلك كان فيه بكثير من العروض اللون الأحمر القاني. ما أعرف السبب الثورات العربية، أو أيش، لكن اللون الأحمر بيكون كثير للشتاء الجاي. 

علشان أكون صريحة، ما قد حسيت بالراحة باللون الأحمر، فأنا لا سوداء و لا بيضاء علشان أحس إن اللون يعطني شيء، كل اللي أحسه إني أزيد صفار :S ... يمكن لأنه لون قوي أخاف منه، لكني أحب كثير الإكسسوارت الحمراء (شنط، جزم، مجوهرات). أعرف إننا بنشوف كثير السنة هذي على الريد كاربيت هذا اللون، لكن الشيء اللي مو متأكدة منه، لو تحولت هذي الموضة للهاي ستريت كيف ممكن ألبس "حمار" بهذي الكمية، من دون ما أحس أنه بيغطي علي و لا يشوف الناس مني إلا شيء أحمر يتحرك. 

كيفكم مع اللون  الأحمر؟ ممكن أو قد لبستي شيء أحمر بالكامل و حسيتي أنه عطاك ما غطى عليك؟

Wearing Collage

بعروض الربيع اللي كانت بالخريف اللي فات، كالعادة كان بعرض كريستوفر كاين بلندن شيء مختلف، و هي ملابس شيفون أو أورقانزا، عليها ورود، مو مطبوعة عليها، كأنها مقصصة من قماش ثاني و محطوطة عليها. أكيد أعجبتني، لكن ما توقعت أنه بتكون بمكان ثاني غير بملابس كريستوفر كاين. 

نهاية الإسبوع اللي فات طلع اللوك بوك لعروض بري فول 2012 إيرديم. العرض بالنسبة لي ما كان مميز، مثل دايم مليان طبعات ... لكن و أنا جالسة أتفرج تقريبا من آخر الأشياء اللي كانت باللوك بوك، هو هذي التنورة الرمادية اللي على اليمين. أعجبتني مرة التنورة، و تذكرت عرض كريستوفر كاين اللي قلت لكم عنه (على اليمين وحده من الملابس اللي كانت عليها ورود). 

أعجبتني الفكرة بكل المرتين مرة، يمكن حبيت ألوان كريستوفر كاين أكثر، لكن عجبتني تنورة إيرديم. الشيء اللي أتمناه الحين، بعد ما شفنا أحد غير كاين مسوي هذا الشيء، هل ممكن نشوف هذي الأشياء إن شاء الله بمحلات الهاي ستريت؟ إن كان فيه محل راح يسويها أرشح توب شوب. 

Cool Girls

من أكثر العارضات اللي يعجبوني دري هامنقوي، ما أعرف بس أحس إنها "كووول"، دايم مايك آب خفيف، ملابس بسيطة ... مرة تعجبني. الشيء الثاني اللي صاير يعجبني الفترة هذي نوعية من اللبس ما أعرف وش هي، بس كذا بعد أحسها "كووول" (أعرف إني كأني توي متعرفة على الكلمة، بس أحسها هي اللي تعبر عن بالي.

بأسابيع الموضة اللي كانت قبل شهرين، أظن بعرض فالنتينو كانت أليكسا شونق جاية، لعرض فالنتينو، اللي يعرفني قبل يعرف إني ما أحب لا أليكسا، و لا ستايلها كثير (طبعا هي تعتبر إن ستايلها ولادي)، لكن بذاك العرض كان شكلها بالنسبة لي غير.

أول مره شفت الصورة، كانت الجزء العلوي بس، مع أنه هذا شكل أليكسا بالعادة، يعني ما تسوي شيء غريب بشعرها، لكن أعجبني أختيارها للنظارة هذي مع فستان الفالنتينو الأحمر هذا ... حبيت كيف خلته فستان كاجوال مره، يمكن لأني شفته قبل على ريتشيل وايسز، و كانت مخليته فستان فخم مع تسريحة شعرها، و المجوهرات اللي لابستها معاه.

