Craftswoman

بالسنوات الخمسة اللي فاتت (أعتقد) أنه تحولت "الموضة" من هوس شنط لهوس جزم، و أظنه الحين أو من سنة و زيادة وصلنا لهوس شنط الكلوتش. 

بالنسبة لي، ما أعرف أول شنطة كلوتش أعجبتني (يمكن أليكساندير ماكوين الخواتم). لكن بعد فترة تعرفت على ماركات شنط كلوتش ثانية، و صارت هي "هوسي" الجديد. 

صراحة ما أتذكر عرفت شارلوت أولمبيا أول أو أولمبيا لو تان، لكن الأكيد أنه لفترة طويلة ظليت أفكر بالكلوتش اللي من شارلوت أولمبيا، اسمها باندورا بوكس. يمكنها كانت من أوائل الشنط الشفافة (اللي الحين صارت موضة). ما طاحت من بالي (علشان ما تقولون طفية)، لكن لما لقيت نسخ أرخص، أكيد بأفكر بالأرخص. (عند زارا وحدة برتقالية). 

اللي يعجبني بشارلوت أولمبيا، إنها تطلع أشياء ظريفة و يمكن "بايخة" بالنسبة لبعض الناس، زي كلوتش العطر و كلبر بورد حق الإخراج. هنا تلقون شنط شارلوت أولمبيا. و بالمناسبة مطلعة شنط جديدة على شكل بطيخ و ليمون ظريفات مرة (أحس بنشوف نسخ منها عند توب شوب أو زارا.

أولمبيا لو تان ما أعرف إذا تعرفونها قبل، بس أكيد قد شفتوا شنطها الكلوتش اللي على شكل كتب. أولمبيا ما تسوي بس شنط كتب (عندها شنط على شكل علبة حليب و كافيار). لكن شنطها الكتب بكل مكان، حتى إيسوس عندهم نسخة (مو رهيبة) لكلتش كتاب (شارلوت أولمبيا بعد سوت مجموعة كلتش كتب). هنا تلقون شنط أولمبيا لو تان.

بينديتا بروتزيكيس (إذا كان هذا النطق صحيح). مصممة جديدة لشنط كلوتش بعد. (على الأقل أنا توي أعرفها). بينديتا عندها شنط كأنها مخدة، و عندها شنط كأنها سبورة و عندها شنط كأنها هدية مغلفة (هذي كلها "علامات تجارية").  هنا تلقون شنط بينديتا بروتزيكيس. أعجبتني شنط بينديتا، أعتقد إنها ظريفة مرة، خصوصا الهدية و الطباشير. لكن من بين الثلاثة، أظن إني أفضل لو أقدر أحصل شنطة من أولمبيا لو تان. 

أنتم مين مصمم الشنط المفضل عندكم؟ و إيش رأيكم بموضة الكلتش؟

My Idol Summer

أعرف إني بعض المرات أتحمس للأشياء قبل وقتها بفترة طويلة، بس عندي قناعة إن حماسي هذا لو ما نفع ما ضر. المهم الشيء اللي من الحين جالسة أدور له هو أشياء عطلة صيفية (لبس و إكسسوار و غيره)، و طبعا لما أقول عطلة، قصدي مكان حلو أسافر له، و أشتري أشياء حلوة له. (ما أعرف ليه) صحيح أنبسط بالسفر، بس ما أعرف ليه، أحس إني بعض المرات أتحمس لأشياء مالها معنى (تحملوني شوي). 

أولا لازم أقولكم إني من فترة طويلة و أنا أدور زيت يعطي لمعة ذهبية للجسم، دورت كثار منهم زيت بودي شوب و أشوف أنه لما يفرك يروح اللون ما يبقى غير قليتر على الجسم، و لو بغيت التأثير هذا كان حطيت قليتر من البداية ما يحتاج أتعب نفسي و أدور على زيت للجسم. فتقريبا كل فكرة التدوينة هذي تدور حول الزيت. 

