You don't have to open Pandora's box, when you can see what inside

أمس كان فيه حفل صيفي مسويته بوربري بلندن، ما أعرف وش الهدف منه، بس يمكن علشان يعطيني فرصة أكتب عن شيء لي فترة و أنا حابته مرة. 

للحفلة جاية كارولين سيبر الستايلست حقت إيما واتسون، قد كلمتكم عنها قبل و عن شنطتها شانيل اللي على شكل دمية، هذي المرة باتكلم بعد عن الكلتش حقتها. 

كارولين زي ما قلت لكم كانت جاية، و لابسة فستان من مجموعة فالنتينو أوت كتو ربيع 2011. 

ماراح أعلق كثير على الفستان و شكلها، بس تعرفون إني أحب الأقمشة الشفافة، و عجبني بعد إنها مسوية شعرها ذيل (مو واضح من هذي الصورة). طبعا أهم شيء بالنسبة لي هي الكلتش اللي معها من شارلوت أولمبيا. 

هذي مو أول مرة أشوفها على أحد، قبل فترة شفتها مع أوليفيا باليرمو، و من ذاك اليوم و هي معجبتني قوة، رحت أدور عليها كانت تنباع عند net- a- porter.com بس شكلها خلصت. كونها خلصت، هذا يعني إن هبالي فيها، و بحثي عنها ما توقف، رحت أدور عليها أكثر و لقيت لها أكثر من صورة، و معلومات عنها. 

أكتشفت إنه يجي معاها ثلاثة شنط قماش زي اللي تشوفونها قدامكم للناس اللي ما يحبون أحد يشوف وش جوا الشنطة. أول شيء أعترف أنه جزء من أعجابي بالشنطة هذي هو اسمها: Pandora's box أو صندوق بندورا هي جاية من أسطورة يونانية أول مرة سمعت عنها بكلاس أخذته عن روائع النصوص العالمية. باندورا هذي مشكلتها إنها فتحت صندوق شرور و طلعت الشرور لكل العالم، و خربت الدنيا (طبعا هذي طرقتي بتخريب القصص، يعني دورا على القصة الأصلية، و لا تآخذون مني). 

عاجبني شكل الشنطة و هي جواتها شنطة، و عاجبتني بعد من دون أي شنطة قماش جواتها، بس معاي أحس أنه صدق بتصير صندوق لشرور خصوصا و إن شناطي دائما مرمي فيها كل شيء يمر فيني، من قراطيس الأشياء اللي أكلها، بنس، أرواج أنسى إني حطيتها ببعض الشناط و ووو و... 

لو تحبوني، و تبغون تعطوني إيها هدية بس مستحين، شوفوا إيملي فوق، عادي قولوا لي بإذني P:

Velvet in Summer ?

 بأحاول كل فترة و فترة أرد على بعض الأسئلة اللي تجيني لما الناس يسوون بحث عن المدونة، الكلام ما راح يكون طويل، و بأحاول أخليه مرتبط بمثال قد ما أقدر.
قرأت سؤال تقول أو يقول فيه: اقدر البس مخمل في صيف؟ 
بالنسبة لي دائما ألبسي اللي يريحك و اللي تحبه، مو اللي يعجب الناس زي ما يقول المثل. بس مرات أحس بعض الأشياء خلاص الناس حطوها بشكل معين صعب يتغير.
اليوم شفت هذي الصورة لإيما روبيرتس وهي رايحة لعرض سلفاتوري فرغامو ريزورت 2012 بنيويورك.

شكل إيما مرة حلو مع هذا الفستان المخمل العنابي (الأغلب أنه فرغامو) مناسب لجسمها، مكياجها حلو، شعرها حلو، جزمتها حلوة، و الشنطة الكلتش "الصندوق" طالعة حلوة مرة مع اللبس. (بس) صيف و أحسه حر، و كأنها ما قدرت تتحمل للشتاء علشان تلبسه.
ما أعرف وش رأيي اللي بتلبس مخمل، بس أنا زي ما قلت لك أحس مرة حر. و أنت قرري بتلبسين مخمل زي إيما، أو لا.
نصيحة أخيرة، لو "لو" لبستي مخمل بالصيف، لا تلبسينه جاكيت أو تلبسين قطع كثيرة عليه، و حتى كيلون لا تلبسين، لأنه بيتحول بسهولة لبس شتوي مرة، و لا أظن أن شكلك بيكون حلو. 

Statement Headwear

من فترة و أخوي الصغير كل شوي يجيني و يقولي تعرفين ذولاك الزرق (يحسب إني ما أعرفهم) سووا له فيلم 3D. طبعا بعد سؤال و جواب عرفت أنه "الزرق" هذولا هم السنافر.

