Matching Green

ما أدري إذا تتذكرون موضوع كتبته مرة عن أنجلينا جولي (قبل ثلاثة سنوات). عن لبس لبسته و قلت إنه يحتاج حلق أخضر (زمرد). (هنا تلقون الموضوع). الأسبوعين اللي فاتوا كان فيه ملابس كثير حلوة، و فيه فوق كذا مناسبات مرة كثيرة (ترويج أفلام، و افتتاح معارض). من هذولي النساء اللي طالع لهم أكثر من مناسبة، و أشكالهم كانت حلوة: آن هاثواي و كيرا نايتلي. 

آن بحملة ترويجية لفلمها الجديد، و كانت لابسة فستان فضي كله ترتر من مجموعة ويس قوردون الأخيرة (ما قد تكلمت عن هذا المصمم هنا، لكني أعتقد أنه من المصممين الإمريكان الجدد المميزيين. المهم آن بدل ما تلبس جزمة سوداء (زي ما يمكن يجي على بال أي أحد بيلبس فستان زي كذا) لبست جزمة خضراء. نفس الشيء كيرا مع فستان أسود و كحلي من نينا ريتشي لبسته أمس لجوائز قافورنير، اختارت جزم خضراء، بعد بدل السوداء اللي يمكن تجي على بال أغلبنا.

 الرابط بين كيرا و آنا و أنجلينا هو الحلق الأخضر اللي تمنيت وقتها أنجلينا تلبسه مع فستانها الإيلي صعب، آن و كيرا كلهم طقموا الجزم الخضراء مع حلق أخضر، و أعتقد النتيجة مرة حلوة و أنيقة. ما أعرف إذا بنشوف أحد ثاني أو لو حتى كيرا و آن مرة ثانية بنفس الطريقة (جزمة خضراء مع حلق أخضر)، لكن ما أعتقد أنه شيء ممكن أمل منه، لأنه موب مزعج و لا هو كثير (من وجهة نظري)، و لا أعتقد إن حلق أخضر ممكن يكون سيء أبدا. 

أنتم وش رأيكم؟ أعجبكم الحلق مع الجزمة الخضراء؟ قد لبستوها؟ تفكرون تلبسونها؟ 

The Dress

أمس أو قبله كان فيه مناسبة ما أعرف وشي هي، بس طلعت فيها كيرا نايتلي. أولا خلوني أقولكم إني ما كنت أحب كيرا أبدا، ما كان فيه سبب معين، بس تمثيلها يغثني. و كنت أتنرفز من اللي يقول عنها جميلة. إلى الآن مقتنعة برأيي، بس صرت أستلطفها لأن أحب إنها ما تعرض حياتها للعالم علشان تلقى اهتمام. ما علينا من رأيي فيها، خلونا نبدأ بالموضوع. 

نرجع لكايرا، كاير بالمناسبة كانت لابسة فستان تل (الصورة الثالثة على اليسار) أول ما شفته حسيته يشبه فستان من شانيل لابسته مرتين قبل، بس لما شفت الأكمام شكيت، و استبعدت إنها تلبس نفس الفستان مرة ثالثة، بس صار نفسه :)

المرة الأولى 2008: 

شعرها كان أطول المرات الثلاثة، و فارقته بالنص، و لابسة كيلون أسود و جزمة سوداء من دون إكسسوار.

المرة الثانية 2013:

كان بزواجها هذا الصيف، لابسة طوق ورد صغير، نظارة شمسيه، عقد ناعم، و جاكيت شانيل، مع جزم لوفير. 

المرة الثالثة 2013:

فرقة على جمب، لابسة توب تول مع شك تحت الفستان، و صنادل ذهبية. 

من الثلاثة يمكن بعد كل هذي السنين عرفتوا أي واحد حبيته أكثر، لبس الزواج مع النظارات و لوفير و الجاكيت و طوق الورد كلعا أشياء تخليني ما أمل من هذا اللوك. يمكن الأول ما حبيت فيها موضوع الكيلون، ما أعرف ليه، شيء يخليني أحس لما يكون الفستان سترابليس، ما يصلح معاه كيلون بذات غامق، لازم يكون فيه توازن بين فوق و تحت. 

أنتم عندكم كذا فستان تحبونه و لبستوه أكثر من مرة بأشكال مختلفة، ما راح أقول زي كايرا، لأني ما أظن فيه أحد قد لبس فستان زواجه قبل لمناسبة ثانية، بعدين لبس فستان الزواج بعد الزواج من جديد لمناسبة جديدة. خلونا نشوف إذا ممكن تلبسه مرة رابعة :). 

