The New Half Shaved Head

أول ما شفت القصة هذي على رازموند بايك قبل أسبوع أو أكثر، ما كنت أتوقع أحد بيسويها غيرها (مع إني ما توقعت إنها ممكن تسوي قصة زي كذا). المهم، اليوم أكتشفت شخص ثاني مسوية نفس القصة (بعد إنجليزية) هي سيينا ميلر، فقررت إني أتكلم عنها. 

ما أتذكر وين بالضبط أول مرة شفت هذي القصة  بس من زمان (أكيد شفتها قبل ما تقصها رازموند)، عجبتني، بس ما كنت أعتقد إنها قصة ما تصلح إلا لتسريحة: مالي خلق، و الجو قرف، و ودي أخلص الشغل اللي معاي. (كذا أحس هذي القصة تقول). علشان كذا ما قد فكرت فيها أبدا لنفسي (و إلى الآن ما أفكر فيها). أعتقد أنه حتى مع مكياج و تسريحة كل الثنتين القصة تعطي يا شعور مالي خلق أو (أنا bad a**) ما عندي مشكلة بالثانية، بس أحس بعد مو كل واحد يضبط عليه هذا السلوك، إلى الآن لما أشوف صور رازموند بالشعر هذا أعجز أربطها بالمرأة اللي أشوفها بالأفلام و على الريدكاربيت. 

مع أنه كريستين ستيوارت قصت شعرها قريب (قصة مختلفة)، بس أحس هذي القصة ممكن تكون مناسبة مرة عليها. ما علينا ننتظر و نشوف مين راح يقصها بعد رازموند و سيينا. 

أنتم وش رأيكم ممكن تقصونها؟ أو حتى قصيتوها قبل؟ 

Samples #9

هذي المرة باتكلم عن شيئين يجون مع بعض، أو المفروض أنهم يكونون مع بعض، الأول مستحضر للشعر، و الثاني للبشرة. زي كل العالم ممكن النتايج تكون عليكم مختلفة، بس أنا أحب قبل ما أشتري شيء (بذات لما ما يكون رخيص) أعرف رأي الناس فيه، و كثير مرات أقتنع بكلامهم.

BUMBLE AND BUMBLE Surf Shampoo & Conditioner

للي مهتمين بأشياء التجميل، و متابعين يمكن سمعوا كثير عن بمبل آن بمبل، بذات خط "سيرف"، تجربتي الأولى مع بمبل آن بمبل، ما كانت مميزة مرة، و لا تحمست أشوف أشياء ثانية منهم، لكن من كلام الناس عن سيرف، قررت أجرب عينة منه. بس علشان يكون عندكم فكرة عن المنتج قبل لا أكمل للي ما يعرف، هو المفترض يعطيك التأثير اللي يصير لشعرك مع السباحة بالبحر. صراحة أنا ما أعرف وش يتكلمون عنه، اللي أعرف إن شعري مع البحر و الرطوبة ينتفش، و يصير أفرو، بس مو أفرو ظريف أبدا. لما جربت هذولا الإثنين شعري كورلي/ويفي أحس أنه حافظ على شكل شعري بشكل حلو و لا خلاه كأنه شعر محتاس. اللي أظنه مو متأكدة إن المنتج فيه ملح بحر، فخلى شعري شوي يابس (كأنه عليه سبري) بس من دون ما يكون ناشف من دون حركة، بس شيء يخليه يمسك الشكل. 

الشامبو ب 24 دولار، و البلسم ب 26 دولار، ل 250 مل، أعتقد لو كنت بأداوم و أقابل ناس يوميا بشعر مفكوك (مفلول) أظن أنه يستاهل سعره، أو للي عندها شعر كورلي، و تحب لفاته و تبغى تحافظ على شكلها كل يوم. 

PHILOSOPHY Hope in a Jar Day & Night 

ما راح أطول بهذا، قلت لكم كل شخص مختلف، هذي ثاني تجربة لي مع منتجات فيلوسفي، و لا أعجبتني، فيها شيء صناعي مرة، لما أحط شيء على وجهي، أبغى أحس أنه طبيعي، ما أتذكر أي واحد فيهم كريم الليل أو النهار، بس ريحته كانت مرة سيئة، و لا شفت شيء مختلف و لا ترطيب، كريم النهار ب 42 دولار و كريم لليل ب 50 دولار لحوالي 60 مل للسعر نفسه أو أرخص بعد أدفع لكوريس، أولا لأن منتجاتهم إلى نسبة كبيرة طبيعية، و ثانيا ريحتها حلوة، و الأهم إني شفت نتايج. 

كل المنتجين موجودين عند سيفورا.كم، مو متأكدة كل محلات سيفورا بالعالم (السعودية خصوصا) تبيعها أو لا. 

Food for Your Hair

ما أعرف كم مرة قلت لكم إن عندي مشكلة القشرة، صراحة ما أعتبره شيء مقرف زي ما يشوفون بعض الناس، صحيح مزعجة، بس ما يطلع شكلها مقرف إلا إذا الواحد طول ما غسل شعره (و هذي خلونا نعترف قليل تصير مع شخص ناضج و لا عنده مشاكل مادية أو صحية)، يصير فيه الأبيض على الشعر و يكون مشهد مو حلو مرة، مشكلته معاه، أحس أنه يكتم مسام الشعر، و يضعف الشعره، و يخلي الشعر يتساقط (ما عندي دليل علمي، هذي نظريتي). علشان كذا أحاول اتخلص منه. 

أتذكر من فترة طويلة (لو ما تتذكرون هنا الموضوع) تكلمت عن كيف الليمون يشيل القشرة، جربته فترة و نفع، ما تغيير رأيي بالموضوع، بس وقفته بعد فترة لأني حسيت أنه جفف شعري بقوة. تركته و رجعت لحالة اليأس، الشامبوات اللي موجودة بالمحلات و مكتوب عليها ضد القشرة، كلها ما نفعت، بعد فترة قررت أرجع أدور على شامبو يكون رخيص و من مكونات طبيعية، لقيت واحد، طلبته، لكن بعد فترة أرسلوا لي الموقع أنه خلص فما راح يقدرون يرسلونه لي. 

قريت كثير عن فوائد خل التفاح الطبيعي، و منها أنه يخفف القشرة و يلمع الشعر، هذي المرة تنازلت عن موضوع الريحة و قررت أجربه، حسيت أنه خف شوي، شعري صار يلمع بقوة (ما كنت مهتمة بموضوع اللمعة، بس ما أمانع) بعد فترة قريت إنه زيت الكتان يشيل القشرة، نفس الشيء قررت أجربه، ما راح أخسر شيء، و نفع مرة، القشرة راحت. صرت أحط مرة خل قبل لا أتروش، و لما أغسله اتروش بشامبو، الترويشة اللي بعد بعدها أحط زيت الكتان. 