اليوم شفت هذا الشيء، شيء ما أعرف إذا يسمى إيديتوريال أو إيش بس فيه "سنفورة" لابسة من ملابس خريف 2011. الشيء هذا مسويته هربر بازار و تلقون هنا الباقي.

مو أول مرة تسوي مجلة أزياء "إيدتوريال" شخصيات كرتونية، قبلها شفت إيدتوريال لسمبسونز، و مرة شفت إيدتوريال لشخصيات ديزني التقليدية: ميكي و ميني و دونالد و البقية ... على أنهم هم المصممين.

مو بس كذا، شكل المصممين بعد يحبون الشخصيات الكرتونية، مثل بمجموعة دي آن جي ربيع 2011 كان فيه تي شيرت عليه سنو وايت. مو هذي الفكرة اللي أبغى أتكلم عنها، بس يعني كذا "سالفة تجر سالفة". أخترت هذي من بين الصور الثانية لأن سنفورة لابسة شيء من أكثر الأشياء اللي أعجبتني من خريف 2011 و هي قبعة لانفين، مو بس القبعة هي الشيء الوحيد اللي عاجبني من هذي المجموعة.

الشيء الثاني اللي أعجبني بعد بالعرض نفس الشيء، قطعة أو إكسسوار للشعر، ما أعرف وشو بس كأنه ورق أو زهرة سوداء، كل الإثنين عجبوني، بس القبعة مشكلتي معها، المشكلة الأبدية، هي أنها ما تنلبس هنا، مع أنه عندي قناعة، إنه بنشوفها كثيييير بصور "ستريت ستايل".

الشيء الثاني حابته (ما أعرف كيف يركب) علشاني ماراح أواجه صعوبة بلبسة، و مع إيش ينلبس، و حبيته بعد لأنه ممكن يخلي شعر مسرح بشكل عادي جدا شكله مرة حلو.

تعليق بسيط، الفستان الأبيض و الأسود (يسار) هنا صورته كاملة، حلو مرة، و عندي إحساس أنه فيه أحد من السلبرتي راح يلبسه. 

I ♥ 90's

ما أعرف وش شعوري تجاه ريانا (خصوصا ستايلها)، بس أعرف إني أحب ذكرياتي بالتسعينات خصوصا و إنها تقريبا الفترة الي عرفت فيها وش أنا جالسة ألبس أو وش أمي تلبسني. بعد بالتسعينات أعطتني أمي لقب أحتفظ فيه لنفسي لأنها تقول أني أحوس الملابس، بالتسعينات بعد قلت لخالتي و لعمتي بعد (عندي كثار) بس ثنتين منهم طلبت منهم إني آخذ ملابسهم لا كبرت، ما أعطوني شيء يوم كبرت، و لا أدري أساسا وش صار على أغلب ملابسهم اللي كانت تعجبني.

The 90's by alorwa featuring clutch bags

Acne twist dress, £150
Zara heel pumps, $60
Jimmy Choo clutch bag, $1,295
Chan luu jewelry, $420

شفت الصورة اللي فوق لريانا أمس بعد واحد من حفلات الجوائز الإمريكية للموسيقى، و اللي ما أدري كم عددها، أو أصلا هم حتى يعرفون هذي الحفلات، و إلا فجأة يدق عليها مدير أعمالها و يقول لها فيه حفل جديد. ما علينا، بس لما شفت هذي الصورة لريانا، أعجبني شكلها مرة، فيه طعم تسعينيات بقوة، خصوصا الفستان الفضي هذا (ما أعرف من وين)، شكله بساطته، كلها تعطيه هذا الشعور، بعد ما أعرف ليه حسيت أنه كيري برادشو (جيسيكا باركر بسيكس آن ذا سيتي). 

المهم قررت إني أسوي سيت عن لبسها، أو لوك التسعينات هذا. أول شيء أخترت هذا الفستان من أكني، من فترة عاجبني خصوصا من ورا شيكوا عليه. 

بعد أخترت معاه هذا العقد الأحمر، لأنه من فترة طويلة من مجموعة Lanvin for H&M و فكرة إكسسوار أحمر عاجبتني. 

بغيت كلتش فضية مع اللبس، و كعب أسود ببوز (أعرف إن بعض الناس يسمونه كذا)، الكعب هذا أعجبني مرة، شكله حلو و غالي، مع إن سعره جدا معقول و من زارا، يعني لو عاجبكم شوفوا يمكن تلقونه بوحده من الفروع. الكلتش الفضية من جايمي تشو، شفتها ببوتيكهم بسنتريا قبل فترة، فيه وحدة ذهبية زيها، أظن كلتش زي هذي، ممكن تمشي مع أي لبس سهرة.