K^3

أعرف إن العنوان بايخ، بس لما جيت أحفظ الصورة، و بالعادة أحفظ الصور على أول حرف من أسم الشيء اللي موجود بالصورة، فاكتشفت أنهم كلهم أساميهم تبدأ بحرف K. ما علينا الموضوع ماله شغل بأساميهم، بس أنه الشيء اللي يشترك فيه هذولي الثلاثة، إني ما أحبهم :). 

 زي ما قلت لكم صحيح إني ما أحب الثلاثة بدرجات مختلفة، و بعد لأسباب مختلفة (ما يهم إني أشرحها هنا) لكن للحق (و علشان تعرفون إني موضوعية، و لا تعميني المشاعر P:) أعتفد أنهم أكثر ثلاثة أشكالهم أو على الأقل (لوك واحد) لهم أعجبني بالفترة الأخيرة. 

كيرستين ستيوارت صايرة بكل مكان لأنها تروج لفيلمين لها On The Road و أعتقد آخر حلقة من Tewlight (وش أسوي ما أحب الفيلم). المهم إن كريستين طلعت بأكثر من لوك عجبني هذا البلانسياقا واحد منهم، أعجبني كل شيء باللوك من الأكسسوار للمكياج (المكياج مرة حلو) و أصلا قلت لكم قبل إن المجموعة الأخيرة لبلانسياقا كانت عاجبتني مرة، و يمكن أكثر شيئ حبيته إنه و أخيرا ابتسمت :). 

اللوك الثاني من كيرا نايتلي اللي رجعت تروج لفيلم آنا كارنينا، هذي المرة بأمريكا (الفترة اللي فاتت كانت ببريطانيا). و طلعت بهذا الفستان (اللي أعتقد أنه بس مصمم لها) من إيرديم بعد مجموعة ربيع 2013 الأخيرة (فيه فستان يشبه له بالمجموعة). عجبني لونه مع إني ما قد تحمست لهذا اللون على فساتين سهرة، أعجبتني النقشات، و أعجبني بعد شعرها، و أهم شيء لون الروج اللي أعتقد أنه عاطي حياة للبس.

آخر وحدة هي كايت موس. صراحة ما أعرف متى آخر مرة كان شكل كايت موس محترم (حتى بزواجها كان شكلها تعبان) بس بحفل توقيع كتاب لها جت بهذا الفستان من بعد مجموعة مارك جايكوبز الأخيرة. كل شيء فيها أحسه "طازج" أعجبني إن مكياجها ما كأنه مكياج (طبعات اللابورد كثير مرات تصير رخيصة) و مع مكياج ثقيل أحس إني على طول يجي ببالي بأحسن الأحوال الكرداشيانز (أعتذر للي يحبهم) بس أشكالهم بالنسبة لي دايم رخيصة :). 

المهم ما فيه شيء ثاني أقوله لكم، إلا إني أوصل لكم رسالة إني أقدر أقول كلام زين عن أحد ما أحبه P:. أنتم شرايكم بالثلاثة؟ بهذي الملابس و بشكل عام. 

* عدلت العنوان اللي كان عبارة عن 3 حرف K جمب بعض، لأني تذكرت أنه الاختصار هذا هو اختصار لمنظمة إرهابية أمريكية مسيحية عنصرية (لو متحمسين تعرفون عنها تلقون هنا كلام أكثر عن المنظمة). 

Elie Saab Takes Over the Red Carpet

ما أعرف ليه هذي السنة أحس بفخر بإيلي صعب، صحيح أنه لبناني و مالي شغل فيه، بس جالسة أتذكر كيف قبل أكثر من عشر سنوات لما كنت أقلب كتالوقات الأزياء مع خالاتي، علشان زواج وحده منهم ... أتذكر كيف كانت تصاميمه، و كيف الحين صار. 

أتذكر بعد صدمتي الأولى لما كنت أتابع الأوسكار 2001 و اللي فازت فيه هالي بيري، أنه فستانها من تصميم إيلي صعب... ذاك اليوم ما كنت مصدقة أنه مصمم عربي فيه أحد يعرفه، طبعا ما كنت أعرف عاليا، لكن الفرق بينه و بين عليه، إن أيلي صعب بدأ بلبنان بعدين طلع لباريس، لكن عليه أعتقد حتى ما رسم رسمه بتونس. 

المهم السنة هذي أعتقد ما فيه مناسبة صارت، إلا و كان على الأقل واحده من الحاضرين لابسة لإيلي ... ما أعرف لازم يشكر الناس اللي تشتغل بالعلاقات العامة معاه، أو يشكر إيلي على فساتينه اللي إذا ما كانت حلوه، على الأقل ما قد صار أي فستان على أي أحد شين :). 

