Glamorous Adventure

مو شيء جديد إني أكتب هنا عن عرض دريس فان نوتين. علشان كذا ما يحتاج أطول بالتقديم له. شخصيا، لو ما لي إلا مصمم واحد ألبس منه طول الوقت، بيكون دريس. باختصار يسوي كل شيء أحبه، من دون ما أقدر على تخيل الفكرة قبل. بس بالنهاية يجمعها كلها بملابس حلوة. بالنسبة لي لو حتى كانت توقعاتي لأسبوع باريس منخفضة، بعد ما نزل الريتم بعد ميلانو، عرض دريس يرفع التوقعات من جديد. 

مو أول مرة يصمم دريس عرض فيه عناصر صينية، يمكن لأنه من أنتويرب، و أنتويرب كانت ميناء مهم لأوروبا لكل العالم. ما يهمني صراحة وش السبب، المهم إن النتيجة تطلع حلوة، و مو مباشرة و لا مكررة أبدا. قليل أشوف دريس على الريدكاربيت، يمكن الثنتين الوحيدات اللي يلبسونه هم أماندا بيت و ماقي جولينهال. إذا كان فعلا عنوان الميت قالا الجاي الصين زي ما قلت قبل، أتوقع أو المفروض (طبعا أنا اللي أحدد وش المفروض P:) ينلبس من دريس للميت هذي السنة. أعجبتني مرة فكرة التنانير المربوطة كإنها مريلة بس على ورا، أعجبني مرة أنه مدخل قماش السفاري الكاكي هذا على ملابس فخمة، الأقمشة وهي تتحرك مرة شكلها حلو (لو حصلت فيديو راح أحط رابط له هنا). عجبني بعد الفستان الأبيض، أحسه يصلح مرة لماقي جولينهال. اللبس الثاني من اليمين التوب فيه حكاية ثانية، و كيف الجزء الترتر خلى القطعة كأن السحاب حلم (أعرف بالغت).

باختصار المجموعة مرة حلوة، أنتم وش رأيكم؟ 

Why Wait Till Summer?

من عروض اليوم كان عرض لواحد من المصممين اللي أحبهم، مع إنه قليل ما تكون ملابسه على الريدكاربيت، ما علينا، أهم شيء إني أنا أنبسط فيها (طبعا عن بعد). دريس فان نوتين عرض اليوم بباريس (مو أول عرض بباريس) بس أول عرض أكتب عنه من آخر أسبوع موضة مشهور.

أكثر شيء حبيته بالعرض، أنه صيفي، بنفس الوقت شتوي، يعني خامة الملابس و بعض المرات ألوانها شتوية، بس النقشات و درجة اللون صيفية. قبل لا أتكلم عن الملابس، صح إني أحب دريس، بس ما أعرف ليه حسيت أني قد شفت قطع تشبه قطعه بهذي المجموعة عند مصمم ثاني قبل، يمكن مارك جايكوبز، صراحة مو متذكرة، لو أحد شاف شيء يشبه لعرضه يقول لي. بغض النظر عن الديجا فو اللي أحسها، خلونا نتكلم عن الملابس، حبيت مرة اللبس الثاني من اليسار، أقدر أشوف نتالي جوس (محررة) لابسته من بكرا. نفس الشيء حبيت الفستان الأسود على اليمين، و عجبني الوردي الثلاثي الأبعاد (ما أعرف هذا بروش أو إيش، بس كان على أكثر من لبس)، اللبس الأخير (يسار) من جد أتمنى أشوفه ريد كاربيت، ما أعرف على مين، بس أهم شيء أحد يلبسه. 

عندكم استعداد تلبسون شيء كأنه صيفي للشتاء، أو تحبون كل فصل له لونه؟

"I'm Obsessed"

أعترف إن عندي مشكلة تجاه إن عرض لدريس فان نوتين من دون ما أتكلم عنه. أمس كان العرض و الكعادة يقدر دريس يخليني أتمنى لو أعيش ببوتيك له، و ألبس من لبسه و خلاص هذي هي حياتي. خطتي الجاية لازم ألبس هذا اللبس لمناسبة (هذا اقتراح ثاني غير تنورة ديور). 