أخيرا حصلت زيت يعطي اللون واللمعة الي أبغاها و أعتقد أنه زين، صحيح أنه مو رخيص أبدا، لكن أعتقد أنه "الإكسسوار المناسب" لأي مناسبة كبيرة بهذا الصيف، أو أي صيف، ما دامت الناس تعتقد أنه البشرة اللي فيها لمعة ذهبية شيء حلو. 

الفستان اللي كأنه شيرت من زارا (تقريبا ب 200 ريال، و منه لونين غير هذا)، شفته قبل فترة و أعجبني، حبيت أنه أطول من ورا، حبيت بعد خفته، شكله، أعتقد أنه من نوعية الفساتين  اللي تطلع حلوة على نوعية أجسام مختلفة، و تخلي أي أحد يلبسها ذوق. 

الشنطة من ريتشيل زو، هي شنطة/ حزام، عاجبتني من شفتها بعرضها لربيع و صيف 2013، أحس فيها شيء ما أعرف كيف بس ذوق براحة، شيء هيبي. الربطة بعد من واحد من عروض ربيع و صيف 2013، تكلمت عنها قبل هنا، هي من عرض مارك باي مارك جايكوبز (أعتقد إني لازم أدور أو أسوي لي ربطة ملوية زي هذي) أحسها تصرخ عطلة. 

الجزمة أو الصندل الجلي (هم كذا يسمونه) من توب شوب، عاجب أختي مرة، أتذكر إنه هذي النوعية من الصنادل كانت المفضلة عند أمي و أنا صغيرة (ما أعرف كم شرت لي فردة)، بس أتذكر آخر وحدة كانت سوداء، و مرة باستراحة بالظلام كنت لابستها، بس ما ربطت الحزام، قعدت أصارخ أحسب أنه عقرب علق برجلي :S. آخر شيء، الحلق من أيسوس، تلقونه هنا لو كان عاجبكم. 

What's in my Bag

أولا لازم أقول لكم إن هذي التدوينة مو وحدة من التدوينات أو الفيديوات اللي صاحبها يورينا الأشياء اللي جوا شنطته. يعني لو مو مهتمين بشيء غير أيش فعلا بشنطتي ما يحتاج تكملون P:
بغيت أكتب لكم اليوم عن شيء مو أنيق مرة، و يمكن شكله ما يعجب كثير، لكن أعتقد أنه مفيد، خصوصا لما تكون شخص زيي لو اضطر و شال شنطة، تتحول الشنطة لغرفة معيشة متنقلة، كل شيء فيها، و كل شيء بعد يضيع جواها. 

قبل فترة طلبت هذا الشيء من eBay لأن عندي شنطة كبيرة (غصب علي أشيل شنطة كبيرة) لأن الأشياء اللي أشيلها كثيرة، و كلها أحتاجها. 

المهم لما وصلت (طبعا قبل يحتاج أعلمكم أنه سعرها مرة رخيص) تقريبا بخمسة دولارات. المهم نرجع للشيء هذا اللي المفترض أنه ينظم أشياءك بحيث أنك تحطينها بوسط شنطتك. لما وصلت كانت شوي صغيرة على شنطتي اللي مرة كبيرة. قياس عرض هذي الشنطة أقل من 30 سم بشوي، و شنطتي 40 سم. أعرف بالكلام كأنه الفرق مو مرة كبيرة، بس أنا كان ودي بشيء على قد المقاس بالضبط. 

ما علينا، على أنه زي ما قلت لكم كانت أصغر شوي، إلا إني مبسوطة عليها مرة، على الأقل خلتني آصل لبعض الأشياء بسهولة أكبر (زي المفاتيح، و المحفظة).

بالفيديو اللي فوق بتشوفون تقسيمات الشنطة، و قد إيش تشيل. إذا أنتم مو مهتمين بالفيديو كامل، الشرح الشنطة يبدأ تقريبا من الدقيقة 5. و هنا تلقون الرابط لها على إي بي.

Oz

أمس كان بريمير فيلم Oz The Great and Powerful، بطولة الفيلم طبعا مع جايمس فرانكو كانت لميلا كونيس، ميشيل وليمز و ريتشل فايس. الحلو بالموضوع إن كل الثلاثة دايما لبسهم حلو.

