Lady in Yellow

ما أعرف إذا قد صرحت بعدم حبي للون الأصفر (على الملابس)، و إذا كنت صرحت لكم، ما أتذكر كم مرة قلتها لكم هنا، ما يهم إذا كنت قلتها قبل أو لا، لأني بأرجع أقولكم، إني ما أحب اللون الأصفر، بس كل مرة (أو أغلب المرات) أشوفه على الريدكاربيت، يكون لبس مرة يعجبني، زي شكل ليا سيدو بهذا الفستان اللي تحت من برادا، بحفل البافتا قبل كم يوم. 

أعتقد إن كل الثلاثة فساتين اللي حطيتها تحت، قد تكلمت عنها قبل، ميشيل وليمز بفيرا وانق بأوسكار 2006، إيما ستون بأتلييه فيرساتشي أظن السنة اللي فاتت بفرنسا، و دايان كروقر بجوائز ساق أعتقد 2009 بفستان من جايسون وو. لكن ما يمنع إني أجيب أشكالهم مرة ثانية علشان ندرس الموضوع من جديد. 

على إنها كلها لها أكثر من سنة (طبعا إلا ليا)، إلا إنها كلها بالنسبة لي لو أحد منهم لبسها أمس بأحبها زي ما حبيتها قبل سنة أو قبل عشر سنين. لما جمعت الصور على بعض أعتقد إن السر دايم يكون بالروج الغامق (أحمر أو فوشي أو عنابي) و العيون بس ماسكارا أو روموش صناعية، الشعر يكون ريترو، و أعتقد بعد إضافة مهمة، الواحد لازم ما يخاف من إختيار مجوهرات تكون ذهب أبيض يكسر اللون الأصفر اللي مسيطر على كل اللوك. 

إلى الآن ما جربت الأصفر، ما عندي مناسبة قريبة ببالي ممكن تخليني أجرب الأصفر و أشوف يمكني كنت ظالمته، و مو بس يطلع حلو على الريدكاربيت، بس أكيد أول مناسبة تحصل لي، باحط هذي الطلات ببالي. 

أنتم وش رأيكم بالأصفر بشكل عام؟ و بشكل ليا بالبافتا بشكل خاص؟ 

Oz

أمس كان بريمير فيلم Oz The Great and Powerful، بطولة الفيلم طبعا مع جايمس فرانكو كانت لميلا كونيس، ميشيل وليمز و ريتشل فايس. الحلو بالموضوع إن كل الثلاثة دايما لبسهم حلو.

ما راح أتكلم كثير عن لبسهم بالبريمر، لأني أعتقد على الأقل وحدة منهم بتدخل قائمة أحسن الملابس لشهر فبراير. بس بشكل عام ميلا كانت لابسة دولتشي آن قابانا، ميشيل وليمز ببرادا و ريتشيل فايس بفيكتوريا بيكام (أعجبني مكياجها مرة).

 ما يحتاج إني أقولكم إتي متحمسة مرة للفيلم وودي أشوفه، لكن اللي خلاني أتحمس و أقرر أكتب عنه، غير إن شكل الثلاثة عجبني بالبريمر (بشكل متفاوت)، لكن اليوم لما كنت أدور بالمكتبة شفت هذا الكتاب Everything Oz (موجود بالصورة) و أعجبني مرة. الكتاب عبارة عن أشياء ممكن تسوينها (أشغال و أكل) كلها لها علاقة ب Oz بشكل أو بآخر. لما رجعت للبيت قررت إني أسوي سيت عن الموضوع (أنا سويت السيت بإيحاء من الفيلم القديم The Wizard of Oz اللي ما أحبه)، هو صح أنا ما أحبه، و أتذكر أول مرة تفرجت عليه كنت معصبة مرة، لأني تزلته تورينت و كان تحميل فيلم يآخذ قرن و بعدين شفت الفيلم و لقيته سخيف و زعلت. ما علينا من قصة زعلي، بس إني بعيد عن سخافة القصة أظني مع الوقت بديت أستظرف الشخصيات و أشكالهم، خصوصا جزم دروثي الحمراء (بالكتاب فيه كيف تسوين جزمة حمراء لماعة). أعتقد بسببه صرت أستظرف الجزمات الحمراء. أخترت الجزمة الحمراء هذي النص كعب (ما أعرف من وين جبت الاسم) من سيلفاتوري فرقامو، و الفستان المربعات من أيسوس (لأن دورثي كانت لابسة فستنان مربعات "قينام" بالفيلم). أخترت الخاتم هذا لأنه عاجبني، و لأن فيه شخصية الأسد (البسة أخت الأسد). و هذي الشنطة (بعد لأن هذا ستايل اللونش باق عاجبني من زمان) علشان شخصية التنكة. آخر شيء حبيت احط علبة الظل هذي من أوربان داكي مطلعين مجموعتين وحدة للساحرة الشريرة (اللي أنا حاطتها) و وحدة للساحرة الطيبة.