لما شفت البمبر هذا على طول طحت بحبه (ما يحتاج أصلا أنا من قبل ما أفتح عرض لدريس أجهز نفسي إني أحبه). قد تكلمت عن البمبر كلبس سهرة من عرض بوتشي لصيف 2013 لكن لو كنت بالبس واحد منهم، أبغى يعطوني حق دريس، ما أعرف هو مطرز أو مشكوك (مع أنه الأغلب أنه مطرز لأن كل العرض فيه تطريز حتى الكعب) بهذي الخيوط الفضية، و قماشة شكله مرة حلو. الشيء اللي خلاني لازم أتكلم عن هذا العرض، هو هذا الفستان، مو بالضبط الفستان، الشيء اللي تحت الفستان، أولا أعترف إني أحب كل شيء مرسوم على الجلد (أحب نقش الحنا الحلو)، فشيء زي كذا بيكون أحسن قطعة بدولابي بلا منازع، أحس إنه ممكن تحول أكثر قطعة من دون شكل، لقطعة كلها حياة (شوفي كيف سوت بهذا الفستان الأسود). آخر شيء لما فتحت العرض من جديد علشان "أراجعه" شفت هذا الحلق اللي على العارضة أعرف أنه شرح ما يشجع بس مع هذا الحلق اللي على كل الأذن أحس من الفخامة كأنها كانت تسبح بمجوهرات. باختصار هذي الثلاثة أشياء، هي الأشياء اللي أبغى ألبسها لو عزمت لأقرب زواج. 

Tartan is Back

قصتي مع اللبس الكروهات حزينة، يعرفها الناس اللي حولي، لأني ذبحتهم بقصتي عن تيور "اسكتلندي" مثل ما كانت أمي تسميه لما نوخذ مني، و لبسته وحدة غيري، و أنا جلست بالبيت لأني ما عندي شيء ألبسه. شفتوا إنها قصة حزينة :). ما أعتقد فيه أحد كبر بالتسعينات ما كان عنده تنورة كروهات لكن هذا ما يعني إني مرتبطة فيها وجدانيا، يمكن الشيء اللي تعلقت فيه فترة هو جاكيت الجينز، لأني بديت أوعى على فكرة الملابس، وش ودي ألبس وش اللي ما أبغى ألبسه، طبعا أمي ما كانت تعطيني فرصة بحجة إني "أخلقن" لكن كان خاطري فيه (ما أعرف حصلته أو لا). 

ما يهم نرجع للكاروهات قلت لكم ما يعني لي كثير غير القصة الأليمة، لكن لما شفت وش سوا دريس فيه، أبغى الحين ألبسه. 

ما أعرف ليه بس دايم أحس أنه ثقيل، يمكن لأن تنورتي كانت ثقيلة، و يمكن لأن أمي كانت تسميها اسكتلندية، و لأني أحب الأشياء الخفيفة، حسيت بشيء مختلف لما شفت كيف دريس فان نوتين خلاها مرة خفيفة أحسها مو بس هي بتطير، إلا اللي يلبسها بيطير بعد.