ما راح أتكلم كثير عن لبسهم بالبريمر، لأني أعتقد على الأقل وحدة منهم بتدخل قائمة أحسن الملابس لشهر فبراير. بس بشكل عام ميلا كانت لابسة دولتشي آن قابانا، ميشيل وليمز ببرادا و ريتشيل فايس بفيكتوريا بيكام (أعجبني مكياجها مرة).

 ما يحتاج إني أقولكم إتي متحمسة مرة للفيلم وودي أشوفه، لكن اللي خلاني أتحمس و أقرر أكتب عنه، غير إن شكل الثلاثة عجبني بالبريمر (بشكل متفاوت)، لكن اليوم لما كنت أدور بالمكتبة شفت هذا الكتاب Everything Oz (موجود بالصورة) و أعجبني مرة. الكتاب عبارة عن أشياء ممكن تسوينها (أشغال و أكل) كلها لها علاقة ب Oz بشكل أو بآخر. لما رجعت للبيت قررت إني أسوي سيت عن الموضوع (أنا سويت السيت بإيحاء من الفيلم القديم The Wizard of Oz اللي ما أحبه)، هو صح أنا ما أحبه، و أتذكر أول مرة تفرجت عليه كنت معصبة مرة، لأني تزلته تورينت و كان تحميل فيلم يآخذ قرن و بعدين شفت الفيلم و لقيته سخيف و زعلت. ما علينا من قصة زعلي، بس إني بعيد عن سخافة القصة أظني مع الوقت بديت أستظرف الشخصيات و أشكالهم، خصوصا جزم دروثي الحمراء (بالكتاب فيه كيف تسوين جزمة حمراء لماعة). أعتقد بسببه صرت أستظرف الجزمات الحمراء. أخترت الجزمة الحمراء هذي النص كعب (ما أعرف من وين جبت الاسم) من سيلفاتوري فرقامو، و الفستان المربعات من أيسوس (لأن دورثي كانت لابسة فستنان مربعات "قينام" بالفيلم). أخترت الخاتم هذا لأنه عاجبني، و لأن فيه شخصية الأسد (البسة أخت الأسد). و هذي الشنطة (بعد لأن هذا ستايل اللونش باق عاجبني من زمان) علشان شخصية التنكة. آخر شيء حبيت احط علبة الظل هذي من أوربان داكي مطلعين مجموعتين وحدة للساحرة الشريرة (اللي أنا حاطتها) و وحدة للساحرة الطيبة.

 ترى كل الخيارات مبنية على القصة القديمة، ما أعرف إذا الفيلم الجديد له علاقة بالقديم.

In Mood: Chainmail Purse

من يومين أو أكثر شفت صورة للورين دومنيقو (محررة بمجلة فوق) ما أعرف وشي المناسبة، و لا مهتمة أعرف صراحة، بس لورين كثير مرات تطلع بلبس حلو (دوروا على صور زواجها بالنسبة لي فستانها كان خرافي). المهم إن لورين كانت شايلة شنطة صغيرة فيها مكياج (أعتقد إنها كانت منتشرة بالعشرينات، أكيد من القرن اللي فات). 

لأني ما لقيت (أو ما دورت بضمير) عن نفس نوعية الشنطة اللي مع لورين (متأكدة إن اللي معها فينتاج)، فقررت أجيب أشياء ممكن تكون "بديل" لها (أهم شيء الفكرة)، خصوصا و إنه من زمان عاجبتني الشنطة اللي من هاوس أوف هارلو. حاولت قد ما أقدر إني أختار أشياء أسعارها معقولة، أو قصدي خيارات أسعار أكبر. أعرف أنه حتى أرخص وحدة مو رخيصة مرة، بس أعتقد إنها ظريفة :) الشنطة الأولى أو الأرخص من نالي على شكل نجمة تلقونها عند أيسوس هنا، فيه عندهم أكثر من لون، شخصيا هذا اللون هو اللي أعجبني. 

الشنطة الثاني من هاوس أوف هارلو، أعتقد من تشكيلة السنة اللي فاتت، بس لقيتها بأكثر من مكان تنباع، و نفس الموضوع فيه أكثر من لون (مو رخيصة بس حلوة). 