بس علشان تعرفون تراني مو راعية خلطات، و لا أحب أحوس، و أحب الأشياء الجاهزة، علشان كذا لفترة طويلة كنت أدور على حلول جاهزة (شامبوهات). بس إلى الآن الموضوع مرة سهل، و لا يآخذ إلا دقايق قبل نصف ساعة لساعة من دخولي للحمام علشان أتروش. 

* تحذير ريحة الخل، و حتى الزيت مو حلوات (الزيت ريحته مو قوية)، بس النتيجة تستاهل (على الأقل بالنسبة لي). 

Samples #5

أعرف من زمان عن العينات، هذي استراحة عن الملابس و الفاشن بعد شهر كامل من الملابس، قلت خلنا نكتب شيء مختلف. هذي المرة جينا لشامبو. أعرف تكلمت قبل عن شامبو، و أحس أنكم بتقولون ليه أجرب شامبوات. الصراحة إني إلى الآن ما حصلت شامبو أعتقد إني أحبه، بنفس الوقت ما أقدر أستوعب فكرة الشامبوات الغالية. 

الفترة اللي فاتت كنت أستخدم شامبو من ترازمي اسمه بلاتينيوم سترينقث سعره 5 دولار تقريبا ل 740 مل. كثير يمدوحون منتجات ترازمي (واقي الحرارة حقهم جيد). و خصوصا قريت مدح لهذا الشامبو، فقررت أجربه. 

Phyto

Phytokératine Repairing Shampoo

مشكلتي كانت مع ترازمي أني أعتقد أنه طيح شعري بكثافة ما قد شفتها. صحيح كان شكل شعري معاه حلو، لكن أحس أنه معدل الشعر المتساقط زاد بقوة، فقررت أجرب عينة عندي من فيتو. 

صراحة ما كنت أعرف العينة اللي عندي لأي نوع من الشعر، بس كان كل همي أوقف ترزامي، و لأني اقترحت قبل فترة لأختي شامبو من فيتو بس لأنه تدور شامبو جيد، و ما كان يهمها السعر، فقلت له أنهم يمدحون هذي الماركة، و جربتها و أعتقد إنها راضية عن النتايج. 

العينة اللي عندي اسمها فيتوكيراتين (ما أعرف وش علاقة الكيراتين هنا، و هل له شغل بالكيراتين اللي يسوونه بعض الناس أو لا)، لكن لما قريت وصفه قالوا أنه يصلح "أكثر الشعور ضعفا". قالوا كلام كثير منه أنه يخلي الشعر لامع و صحي. أول مرة جربته قررت أجربه من دون بلسم (استخدم أورقانكس أرغان). الشيء اللي حسيته إن الشعر اللي يتساقط بالعادة قل. لكن شكل شعري مو مرة حلو (يمكن الجو كان رطب ولا ساعد)، لكن كان فيه شعرات كثيرة طايرة. المرات اللي بعده استخدمته مع البلسم و أحس النتيجة كانت أحسن (من ناحية الشكل). 

ريحة الشامبو حلوة (مو قوية)، لكن أختي تقول اللي عندها مو حلوة ريحته، و أعتقد أنه قلل تساقط شعري، و حسيت بإحساس مريح و أنا أفركه على فروتي. علبه تجي بعلبة معدنية (ما أعرف إذا كان هذا يفيد المنتج أو لا) لكن 200 مل تقريبا تباع العلبة ب 19 دولار يعني تقريبا ب 70 ريال. 

الآن أنا تخلصت من ترازمي، و جالسة أجرب شامبو جديد (أغلى من ترازمي). إذا شفت أنه حل مشاكل شعري أكيد باستمر عليه. أما لو أعتقدت أنه ما فيه فايدة، أظن إني بافكر بمنتج من فيتو، حتى لو ما أعجبني شكل شعري، لأني أعتقد الشكل نلقى له حل مع أدوات التسريح، بس الصلع ماله حل P:. 

Ombre Hair: To do or not to do?

كعادتي جالسة أقلب مواقع مختلفة، للأسباب المعهودة، أولا إني أقضي أوقات فراغي، ثانيا و هذا اللي المفروض يهمكم، إني ألقى شيء أقدر أكتب عنه هنا. المهم شفت ب Style.com بفقرة عندهم يجيبون فيها سلبرتي و يسألونه عن "أهم" مستحضرات التجميل اللي يستخدمها. هذي المرة كانت لو ديلون. للي ما يعرف لو هي بنت جاين بيركين (ممثلة و مغنية بريطانية). هي أعتقد إنها بنت مخرج فرنسي، ما علينا أهم شيء إنها هي بعد تغني و اللي يعرف شارلوت جينسبورق (ممثلة فرنسية) لو تكون أختها من الأم (أحس إني طولت الموضوع بالشرح). 

أول ما عرفت لو ما كانت تعجبني، بس مع الوقت صرت أحس إن فيها من "الكولنيس" اللي عند أمها و مرات أختها. لما جلست أشوف وشي أهم الأشياء عند لو "صدمت" لما شفت جوليان. ما قد جربت جوليان، بس ذكرياتي معاه كلها ما كانت "راقية" أتذكر أول ما عرفته لما كنت بالإبتدائي من بنت خالتي اللي أكبر مني بكذا سنة، لأنها قررت "تشقر" حواجبها فيه، و تشقر أماكن أخرى (أتذكر إنها مرة قررت بدل ما تضيع وقت بمناسبة مفاجئة و تشيل شعر يدها، قررت تشقر !!). غير بنت خالتي، أتذكر بالمتوسط وحدة من زميلاتي صبغت شعرها فيه، صار رأسها كأنه شعله ملتهبة، (من دون مبالغة). من الآخر ما أتذكر شيء حلو طلع من جوليان. 

الموضوع الثاني اللي مو عاجبني هي "موضة" الأومبريه، مو كل الإومبرية، أعرف أنه الشعر طبيعيا (عند أغلب الناس) لون الجذور يكون أغمق من لون الأطراف بدرجة أو درجتين، لكن بجد الشعر اللي بدايته أسود إلى النص، بعدين بلاتيني بالخمسة سانتيات الأخيرة (وبعض المرات برتقالي)، لما أشوفه على أحد، ودي أمسك مقص و أقص شعرها و أمس الأطراف بيدي و أقول لها لا عاد تعودينها. 

لما قريت الكلام اللي قالته لو عن ليه تستخدم جوليان، تحمست شوي، أحس إنها خلتني أفكر بالموضوع (موضوع تجريب جوليان). أنا ودي أغير بشعري، بس مالي خلق أقصه، و لا أفكر أبدا أصبغه (قصدي كامل أو هاي لايت أو لو لايت)، بس كأني أفكر أسوي زي شعر لو، بس من دون ما أخلي الأطراف فاتحة مرة زيها.