 ترى كل الخيارات مبنية على القصة القديمة، ما أعرف إذا الفيلم الجديد له علاقة بالقديم.

Rounded Necklace

بقولدين قلوب ميشيل وليمز طلعت مع مجموعة ثانية من اللي كانوا حاضرين حفل توزيع الجوائز، بحركة ما حبيتها لو تتذكرون وهو موضوع الربطة أو الطوق. المرة هذي بعد ميشيل و أكثر من ممثلة منهم كاميرون دياز و بينالوبي كروز كانوا لابسات "تقريبا" نفس العقد. 

العقد هذا اللي ما أعرف وش أسمه أنا خرفت له اسم بالعنوان مو متأكدة منه (لو تعرفون قولوا لي)، من زمااااان آخذ لي عقلي، الصيف هذا كنت أدور على شيء يشبه له بس ما لقيت، كذا صف فصوص (ما يهم ألماس أو لا) ما فيه شيء طالع، ما فيه حوسة بس شيء أنيق و فخم، لكن ما لقيت، و القليلات اللي لقيتها كانت غالية مرة. 

ما أعرف كيف بدأ ولعي بالنوعية هذي من العقود، لكن لدرجة رحت أدور على هذا الإيدتوريال لنتاشا بولي (ذيك الفترة)، و اللي كان عاجبني مرة، بس ما حفظته عندي (ما أحفظ أي إيدتوريال على جهازي، أكتب عنها و أحذفها:) لكن هذي الصورة من الإيدتوريال اللي عنوانه Just Married محتفظه فيها تقريبا من الصيف، لأنه نتاشا فيها يلبسها هذا الشايب عقد من كارتييه، بالشكل اللي كنت أحلم فيه. 

قطعت الأمل، لكن بعد فترة أنتبهت لشيء، لو كنتوا تبغون عقود زي هذي، بس ما تبغون تدفعون عليها مبلغ كبير، لأنكم زيي ما تروحون لزواجات و مناسبات كبيرة إلا تقريبا مرة كل سنتين، راح تلقون أشكال حلوة منها عند محلات الفضة، و هي أرخص بكثير من الذهب و الألماس.

شرايكم بالعقد؟ تفكرون تلبسونه مع فستان سهرة؟

Best Dressed: BAFTA & Grammy 2012

موسم الجوائز لسا ما خلص، و مسلسل الملابس المحبطة متواصل، علشان كذا ما أتوقع إني بأشوف شيء حلو بالأوسكار ... أمس كان بلندن جوائز بافتا للتلفزيون و السينما، و بعد بأمريكا بلوس أنجليس كان فيه قرامي ... صراحة طولت و أنا أدور على شيء مقتنعة أنه حلو، لكن ما لقيت، لكن لقيت "أحسن" مو فساتين حلوة :). 

Michelle Williams in H&M

ميشيل وليمز كانت جاية للبافتا بفستان مو غريب عليها (أبيض و أسود)، من H&M صراحة ما أعرف وش قصة الفستان، يعني هو فستان رخيص، أو H&M راح يسوون زي توب شوب و يطلعون ماركة غالية، ما أدري لكن الفستان عادي، صح خياطته نظيفة، لكن مايك آب ميشيل و الإكسسوار اللي أختارته معاه (السلسال، و الشنطة اللي علي شكل كتاب) كلها أعطت الفستان شكل، و لا أنسى بعد شعرها عاجبني مرة. 