آخر وحدة من جيمي تشو أعجبتني الشنطة كثير، ما عادا شيئين ما عجبوني فيها سعرها أكيد (ما أشوفه طبيعي). و أنه مكتوب عليها جيمي تشو.

شرايكم بالشكل هذا من الشنط مع ملابس السهرة؟

That Backpack

أحاول الفترة هذي ما أشتري شيء جديد، لأني لازم أضف عفشي لأني باترك البيت اللي أنا فيه، لكن المشكلة هذا اللي يقوله لي عقلي، لكن قلبي يقول إني أحتاج أشتري أشياء كثيييييرة، أدري إني قلبي يكذب لأني ما أحتاج، لكن حاجة نفسية :). 

يمكن من أهم الحاجات النفسية، هي شنطة ذا رو الباك باك (تكلمت فيها لما شبعت) لكن و لأني إلى الآن ما انهبلت (على قولة أمي:). ما راح آشتري شنطة بحول 120 ألف ريال؟!!!

و أنا جالسة أقلب باليوتيوب دخلت قناة توب شوب، و لقيت تقرير عن مجموعتهم لخريف 2012 و يمكن الآن تدرون إني حبيت ذيك المجموعة مرة. المهم كان فيه لقطات من باكستايج و شفت الصورة الأخيرة و تذكرت شنطة ذا رو اللي طلعت بخريف 2011 و بالصورة اللي فوق على اليسار ماري كايت و هي لابستها. و خلتني أحبها أكثر، طبعا أعرف إن توب شوب يونيك مو رخيص، لكن أكيد أي شيء بيكون أرخص من ذا رو. 

المشكلة الحين، ما أعرف كيف آصل لمجموعة يونيك توب شوب :S بأكون ممنونة اللي يدلني على مكان غير لندن و نيويورك أقدر آصل فيه لهذي الشنطة. 

شرايكم بالشنطة اللي مآخذه عقلي؟ أو إنها ساحرتني و لا تستاهل؟ 

The Backpack

الشنطة اللي ما تخونك بأي مكان (إلا الحفلات :) هي الباك باك ... ما عندي وحده، بس أختي تحبها كثير، و أما أفكر فيها بجدية، الشيء الوحيد اللي يخليني أتراجع عن الفكرة هي إني ما أنزل الشنطة مني طول ما أنا لابستها، بجامعة، أو بسفر، فصعبة شوي إن أجلس و على ظهري باك باك، إلا لو أخترعوا كراسي محدبة :)

من قبل ما أفكر بباك باك، هذا الصيف ذا رو إذا تتذكرون نزلوا خط الشنط حقهم، ذا رو ما يمزحون أبدا، أول ما شفت الشنطة هذي (السوداء اللي على اليسار)  على وحده من الأولسينز عجبتني على طول، لكن يوم شفت كم سعرها، كالعادة كأنه فيه أحد أعطاني كف ... لكن على الأقل هذي بـ 14 ألف، مو اللي جلد تمساح اللي سعرها تقريبا بـ 122 ألف ريال!!!.
الشنطة الثانية من مادويل تلقونها هنا.

الصف الثاني يمكن فيها أكثر ثنتين حبيتهم ... الأولي (السوداء) من مارك باي مارك جايكوب، حبيت هذي الشنطة اللي موجودة عند ساكس، بالسعر اللي تشوفونه، عجبتني مرة، أحسها ظريفة :) 

الثانية يمكن صورتها هنا مو حلوة مرة، لكن شوفوها هنا عند بلومينق ديلز، عجبني لونها، و أهم شيء أحس إنها تضف أشياء كثيرة، فلو كانت عندي ممكن يوم من الأيام ألقى البيت كله فيها، خصوصا و إن الشنطة عندي مستودع، اللي يدخل فيها ما يطلع. 

