السبت، 25 فبراير، 2012

Jil Sander: Great show, great venue

اليوم كان عرض لواحد من أحب الماركات لي اللي تعرض بميلانو ... عرض جيل ساندير اللي فيه عرض مصمم الماركة تقريبا من 6 سنوات راف سايمونز مجموعته الأخيرة للماركة، بعد ما أعلن أنه بيتركها، و بترجع المصممة الأصلية للماركة جيل ساندير (فيه إشاعات أنه بيصير مصمم ديور). 
راف بالسنتين الأخيرة (على الأقل بالنسبة لي)، سوى عروض من أحسن العروض بالنسبة لي (شيكوا هنا على بعض تصاميمه للماركة بالستة سنوات اللي فاتت من 2006). 


غير أنه المجموعة مرة حلوة (ما تقل جودة عن مجموعاته اللي فاتت) فيها ألوان فاتحة كثير، مع ذلك فيها دفى ... فيها شيء شتوي باهت و كئيب بس مو بقبح ... ما راح أتكلم أكثر عن المجموعة اللي أعجبتني (شيكوا عليها هنا). لكن الفنيو اللي سوا فيه العرض كان خيالي بالنسبة لي، قريت أنه عنوان العرض كان "الحديقة السرية" مو متأكدة، لكن الديكور سحرني بشكل غير طبيعي، جدران و أرضية بيضاء، و عواميد بيضاء زي ما أنتم شايفين، فوقها مزهرية الورود اللي فيها تقتل (ألوانها، أشكالها، ترتيبها ... كل شيء)، و أكثر شيء عاجبني أنه كل مزهرية لها شكل مختلف عن الثانية (ودي أعيش هناك :). 

أتمني أشوف هذي المجموعة تنجح (يعني على الريدكاربيت)، و متحمسة أشوف جيل ساندير وش راح تسوي لماركتها اللي تركتها 6 سنوات؟!!