(كبروا الصورة لو بغيتوا تشوفون أكثر)

بصراحة ما أعرف من وين أبدأ، اللي أعرفه إني احترت وش اختار و وش أخلي. بس اللي كنت متأكدة منه إني لازم أحط اللوك الأول من اليسار، لأني أعرف إني أختي بتحب القميص مرة، ثم تقول لي "ترى عادي تشترينه لي". ما يحتاج أقول إني حبيت حتى كيف حاط اللوك على بعض (بس دريس يعرف يجيب طبعات من كل مكان و يخليها تمشي على بعض)، حبيت بعد العقد اللي لابسته العارضة مع القميص. باللوك اللي بعده أعرف أنه بياخة إني آصف كل شيء، لكن راح آصف فكرة كروهات تصير لبس سهرة الحالة فكرة عبقرية، لكن الطريقة اللي سواها فيه، أنه حط التنورة السوداء الفخمة هذي فوق الفستان الكروهات اللماع تخليني ودي أقلده الحين، باطلع مناسبة من زي مكان ما يحتاج أعلق على كيف خلى الكاروهات "ميتاليك" تأثير الميتاليك كان تقريبا بكل العروض، بس ما أقدر أنتهي و أنا ما تكلمت عن الفستان الأخير، أو الأول من اليمين. ما كنت أتخيل أنه ممكن أستخدم قماش كروهات بطانة لفلورال شفاف و تطلع النتيجة بهذي العظمة. ما أعرف ليه أنا كل موسم أشوف ملابس دريس علشان أصيح عليها؟

شرايكم بالكروهات، تحبونها أو ما ودكم تشوفونها أبدا بملابس الصيف الجاي؟

Clash of Prints

من فترة طويلة ما حسيت إني شفت إيديتوريال مفيد، يعني فيه صور و أفكار حلوة، بس ما فيه أفكار حلوة للملابس، كل اللي أشوفه ملابس نفسها تنعاد بخلفيات مختلفة.

قبل أسبوع تقريبا شفت سكان، ما كان مرة واضح لإيديتوريال من عدد فوق يو إس لشهر مارس الجاي. عجبني مرة الإيديتوريال. مو لأن الصور فيه حلوة، لكن حبيت الملابس فيه مرة. ما أعرف كم مرة قلت فترة عروض ملابس صيف 2012 بسبتمبر اللي فات، إن الطبعات كانت موجودة بكل مكان، بكل الأشكال، و الأحجام و الألوان. لكن ما جاببالي أنه ممكن أحد يلبس طبعات بهذي الكثرة و إنها ممكن تطلع حلوة. حبيت كيف منسقين الملابس بهذا الإيديتوريال، خصوصا بهذي الصورتين (تلقون باقي الإيديتوريال هنا). عجبني مرة شكل كارا دوليفين بهذي البدلة من مجموعة ربيع 2012 ماري كاترنتزو. أكثر شيء عجبني بالإيدتوريال هذا كأنه يقولك خلط كل الطبعات اللي عندك مع بعض و لا تخافين إنها بتكون مبالغة، أو بتصير غلط على بعض.

الإيديتوريال مليان طبعات من كل الألوان كل شيء مخلط مع كل شيء، أعجبتني الألوان الصارخة (زي اللي على كارا مرة ثانية). و عجبتني الألوان الفاتحة مرة زي اللي على كارا (تحت)، و على سن فيفي (يمين تحت)، و طبعا التيور اللي بعده اللي من دريس فان نوتين (قد تكلمت لكم عنه قبل). من أحسن القطع بكل الإيديتوريال بالنسبة لي كانت الكعب الإيرديم، اللي لابستها العارضات (تحت). 

ما أعرف مين يقدر يلبس كل هذي الطبعات و يطلع شكله حلو و لا هو مكركب (غير الموديلز طبعا :)، يعني أحس أنه شيء ماله قوانين يعتمد على حدسك أنت، لكن يمكن الشيء الوحيد اللي أعتقد أنه لازم لازم تسوينه لو لبست لبس كله طبعات، أنه شعرك و مكياجك يكون أبسط شيء ممكن تسوينه، أو بيصير شكلك شوي مهرج D: 

 شرايكم بلبس طبعات على طبعات؟

Military, Again

خلصت أسابيع الموضة، صراحة كان صعب إني ألحق و أقلب كل العروض اللي نزلت لها صور على نت، خصوصا مع كمية المناسبات هذي السنة، اللي وافقت العروض. 