إذا أنتم ملاحظين، ترتيب الشنط على حسب سعرها، طبعا لو كان الوضع طبيعي، كان ذا رو صارت بتدوينة لحالها، (مو لأنها حلوة، لأنه سعرها غير طبيعي). الشنطتين الأخيرات، أشكالها حلوة، و رخيصة، و تصلح كثير للجامعة.
اللي على اليسار من مودكلوثز، و اللي على اليمين من أوربان أوتفيتير، فيه منها ألوان كثيرة حلوة.

شرايكم بالباك باك، و إذا عندكم وحده مفضلة وش هي؟

Men's Talk

أسابيع الموضة اللي بدأت من نيويورك طبيعي أنها تكون عن ملابس المرأة، لكن بعض العروض مثل عرض مايكل كورس يدخل فيها ملابس رجال. 

زي كل عرض أشوف صوره أحط ببالي إني راح أتكلم عن الملابس "النسائية" فيه، لكن لما شفت الصورة هذي (الأولى من اليسار) قررت إني أتكلم عن ملابس الرجال هذي المرة. 

أعرف إني قليل ما أتكلم عن ملابس الرجال، لأني زي ما قلت أكثر من مرة أنه ما يهموني كثير، لما أحس إني أبغى أتكلم، أتكلم عن شيء حتى أنا ممكن ألبسه أو أسويه، و بالنسبة لي من أكثر الأشياء اللي أحبها بالفاشن الآن، أنه فيه أشياء كثيرة صارت تصلح للجنسين، لأني ما أعرف ليه بعض الأشياء يقرر الناس إنها خاصة بالرجال، أو خاصة بالنساء (مثل التنورة أو الوزرة) يعني فيه ناس كثيرة يلبس فيها الرجال وزرة، أو مثل حالتنا ثوب (أخو الفستان)، أو تنورة زي الإسكتلنديين، مع ذلك ما نشوف شيء زي كذا بمحلات و أقسام ملابس الرجال. 

يمكن العكس أقل، من زمان و الجاكيتات و البدلات الرسمية (مثلا) داخلة من زمان على ملابس النساء. أرجع فيكم للعرض، زي ما قلت لكم أعجبني اللبس الأول من اليسار ألوانه حلوة، كيف إن شكله "مكروف" عجبني كثير، أظن أنه حلو للرجال (أعرف قليل راح يلبسونه)، بس لو بنت قررت تلبسه أظن إنها بس تحتاج تلبس معاه إكسسوار ذهبي (سلاسل مثلا) و بيطلع لبس مرة حلو، خصوصا لطلعة بسيطة. 

الشناط من أكثر الأشياء اللي يمكن تنلبس من الجنسين، حبيت شكلها، و إنها واقفة، ذكرتني شوي بشنطة ذا رو، اللي ما زقدر عليها، بس بأقل آناقة.

آخر شيء الجاكيت الجلد، تمويجه عجبني مرة، أحسه شوي كبير (على مرأة)، بس يمكن مع قميص حرير أوف وايت خفيف، و شورت جينز بيطلع مرة حلو (على مرأة). 

You don't have to open Pandora's box, when you can see what inside

أمس كان فيه حفل صيفي مسويته بوربري بلندن، ما أعرف وش الهدف منه، بس يمكن علشان يعطيني فرصة أكتب عن شيء لي فترة و أنا حابته مرة. 

للحفلة جاية كارولين سيبر الستايلست حقت إيما واتسون، قد كلمتكم عنها قبل و عن شنطتها شانيل اللي على شكل دمية، هذي المرة باتكلم بعد عن الكلتش حقتها. 

كارولين زي ما قلت لكم كانت جاية، و لابسة فستان من مجموعة فالنتينو أوت كتو ربيع 2011. 

ماراح أعلق كثير على الفستان و شكلها، بس تعرفون إني أحب الأقمشة الشفافة، و عجبني بعد إنها مسوية شعرها ذيل (مو واضح من هذي الصورة). طبعا أهم شيء بالنسبة لي هي الكلتش اللي معها من شارلوت أولمبيا. 