شرايكم بموضة الأومبريه؟ لكم تجارب أو ذكريات مع جوليان؟

Met Gala 2013: Hair Trend

من الأشياء اللي كانت أمس تقريبا على كلن هو خصل ملونة (بالمناسبة، إذا هذا التصرف بنك، ودي أقولكم أختي بنك) . أعجبني الشكل بالذات على ديان كروقر لأنه لبسها مرة فخم (لابسة شانيل أوت كتور، و الفستان واحد من الفساتين اللي تمنيت أشوفها بالأوسكار). المهم ما أبغى أطول، بس من بين أكثر الأشخاص اللي عجبني شكلهم كانت نيكول ريتشي بشعره الأبيض (كامل). 

إذا كنتوا حابين الفكرة، و لا تبغون تصبغون شعوركم صدق، و لا تعرفون من ين تحطون خصل ملونة، هذا تيتوريال سريع كيف تسوون شعركم كذا ملون. بللوا أطراف الشعر (أو خصلة كاملة إذا تبغون) و مرروا عليها ألوان باستيل (اللون اللي تبغون و أكثر من مره علشان يقوى اللون) و بيمسك اللون على الشعر (طبعا يروح لما تتروشون). 

ملعومة جانبية علشان ما تقولون لي ما نفع، كل ما كان الشعر أفتح كل ما وضح عليه اللون أكثر. 

إيش رأيكم بالشعر الملون؟ 

Samples #1

هذي مو أول مرة أتكلم عن عينات، لكن هذي أول مرة راح أتكلم عنها، بعد ما قررت إني أكتب عن العينات اللي جربتها و رأيي فيها. أولا لازم أبين لكم أني دايم أميل لطلب عينات من أشياء النظافة و الرعاية الشخصية، زي الشامبوهات و كريمات الجسم، ثم المكياج ثم آخر شيء العطور. السبب هو لأنه الأشياء هذي صعب تجريبها بالمحل أو حتى مستحيل، أما المكياج، مو دايم التجريب بالمحل يكفي، أو حتى ممكن فيه منتجات ما تجي على بالك. أما العطورات فهي بسيطة بخي العطر، و إذا كنتم تبغون تتأكدون الريحة تعجبكم أو لا، خذوا الكرت اللي بخيتوا معاكم و أنتظروا حتى ما يبرد و خلاص انتهت التجربة. 

هنا راح أحط لكم الأشياء اللي جربتها، على حسب وش خلصت أول. 

Bumble and Bumble 

Thickening Shampoo and Conditioner

دايم كنت أسمع عن بمبل آند بمبل لما يجي الموضوع لمستحضرات الشعر. صراحة ما قد فكرت أشتري منهم لأن أسعاره مو رخيصة، و لا فيه شيء بشعري أشكي منه لدرجة أظن أني بحاجة لشامبو ب 24 دولار، 90 ريال تقريبا. 

لما شفت أنهم عارضين عينة، صراحة ما انتبهت وش نوعية الشامبو المعروض (يعني لأي شعر) بس أضفته للسلة، لأني خطر ببالي أشوف وش اللي يخلي كل هذي العالم تتكلم عن منتجاتهم. 

الفترة اللي فاتت كنت مسافرة للشرقية، و شعري عنده مشاكل مع الجو الرطب، ينتفش و تصير كل شعرة لحال. بالبداية استخدمت الشامبو اللي الحين أستخدمه (استخدم شامبو ترازمي بلاتينيوم). لكن شعري انتفش بزيادة لأن ترازمي تقريبا يخلي الشعر ما فيه زيت. طلعت العينة اللي معاي و لقيت إنها للشعر الخفيف و إنها تثقلة، شعرتي مو أخف شعرة بالعالم، لكنها مو ثقيلة أبدا، ففكرت قلت يمكن يثقل شعري و لا ينتفش. جربت الشامبو مع البلسم، و أقدر أقول أن شعري معاه (مع جو الشرقية) بالثلاثة مرات اللي استخدمته (لأنه العينة تقريبا تكفي ثلاث استخدامات لشعر قصير) كان جدا (عاقل) و تقريبا التمت أكثر الشعرات الطايرة. 

هل ممكن أشتريه؟ ما أظن لأني مو ساكنة بالشرقية و لا أطلع بمناسبات فيها، لو كنت أطلع كان ممكن فكرت فيه و استخدمته للمناسبات الخاصة (أشتري أصغر حجم اللي ب 8 دولارات). لكن زي ما قلت لكم ما أعتقد فيه أي سبب ممكن يخليني الآن أشتري شامبو و بلسم بتقريبا ب 180 ريال. 

بالمناسبة وش رأيكم بالشكل الجديد للمدونة؟

Like a Pro

ما آعرف كم مرة قلت لكم إني ما أعرف (أو ما أشتهي) أسوي أي شيء بشعري. كل اللي أسويه، أغسله، أنشفه، أمشطه، و خلاص خلصت القصة. هذا ما يعني إني ما ودي شعري يصير بأشكال ثانية، كل الموضوع إني ما أبغى أتعب نفسي.

من فترة  و أنا أدور لي أسلوب أسهل إني استشور فيه شعري. شريت فرشة غريبة شوي، باوفر عليكم شرحة، كنت ودي أستخدمه للإستشوار، و لأني أساسا ما أعرف أمسك مجفف الشعر (حركة المجفف بيد و الفرشة بيد)، لقيت عذر بأن المجفف حقي صار يطلع هوا ضعيف، و لا جربته غير مرة ووقفت.

بالصدفة كنت أشوف مقطع على اليوتيوب و شفت وحدة تستخدم هذا الإستشوار أسمه Infiniti Pro by Conair Spin Air Rotating Styler (أعرف أسمه طويل، بس هذا الاسم اللي راح تلقونه فيه). المهم إني تحمست له شوي، خصوصا أنه ما عندي استشوار و لا أيرون و لا كلرلينق أيرون و لا شيء، ما عندي إلا مجفف هواه صار ضعيف. عرضته على أختي بس ما اتحمست للفكرة لأنه ينفش الشعر (أو يعطيه فاليوم بمعنى أكثر دقة)، و أختي ما تبغى شيء زي كذا، لكن للسبب هذا أنا كنت متحمسة له، لأن شعري يلصق على طول بالاستشوار.