زي ما قلت لكم قبل، السنة هذي قررت إني أجمع الفساتين اللي أعجبتني من بداية السنة، علشان ما أنساها لما تجي نهاية السنة، لو بغيت أكتب عن أحسن الفساتين بالسنة اللي بتخلص ... المهم، بعد فترة لما شيكت على قائمتي اكتشفت إن القائمة مليانة فساتين من إيلي صعب، ففكرت إني أشارككم، باللي أشوف إنها أحسن، و أشوف تصوتون على أحسن واحد بالنسبة لكم ... من المجموعة اللي قدامي، بالنسبة لي الفستان اللي على اليمين من مجموعة أوت كتو خريف 2011 اللي لابسته كيرا نايتلي، أعجبني مرة، أعترف إني يمكن حتى ما انتهبت له لما كنت أقلب المجموعة، لكن لما لبسته كيرا عجبني مرة، خصوصا أكمامه. 

قلت لكم قائمتي كانت طويلة، حتى أطول من هذي الثمانية فساتين، لكن قلصت المجموعة بمساعدة خواتي :) ... المجموعة هذي أعجبني فيها الفستان الأخضر اللي على زوي سالدانا من مجموعة ربيع 2012، للحق ما شفت المجمعة زين، لأني عجازة، لكن بشكل عام قلبتها، عجبتني الألوان القوية فيها (فيها أخضر و أزرق نيلي، و أصفر) لأنها ألوان ما أتذكر إن إيلي قد استخدمها (بهذي القوة)، لما شفته زي ما قلت لكم على زوي، عجبني خصوصا مع لون بشرتها. لكن المفضل عندي من هذي المجموعة (مو كفستان) كشكل عام هو ليا سيدو (يسار) بالفستان الأوت كتو ربيع 2011، ما أحس إني من فترة طويلة اهتميت كيف جسم أي وحده، مادامها تلبس لبس يناسبة و يطلعه حلو، لكن أظن جسم ليا هو اللي أعطى شكل للفستان، أحب كيف إنها مليانه برشاقة (ما أعرف كيف آصفه)، لكنه يعطي الملابس شكل مختلف. 

Nude Gowns

الجمعة اللي فاتت بدأ مهرجان فانيسيا (البندقية) السينمائي، من زمااان أحب هذا المهرجان، و لما كنت أحب كل شيء إيطالي كنت مقهورة أنه الناس تهتم بكان، مع أنه مهرجان فانيسيا أقدم منه أو حتى أقدم مهرجان سينمائي موجود بالعالم :). المهم المهرجان بدأ، و يمكن أكثر شيء فرحني أنه بدأت فساتين من قائمتي للفساتين اللي توقعت إنها تنلبس من عروض أوت كتو خريف 2011 يشخط عليها من القائمة، لأنه أنلبست صدق :) (شيكوا على القائمة هنا).

أهم شيء أنتبهت له أنه الفساتين النود، لحد الآن هي المسيطرة على المهرجان، و أغلبها حلوة مرة. 

أول من بدأ لبس الفساتين النود أو اللحمي بالمهرجان هي ديان كروقر بفستان من إيلي صعب (شوفوه بالقائمة اللي توقعتها) لكن ما عجبني التعديل اللي عدلته على الفستان. 

بعد يومين طلعت كيرا نايتلي بعد بفستان توقعت أنه يلبس من فالنتينو، عجبني الفستان كثير، صحيح فيه كثير ما أعجبهم، بس أنا أعجبني كثير من العرض، و السبب اللي خلى هذولا الناس ما يحبون الفستان، هو السبب اللي خلاني أحبه، يقولون أنه محافظ بزيادة (لأنه طويل و أكمامه طويلة)، لكن أنا من زمان تعجبني هذي النوعية من الفساتين، و الأهم أنه مغطي جسم كيرا (ما أحب نحفها الزياد، ينرفزني). 

اليوم اللي بعده جت قوينث بالترو بفستان من برادا، الفستان كان مرة حلو، كثير حسبوه فالنتينو، لكن طلع برادا، اللي عجبني بالثنتين (كيرا و قوينث) أنهم مطقمين الإكسسوار مع الفستان (الجزم، و الكلتش) ما أعرف كيف طلعت معاهم حلوة و راقية مو شغل بربسة، بس أعجبني (ما أتوقع أسويه، بس حلو). 

أمس بالمهرجان طلعت جيسيكا تشاستين بشكل مرة حلو، بعد بفستان نود من مجموعة إيلي صعب أوت كتو الأخيرة، الفستان كان حلو، المجموهرات اللي لابستهم معاه حلوات (حتى قوينث)، مكياجها، تقريبا كل شيء أعجبني باللوك حقها، و لأني حبيته مره، و لأن إيلي صعب يستاهل أنه يمدح على شغله (اللي ما عمره أبدا صار شين على أي أحد) كان لازم تشوفونه من زوايا مختلفة (تلقون صور ثانية هنا). 