هذي مو أول مرة أشوفها على أحد، قبل فترة شفتها مع أوليفيا باليرمو، و من ذاك اليوم و هي معجبتني قوة، رحت أدور عليها كانت تنباع عند net- a- porter.com بس شكلها خلصت. كونها خلصت، هذا يعني إن هبالي فيها، و بحثي عنها ما توقف، رحت أدور عليها أكثر و لقيت لها أكثر من صورة، و معلومات عنها. 

أكتشفت إنه يجي معاها ثلاثة شنط قماش زي اللي تشوفونها قدامكم للناس اللي ما يحبون أحد يشوف وش جوا الشنطة. أول شيء أعترف أنه جزء من أعجابي بالشنطة هذي هو اسمها: Pandora's box أو صندوق بندورا هي جاية من أسطورة يونانية أول مرة سمعت عنها بكلاس أخذته عن روائع النصوص العالمية. باندورا هذي مشكلتها إنها فتحت صندوق شرور و طلعت الشرور لكل العالم، و خربت الدنيا (طبعا هذي طرقتي بتخريب القصص، يعني دورا على القصة الأصلية، و لا تآخذون مني). 

عاجبني شكل الشنطة و هي جواتها شنطة، و عاجبتني بعد من دون أي شنطة قماش جواتها، بس معاي أحس أنه صدق بتصير صندوق لشرور خصوصا و إن شناطي دائما مرمي فيها كل شيء يمر فيني، من قراطيس الأشياء اللي أكلها، بنس، أرواج أنسى إني حطيتها ببعض الشناط و ووو و... 

لو تحبوني، و تبغون تعطوني إيها هدية بس مستحين، شوفوا إيملي فوق، عادي قولوا لي بإذني P:

Never ending story

أمس كان فيه جوائز CFDA للفاشن، و اللي يوزعون فيها جوائز للأفضل المصممين الإمريكان . ذا رو ماركة بنات أولسين كانت مرشحة لوحدة من الجوائز، البنات ما فازوا. اللي فازوا بأفضل جائزة، حقين بروينزا سكولير.
طبعا البنات كانوا موجودات، بس شكله ما كانوا مهتمين للجائزة، قد مو مهتمات أنهم يسوقون لخط شنطهم الجديد.

مو مرة عجبني شكل البنات خصوصا ماري كايت (يمين)، ماري كايت كانت لابسة جاكيت من شاني مجموعة بري فول 2011، ما عجبني شكلها، خصوصا مع الشعر الجديد المصبوغ، حسيت شكلها كأنها عجوز.
آشلي لابسة فستان سترابليس من ماركتهم ذا رو، المايك آب حلو، و الشعر حلو، و ألوان الأشياء حلوة مع بعض، خصوصا السلسال أو الخلخال اللي حاطته على رجلها، بس بشكل عام اللبس مو ذاك اللي يجنن.

ما أعرف وش مشكلتي مع الشناط، أو إن كان فيه أحد ثاني عنده نفس المشكلة، بس ما أحس أبدا أني يوم حسيت أنه لا خلاص طفشت من الشناط. صح أنا ما أشتري شناط كثير، بس دائما تحي ببالي، يعني بخاطري كلتش حلوة، و بعد بخاطري شنطة حقت كل يوم، من فترة أعجبتني فندي، بعدين شفت عند سلين وحدة، بس لسا ما أحس فيه مناسبة.
اليوم و أنا أشوف شنط بنات أولسين، عجبتني مرة، و شكلي خلاص لو فكرت أشتري شنطة لكل يوم، بأفكر بشنطة من ذا رو، خصوصا اللي مع آشلي. حجمها حلو، لونها حلو، و شكلها حلو، بس لسا ما أعرف كم قيمتها، لأنهم لسا ما أعرضوهم للبيع.

وش رايكم بشنط ذا رو؟ و وشو الشنطة اللي عندكم لكل يوم، أو ودكم تشترونها؟

Dolls for Evenings

قلت لكم قبل عن الموقع اللي يعرض أشياء للبيع قبل ما تنزل للأسواق، المهم اليوم جاني إيميل منهم أنه وصلتهم المجموعة الأخيرة من جوديث ليبير، للي ما يعرف مين هذي هذي مصممة شنط غالية مرة (أغلبها كلتش) أمريكية. 