Things to Invest in

كل يوم تقريبا من أسبوع يجيني إيميل من net-a-porter.com يذكروني بتخفيضات نهاية الموسم. بالسنوات اللي فاتت لاحظت أنه بالإنترنت تخفيضات نيت أي بورتيه زي العيد عند الناس الي يحبون الفاشن و الماركات الغالية. 

الصيف اللي فات خربت سيرفرات الموقع تقريبا و أنا أدور على فستان أقدر ألبسه لزواج ولد خالتي، و لا حصلت شيء يناسبني. السنه هذي للحق ما دورت على شيء و لا فكرت، لأني ما أحس أني أبغى أشتري أي شيء منهم. بس فيه أشياء عاجبتني لو قالوا لي خوذي أربع قطع من دون ما تدفعين و لا ريال، باختار هذولي. 

هو صراحة مو هذي الأشياء اللي أختارها، لأن عنوان التدوينة للأشياء اللي ممكن تشترينها بسعر غالي، و لا تطيح موضتها بكرا، و تقريبا تصير "قديمة" و لا تستاهل إنها تنلبس. فيعني من الآخر شيء تقريبا نقدر نقول أنك تستثمرين سعرها. (الأسعار اللي خاطتها فوق كلها بعد التخفيض).

البالطو، ما أعرف الكارديقان الملون هذا من ميسوني عاجبني مرة من العرض، ألوانه مرة حلوة، و أكثر شيء يعجبني بميسوني أن كثير من القطع، مو سهل تعرفين من أي موسم، فهي تقريبا أكثر قطعهم ما تصير "قديمة" أبدا. بصراحة النسخة اللي عاجبتني هي النسخة القصيرة (شوفوها هنا) بس هذي بعد حلوة.

الشيء الثاني اللي أكيد بانصح أي وحدة لو بغت تشتري شيء غالي تشتريه، هو كعب أسود، الكعب الأسود أظن أنه أقدم شيء بالتاريخ، و لا يطلع أبدا من الموضة، و يصلح من ملابس كثيرة (سهرة، و صباح)، الكعب هذا اللي من فونيه، عجبني مرة، خصوصا على عارضة الموقع (شيكوا عليه من الرابط). شكل الجزمة حلو، خصوصا أنه تقليدي تقريبا من قدام، بعدين من ورا جاي بكعب أبيض. 

يقولون الجزم هي الشنط الجديدة، مو يعني أنه يحط فيها شيء، بس تتذكرون قبل 3 سنوات و أكثر كل العالم كانت هابة بالشنط، الوقت هذا جا دور الجزم، علشان كذا أقترحت عليكم أكثر من جزمة. الشبشب هذا من ميو ميو عاجبني مرة، أحسه يجيب الانتعاش، الأهم و اللي أنا أحسه، أنه يتحمل كثير (خصوصا قاعدته خشب)، و يصلح ينلبس مع أشياء كثيرة، من طلعة عادية، لحفلة نهارية بسيطة، و بجو زي جونا تقريبا كل السنة صيف، ما راح أتحسف أجيبه.

آخر شيء الشنطة هذي من مارك جايكوبز، أعتقد أنه هذا الشكل من الشناط (سلسلة، و جلد أسود، و صغيرة) ماراح ينقرض أبدا، و الدليل شنطة شانيل مودموزيل، فإذا كانت شانيل بخاطرك، بس ما تقدرين على سعرها، بالنسبة لي هذي خيار مرة حلو، و عن ذوقي، أشوف إنها أحلى.

آخر شيء، على أنه نيت آي بورتيه ما يبيع أشياء رخيصة، بس الموقع هذا من أسهل المواقع الي تعاملت معها، يغلفون لك الشيء اللي شريتيه مجانا، يوصلون بسرعة، و أهم شيء أنه جدا متعاونين، مرة وصلني منهم عقد مكسور، بدلوه لي بسهولة، و من دون ازعاج. 

PINK: Day & Night

منشغلة الفترة هذي إنس أشوف لي ملابس و أغراض جديدة، أحس من زمان ما شريت لي شيء، و تراي صادقة لما أقول من زمان، يمكن أكثر من 3 شهور، حتى ما أتذكر وش آخر شيء شريته.

من الأشياء اللي ملاحظتها على السلبرتي هذا الصيف، و من الأشياء اللي صايرة تغريني أني أشتري شيء زيها، هو شيء وردي، الصيف هذا كل تقريبا سلبز طلعت بشيء وردي: ناومي واتس، كيت باسورث، كايتي هولمز، ديان كروقر ... و القائمة تطول 

قبل يومين شفت هذي الصورة لسلمى بلير، و عجبني شكلها، مرة، و حمسني أكتب عن الوردي، للي بخاطري من فترة أكتب عنه خصواصا و أنه تقريبا كل مجموعات الريزورت كان فيها وردي. 

