الأحد، 15 سبتمبر 2013

Ahlan Wa Sahlan

علشان أكون صريحة معكم، نسيت متى آخر مرة تحمست لشيء بالفاشن بهذا الشكل، قررت إني ما أنام قبل لا أكتب عنه أخاف أحد يعلمكم عنه قبلي (إيه وصلت هذا الشعور إني كأني بس أنا اللي عارفة)، فيعني حتى لو شفتوا الصور قبلي رجاء أعطوني فرصة و لا تقولون عارفين. نجي للموضوع، على أنه من كم موسم كل مرة أشوف صور من عرض أشيش تعجبني الملابس، مع ذلك أظن إن عندي مشكلة بالذاكرة تخليني أنساه إلى الموسم اللي بعده، و لا أفكر إني متحمسة لعرضه. 


أول ما شفت جينز عليه ترتر و مشقق (من العرض) قلت طيب حلو اللي بعده (طبعا لأن فيني نوم)، يوم شفت الصورة اللي فوق يسار (تي شيرت الكولا اللي بالعربي). بدأ عقلي يشتغل و فكرت "مو أشيش هندي؟" أو أنا مضيعة؟ بعدين لما كملت و قريت الشيء الي فيه "شكرا" و "عودتكم" و "بأنتظار" و مع هذي الإكسسوارات، أول فكرة جت ببالي قلت: شكله رايح إجازة بالمغرب و استوحى منها هذي المجموعة (لأني أتذكر أنه أصله هندي). بس كملت و قلت أشوف بعدين. 
المهم غير الكتابة العربية أعترف إني أحب أي شيء عليه كولا و أنا ما أشربها، أحب بعد "الذوق الرخيص" بس بفن (أعرف صعبة، بس هذ اللي يحببني فيه). طبعا ما يحتاج أقول أنه عجبني البمبر اللي عليه ترتر ذهبي، و عجبتني الفضيات (الإكسسوار) مرة. 
نسيت أقولكم أنه يقول أنه استوحى المجموعة من بقالة عربية بجمبه (للأسف ما راح للمغرب P:). 
إذا كان فيه مجموعة إلى الآن ودي أشتري منها، فهي هذي المجموعة أكيد.