قبل لا نتكلم مرة ثانية عن جوديث، بس ببدأ أكلمك عن سالفتي الأصلية و هي الشنط اللي على شكل دمية. يمكن السنة اللي فاتت أخرها إلى بداية السنة هذي، كانت المرة اللي على اليسار (إسمها كارولين سيبير)، و هي ستايلست نمساوية و عايشة بلندن، و زي ما يقولون إنها ستايلست للنجوم كثار، أنا ما أعرف منهم إلا إيما واتسون. أهم شيء كارولين كانت تشيل معاها شنطة على شكل عروسة صينية. شكل العروسة كان كيوت مرة، بس هي مو من جوديث، الشنطة من شانيل (إذا تبغون تشوفون الشنطة بشكل أوضح هنا).

نرجع مرة ثانية لجوديث ليبير، و هي زي ما قلت لكم مصممة شنط، أول مرة عرفتها يمكن السنة اللي فاتت أوي اللي قبلها، شفت لها شفت لها كلتش عليها تفاحة و عليها ظلال عماير و مكتوب عليها New York طبعا كله كريستال (تلقونها هنا).
كنت أكسر الخاطر و متحمسة لها، و لما شفت السعر حسيت كأنه فيه يد طلعت من شاشة و عطتني كف. بعدها و أنا ما أفكر بالماركة بس للأسف صارت تطلع لي بكل مكان.

أتذكر إني شفتها بحلقة من حلقات Sex and the City لما مستر بيق أهدى كيري برادشو شنطة على شكل بطريق (على ما أظن)، و كلها كريستالات فعلشان كذا خمنت أنه منها (ما لقيت الصورة). بس لقيت صورة لشنطة من جوديث بعد على شكل كوب كايك كانت أظن بـ SATC الثاني.

ننقز للمرة المليون لسالفتنا بالأول عن موقع مودا أوبيراندي اللي اليوم وصلت لهم مجموعة جوديث ليبر الأخيرة، و بيعرضونها عندهم لثلاثة أيام.

من بين المجموعة كان فيه هذي الدمية الروسية، و ما يحتاج أقول إنها حبست أنفاسي، أصلا هي لحالها تكفي من دون أي ملابس P:. بس قبل لا أقرر أشتريها ما وقفني إلا شيء واحد مو سعرها اللي تقريبا بـ 18700 ريال، لكن ما فيها سلسة يعني كيف راح أشيلها؟ P:

وشرايكم بشنطة على شكل دمية؟

Kate's shoulder bag

فيه بعض المرات يجي شح بالأفكار، و ألقى نفسي أتكلم عن نفس الشخص مية مرة بالشهر :) مرة ثانية شفت صور لكايت بوسورث تتمشى بالشارع، و و حبيت شكلها، خصوصا الشنطة اللي تلبسها من فترة.

بغض النظر عن أي شيء ثاني، يعني الورود مع الجيشي، و الأبوات بس حبيت أتلكم عن الشنطة. من فترة طويلة و أنا حابة الشنط الشولدير هذي اللي شوي صغيرة، و أي أحد يسألني وش أجيب شنطة أقترح عليه وحده من الشنط  اللي على هذا الشكل (طبعا فيه كثار، من كل الماركات). بس اليوم ما بغيت أجيب شيء غالي، و فكرت أشوف لكم من ماركات الوسط.
قبل ما أحطها صراحة ما أعرف شنطة كايت من وين، بس أشك إني قد شفتها بموقع Topshop مع إني ما لقيتها يوم جيت أدورها اليوم (لو تعرفون علموني).

الأولى من توب شوب، سعرها بـ 290 ريال تقريبا، الشنطة من برا تشبه حقت كايت، بس من جوا شكلها شوي غريب، يعني كأنها دوسية، حلوة مرة، بس ما أحس تشيل أشياء كثيرة خصوصا لوحدة زي ترمي كل شيء بالشنطة.

الثانية أرخص، لقيتها عند asos هي أساسا من ريفير آيلند، سعرها تقريبا 152 ريال. حبيتها مرة، خصوصا و هي على العارضة. (شيكوا على الرابط).