من بين كل السليبز اللي لبسوا وردي (أكثرهم أشكالهم حلوة) حبيت إني أحط هنا صورة سلمى، لأني أحب كثير شكل الحوامل المرتبات و النظيفات، و اللي يعرفون كيف تطلع أشكالهم مو كأننا غاصبينهم على الحمل، و يعاقبونا بشكل يجسب سدة النفس.

زي ما قلت لكم أنه مجموعات الريزورت 2012 تقريبا كلها فيها علي الأقل قطعة وردي، و لحد الآن فستانين (أكيد ورديات) من هذي المجموعات أنلبست من سلبز: 

الأول لبسته العارضة بروكلين ديكر للميت قالا من مايكل كورس، حتى قبل لا يطلع المجموعة للعالم، أول ما شفت الفستان حفظته عندي لأني توقعت أنه أحد من السلبرتي بيلبسه، و نبهتني أختي أن بروكلين لبسته و خلصت. 

الفستان الثاني لبسته كايت بسورث من ريتشارد نيكل، الفستان هذا توقعت (إن أخوه) فستان نفسه بالضبط بس بكم، راح ينلبس، بس كايت لبست هذي النسخة بأسرع من ما توقعت. 

زي ما قلت لكم، الوردي كان بكل مكان، و يصلح لكل وقت ملابس صباح، أو ملابس سهرة. 

الصباح:

الملابس من اليسار لليمين: (نرسيسو رودريقز، مارك جايكوبز، سلين). من بين الثلاثة هذي أكثر شيء حبيت بقوة يعني ودي أسرقه الحين، هو البالطو اللي من نرسيسو عجبني بشكل غير طبيعي، لونه، شكله، شكل قماشة كلها تخليه حلو، و أهم شيء أنه مو ثقيل و لا ضيق يعني ممكن ينلبس لأكثر من جو، يعني لو لبستي تحته كل دولابك للجو البارد ما يطلع بايخ و متنفخ، و لو كان الجو "بويرد" ينفع بس تحته ملابس ربيعية خفيفة. 

أتمني أشوفه على أحد، بانبسط بجد أن فيه ناس قدرت هذا الشيء.

عجبني اللوك حق مارك جايكوب بشكل عام، تنورة وردية نفاشة (بناتية مرة) و معها سويتر رمادي (ناضح مرة). نفس الموضوع على سلين أعجبني لوك كامل، و أتوقع إني أشوفه بالضبط على أحد بالشارع أو بأي مكان زي ما هو بحزامه و قميصة و جزمته.

ليل:

من اليسار لليمين: (أوسكار دي لا رينتا، بوتشي، برابال قورنق). من الثلاثة ذولي أكثر شيء عجبني مرة هو اللوك اللي من بوتشي، أعجبتني التنورة الترتر المنفشة، مع التوب الشيفون ... مع أنه أكثر شيء أعجني، و نفس قصة البالطو اللي من نرسيسو ودي أسرقه كامل الحين، بس أعتقد أنه فستان أوسكار و برابال هم اللي راح ينلبسون للريدكاربيت و أحسهم بيطلعون حلوت. بخاطري بجد أشوف بوتشي على أحد، و خصوصا أحد بيلبق عليه هذا اللبس مثل تيلدا سوينتن أو كايت بلانشيت.

Perfect Look for Summer

فيه شيئين أنا طايحة فيهم الفترة هذي: ريتشيل زو (خلصت السيزون الأول و الثاني من ريتشل زو بروجيكت)، و الثانية هي بلايك لايفلي، بس تراي لسا ما انحدرت لمستوى GG لا تزعلون ياللي تشوفونه، بس عجزت أتحمل اتحمل تفاهته.
بلايك بالنسبة لي علي الأقل من الأشياء اللي شفتها إنها ما تعرف تمثل، بس صراحة البنت حلوة، و جسمها قاتل.

أنا مو من الناس اللي طايرين بستايل بلايك، و لا أنا بعد من اللي كل ما لبست شيء قاموا يعطونها دروس باللبس، و بعد ما تفرق بالنسبة لي كان عندها ستايليست أو لا (زي ما هي تقول)، لأني ما أشوف إن الموضوع يستاهل إني أفكر فيه أصلا.
ما يهم نرجع للموضوع الأصلي (زي دايم)، و ابغى أتكلم عن لبسها لجاي لينو ..
اللبس بالنسة لي بهذي الفترة يمثل كل شيء خاطري فيه، خاطري بقطعة من ميسوني، بس ما أعرف إيش، وش يستاهل قيمة مرتفعة؟ و أفكر إني أنتظر وش راح يسوون لتارقيت، يمكن يطلع معاهم أشياء حلوة، ينقدر عليها.
خاطري إني آصل لمجوهرات غالية و فخمة متى ما أبغى (تأثير ريتشيل زو)، البرنامج خلاني أقدر المجوهرات بشكل كبير، رغم إني ما أشتريها كثير، لأني ما أشوف إني "أحللها"، بس ودي كذا لما أشتهي أروح لمحل و أختار، و لا عندي مانع بكرا أرجعها لهم.
و أكثر شيء خاطري فيه، إني ألبس قطعة غالية بشكل كاجوال. مو رسمي.