أول مرة كنت باجربه شفت هذي الصورة لداريا ويبري لحملة حقت سيلين لمجموعة صيف 2013، و قبل ما أجربه تمنيت إن شعري كذا يصير، و مدون ما أسوي شيء يتعب، بس غسلت شعري "أكيد" بشامبو ترازمي بلاتينيوم سترينقث، و استخدمت كوندشنير، ثم بعد ما نشف حطيت شوي من زيت أرغان هذا علشان يحمي شعري من الحرارة، و من دون ما أبالغ شعري صار كذا شكله.

إذا مهتمين فيه، سووا عليه بحث باليوتيوب، و هنا تلقونه عند أمازون. بس علشان أكون واضحة معاكم شعرتي دهنية و تميل للخفيفة فيمكن ما تطلع النتايج على شعرك مثل اللي طلع لي.

New Love

أعرف إن أغلبكم رجع من السفر، بس هذا ما يمنع إني أكتب عن شيء للأسف إني توي أكتشفه، مو توي توي، كنت أعرفه من قبل بس كل مرة أشوف هذا المحل (لوش) ألقى لنفسي عذر إني ما أجرب وش فيه. أتذكر أول مرة شفته كنت مسافرة و دخلت محله كان حاط صحون كبيرة فيها خلطات، صراحة ما كنت أعرف وش سالفة أي شيء كان حدي بمستلزمات العناية بالبشرة شامبو و شاور جيل، فخوفني المكان و طلعت :). 

المرة الثانية كانت بالمملكة اللي يبيع عرض علي شيء أحطه بالبانيو و يطلع ريحة، بس لأني ما كان عندي بانيو بعد بطلت، و لما شفت أسعاره حسيت أنه بودي شوب غالي. المرة هذي جتني هدية كذا علبة كبيرة فيها عدة مستحضرات من نفس المحل، بصراحة ما يحتاج تجربون شيء يكفي بس تشمون ريحة الأشياء، علشان تحبونها. 

ما راح أتكلم عن كل شيء كان بالعلبة، لأني إلى الآن ما جربت كل شيء ... لكن راح أتكلم عن بعض شاور جيل اللي يسوونها، و اللي كانت جاية مع باقي الأغراض. كان بالعلبة أكثر من شاور جيل، لها نفس الوظيفة بس ريحتها تختلف، فأعطيت أختي واحد، و تركت لي واحد اللي أنا حاطة صورته أسمه Happy Hippy و ريحته المفروض إنها قرايب فروت :) طبعا أقول إنه المفروض مو لأني مشككة بريحته، ريحته حلوة مرة، بس ما أتذكر إني شميت قريب فروت علشان أقول إن الريحة زيه بالضبط :). زي كل شيء عندهم فيه أكثر من حجم للأشياء، الشيء اللي وصلني حجم عبوته 100 مل و أهم ميزة حبيتها فيه أنه شامبو و شاور جيل بنفس الوقت، طبعا الفكرة اللي ببالي، مع هذا الحجم (اللي مسموح فيه بالطيارات، ولا يآخد مكان كبير)، و أهم شيء يوفر عليك أخذ كومة أشياء للسفر بما أنه 2 في 1 :). جربته كشامبو (لأن هذا المهم بالنسبة لي) أكثر الشاور جيل تكون شوي قوية على الشعر أو ما ترغي، لكن هذا طلع رغوة حتى بموية بالعادة ما تطلع رغوة كثير. قلت لكم إني حبيته و حبيت الفكرة. 

زي ما قلت لكم قبل المحل مو رخيص (خصوصا اللي هنا بالسعودية، يمكن يزيد من 15 ل 40 ريال عن أماكن ثانية) فلو كنتوا لسا ما رجعتوا من سفراتكم، و تعرفون أنه قريب منكم، لا تفوتون زيارته. 

قد جربتوا أي شيء من لوش؟ وش أكثر شيء عجبكم منهم لو كنتوا جربتوا. 

MET Gala's Trend: Retro Waves

أعرف إني بطيئة مرة بتغطيتي، بس وش أسوي الإلتزامات تسلطت على وقت ميت قالا، ما علينا، على الأقل قدرت الحين أقرر أحلى الملابس لميت قالا، و دخل كم فستان للقائمة المبدئية لأحسن ملابس مايو. قبل لا أتكلم عن أحسن الفساتين، راح أتكلم عن موضة ثانية كانت كثيرة بميت قالا و هي تسريحة تمويجات ريترو. 

أتذكر قبل ثلاث سنوات أو أكثر كنت متحمسة لتموجات ريترو، ما أتذكر إنها كانت منتشرة كثير على الريد كاربيت، لكن أتذكر إني حبيته من بعض العروض، ما أعرف أي عرض لفانتينو، لكنه قديم، و ما زلت محتفظة بالصورة عندي، و كنت أدور على أحد يسويها لي. أعترف إن أسوء لحظاتي مع التسريحة لما صارت إليسا ما تعرف شكل غيرها، و لما شفتها على بعض البنات و كان الشعر كأنه منحوت من كثر سبري. 

من فترة و أنا حابته من جديد، لكن ما فكرت أسويه، خصوصا و أنا أشوف صور كثيرة لفيرونكا ليك، ما زلت ما أشوف نفسي بهذي التسريحة (يمكن علشان ما عندي فستان يمشي معها الحين)، لكن أظن يوم لازم أسوي زي شعر فيرونكا لايك، علشان أطيح الفكرة من راسي. 

مو بس الأربعة هذولي كان مسوين شعرها ريترو ويفز، بعد من اللي تكلمت عنهم أمس "عن الروج الغامق" جيسيكا ألبا (عجبني شعر جيسيكا) و أمبير كانت تسريحاتهم ريترو. 

شرايكم بالريترو؟ سويتوها قبل؟ تفكرون تسوونها؟

Never Again

دائما أتكلم عن الأشياء اللي تعجبني، قليل أقول عن الأشياء اللي جربتها، و كانت تجربتي معاها مو جيدة، مع إني أعتقد أنه لازم الواحد يعرف عن تجارب الناس الثانين علشان ما يصيع وقته و فلوسه، هنا الأشياء اللي أعتقد إنها أكثر شيء أحبطني بالفترة اللي فاتت. 

1. سيروم الشعر بوتز

بالأساس كنت أدور على بخاخ يبخ على الشعر و يخليه ما ينفش مع الرطوبة، قالت وحده من صديقاتي إن أختها شرت شيء زي كذا من سيفورا (فرع مو بالسعودية) و رحت أدور عليه عندنا أو بأي مكان قريب (البحرين/الإمارات) لكن ما لقيته، لقيت على النت أشياء بس كل المواقع اللي أعرفها ما توصل للسعودية أي سوائل. زرت مرة بوتز البحرين و سألتها عن هذا الشيء (قصدي بخاخ الرطوبة) و أعطتني بدل عنه هذا.جربته كان جدا سيء أصلا هو يزيد نفشة الشعر. الحين و أنا أقرا علبته أعتقد إني أتحمل جزء من المسؤولية لأني ما قريت وش مكتوب عليه. مكتوب أنه يعطي كثافة للشعر.

