Wrong Theme

تعرفون أنه لما يصير حدث زي ميت قالا، لازم أفصفصه فصفصة (متى تحصل فرصة زي كذا) شيء أقدر أتكلم عنه كثير. و ما أقول ما لقيت موضوع أتكلم فيه. 

زي ما قلت لكم عنوان المعرض اللي افتتح أمس كان: بنك من الفوضى للخياطة الراقية. ما كنت عارفة إذا مطلوب من الحاضرين يلبسون بنك، بس خواتي قالوا لوي أنه من مقابلات شافوها، يبدو أنه مطلوب من الحاضرين لبس ثيم بنك. شخصيا ما عندي مشكلة مع اللي ما لبسوا بنك، بالعكس بالنسبة لي أفضل من اللي بالغوا بتطبيق الثيم، لأنه بالنهاية مو حفلة تنكرية. 

صحيح فيه ناس ما لبسوا بنك زي ما قلت لكم، و قلت لكم ما عندي مشكلة مع هذولا، مشكلتي مع اللي لبس بثيم، بس ثيم مختلف. ليلي ألدريج، ماري كايت أولسين، قوينث بالترو و آبي لي كلهم كانوا موجودات، و كلهم أعطوني شعور تسعينات بداية الألفية مو بنك. 

قوينث بفالنتينو حسيته شيء يشبه لبس لبسته للأوسكار 2002، ليلي آلدريج و آبي لي كيرشو، أعتقد أنه لو سويتوا بحث على فساتين التسعينات هذا الشكل من الفساتين أول شيء بيطلع لكم. أما ماري كايت أولسين بفستان فينتاج شانيل و روب بفرو (واضح أنه فينتاج بعد)، مع تسريحة شعرها حسيته لوك يصلح لداوسن كريك. 

أنتم وش رأيكم بالأربعة هذولي؟ و مين بنظركم كان أسوء من لبس؟

MET Gala 2012: Best Dressed

و أخيرا بعد يوم و زيادة قدرت أقرر أحسن ملابس لميت قالا أمس أو قبل أمس. غير التريندز اللي قلت لكم عنها، كان فيه كثير فساتين ذهبية/ فضية لماعة. (كنت راح أتكلم عنها) لكن لما شفت كثير منهم أخترتهم لموضوع الروج الغامق و الشعر، و حتى أحسن لبس، ما بغيت أكرر نفس الصور من جديد، فقررت على طول أحط هنا أحسن الملابس. 

صراحة عجزت أختار من أحسن الأحسن، لكن أكيد ميت قالا هذا السنة كان فيه كثير أشياء حلوة (ما أتذكر عجبني شيء كثير السنة اللي فاتت). يمكن أسوء شيء بهذي السنة، إن آشلي أولسين ما جت، ما أعرف ليه بالذات بهذي المناسبة أحس لازم كل الثنتين لازم يجون. 

هنا بس حطيت صور مقربة للي عجبوني، لكن بتلقون بالألبوم صور للفساتين من قدام، و تحتها كل واحد من وين. تعليقات بسيطة راح أكتبها هنا على تقريبا كل وحدة. 

• عجبني كثير شكل كيري موليقان، أصلا اشتقت لها من زمان ما طلعت، لكن أسوء شيء بالنسبة لي كان أختيارها للجزم، لكن ما يمنع إنه شكلها عجبني. 
• عجبني شعر ماري كايت أولسين، أحب لما يكون فيه شعر طاير من التسريحات (أتذكر ديان كروقر كانت تسوي تسريحات تشبه هذي كثير)، اللي يخليني أحبها، أحس أنه فيه شغل دقيق و جامد كان عليها. بعد حبيت الشيء اللي شايلته ما أعرف هو شنطة أو علبة مكياج قديمة أو إيش؟!!
• عجبني كثير القفاز اللي لابسته كارا دوليفان، أحس من دون القفاز كان الفستان بقى حلو لكن ما فيه طعم ميت قالا. 
• أعجبني الشعر الأسود مع هذا الفستان على جيسيكا ستام، جلست أتحيلها و هي لابسته بشعرها الأشقر، عجزت أتخيل أنه بيطلع بهذا الشكل. 
• عجبني لون شعر لانا مع مكياجها، ما حبيت إنها صبغته غامق، لكن أكيد المكياج هذا خلاني أول مره أحس إن لانا ممكن تطلع حلوة :). 

لو كنتوا تابعتوا فساتين ميت قالا من عجبكم أكثر؟

Extended Wishlist

ما عمري صنفت نفسي مهوسة جزم (صح الواحد ما يحس بنفسه)، لكن أعتقد إن استهلاكي للجزم سنويا معقول. إلى الآن ما عندي جزمة غالية (و لا كنت أفكر) لحد ما شفت هذي الصورة لماري كايت أولسين بهذي الجزم. 