ما علينا، حبيت بكم موضوع جاي أكتب عن أهم الموضات اللي كانت بعروض الخريف و الشتاء الجايين (مو هذا اللي تقريبا خلص)، طبعا الكلام بشكل عام، و زي دايم إن شاء الله مع الوقت راح أتكلم عن هذي الأشياء أكثر. 

ما أعرف كم مرة بهذي المدونة أعلنت عن حبي للأشياء الجيشية، ما زلت أحبها، ما طفشت أبدا منها، و لا أعتقد إني راح أطفش، مادام كل مرة راح أشوف شيء جديد فيها. 

الجيشي بالعروض اللي خلصت كان تقريبا بكل عرض، لون أو إيحاء تصاميم أو حتى مدمج بالثيم الأكبر اللي كان ثيم لكثير من العروض، هي موضوع "المرأة القوية"، ما أعرف كيف أفسرها، لكن يمكن الشيء الأوضح أنه تصاميم الملابس كانت أقل نعومة و أنثوية، يعني بناطيل كثيرة، قصات واقفة، و قليل مرة ملابس ماسكة على الجسم. 

قلت لكم مبسوطة كثير على وجود الجيشي بكثرة بالعروض، أكيد أتوقع أنه الموضة هذي بتكون من الموضات اللي بتنسخ بالهاي ستريت (أتوقع زارا، و إتش آن إم) بيسوون نسخ حلوة. الشيء الحلو بالجيشي هذي المرة، أنه جاي بأشكال مختلفة كثير، من جمب سوت، لفساتين، جاكيتات و بالطوات، شيء وسيع، و شيء ضيق، شيء ثقيل، و شيء أخف ... فأعتقد أنه كل شخص بيلقى شيء يناسب ذوقه بهذي الموضة. 

وش رايكم بالجيشي؟ عندك شيء جيشي أصلا؟ متحمسة تلبسين شيء جيشي للشتاء الجاي؟

Night Lights

واضح جدا إن الصيف الجاي بيكون كل طبعات من كل الأشكال: خضار، ورود، سلاسل و أشكال غريبة. لكن الشيء اللي كنت أنتظره حتى من قبل ما أشوف أي عرض، و أناظر إن الطبعات بكل مكان، كنت أنتظر طبعات دريس فان نوتين، مو لأني ذكية و أعرف إن دريس راح يسوي طبعات، لأن الطبعات هي موضة ربيع 2012، لكن لأن هذا الشيء اللي متخصص فيه دريس " الطبعات".

على الرغم من إني أحب دريس فان نوتين، بس فيه أشياء من كثر ما هي حلوة، ما أتمنى أشوفها، لأني ما أبغى أتنكد إني ما أقدر أجيبها :). 

و أنا جالسة أقلب بالمجموعة لهذا الصيف شفت الفستان الأول من اليسار و لما شفته من فوق و النقط الصفراء، قلت يا رب الطبعات مو قصده إنها مدينة بالليل، مو لأنه شيء بايخ، لأنه الفكرة بالنسبة لي عبقرية، و لا ودي أدري أنه فيه مصمم سوا شيء حلو زي كذا، و موب سهل آصل للأشياء اللي يسويها. 

ربي ما استجاب لدعائي، و لما قلبت باقي الصور، تأكدت أنه النقط الصفراء مو غلط، لا دريس كان قاصد أنه يسوي طبعات لمدينة بالليل. (الجاكيت و الفستان اللي على اليمين، يقتلون). 

الفستان اللي بالوسط عجبتني طبعاته، صح ماله شغل بصور مدينة بالليل، بس ذكرني بمقلمة شفتها مع بنت عليها مارشملو أبيض و وردي، و قلت لها: مقلمتك حلوة، قالت لي: أدري ودي أكلها D:، أحس أني ودي آكل هذا اللوك حتى لو كان زهور مو مارشملو :).