2. أدفانسيد نايت ريبير إيستي لودير 

حق التبييض هذا المنتج أبدا مو رخيص، كان المفروض أنه يوحد لون البشرة، اللي باعه لي قالي أنه ينزل تحت البشرة و يفتت صبغة الميلانيين اللي تغمق لون البشرة بس بالأماكن اللي متجمع فيها (زي آثار الحبوب و الجروح). يمكن لي أمثر من 6 شهور أستخدمه، ما أشوف أنه سوا شيء (على الأقل لي). بالمناسبة أنا ما أقول إن باقي أشياء إيستي لاودير مو مفيدة (عندي أشياء ثانية أعجبتني مرة) لكن هذا ما راح أشتريه مرة ثانية.

3. لصق الملابس

قبل لا أشوف هذا الشيء عند أيسوس، كنت أسأل بعض اللي حوالي لو يعرفون شيء ممكن أستخدمه علشان ألصق الملابس علي علشان ما تتحرك (خصوصا بعض الفتحات لو تحركتي ممكن يطلع كل شيء). لما شفته على الموقت طلبته و جربته أبدا ما نفع، كأنه لصق عادي بوجهين، يلصق على الجسم مضبوط بس يخرب الصمغ اللي عليه من جهة الملابس و بعد فترة يطيح.

4. مرطب شفايف إتش آن إم

هذا الشيء أنا شاريته و عارفة أنه ما راح يكون مفيد لي. بس لما شفت العلبة ما قومت (قلت لكم أحب التغليف الحلو). أساسا أنا ما أستخدم مرطب شفايف، دائما أعتقد إن السعابيل موجوده للوظيفة هذي، ليه أشتري شيء و هو عندي أساسا؟!. لكن لو كنت تحبين أو تعرفين وحده تحب مرطبات الشفايف أحس أنه بيكون هدية حلوة صحيح الحرامي الشايع ما يبيعه بسعره الأصلي (كان ب9 ريال و هو يبيعه أظن ب16) لكن علبته حلوه، ريحته حلوة (ما أدري عن جودته، لأني أساسا مو مهتمة بالمرطبات). لكن بس يخلص أكيد ما راح أشتري ثاني، بس بأحتفظ بالعلبة.

5. سوب آند قلوري كلنزير

هذا الشيء المفروض أنه ينظف البشرة، صراحة أحس إني جزئيا مسؤوله عن فشله. لأني لما شفت سوب آن قلوري، ما فكرت كثير كان أهم شيء عندي إني أشتري منهم شيء، و شريت هذا. ريحته ذكرتني بكريم شعر بريطاني قديم، تجي معاه زي الشاش، المفروض إني أدلك وجهي بهذا الشيء بعدين أحط الخرقة على وجهي بعد ما تكون مبللة بموية دافية (الخرقة هي الشيء الوحيد اللي أستفدت منه).

6. فرشة ماك

بعد ما تعبت من فرشة الأساس اللي كانت عندي (ما أعرف وش ماركتها). بس لأنه فيه كثير يستخدمون فرش ماك قررت أشتري منهم، مع إني ما أعرف كثير عن الفرش. بغيت فرشة 187 بس اللي كان يبيع لي بماك أقنعني بعد محاولات إني أشتري مجموعة من الفرش (أربعة فرش وحده منهم اللي المفروض إنها 187) بسعر تقريبا أرخص من الفرشة الغالية لحالها. لما بديت أستخدم الفرشة، ما فرقت لقيت شعرات تطيح منها و تلصق بوجهي و أنا أستخدمها. بعدين أكتشفت أنه إسمها 187ES و لما بحثت زيادة عرفت أنه فرش ماك اللي نهايتها ES المفروض إنها أرخص و أقل جودة، ما أعرف من اللي أعطاهم هذي الفكرة، خصوصا إنها مو رخيصة مرة علشان أمشيها عليهم. لكن أكيد ماراح أشتريها ثانية.

لو كانت لكم تجارب مختلفة مع شيء من هذي الأشياء قولوا لي، أو أشياء ثانية أشتريتوها و تحسون إنها ضياع فلوس، بعد أكتبوا عنها، أو صوروها و خلونا نشوفها. 

Imagine Dakota With Different Hair

أمس كان فيه مناسبة لإيلي صعب ... ما أعرف وين و لا وش مناسبتها، المهم زي أي مناسبة يسويها المصممين لازم يجيبون سليبرتي لها، و طبعا السلبريتي لابسين لبسهم. من الجايين كانت فيه داكوتا فانينق. 

داكوتا كانت لابسة من إيلي صعب (أكيد). ما فيه شيء جديد سوته داكوتا خصوصا شعرها. شخصيا ما عندي أي مشكلة مع داكوتا، و لا ستايلها، حتى لو إني أحس إنها بعض المرات تحاول بقوة تطلع بستايل ما أحسه يلبق لها. 

مشكلتي مع داكوتا مع شعرها، بلا مبالغة شعرها هو نفسه يمكن من سنتين ما تغير، نفس التسريحة مع كل لبس، بعض المرات أحسها كأنها صوره بواحد من هذي المواقع اللي فيه رسمة لبنت، تلبسونها اللبس اللي تبغينها. بصراحة ما عاد أحس باللبس اللي تلبسه، ما عاد أقدر أشوف شيء غير شعرها. 

مع إني قلت لكم إني صرت ما أقدر أشوف أي شيء غير شعرها لكن أحس إن هذا اللبس كان ممكن يكون حلو، خصوصا إنها دخلت إكسسوار ملون (صنادل برادا أحمر و أسود). و الشنطة الكلتش اللي فيها ورود. 

و لأني مو الوحيدة اللي بالعالم اللي بجد متنرفز من شعر داكوتا، قررت إني أجرب شىء  لو بتعديل بايخ على صور. أختي أمنيتها إنها تقابل داكوتا علشان بس تحوس شعرها. و أنا لو شفتها بأعطيها ربطة علشان تضف شعرها، بأي شكل، بس أهم شيء ما عاد أشوفه مفكوك بالطريقة هذي (أحلف لو كنت أمها لأحرمها من الطلعة، لو عيت تغير شكل شعرها:) .

كل الأربعة تسريحات اللي أخترتها من عروض، بصراحة ما كنت أفكر قد إيش التسريحة حلوة، أو إن كانت مناسبة أو لا، بس أهم شيء، شعر مرفوع، شيء مختلف عن الشيء اللي طفشت منه. و أنا أدور بالبداية كان كل همي تسريحة شانون، أي شيء ما عاد أشوف في شيء على كتوفها، لكن آخر لوك (الأخير من اليمين)، فكرت أنه ما يهم يكون شعرها مرفوع أو لا، أهم شيء  يكون شعرها مو على وجهها، و مو مستقيم. 

