Best of LFWFW 2015 (Back to Black)

ما أظن أسبوع لندن كان زي أسبوع نيويورك، لكن أعتقد بشكل عام العروض كانت كويسة، و الأهم إن مجموع العروض بلندن أقل بكثير من نيويورك، فأكيد الأشياء الحلوة بتكون أقل. الشيء الغريب بالنسبة لي كمية الفساتين السوداء الحلوة بالعروض، لدرجة أضطريت أحطها لحالها، لأنه حرام ما أتكلم عنها، و بعد حرام الفساتين و الملابس الملونة ما تآخذ مساحة هنا. 

ببدأ بالسوداء، بعدين بأرجع و أتكلم عن الملونة، أعرف إن الفساتين السوداء مو مفضلة عند كثير، أتذكر مدرسة التفصيل مرة سألتني عن ألوان ملابس السهرة اللي عندي و قتها كان كل اللي عندي فستانين، و كلهم أسود. أتذكر هاوشتني و أعطت محاضرة عن إننا صغار و لازم نلبس ملون. ما أتكلم كثير عن الملابس السوداء هنا مو لأني تعقدت من كلام المدرسة، لأني إلي الآن، أعتقد أسهل شيء إنك تطلع حلو بالأسود، اسألوا جنيفير أنيستون. و بعد إنك تسوي فستان أنيق أسود. 

هذا ما يعني أنه أبدا ما فيه فساتين مميزة لونها أسود (إذا تتذكرون فستان أنجلينا جولي الأسود من أتلييه فيرساتشي). المهم هنا أحسن الملابس السوداء عندي من لندن: أولا خلونا نتكلم عن كمية الفخامة بالتيور (القطعتين جاكيت و تنورة، الثاني من اليسار فوق) فوق من روكزندا، عجبني مرة طابع الثلاثينيات فيه،  ما ببالي أحد يلبسه بهذا الشكل، بس أحس ممكن يطلع حلو على بيونسية. أعجبني بعد الفستان (الأول من اليمين تحت) من هاوس أوف هولاند، أحسه بيكون حلو على أليكسا شونق، بعد مرة أعجبني القطعتين (تحت الثاني من اليسار) من دايفيد كوما، أحسه بيكون حلو على أيميلي بلونت. 

أول شيء خليني أقول إني كنت حاطة بالملف فستان من جوليان مكدانولد، و قبل ما أكمل كتابة الموضوع طلعت تايلور سويفت و لبسته، صراحة توقعته يلبس بس مو من تايلور، شوفوا الصورة هنا. أعجبني مرة الفستان الأحمر (فوق الثاني من اليمين) من أنتطونيو بيراردي، أحس ممكن ناومي واتس بتلبسه، ودي لوبيتا تلبس اللبس الملون من جونثان سانودرز (فوق الأول من اليسار). أعرف الجاكيتات مو شيء مهم على الريدكاربيت، بس أعجبني مرة البالطو من إيرديم، أعجبني كيف التدرج مو بس بالألوان، لكن بالأقمشة، من صوف، لشيء حرير أو ستان (ما أعرف وش القماش هنا). التنورة و الكنزة اللي تحت من برين مرة أعجبتني، أحس ممكن تكون حلوة على كلوي مورتيز. بعد عجبني اللوك اللي فوقه من ماثيو ويليمسون، أعرف إن شكله ممكن يكون قديم (أول الألفية) بس عجبني، ما أتذكر إني قد شفت بوبي دوليفان بماثيو وليمسون، بس أحس هذا بيكون حلو عليها. 

أنتم وش رأيكم بلندن لو كنتوا متابعين؟ و بالفساتين السوداء؟ 

Tacky is the New Class.