أول ما شفت الصورة، ما أهتميت بأي شيء ثاني، أصلا عجزت أشوف شيء ثاني غير جزم الإكسفورد اللي لابستها. غير ألوانها (قلت لكم أكثر من مرة إني أحب الطبعات) إنها مقطوعة كذا من ورا عجبتني مرة. ما أتذكر إني قد شفت شيء و تحمست إلا بأعرف من وين. الحين أقول ليتني ما تحمست، لأني ما أتذكر إن بنات أولسين أبدا (على الأقل التوأم)، قد لبسوا شي رخيص. لما دورت لقيت إنها من حيد أكيرمان مجموعة ربيع 2012 (إللي لسا بالأسواق). 

مجموعة أكيرمان لربيع 2012 كانت عاجبتني مرة، لكن ما أعرف كيف فات علي شيء جميل زي كذا. ما أعرف ليه عجزت أوقف أناظر فيها، أتمنى الحين أفتح دولاب الجزم و ألقاها عندي (حتى من كثر ما أنا حابتها و متحمسة ما فكرت أي نقشة ودي فيها). لما دورت عليها أونلاين لقيتها هنا(نفس اللي على ماري كايت) بحوالي 2800 ريال. و لقيت ثانية عند ساكس بس مو كأنها "شبشب" بس أغلى بتقريبا 3430 (شفتوا إن طيبة و ذوقي رخيص :)) ما أبغى اللي عند ساكس يكفيني الشبشب :). 

The Olsen Impact

كان أمس عرض ماركة ذا رو حقت بنات أولسين، ما أعجبتني قوة زي مجموعة الخريف. لكن بعرض ماركة ثانية "ريبكا تايلور" لاحظت شيء بالعرض، و تذكرت قبل يمكن شهر أو شهرين، شفت هذي صورة لآشلي أولسين بالمطار. 

غير النظارت البرادا، و الشنطة اللي من ماركتهم "ذا رو" ما فيه شيء مميز باللبس، أسودXأسود. لكن انتبهت للعقد اللي لابسته آشلي. هذي مو أول مرة تلبس هذا العقد اللولو، لكن أول مرة أشوفها لابسته بالطريقة هذي (كروس بودي). أعجبتني الحركة مرة، صحيح ما عندي عقد لولو طويل، و لا أفكر أشتري بس علشاني شفت هذي الصورة، لكن لو شفت قدامي عقد لولو أو أي عقد بأي فصوص أو حتى تكون يليلته واضحة و طويل، أكيد راح أجرب إني ألبسه بالطريقة هذي، خصوصا لو كنت لابسة ملابس سادة ما فيها، و لا عليها أي شيء. 

زي ما قلت لكم ما أعجبني عرض The Row مرة، هذي المرة، لكن بعرض ريبكا تايلور، و اللي كان عادي بالنسبة لي (أساسا ما أنتظرت شيء مميز منهم :) كانوا بعض العارضات لابسين العقد بنفس الطريقة اللي لابستها آشلي (قولوا لي لو كنت مخطئة) بس ما قد شفت أحد لابس العقد بالشكل هذا قبل، فأقدر أقول أنه شيء أخترعته آشلي :). 

زي ما قلت لكم أول ما شفت العقود بعرض ريبكا تايلور، تذكرت آشلي أولسين،  و لما شفتها بالعرض ما قل إعجابي بالفكرة، بالعكس حبيت إنا أعطت شكل للملابس خصوصا الأولين من اليسار، أحسها أفضل لما ما يكون في نقشات و خرابيط كثيرة على الملابس. 

أنتم شرايكم بالحركة؟

تحديث:
جاني هذا الرد بتمبلر، فأتراجع عن أنه آشلي هي اللي أخترعته :)، يمكن آشلي ذكرت ريبكا تايلور، بس زي ما قالت indooo إنها كانت تشوف هذا الشيء كثير :)

The White Shirt

تكلمت قبل عن القميص الأبيض للسهرات لما لبست تيلدا سوينتن قميص و تنورة للقولدين قلوب، و بعد تكلمت عن التي الأبيض مع أي تنورة، و اللي كان  واحد من أهم موضات هذا الصيف، اليوم بأرجع للقميص الأبيض مع تنورة فخمة، خصوصا أنه الحين مع عروض الأوت كتو بباريس، فما فيه كلام إلا بالأشياء الفخمة :).

كنت منقطعة عن النت اليومين اللي فاتوا، فرحت أشيك على الأشياء اللي فاتتني، منها إذا فيه صور جديدة لبنات أولسين (وصار فيه هذي الصورة لآشلي). و الشيء الثاني عروض الأوت كتو اللي بدأت أمس مع ديور (أول عرض أوت كتو من دون جون قوليانو) و عرض جامبتيستا فالي، اللي أول مرة يسوي عرض أوت كتو. 

طبعا ما يحتاج أتكلم بعرض ديور اللي ما أعجبني أبدا، ما يشبه ديور، أحس كثير من الفساتين كومة قماش مخيطة، و المايك آب و الشعر أخذينها من عروض قديمة لديور مع جون. 