شرايكم بشعر داكوتا؟ متضايقين منه زيي أو أنا أبالغ بالموضوع :)؟ 

The Perfect Conditioner

لما يجي الموضوع للعناية بالشعر، أو بالجسم أو بأي شيء ثاني داخل فيه كلمة "عناية" مو أنا الشخص اللي المفروض تروحون له، لكن راح أتكلم عن تجربتي الشخصية (مو نصيحة مختص). من 8 سنين تقريبا ما أفص شعري إلا بمكان واحد، و لا أفكر أغير لأني مرتاحة يكفي أنهم يسوون لراسي مساج :) أقص شعري عند فاشن، و لا أعرف و قلت لكم و لا أهتم بأي اقتراح ثاني لأني مبسوطة عندهم. الشيء اللي يخليني ما أفكر بغيرهم (مو هم أرخص ناس) لكن لأنهم يغسلون شعري، و يستخدمون فيه بلسم، ما أعرف وشو و لا قد حاولت، لكنه يخلي راسي خفيف :). بشكل عام أنا ما استخدم بلسم أبدا، لتجارب سيئة لما كنت صغيرة (يا يتلصق شعري اللي أصله مزيت، أو يتلصق و يتساقط). 

من فتحت بوتز، و أنا أحس أخلاقي متحسنة، بس أروح هناك و أدور فيها، ينشرح صدري حتى لو ما شريت شيء :). قبل فترة أختي شرت من عندهم بلسم (كوندشنير) علشان شعرها جاف، طبعا هي قبل جربت نوعيات مختلفة، كلها كانت تخلي شعرها يتساقط (نفس الشيء اللي صار لي قبل)، لكنها و لأن شعرها جاف ما استسلمت ... ما أعرف وش خلها تجرب بلسم بوتز، لكنها كانت بعده مبسوطة ... نصحت صديقتها فيه و هي بعد انبسطت على نتايجة ... قررت إني أعطي البلسم فرصة ثانية، خصوصا أنه عندهم بلسم للشعر الدهني (صحيح أنه أكليل جبل و ريحان، و أنا أحس إن هذا الأشياء موجودة بس لمعاجين الأسنان :) لكن شريته :). شعري ما تساقط و لا تلصق، و أقدر أسوي لراسي مساج فيه :) 

قلت لكم البلسم موجود عند صيدليات بوتز، يصلح لكل أنواع الشعر، لكل الجنسين، سعره (زي مو اضح بالصورة بـ 12 ريال). بالمناسبة سعره ببريطانيا .99 بينس يعني تقريبا 6 ريال لكن الشايع و عفوا على الكلمة لكن بجد أنا متنرفزة منه لأنه شخص جشع جدا، و لا يشبع (رفع أسعار المكياج) و بعد منع الترجيع من المحلات اللي هو وكيلها بالمنطقة (يقولون يعطونك بطاقة علشان تشترين منهم من جديد) يعني ما فيه أمل يرجع لك فلوسك (يعني بيآخذ فلوسنا بالقوة). 

صحيح إن الموضوع عن البلسم حق بوتز، لكن هذا ما يمنع إني أقول لكم لو كنتوا تعرفون أي وسيلة، تمنع الشايع من أنه يتمادى بجشعه، لا توقفون لأن هو ما راح يوقف عن سرقتنا. 

Viola Davis: Wearing no wig

أعرف أنه لسا أسابيع الموضة ماشية، وصلنا الحين ميلانو، لكن ما أعرف ليه ما أحس بأي حماس تجاه أكثر الأشياء، ما أقول كل العروض بايخة، لكن ما أظن فيه عرض لحد الآن أعجبني من أوله لآخرة يمكن إلا تايكينز ثيوري (أحس بنشوف منها كثير على الريدكاربيت) و توب شوب يونيك، أما باقي العروض تعجبني قطع فيها، علشان كذا ما أحس إن عندي رغبة إني أكتب عنها، يمكن أكتب بعد ما تخلص كل العروض عن أهم الأشياء، لكن إلى الآن ما أحس فيه شيء خلاني أتكلم عنه.

المهم بالجانب الثاني شفت هذي الصورة لفيولا دايفس أمس و هي كانت حاضرة وحدة من المناسبات، و لأول مرة من طلعت على الريدكاربيت جت من دون باروكة.

بصراحة حبيت شكل فيولا من دون باروكة، ما أعرف ليه من دون سبب معين ما كان عاجبني شكلها ببواريك، أحس فيه شيء غريب، كأنه شعرها متعلق فوق، مو تابع لها، يعني واضح أنه مو شعرها ... 

فايولا مو أول سيلبيرتي تطلع بشعر قصير أو من دون شعر، يعني قبلها أظن بالتسعينات طلعت ديمي مور، اللي حلقت شعرها علشان فيلم، و بعدها نتالي بورتمان طلعت بعد برأس أصلع. 

بس هذي مو أول مرة تطلع فيولا من دون شعر قبل يمكن أسبوع أو أسبوعين طلعت فيولا نفس الشيء من دون باروكة بإيدتوريال على مجلة إل آي تايمز، الإيدتوريال أعجبني مرة، و تمنيت لو أشوف فيولا على الريد كاربيت بنفس الشكل. 

ما أعرف وش راح تسوي فايولا بشعرها بالأوسكار الأحد/الإثنين  الجاي، لكن بجد أتمنى ما تلبس باروكة، و تطلع بشعر قصير مرة ... 

بفستان زي هذا، أو هذا من مجموعة مايكل كورس الأخيرة خريف 2012، مع أقل كمية من المجوهرات أحس إنها بتكون من أحلى الحاضرات للحفل. 

هذي وحدة من الصور اللي كانت بالإيديتوريال فايولا فيها لابسة فستان من جايسون وو خريف 2011، شكلها فيه مرة حلو، هو اللي خلاني أتمنى أشوفها من دون باروكة. 

تتوقعون فايولا تلبس باروكة أو لا للأوسكار، و تعبجكم أكثر بباروكة أو من دون؟

Inspiration 6: Messy Hair+ Green Accessory

هذا اللوك ما من ليا سيدو ما تحملت تنتهي السنة و أنا ما تكلمت عنه، بالنسبة لي ليا هنا شكلها كان من أحلى الأشكال اللي شفتها هذي السنة على الريد كابيت. يمكن أبالغ، خصوصا إني من السنة اللي فاتت، قلت لكم إنها عاجبتني قوة، كل شيء فيها حلو (يمكن بتصير بالنسبة لي كيرستين دونست الثانية:). 