لفترة طويلة كنت أقول، لما شفت هذا الإيديتوريال، عرفت وش ستايلي بالضبط، لأن هذا كل شيء أتمناه بلبسي، بس شيء واحد مو مضبوط، إني ما ألبس أبيض كثير، مو لشيء بس لأني أحب الأسود أكثر. باقي الأشياء كلها أحس تقولي خوذيني (عندي احساس لو الملابس تحس، كان جت عندي من دون ما أدفع فيها فلوس، مو لأني استاهل أو أي شيء زي كذا، بس أحس رحمة فيني، من كثر ما أمدح فيها). 

الشيء اللي أعتقد إني أحبه، غير تخليط الأشياء، و هو هنا موجود، مع خلط أشياء مو فخمة أبدا زي الكولا، مع ملابس غالية، أو خلط الترتر مع خطوط و ألوان نظيفة و محايدة.

ثلاثة من الصور اللي اخترتها فيها شيء له علاقة بالكولا، مع إني ما أشربه، بس دايم أحس شعار الكولا و طبعاته مرة حلوة، تعطي شعور ڤينتاج. و ألوانه حلوة. طبعا تعرفون إني أحب الترتر، علشان كذا بعد ثلاثة من الصور الأربعة اللي اخترتها فيها ترتر، ليچينچ أو ما أعرف وش ممكن يوصف من لوي فيتون (أعجبني كيف نسقوه مع شيء بسيط مرة) صار مرة أنيق و مو مبالغ فيه، شنطة أشيش اللي على شكل كيسة مكتوب عليها كوك، و سويتر مارك جايكوب الحمراء. (لو بغيتوا شيء يشبه لها أو علي الأقل يشبه للثانيات منها (مو مرة، بس نفس الفكرة) هنا و هنا تلقونها ب39 دولار، أما شنطة أشيش أرخص شيء لقيته ب 460 دولار. 

هنا تلقون باقي الإيديتوريال من مجلة i-D، ما أعرف إذا حتى أنتم معجبين بهذا الإيديت زيي، أو تشوفنه بايخ، و لا فيه شيء مميز؟ 

Ahlan Wa Sahlan

علشان أكون صريحة معكم، نسيت متى آخر مرة تحمست لشيء بالفاشن بهذا الشكل، قررت إني ما أنام قبل لا أكتب عنه أخاف أحد يعلمكم عنه قبلي (إيه وصلت هذا الشعور إني كأني بس أنا اللي عارفة)، فيعني حتى لو شفتوا الصور قبلي رجاء أعطوني فرصة و لا تقولون عارفين. نجي للموضوع، على أنه من كم موسم كل مرة أشوف صور من عرض أشيش تعجبني الملابس، مع ذلك أظن إن عندي مشكلة بالذاكرة تخليني أنساه إلى الموسم اللي بعده، و لا أفكر إني متحمسة لعرضه. 

أول ما شفت جينز عليه ترتر و مشقق (من العرض) قلت طيب حلو اللي بعده (طبعا لأن فيني نوم)، يوم شفت الصورة اللي فوق يسار (تي شيرت الكولا اللي بالعربي). بدأ عقلي يشتغل و فكرت "مو أشيش هندي؟" أو أنا مضيعة؟ بعدين لما كملت و قريت الشيء الي فيه "شكرا" و "عودتكم" و "بأنتظار" و مع هذي الإكسسوارات، أول فكرة جت ببالي قلت: شكله رايح إجازة بالمغرب و استوحى منها هذي المجموعة (لأني أتذكر أنه أصله هندي). بس كملت و قلت أشوف بعدين. 

المهم غير الكتابة العربية أعترف إني أحب أي شيء عليه كولا و أنا ما أشربها، أحب بعد "الذوق الرخيص" بس بفن (أعرف صعبة، بس هذ اللي يحببني فيه). طبعا ما يحتاج أقول أنه عجبني البمبر اللي عليه ترتر ذهبي، و عجبتني الفضيات (الإكسسوار) مرة. 

نسيت أقولكم أنه يقول أنه استوحى المجموعة من بقالة عربية بجمبه (للأسف ما راح للمغرب P:). 

إذا كان فيه مجموعة إلى الآن ودي أشتري منها، فهي هذي المجموعة أكيد.