أرجع للبسها بشكل عام، أعجبني مرة الفستان الميسوني الذهبي هذا، أعجبني إنها لبست تحته تانك أبيض، خلاه كاجوال، و أكيد غطى جزء من صدرها، خصوصا و إن الناس دايم ناقدين عليها قضية الصدر. أعجبني الصاندل الكعب اللي من كريستيان لوبيتن (يمكن أول مرة يعجبني شيء من لوبيتن بقوة) لونه مع هذا الفستان الذهبي الفاتح طالع حلو مرة، و الصندل مخلي اللبس كاجول، بنفس الوقت مو حق بحر أو شارع، الكعب يخليه لبس حفلات. أعجبني كثير إنها لبست مجوهرات (واضح) إنها غالية مرة، الفيروز طالع حلو، مع مجموعة الأساور الثانية.

مع المايك آب، و الشعر، أكيد أختار هذا اللوك أنه يكون أحسن خيار لحفلة بالصيف، تذكروا دايم أنه مو لازم تسوون نفس الشيء، يعني فستان بلون فاتح (ألوان طبيعية)، و من دون موديل معقد (من دون أكمام و قصير)، تانك أبيض، مجوهرات أو إكسسوارت كثيرة على يدك و ملونة، مايك آب خفيف، وايفز بسيطة، و صندل كعب بلون نيون، من أي ماركة، أي محل بيخليك حلوة زي بلايك.

What about doing something useful in the summer?

هذا واحد من العناوين الطويلة اللي تطلع معاي من فترة لفترة، يقولون العناوين الطويلة هي ميزة للأفلام الإيطالية، بس أنا ما أتذكر إني شفت فيلم إيطالي عنوانه كان طويل.

ما يهم نجي للسالفة الأساسية، قلت لكم كم مرة عن كتاب p.s. i made this  اللي أشترته أختي، و هو عن أشياء (على الموضة)، ممكن تسوينها أنت بنفسك. 

قبل أمس ما أردي أمس قالت لي أختي إنها ودها تسوي شيء من الكتاب، ما فتشنا الكتاب من جديد علشان نفكر بوش ممكن نسوي، بس اليوم شفت عندها شغل حلو مرة على موقعها. 

أحب دريس فان نويتن، بس ما أعرف ليه لما كنت أقلب مجموعة ربيع 2011 أول ما نزلت ما انتبهت لهذا البنطلون الجينز ... ما انتبهت له إلا لما شفت على وحدة بستريت ستايل (عجزت أتذكر، مين و لا وين شفتها) بس لفت لي نظري البنطلون قوة، و عجبني و كنت ما زلت ما أعرف من وين بنطلونها. 

دائما، دائما، دائما أحتاج نظرة ثانية و ثالثة و عاشرة علي بعض المجموعات علشان أستوعبها، و أنتبه للأشياء الحلوة فيها، و من محاسن الصدف إني قلبت المجموعة من جديد، و اكتشفت إن البنطلون من عند دريس. البنطلون زي ما قلت لكم أعجبني قوة بس أنا الحمد لله قنوعة P: علشان كذا ما فكرت أعرف سعره (بس اضطريت يوم جيت أكتب لكم) :).

زي ما قلت لكم أنه عاجبني، بس بصراحة ما حلمت فيه، لأني ما أتوسد جبل من ذهب، علشان كذا عندي قناعة أن الجينز حرام فيه أحد يشتريه من ماركات غالية، حتى لو كان مطرز بذهب، بالنهاية هو جينز، ماراح ينلبس لأوسكار، و لا لزواج ... و لا حتى بعزيمة تقابلين فيها الرئيس.

المرأة العبقرية اللي تشتغل على الأشياء الموجودة بـ p.s. i made this (للأسف ما أعرف اسمها) عرفت كيف تسوي البنطلون تقريبا ببلاش ... كلوريكس، خل و مقص إذا بغيتي يكون مشرشح من تحت. 

الشيء اللي باقوله، الجينز بكل أشكاله راجع بقوة، بيكون حلو لو يكون عندك شيء مختلف و مميز زي هذا، أكيد إن شاء الله إني باجرب أسويه بس لازم أتنقى بالأول أي جينز راح يتعرض لعملية التطهير هذي P: ... 

لو سويتوه، وروني كيف بيطلع معاكم، و أنا أكيد راح أوريكم. 