أولا ما أعرف فستانها من وين، على الأغلب برادا، لكن مو أكيد (هذا تخميني)، الفستان ما يهمني هنا، أكثر شيء عجبني شعرها. على إنها لابسة فستان سهرات، ليا تركت شعرها بتسريحة جدا بسيطة (فوضوية)، و وجه من دون مايك اب كثير ... بعض الصور زي هذي، تخليني أتمني أنه الحين تجيني مناسبة كبيرة، علشان أسوي زيها. 

الشيء الثاني اللي اللي أعجبني هو إنها أختارت شنطة خضراء مع فستان زي كذا كله ألوان كلاسيكية ... قولوا عني إني منحازة، لكن أحس إن اختيار الشنطة الخضراء مع ألوان "تعودناها" على الفساتين فكرة عبقرية :) ... هنا بتلقون صورة أوضح للشنطة. 

شرايكم بتسريحة الشعر بالشكل هذا؟ و الشنطة الخضراء؟

Effected

ما كنت أؤمن أنه ممكن ممثلة يتأثر شكلها بدور هي مثلته، مع إني ما زلت أردد إن آن هاثواي ما تعدل لبسها إلا بعد "ذا ديفيلز وير برادا". لكن بعد ما شفت كيف روني مارا تغيرت بعد تمثيلها فيم "ذا قيرل ويذ ذا دراقون تاتو" عرفت كيف الدور ممكن يأثر على حياة ممثله. 

من اليسار روني قبل ما تصور الفيلم، و من اليمين صورة لروني قبل شهر بوحدة من المناسبات، (شوفوا هنا شكل روني بالفيلم). بالنسبة لي أنا حابة التغيير اللي سوته، عاجبني القوثيك عليها، الشعر الأسود، مع الحواجب و الغره القصيرة، مناسبة مرة عظام وجهها، و بالنسبة لي أتمنى تبقى على هذا الشكل. 

لما شفت الصباح هذي الصورة لروني و هي تروج للفيلم حقها (نفسه)، بالسويد، و لابسة هذا الفستان الأسود من برابل قرونق، تأكدت أنه روني المفروض ما ترجع لشكلها الأول، مو لأنها مو حلوة فيه، لكن لأنه بهذا الشكل مستحيل أحد يشوفها و ينساها، لكن يوم بشكلها الأول شفتها أكثر من مرة، و كل مره أنسى كيف شكلها، لما أقرى عنها شيء.

شرايكم باللوك القوثيك؟ و بأي شكل عجبتكم روني أكثر؟

lem·on [lem-uhn]

سببين يخليني أحط هذي الصورة لهذا الإيديتوريال القديم، (مو قديم مرة، يعني السنة اللي فاتت، بس بالنسبة للمجلات قديمة :). السبب الأول إني كنت حابته مره، أحسه كان أحسن إيدتوريال شفته السنة اللي فاتت، و أحسن إيديتوريال شفت فيه طبعات الحمضيات هذي اللي من ستيلا. 

السبب الثاني إني أحب الليمون، و الأسبوع هذا صار فيه سبب جديد إني أحبه، فلما كنت أفكر أكتب عن هذا السبب، و جلست أدور صوره حلوة لليمون، تذكرت هذي الصورة، فقررت إني أحطها، مع إنه مالها معنى بالموضوع :). 

من عرفت نفسي، و أنا أعرف إن فروة راسي تغطيها طبقة لا بأس بها من القشرة، ما عرفت أبدا أحلها، مرة وحدة تخلصت منها بشامبو مرة غالي، بس مو معقولة إني أشتري كل شهر هذا الشامبو ... فقررت إني أتعايش مع قشرتي. طبعا ما أحاول أغطي راسي كثير، بالذات وهو رطب ... صرت أغسل رأسي بموية باردة، حتى بالشتاء، و مع ذلك ما شفت شيء تغير. 

الأسبوع اللي فات قالت لي صديقتي لما تتروشين بعد ما تغسلينه من الشامبو حطي خل، و بعدين غسلي الخل. و لأني ما أحب ريحة الخل، حتى وهي تطير بسرعة، رحت أتأكد من فعالية هذي الطريقة بالنت، لقيت واحد من الحلول يقترح عصير ليمونة، بدل الخل. أعرف يمكن هذا الشيء قديم بالنسبة لكثير منكم، بس للي زيي ما كانوا يعرفون الطريقة، الطريقة بسيطة: 

1. عصير ليمونة أو ليمونتين (على حسب كثر عصير الليمونة).
2. حطيه أو حطه بعد ما تغسل شعرك من الشامبو، بعدين سوي مساج لرأسك (يعني فرك/ أو فركي رأسك بأطراف أصابعك)
3. غسل/غسلي رأسك، بعدين و لاااا (شعرك تقريبا ما فيه قشرة :). 

إن شاء الله الحركة أعجبتكم، و لو كنتوا عارفينها قبل، أو ما تهمكم لأن رأسكم ما فيه قشرة، أظن إن الصورة حلوة، و تستاهل إني أطلع أي كلام علشان أكتب عنها :). 

Give Me that Hair ... Now

مرة ثانية للشعر، بعروض نيويورك بعد، أمس كان من العروض عرض أوسكار دي لا رينتا، علشان أكون صريحة معاكم عجزت أركز على الملابس، لأني ما قدرت أشيل عيني عن شعور العارضات. 

ما عمري حبيت الشعر الكورلي بهذا الشكل، صح إن أترك شعري يتموج على كيفه، بس شعر زي كذا ما قد شفت، و لا بعد أتذكر إني قد شفت تسريحة، و كان ودي الحين (تماما) الحين إني ألقي زواج أروح له، و أسوي شعري زي كذا. 

ما أعرف وش الشيء اللي سحرني بهذي التسريحة، يمكن الدراما اللي أحس أنه طالعة من أشكال العارضات فيها، ما عندي فكرة كيف سرحوهم أصلا (بس على الأغلب أنه مو شيء صعب ينعرف، أو يتسوى) و سهولة و أريحية هذي التسريحة (الشعر طاير، من دون تنظيم) يمكن هي اللي حببتني فيها. 

ما أنكر إني أحب كثير الحياة بالأفلام (أكيد السعيدة منها)، إيه كبيرة، و أعرف أنها مو صدقية، بس ما يعني إني إذا شفت شيء كأنه فيلم، بالخصوص فيلم تاريخي رومانسي (ما أحب هذي النوعية من الأفلام، بس أشكالهم دائما حلوة)، إني أتمنى إني أطلع حلوة زيهم. 

شرايكم بالشعر بأوسكار دي لا رينتا، أو أي شيء ثاني عجبكم بالعرض؟. 