Taylor Swift in Zuhair Murad

 تايلور سويفت كانت حاضرة للقرامي أمس، لابسة فستان من زهير مراد، إذا ما كنت واهمة حتى قرامي السنة اللي فاتت لبست لمصمم لبناني، أتذكر إنها لبست لإيلي صعب :). شخصيا الفستان مو ذوقي أبدا، يعني مرة ثقيل، لكنه ناسب مرة على تايلور، يمكن لأنها طويلة ما أعرف، لكن أكثر شيء حببني بهذا اللوك، هو أنه تايلور غيرت عن تسريحتها المعتادة، شانون بشعر كرلي ... حبيت وجه تايلور فيه مرة، و يمكن لأنه بنظري ما فيه أحد لبس أحسن منها. 

شرايكم بميشيل و تايلور؟ و إن كنتوا متابعين مين أكثر شيء عجبكم أمس؟

Headbands?

من الأشياء اللي خلتني أتضايق شوي من ملابس بعض اللي جايات، هو الطوق اللي شفته على أكثر من وحدة. بشكل عام ما عندي مشكلة مع الأطواق، أو الربطات، لكن ما أعرف ليه ما أحبها مع ملابس السهرة (ما أدري رأيي بيتغير بعدين أو لا). لكن الحين أحس إني ممكن ما أحب لوك، علشانها.

ميشيل وليمز و شارليز ثيرون و بعد زوجة إيوان ماكروقر إيفا، كلهم كانوا لابسين ربطات أو أطواق. ما أعرف ليه إحس إنها ما تصلح على أحد فوق العشرين، خصوصا لما تكون مع ملابس سهرة، كذا شعور يجيني إن اللي حاطتها تسوي نفسها "بنوته" بالقوة. أو إنها شوي حركة سخيفة، بصراحة ما عندي سبب مقنع إني ما أحبها، لكنها ما تعجبني، و أعتقد إني ما حبيت أشكال بذات شارليز و ميشيل علشان الشيء اللي حاطينه على روسهم.

أنتم وش رأيكم؟

Things I wouldn't do

الريد كاربيت لكان و الأوسكار تقريبا زي زواجاتنا ... لأنه الزواجات قربت باتكلم لكم عن لوك ميشيل وليمز بكان بالليل (الصباح أعجبني و يمكن أحط عنه بإن بريف عن كان) ...

المهم مشيل لابسه من شانيل أوت كتو للربيع للسنة هذي ... شخصيا مو الفستان المفضل لي بالمجموعة ... أما ليه ما أعجبني علي مشيل أولا الفستان مخلي نشيل قصيره مره ... و هي مو ذاك القصر زي ما تشوفون طولها ...

الشي الي ما عجبني بموضوع الأكتاف ... لو كانت أكتافي زي مشيل مو مستقيمة (منحنية قوة) ما راح ألبس أبدا فستان بسيور مو عاد سيور طايحة كأن كتوفي عجزت تشيله ... لمشيل أختار لها يا بف سليفز ... يا سيور عريضة أو كت أو ستاربليس لكن سيور نحيفة طايحة؟!!! no way.

نجي للوجه ... الفستان أساسا وردي فاتح مرررره و هي بيضا يعيني فكرة إنها تطلع بناتشرال مايك آب آبدا مو موفقه طالع الفستان كأنه قميص نوم ...

أما الشعر ... مع إني ما أحب كثير الشعر القصير لأني أحس أنه ممل لكن لو شعري قصير مستحيل أطلع لريد كاربيت أو زواج علي مقياسنا بالشكل هذا ... إذا ميشيل ما تبغي تسوي ريترو زي كيري موليقان فيها حلول ثانيه ... تشده كله على ورا ... تشد الغره على جنب ببنس أو توكه وحده كريستال بس تخليه كذا أبدا مو موفق ما عجبني اللوك أبدا

أقلها كان لبست مجوهرات كبيرة ... (شوبار يلبس الزوار مجانا)

أحبطتني :(