أرسلوا لي الصور على dejavu_ar[at]hotmail.com "أكيد لازم تبدلون كلمة at بـ @" بس هذا إجراء علشان ما يلقطها السبام.

أما إن كان عاجبكم بس مالكم خلق تسوونه، فتقدرون تشترونه (إن حصلتوا الماركة) بـ 313 دولار، طبعا إن ما كان خلص أساسا، خصوصا و أنه بدأت التخفيضات على ملابس ربيع و صيف2011.

Defected Couture ?!!

أعرف أنه خاف نشاطي هاليومين، أو الإسبوعين، بس خلاص آخر السنة، و كل العالم عندهم اختبارات ... و غير كذا أساسا ما طلع معاي شيء. 

اليوم كنت بواحد من الأسواق (الله يستر علينا و عليهم). شفت بواحد من محلاته (و بعد ما راح أقول أسمه) P:. هذ الفستان اللي على اليمين.

و الله الهدف مو إني أتمسخر على أحد، بس هذي الفضاوة، يعني بالأساس أنا مو ضد تقليد أفكار ماركات الهاي فاشن، بالعكس، و دائما أحاول أجيب أشياء تشبه لها من الهاي ستريت لسببين، الأول إني بعض المرات أشوف إنه فيه موضات يمكنها لطيفة، بس ما تستاهل أضيع فلوسي عليها. الشيء الثاني من حق كل الناس يلبسون ملابس حلوة، حتى لو ما عندهم فلوس تخليهم يشترون من الهاي فاشن، 

الفستان اللي قدامنا زي ما أنتم شايفين "يقال له" نسخة من الفستان اللي علي اليسار من مجموعة ربيع 2009 الأوت كتو، لكيغيستيان ديور. اللي أشوفه قدامي كارثة، و مثال كيف تحول تحفة، لفستان مسخرة على واجهة محل، يسوي نفسه يبيع فساتين سهرة. الدرس الثاني اللي استفدته من هذي الصورة D: هو أنه لما تجي دور زي ديور، شانيل، أرماني و إيلي و فالنتينو جيفنشي و غيرهم، يسوون فساتين أوت كتو يآصل سعرها لأكثر من 60,000 دولار فأنه معاهم حق، مو مرة، بس الفستان اللي صورته لكم خلاني أقتنع شوي. 

آخر شيء، كبروا الصورة و ناظروا تفاصيل الفستان، طبعا مو اللي على اليمين أكيد، اللي على اليسار، و بتعرفون وش معنى خياطة راقية. 

Boho

قبل تدوينتين يمكن، تكلمت لكم عن ريتشيل زو، و الكوليكشين الريزورت حقها، قلت لكم بذيك التدوينة إني ما أحبها، و علشان تعرفون أنه خطأ الواحد يصدر أحكام من دون ما يعرف عن الشخص أكثر :)، أنا طحت بهذا الخطأ، و ريتشيل مو هي الوحيدة الي بنيت تصور عنها قبل لا أشوفها، و أعرف كيف تتصرف.
كنت قبل أسبوع تقريبا فاتحة اليوتيوب الصفح الرئيسة، و اقترح علي اليوتيوب مقطع من برنامجها، المقطع كان قصير بس حمسني إني أنزله، نزلته، و أعجبني، و ما أقول إني بديت أحبها، بس كثير من الأسباب الي كانت تخليني ما أحبها أكتشفت إنها أشياء أنا متخيلتها، أو بانيتها من كلام مواقع القوسيب.
ما يهم نجي للي لكلام اليوم، و هو هذي الصورة اللي شفتها لنيكول ريتشي، و هي طالعة من بيت وحدة من صديقاتها، أعجبني شكلها كثير، حسيته مريح، مع إني شفت ناس يسبونها، بس ما يهم، أنا أحب الأشياء المريحة، و اللي أحس فيها إني ما لبست شيء، خصوصا بالصيف.

Rachel & Nicole by alorwa featuring chunky beaded necklaces

Tibi maxi dress, $770
Camper shoes, 180 CAD
Bex Rox chunky beaded necklace, £245
Ileana Makri gold ring, £4,250
Chain necklace, £569
Hair accessory, £18
TopShop round sunglasses, $45