Rainbow

قلت لكم أمس، أنه عرض جيل ساندير نايفي مو أحسن عرض أمس (على الأقل بالنسبة لي)، إذا كان فيه عرض من عروض قبل أمس لازم يفوز بأحسن عرض، هو عرض تكوون، كثييير من القطع كانت حلوة، التشجير أعجبني مرة، الألوان أعجبتني، الجزم أعجبتني مرة، و يمكن من أكثر الأشياء اللي أعجبتني بالعرض هو الشعر، من أمس و أنا أبغى أتكلم عنه، بس كنت أنتظر صورة حلوة.

تعرفون إني أحب الشعر الملون، ما أعرف ليه بس أحس فيها شيء كرتوني، مع إني ما عشت طفولتي و أنا محاطة بأفلام كرتون كثيرة، زي كثير من الناس اللي أعرفهم.

الشعر بعرض تكوون كان ملون، مو بصبغة، و لا ببواريك، و لا توصيلات، كان ملون ببودرة يستخدمونها بالهند لتلوين الشعر بمناسبات معينة (ما أبغى أتفلسف، و أقعد أعطيكم قصص عن الشيء هذا، و بعدين يطلع شكلي بايخ، و جاهل :).

أول مرة شفت شعر ملون بالبودرة كان بعرض لإيتام بباريس أظن أنه السنة اللي فاتت، حبيت أشكالهم مرة، كان ودي لو أعرف كيف سوو هذا الشيء علشان لو مرة سويت حفلة ألون شعري (أعرف أني أتكلم عن الحفلات كثير، و كأني ما أوقف حفلات، و العكس هو الصحيح، يمكن ما أحضر أكثر من 3 بالسنة :).

زي ما قلت لكم حاولت أعرف كيف يلون الشعر بذاك الوقت بس ما قدرت، كنت أحسب فيه بودرة أو بخاخ مضغوط خاص للتلوين بس ما حصلت شيء زي كذا. قبل فترة قالت لي أختي إنها لقت فيديو لكوافير إستورالي يوري كيف يسوي شعر ملون بالبودرة (طلعت هذي البودرة أي شيء ممكن حتى شدو قديم). أو حتى ممكن تلقون بودرة ملونة (ألوان كثيرة) بمحلات المكياج زي مايك آب فورإيفير، أو ماك أو إنقلوت.

هنا باقي العرض، لو تيغون تشوفون، ولو حبيتوا الشعر زي ما أنا حبيته، شوفوا الفيديو تحت، تراه شوي طويل، و بالإنجليزي، بس أظن الفكرة واضحة.

آخر شيء تذكروا أنه بودرة، يعني يمكن يوسخكم، ألبسوا ملابسكم قبل، حطوا عليكم سفرة أو كيس أو الروب أو أي شيء، تأكدو إن الشعر ماراح يلمس الملابس، أو على الأقل أنه نشف، و لا راح يوسخ ملابسكم، جربوها قبل على ملابس مو مهتمين فيها كثير، لأنه ما أبغى أكون سبب لخراب لبس تحبينه، بعدين تقولين أنا السبب D:. 

Think Pink, and Other Colors

أعرف ما أمداني تكلمت عن الشعر الوردي يمكن بداية رمضان، لما طلعت صورة لكاتي بيري بشعر وردي (ولا طلعت لها صورة بعدها). من بداية هذا الشهر رمضان / أغسطس و أكثر من وحدة من السلبرتي طلعوا بشعر ملون. كايت بوسورث بأطراف زرقاء و بعدين دايانا أقرون (حقت قلي) بشعر وردي بعد. كل الثنتين قالوا الناس عنهم إنهم صبغوا علشان أدوار راح يمثلونها بالفترة الجاية، ما يهمني إن كانوا صبغوا علشان شيء راح يمثلونه أو لا، لأني أحب الشعر الملون و أشوف أنه يدخل البهجة على قلبي :). 

بهذي المناسبة تذكرت إيدتوريال مو جديد، بس حبيته، و كنت أدور له مناسبة علشان أكتب عنه و أحطه لكم، الإيدتوريال من مجلة جيليس و العارضة فيه هي شارلوت فري. 

شارلوت عارضة أمريكية (تقريبا جديدة)، بس أهم شيء فيها إنها صابغة شعرها وردي، يعني من طلعت هذي السنة و شعرها وردي، بالمعروض و بكل مكان، يعني مو بس لهذا الإيد. 

اللي كان عاجبني بهذا الإيدتوريال أنهم أستخدموا شعرها علشان يخدم الصور، عاجبني فيه جو السيرك (قبعة كبيرة، بناطيل مقلمة) و أهم شيء شعر شارلوت الوردي. 

من ناحية الملابس و تنسيقها بالنسبة لي ما فيه شيء مميز مرة، بس تعرفون الصور بهذا الإيديتوريال من نوعية الصور اللي البنات يحبون يحطونها بأي مكان يستخدمونه (بي بي، ماسنجير، فايس بوك، تمبلر، تويتر) فيعني إذا ما عجبتكم فكرة الشعر الملون، على الأقل تقدرون تسخدمون الصور لأغراض أخرى :) 

و علشان تتفرجون على باقي الإيدتوريال، وزي ما قلت لكم إذا ما عجبكم شكل شعرها، تقدرون تستخدمون الصور لشيء ثاني، بس لو حتى الصور ما أعجبتكم، ما عندي لكم حل للمشكلة هذي :) 

اللي خلاني أكتب عن هذا الموضوع من جديد، غير أنه زي ما قلت لكم شفت أكثر من سلبرتي صابغة شعرها، لكن بعد لأني شفت بكليرز هذي الخصل الملونة، (إيه أروح لكليرز صح إن عمري أكبر من 15 بس إلى الآن عندهم أحسن ربطات للشعر بألوان كثيرة :).

المهم أنا صراحة ما أعرف كيف ملمس الشيء هذا يعني شعر طبيعي أو لا، شعر إنسان و إلا من وين جاي، بس شكله حلو، و عجبتني ألوانه، و أهم شيء يعطيك فرصة تلونين شعرك، من دون ما تغامرين و تلونينه صدق. خصوصا أنه (على الأقل من وجهة نظري) الشعر الملون صعب يطلع حلو بالمناسبات الرسمية (يعني زواجات، ملكة زوارة) أو ما شابه، لكنها بتطلع حلوة مرة لحفلات ثانية (خصوصا العيد جاي). 

آخر شيء بس بغيت أعلمكم عن سعرها، سعر الخصلة الوحدة بـ 33 ريال أو ما يعادلها من العملات الأخرى :). 

شرايكم بالإيديتوريال؟ و ممكن تستخدمون هذي الخصل من كليرز، و إن كنتوا استخدمتوها كيف لقيتوها؟