Met Gala 2013: Hair Trend

من الأشياء اللي كانت أمس تقريبا على كلن هو خصل ملونة (بالمناسبة، إذا هذا التصرف بنك، ودي أقولكم أختي بنك) . أعجبني الشكل بالذات على ديان كروقر لأنه لبسها مرة فخم (لابسة شانيل أوت كتور، و الفستان واحد من الفساتين اللي تمنيت أشوفها بالأوسكار). المهم ما أبغى أطول، بس من بين أكثر الأشخاص اللي عجبني شكلهم كانت نيكول ريتشي بشعره الأبيض (كامل). 

إذا كنتوا حابين الفكرة، و لا تبغون تصبغون شعوركم صدق، و لا تعرفون من ين تحطون خصل ملونة، هذا تيتوريال سريع كيف تسوون شعركم كذا ملون. بللوا أطراف الشعر (أو خصلة كاملة إذا تبغون) و مرروا عليها ألوان باستيل (اللون اللي تبغون و أكثر من مره علشان يقوى اللون) و بيمسك اللون على الشعر (طبعا يروح لما تتروشون). 

ملعومة جانبية علشان ما تقولون لي ما نفع، كل ما كان الشعر أفتح كل ما وضح عليه اللون أكثر. 

إيش رأيكم بالشعر الملون؟ 

Best Dressed: BAFTA & Grammy 2012

موسم الجوائز لسا ما خلص، و مسلسل الملابس المحبطة متواصل، علشان كذا ما أتوقع إني بأشوف شيء حلو بالأوسكار ... أمس كان بلندن جوائز بافتا للتلفزيون و السينما، و بعد بأمريكا بلوس أنجليس كان فيه قرامي ... صراحة طولت و أنا أدور على شيء مقتنعة أنه حلو، لكن ما لقيت، لكن لقيت "أحسن" مو فساتين حلوة :). 

Michelle Williams in H&M

ميشيل وليمز كانت جاية للبافتا بفستان مو غريب عليها (أبيض و أسود)، من H&M صراحة ما أعرف وش قصة الفستان، يعني هو فستان رخيص، أو H&M راح يسوون زي توب شوب و يطلعون ماركة غالية، ما أدري لكن الفستان عادي، صح خياطته نظيفة، لكن مايك آب ميشيل و الإكسسوار اللي أختارته معاه (السلسال، و الشنطة اللي علي شكل كتاب) كلها أعطت الفستان شكل، و لا أنسى بعد شعرها عاجبني مرة. 

Taylor Swift in Zuhair Murad

 تايلور سويفت كانت حاضرة للقرامي أمس، لابسة فستان من زهير مراد، إذا ما كنت واهمة حتى قرامي السنة اللي فاتت لبست لمصمم لبناني، أتذكر إنها لبست لإيلي صعب :). شخصيا الفستان مو ذوقي أبدا، يعني مرة ثقيل، لكنه ناسب مرة على تايلور، يمكن لأنها طويلة ما أعرف، لكن أكثر شيء حببني بهذا اللوك، هو أنه تايلور غيرت عن تسريحتها المعتادة، شانون بشعر كرلي ... حبيت وجه تايلور فيه مرة، و يمكن لأنه بنظري ما فيه أحد لبس أحسن منها. 

شرايكم بميشيل و تايلور؟ و إن كنتوا متابعين مين أكثر شيء عجبكم أمس؟

Inspiration 2: Sweater+ Pleated Skirt

بالعادة، يعني بشكل عام تايلور سويفت ما تعجبني (ما أعرف أغانيها) بس قصدي ستايلها، يمكن الموضوع راجع لشعرها اللي قليل ما أشوفه بشكل مختلف، لكن المرة الوحيدة اللي شفته فيها مستشور، ما عجبني. 

قبل فترة بعد شفت لها صورة و هي تمشي بالشارع، ما أعرف رايحة لوين أو جاية من وين، بس شكلها أعجبني مرة، و هذي من المرات يمكن النادرة اللي أحب شكلها فيه، لكني كل مرة أشوف الصورة، أحس بتأنيب ضمير إني ما كتبت عنها. 

التنورة المكسرة، من فترة و هي عاجبتني، ما أعرف إن كنت ما شفتها موظفة بشكل حلو من قبل، أو إني ما شفت تنورة مكسرة لحد الآن تعجبني. 

تعرفون من زمان إني أحب هذا اللون الأصفر الماسترد (خردل)، و يمكني بعض المرات انحاز له، حتى لو ما كان يستاهل، لكن هذي المرة شكل تايلور، بالتنورة المكسرة هذي و الكنزة الكحلية مرة حلو. أعجبني شكل شعرها، أعجبني لون الروج الأحمر حقها و الجزم الفلات اللي تقريبا نفس اللون، و حتى الحلقات اللؤلؤ اللي هي لابستها معاه. بالنسبة لي و خصوصا أنه الوقت مناسب، أعتقد أنه هذا اللوك بيكون مره حلو لمناسبة بسيطة بالوقت هذا من السنة (الفترة القصيرة هذي اللي نقدر نلبس فيها ملابس ثقيلة). 

باختصار اللي تسأل و تقول وش ممكن بنت عمرها 21 تلبس، أظن أنه هذا لبس مناسب لشريحة كبيرة من البنات بالعشرينات، و بعد بالطعشات :). 

شرايكم بشكل تايلور سويفت هنا؟ ممكن تلبسون زيها؟