نرجع لآشلي شوي بعدين نروج لجامبتيستا. شفت هذي الصورة لآشلي و هي لابسة قميص أبيض سادة، مع تنورة (لايدي لايك) كحلية شكلها من شانيل (عجزة أدور و أتأكد :)، نظارات برادا، و شنطة لونها تان من خط الشنط الجديد حق ماركتهم The Row. (بالمناسبة راح تنباع الشنط عند net-a-porter.com إذا أنتم مهتمين. 

أعجني مرة شكل آشلي فيه أناقة كلاسيكية، مع هذي التنورة، ثم من فوق آشلي قدرت تخليه عصري و ينلبس مع القميص الأبيض هذا، حبيت اللوك كثير، يمكن لأنه يشبه طريقة أودري هابيرون (زي رأي بعض اللي علقوا عليها)، بس الأكيد اللي خلاني أحبه، إنها مخليته عصري، مع هذا القميص.

نرجع مرة ثانية للأوت كتو، مع عرض جامبتيستا فالي. (تقريبا هو أول العروض اللي أهتم فيها من الأوت كتو بعد ديور، اللي ما أعجبني أبدا من دون جون). 

صح بنات أولسين ما عندهم خط أوت كتو، و لا هم بباريس الحين، لكن هم و جامبتيستا فالي كلهم لهم ماركات لها ناس تحبها من الهاي فاشن، و كلهم يعرفون وش الشيء الجديد اللي بيكون بالفاشن. 

بعرض جامبتيستا فالي الأول بالأوت كتو (ما أعجبني مرة) بس هو قال أنه كان هدفه أنه يصمم ملابس ما تروح موضتها، و أظنه بهذي نجح لحد كبير خصوصا إن شارلوت كاسيراقي لبست من مجموعته قبل لا تعرض فستان لزواج خالها قبل يومين بس بلون سماوي، يقول جامبتيستا إن إسم هذا اللون "أزرق قرايس كيللي"، و لا أحد عرف من وين الفستان، بعضهم شك أنه حق جدتها قرايس كيللي، هذا يعني أنه جامبتيستا قدر يسوي ملابس حلوة، تصلح لأي عمر و لأي وقت. 

ترجع للفكرة الأساسية و هي قميص أبيض مع تنورة فخمة، و اللي كانت بعد بعرض جمابتيستا، حبيت الفكرة كثير خصوصا اللوك اللي على اليمين، تحمست إني ألبس تنورة فخمة مرة، مع قميص أبيض، و عقد فخم بعد لزواج. 

إن كان عندك زواج و لسا ما حددتي وش تلبسين، تفكرين بقميص أبيض مع تنورة فخمة؟

Never ending story

أمس كان فيه جوائز CFDA للفاشن، و اللي يوزعون فيها جوائز للأفضل المصممين الإمريكان . ذا رو ماركة بنات أولسين كانت مرشحة لوحدة من الجوائز، البنات ما فازوا. اللي فازوا بأفضل جائزة، حقين بروينزا سكولير.
طبعا البنات كانوا موجودات، بس شكله ما كانوا مهتمين للجائزة، قد مو مهتمات أنهم يسوقون لخط شنطهم الجديد.

مو مرة عجبني شكل البنات خصوصا ماري كايت (يمين)، ماري كايت كانت لابسة جاكيت من شاني مجموعة بري فول 2011، ما عجبني شكلها، خصوصا مع الشعر الجديد المصبوغ، حسيت شكلها كأنها عجوز.
آشلي لابسة فستان سترابليس من ماركتهم ذا رو، المايك آب حلو، و الشعر حلو، و ألوان الأشياء حلوة مع بعض، خصوصا السلسال أو الخلخال اللي حاطته على رجلها، بس بشكل عام اللبس مو ذاك اللي يجنن.

ما أعرف وش مشكلتي مع الشناط، أو إن كان فيه أحد ثاني عنده نفس المشكلة، بس ما أحس أبدا أني يوم حسيت أنه لا خلاص طفشت من الشناط. صح أنا ما أشتري شناط كثير، بس دائما تحي ببالي، يعني بخاطري كلتش حلوة، و بعد بخاطري شنطة حقت كل يوم، من فترة أعجبتني فندي، بعدين شفت عند سلين وحدة، بس لسا ما أحس فيه مناسبة.
اليوم و أنا أشوف شنط بنات أولسين، عجبتني مرة، و شكلي خلاص لو فكرت أشتري شنطة لكل يوم، بأفكر بشنطة من ذا رو، خصوصا اللي مع آشلي. حجمها حلو، لونها حلو، و شكلها حلو، بس لسا ما أعرف كم قيمتها، لأنهم لسا ما أعرضوهم للبيع.

وش رايكم بشنط ذا رو؟ و وشو الشنطة اللي عندكم لكل يوم، أو ودكم تشترونها؟