شرايكم بالفساتين (اللحمية/النود)؟

Lemony Summer

أحب الليمون، و لا أعرف ليه لما يجي ببالي يجي بالي شيء صيفي و انتعاش، مع أنه الصدمة الكبرى بالنسبة لي كانت، لما عرفت أنه فاكهة شتوية ؟!! رحت أسأل أمي، بس للأسف أمي أكدت المعلومة، و خلتني أعيش بدوامة مالها نهاية. كيف نعيش طول عمرنا و ببالنا أنه الليمون رمز الانتعاش، و بالنهاية يصير يطلع بالشتاء؟
نجي لموضوع اليوم وهو اللون الليموني، مو الليمون نفسه ...

قبل أسبوع تقريبا كان على ما أظن فيه حفل لسيفورا أو شيء زي كذا (منتج تجميل)، و كانت جاية سولانج نولز (أخت بيونسية) لهذا الحفل لأنها على ما أعتقد أنها وجه لهم.
المهم سولانج لها ستايل مختلف مرة عن بيونسية، (شعر أفرو، ألوان أفرو، نقشات أفرو) كثير مرات تطلع بشكل حلو، بس بعض المرات أحسها "أوفر" شوي. لكن بهذيك المناسبة، ما كانت أوفر إطلاقا، شعر أفرو و بدلة ليمونية مع قميص أبيض، سلسا و صندل.
اليوم شفت الصورة هذي لكيرا، كيرا ما أعرف ليه بس أحس من زمان ما عجبني شيء عليها، لكن هذي التنورة الليمونية المكسرة (التكسير راجع بقوة) مع قميص أبيض نفس الشيء و صندل.
قبل بعد أيام شفت الصورة هذي لميشا بارتون اللي راجعة تلبس بشكل نظيف، مو مكركب، بعد لابسة تنورة ليمونية قصيرة، مع قميص حرير عليه خنافس. ميشا يمكن أختلفت عن كيرا و سولانج بأنها لبست لبس ملون أكثر، بس يظل ألوانه هادية و صيفية مرة.
بس أذكركم كيف لبست السنة اللي فاتت ميشا بنطلون ليموني، و علشان تعرفون بعض الأشياء ما تجي بالساهل، صح يطلع الشكل متعوب عليه بس يحتاج بعد شوي تفكير.

الصور هذي خلتنني أفكر باللون هذا قوة، خصوصا أنه ألوان بشراتهم  مختلفة مرة، و كلهم لابق عليهم الون، يعطي جو صيفي بقوة، بس يمكن أهم شيء فيه أنه يبقى اللوك بسيط قد ما يمكن، و إن كان فيه شيء ممكن ينلبس معها (جزم، شنط) أظن بني أفضل خيار.

Light beige almost white

من فترة و أنا جالسة أدور شي أكتب عنه، و عجزت أحس كل شي مو كامل، فكرت أنه أكتب عن كيرا نايتلي و إنها الفنرة الأخيرة طلعت بأكثر من فستان من شانيل من الثلاث المجموعات الأخيرة (تحلل غيبتها)، بس ماش ما بغيت أكتب شيين عن شانيل ورا بعض.

أمس سيينا ميلر أنقذت الموقف و جت لحفلة اليونسكو بشكل أعجبني مره.

الفستان الي طلعت فيه سيينا أعجبني مره، الفستان من ستيلا مكارتني قد كتبت عنه قبل، وزي ما تشوفون النسخة الي كانت باللوك بوك، و الي تنباع، و بعد الي شفتها على السلبرتي قبل كانت سوداء، الفستان كان عاجبني بس النسخة البيج مع المجوهرات و المايك آب و التسريحة خلوه مره حلو، من كثر ما أعجبني انتبهت أنه الفساتين البيج لبست من أكثر من سلبرتي (سلبرتي معناه واحد أو وحده مشهورة بس بمجال الترفيه) (للي يعرفون لا يقولن خير، لأني لقيت بحث وش معنى سلبرتي).

أول وحده جت ببالي هي كيرا نايتلي بالفستان الشانيل من مجموعة الأوت كتو الأخيره، الفستان ما عجبني مره على الموديل (زي كثير من المجموعة)، بس كيرا بقصتها الجديده، تخلي كل فستان حلو.

إيفا منديز لابسه فستان من ليلا روز، الفستان عجبني من تحت شكل قماشه مره حلو الشعر بعد حلو ...

فترة كنت أدور لي على فستان سهرة و كنت أدور فستان بلون فاتح، إن شاء الله الحين لو بغيت فستان سهرة، أظن اللون البيج متوفر أكثر الحين.