و أنا أشوف البرنامج، عرفت أشياء كثيرة عن ريتشيل ما كنت أعرفها قبل، أهم شيئين: إنها تحب الفينتاج و تحب المجوهرات. صحيح إلى الآن كثير من لبسها أو اللوك النهائي حقها ما يعجبني، بس بعد ما شفت البرنامج أكتشفت إن عندها قطع بذات فنتاج تخليني ودي الحين أسرق بيتها.
من جهة ثانية نيكول ريتشي (و اللي كانت وحدة من زباين ريتشيل، و الحين صديقتها) تحب كثير ستايل "البوهو"، حتى أنه خط المجوهرات و خط الملابس حقها كلهم تشوفون فيه تأثير البوهو و الستينات.
اللوك اللي اخترته قلت لكم أخترته بتأثير الثنتين، أخترت فستان أبيض، ستايل ستينات (بوهو)، و عمامة زي نيكول تقريبا، و أخترت إني أكثر المجوهرات (و بالعادة ما زسوي كذا بالحياة الحقيقية)، لكن هذا من تأثير ريتشيل علي، خصوصا و إني لما أشوفها أحسها بتطيح على وجهها من كثر المجوهرات، و أهم شيء أخترت سلسال شانيل فينتاج علشان أعطي شعور (ريتشيل زو).
الجزمة أخترت هذي الجزمة الفلات، مع إني ما أحب تطقيم الألوان خصوصا الملابس مع الجزم، بس هذي الجزم أعجبتني مرة، مع إني ما أحب أقول هذي الكلمة، بس إنها كيوت. 

Never ending story

أمس كان فيه جوائز CFDA للفاشن، و اللي يوزعون فيها جوائز للأفضل المصممين الإمريكان . ذا رو ماركة بنات أولسين كانت مرشحة لوحدة من الجوائز، البنات ما فازوا. اللي فازوا بأفضل جائزة، حقين بروينزا سكولير.
طبعا البنات كانوا موجودات، بس شكله ما كانوا مهتمين للجائزة، قد مو مهتمات أنهم يسوقون لخط شنطهم الجديد.

مو مرة عجبني شكل البنات خصوصا ماري كايت (يمين)، ماري كايت كانت لابسة جاكيت من شاني مجموعة بري فول 2011، ما عجبني شكلها، خصوصا مع الشعر الجديد المصبوغ، حسيت شكلها كأنها عجوز.
آشلي لابسة فستان سترابليس من ماركتهم ذا رو، المايك آب حلو، و الشعر حلو، و ألوان الأشياء حلوة مع بعض، خصوصا السلسال أو الخلخال اللي حاطته على رجلها، بس بشكل عام اللبس مو ذاك اللي يجنن.

ما أعرف وش مشكلتي مع الشناط، أو إن كان فيه أحد ثاني عنده نفس المشكلة، بس ما أحس أبدا أني يوم حسيت أنه لا خلاص طفشت من الشناط. صح أنا ما أشتري شناط كثير، بس دائما تحي ببالي، يعني بخاطري كلتش حلوة، و بعد بخاطري شنطة حقت كل يوم، من فترة أعجبتني فندي، بعدين شفت عند سلين وحدة، بس لسا ما أحس فيه مناسبة.
اليوم و أنا أشوف شنط بنات أولسين، عجبتني مرة، و شكلي خلاص لو فكرت أشتري شنطة لكل يوم، بأفكر بشنطة من ذا رو، خصوصا اللي مع آشلي. حجمها حلو، لونها حلو، و شكلها حلو، بس لسا ما أعرف كم قيمتها، لأنهم لسا ما أعرضوهم للبيع.

وش رايكم بشنط ذا رو؟ و وشو الشنطة اللي عندكم لكل يوم، أو ودكم تشترونها؟

MTV Awards Best Dressed

أمس حاولت إني أشوف MTV بس نمت قبل ما يجي، و أساسا ما أدري هي جت على MTV arabia أو لا. أتذكر إني شفت يوم الجمعة و أنا حاطة ميوت إعلان عن الجوائز بس ما انتبهت. ما يهم أصلا ما كنت مشتهية قوة إني أشوف أي شيء.

نجي للموضوع الأهم، و هو من أحسن من لبس. بالنسبة لي إم تي في أواردز أهم قانون باللبس فيها، بعد عن أي شيء كلاسي، و فخم.

أحسن لبس بالنسبة لي مو جاستين P: ، ميلا كونيس بس للأسف ما لقيت لها صور بالأرايفيلز. ميلا كانت لابسة تنورة و توب من بيلمان مجموعة الخريف الأخيرة 2011. أعجبني كثير كيف أختارت مع تنورة ميني مشكوكة أو ما أعرف وش مسوى فيها، بس إنها تلمع مرة، توب أسود كامل ما فيه أي شيء.

على إني ما أحب هذا الشكل من الشعر، الملحس مفروق بالنص، و محطوط على قدم (عقدتني كيم كرداشيان). بس أنه مع المايك آب و اللبس طالع مناسب مرة، خصوصا أنه التوب ما فيه شيء، فمو مشكلة أنه يتغطى بالشعر.

