تقريبا الصيف خلاص جا، ما أظن فيه أحد يلبس إلى الآن لبس ثقيل (شفت صور أنه فيه ثلج نازل على حائل و النماص)، لكن بكل الأحوال حتى حائل و النماص بيجيهم الصيف :) من الأشياء اللي كانت تقريبا موجودة بكل عروض صيف 2012 هو الكوت أو البالطو، طبعا أكيد صيفي و خفيف، لكن ببعض العروض خلته كأنه فستان.
الصباح اليوم شفت هذي الصورة لريانا لابسة بالطو ترينش من دون ما تلبس تحته شيء، يعني هو الفستان.
ريانا مو هي اللي مخترعة هذي الحركة (أكيد)، و لا أول وحده تلبس بالطو بهذا الشكل، قلت لكم كان موجود بأكثر من عرض، و لبسته أكثر من سلبرتي بشكل هذا من بداية السنة (أتذكر بلايك لايفلي، و أليسكا شونق). لكن بالنسبة لي لما ريانا تلبس شيء أو تسوي موضة معينة، هذا معناها أنه راح تنتشر أكثر. (بالمناسبة مبسوطة إن ريانا صبغت شعرها أسود من جديد).
ما أعرف مين راح نشوف المرة الجاية لابس بالطو كأنه هو الفستان (قصدي من المشاهير)، أو مين ممكن تلبس بالطو للريدكاربيت (أحسه ممكن يكون حلو على الممثلات الصغيرات زي إيل فاننيق).
بصراحة ما انتبهت قد إيش البالطو موجود بمجموعات الصيف لمحلات الهاي ستريت، لكنه زي ما قلت لكم موجود بكثير من عروض الهاي فاشن لربيع و صيف 2012، مبسوطة على فكرة البالطو كثير، لأنه هذا يعني لما أدور على بالطوات صيفية بألقي خيارات كثيرة (قبل صيفين أو أكثر كنت أدور على بالطو ات صيفية، لصدقتي لكن بالموت حصلت على شيء، كنت مبسوطة عليه، بس الخيارات ما كانت أبدا كثيرة، و لا سهلة). حتى إني بعض المرات و أنا أدور و لا ألقى كنت أفكر فيه شيء أسمه بالطو صيفي أو أنا أخترعته، و صدقت أنه موجود :)
(من اليمين: جامباتيستا فالي، فالنتينو، إيرديم، كريستوفر كاين)
قلت لكم كثير عروض أختارت تعرض بالطواتها كأنها هي الفستان (من دون ما يكون تحتها شيء حتى تايت)، و بعضها شكله ما كان بس للطلعات العادية، و أنا جالسة أشوف بعض العروض بالطواتها كانت كأنها فساتين من فخامتها. (أتمنى أشوف جامبتيستا فالي على الريدكاربيت، خصوصا علي ممثلة صغيرة).
(من اليمين: نينا ريتشي، بوربري، فيندي، أليكساندير وانق)
المجموعة الثانية اللي حطيتها (لأن الخيارات كانت كثيرة و تحسفت بس أعرض أربعة)، هي اللي أعتقد إنها ممكن تلبس كل يوم. أعجبني مرة بالطو نينا ريتشي و أليكساندير وانق (بس لو كان أطول شوي) أحس أنه ممكن ألبسها لحالها. حبيت فندي أحس أنه خفيف مرة، حتى من خفته، أحس ما يمكن يلبس تحته شيء.
شرايكم بالبالطو كفستان، بالنسبة لي أحس ممكن ألبسه "كاجوال" لكن لمناسبة رسمية أحسه شوي رسمي على لبسي بالعادة. أنتم ممكن تلبسونه؟