مو ما عجبني على ريتشيل، لكن حبيته مره على أليكسا ... بعد فترة شفت الصورة كاملة و حبيت شكلها زيادة، خصوصا إنها لابسة معاه سلبيرز حقات مارك باي مارك جايكوبز، السليبرز كانت عاجبتني من الموسم اللي فات، بس لما جت التخفيضات حقت نيت أي بورتيه، لقيتها مخلصة، فلما شفتها على أليكسا انبسطت أنه أحد لبسها بشكل حلو.

المهم نرجع للوك اللي سويته اليوم ... مع كل التعاونات اللي بين المصممين و بعض الماركات آخرها فيرساتشي لـ H&M زي ما تعرفون (ترى جزء من المجموعة كان بفرع المملكة، لو لحقتوا عليه و شريتوا منه شيء قولوا لي :).

أمس (على ما أظن) كان فيه حفل لتعاون بين كريستوفر كاين، و جي براند للجنوز، و كان جاي بعض هذولا الناس اللي يجون الحفلات :) و كانت من بينهم دري هامنقوي، طبعا اللي جايين كانوا لابسين قطع من هذي الجنوز. الشيء اللي أحبه بكريستوفر كين هو أنه يعرف يسوي ألوان نيون تشهي، يخلك كل مرة تحسين إن دولابك فاضي لأن ما فيه قطعة نيون.

Cool by alorwa featuring cutler and gross sunglasses

MTWTFSS Weekday jumper shirt, €7,50
Mulberry low jeans, $310
Keds suede shoes, $45
Proenza schouler bag, $2,804
Cutler and gross sunglasses, $495 قلت لكم هذي محاولة أجمع فيها كل الأشياء اللي أحس إنها بتخليني كول، سويتير نيون ... سنيكيرز و شنطة بروينزا سكولير .. دري بالصورة لابسة واحد من بناطيل المجموعة برتقالي نيون (واضح :) و قميص يلمع (قصديري) أعتقد أنه كريستوفر كين ريزورت 2012 ... لو بغيتوا تشوفون المجموعة، أو تشترون منها تلقونها هنا. 

Straight Orange

من فترة ما تكلمت عن ملابس أحد، جت الأعياد و رأس السنة، و دخلوا الناس ببيات شتوي. بس أمس كان فيه جوائز اختيارت الناس people's choice award كان فيه ناس لابسه لبس حليو، بس قررت إني أكتب عن درو باريمور اللي كانت جاية لحفلة ثانية لمجلة Covergirl لابسه برتقالي من جيل ساندر.

ما أعرف أنا توي أنتبه، أو صدق السلبرتي كاثر لبسهم لمصممين مختلفين و منهم جيل ساندر ... تستاهل جيل طلعت بمجموعة حلوه مره، و أنا وقتها تكلمت لكم عن الشنط الي كانت بالمجموعة، و فيه بعد لوك اخترته لقائمتي لأفضل أشياء ميلانو ...

الي باتكلم عنه اليوم أهم شي اللون البرتقالي اللي لابسته درو، عجبني اللون، عجبني شعرها هذا اللي كأنه مجبص، ما أعرف كيف، بس مو أول مره تطلع فيه ....

المهم اللون البرتقالي أتوقع بيكون كثير بملابس الصيف هذي السنة، و شفناه بكثير عروض لربيع 2011.

من كثير ملابس كان لونها برتقالي ... هذي أكثر الملابس الي أعجبتني، أولا مع الفستان الي على اليسار من كريستوفر كين دانتيل وردي، مع خطوط برتقالية، غير القماش، أكثر شي أعجبني طول الأكمام.

الوسط تنورة من جيل ساندر بعد، التنورة أحسها خطرة شوي، ممكن تطلع مره قبيحة، أو مره حلوه ... آخر لبس من هيدر أكيرمان، حبيت هذا الفستان، حسيته مصمم على الموديل نفسها، يعني المصمم كان يربطه و يخيطه على العارضة، مع عقد ذهبي طويل مع تعليقة كبيرة، أحسه بيطلع هيت لأي ريد كاربيت.