عجبتني بعد جزمها، ما أعرف من وين بس حلو إنها لابسة كعبات نود، و من تحت ذهبي، لا شتت الإهتمام من التنورة، و بنفس الشيء الذهبي أعطاها شوية حياة.

آخر فقرة أعجبتني بميلا، إنها ما لبست أي إكسسوار مع اللبس.

بالمناسبة ميلا مو هي الوحيدة اللي لبست من بالمان، كيرستين ستيوارت لبست فستان ما قد شفته بأي مجموعة، بس يشبه جاكيت من مجموعة ربيع 2011 أحمر جلد عليه مشابك، و ليتين لابسة فستان من مجموعة خريف 2011 (نفس المجموعة اللي لبست منها ميلا).

بس ميلا أكثر وحدة أعجبتني.

Clients Comes First

ما أعرف إذا تكنت قد تكلمت قبل عن ريتشيل زو، أو لا. بس إذا ما تعرفونها هي ستايلست أمريكية مشهورة بأنها ستايلست لقائمة طويلة من السلبرتي. و بعد ما أعرف إذا كنت قد قلت قبل لكم إني ما أحبها، لأسباب عديدة، بس حبي لها ما يهم، نجيب الخبر الأهم.

بصراحة أنا ما أفهم هوس الناس بتصميم الأزياء، يعني أنا أحب الملابس، و أحب تجميع لوك لو حتى مو لنفسي، بس ما أفكر بالتصميم، ما أحس إني باستمتع، و لا أحس أنه شغلتي. 

ريتشيل قبل أيام طلعت مجموعة ريزورت باسمها أظن إنها المجموعة الثانية، أتذكرت قبل فترة عرضت مجموعة صغيرة، يمكن ما فيها إلا 5 أزياء. 

الحين يوم إن ريتشيل طلعت مجموعتها و خلصت، و أكيد ما شاورتني، مالي إلا إني أعلق على المجموعة، و بما أنه ريتشيل عندها قائمة طويلة لزباين مشاهير، هي الستايلست (أو المنسق) لهم، فأتوقع أنهم راح يكونون أول من يلبس لها. فحطيت اقتراحاتي لمين يلبس إيش. 

علشان أكتب هذا الموضوع رحت أدور مين هم زباينها، فيه ناس أعرفهم من قبل زي جينفير قارنر، آن هاثوي و كاميرون دياز، بس فيه ثانين تفجأت لما شفتهم منهم إيفا منديز. 

ما أعرف ليه حسيت إن هذا الفستان يصلح لإيفا، بس الفترة الأخيرة أحس إنها تلبس فساتين كثيرة من هذا الشكل، خصوصا الأقمشة اللي فيها طبعات. يمكن اللي خلاني أحس أنه يصلح لها، شكلها بالميت قالا لبست فيه فستان نيلي، أو اللي يسمونه أزرق إلكتريك أو ملكي بالميت قالا من هالستون هيرتيج. 

كايت باكنسيل، يمكن الوحيدة اللي من اللي باكتب عنهم اليوم، كنت أعرف من قبل إنها وحدة من زباين ريتشيل، ما يعجبني ستايلها بشكل عام، مو لأنه شين، بس أحس إنها تتعب بقوة علشان يطلع شكلها حلو. 

الفستان اللي فوق هذا، أحس أنه الوحيد اللي من المجموعة اللي أكيد راح تلبسه وحدة من السلبرتي. أول ما شفته ما فكرت إلا بكاميرون دياز و آن هاثواي من زباينها ممكن يلبسونه، خصوصا أنهم طويلات، بس براسي ما ركبوا، و لما تذكرت كايت، حسيت أنه راح يمشي عليها بقوة.

كايت هادسون بعد ما كنت أعرف إنها من زباين ريتشيل، بس طلعت وحده منهم. كايت الحين حامل، و أظن إنها مطرفة (يعني على وشك ولادة). الفستان هذا يناسب اللوك حقها (البوهو) كثير، و يصلح لحامل و لغير حامل، بس لو لبسته أعتقد راح تلبسه بعد ولادة، لأني ما أظن باقي كثير على ولادتها، علشان يمديها تطلع لشيء يستاهل هذا الفستان.

ما أعرف ليه هذا الفستان ذكرني بفستان من مجموعة قوتشي لخريف 2011 شوفوه هنا، و أحس أنه هذا الفستان راح يلبس. 

اللي كانت صدق صدمة لي (إنها من زباين ريتشيل). ما أعرف ليه كنت أحس إنه هذا ذوقها، بس هذا دليل على إن شغل ريتشيل زين حتى لو قلت لا. 

ليف ما تلون بملابسها كثير، دائما أسود أو أبيض، و كثير تطلع سيقانها، علشان كذا أعتقد أنه هذا الفستان يلبق عليها كثير (ممكن تلبس معاه جاكيت لو لبسته).