قلت لكم أكثر من مرة ما أدعي إني خبيرة مكياج أو عناية بالبشرة، بس إني أحبهم و مهتمه فيهم لنفسي. لكن الفترة الأخيرة جتني أسأله من الناس اللي حولي عن كيف أعتني ببشرتي، و صراحة إلى قبل ما تجيني الأسئلة هذي و أنا كنت أعتقد إن اللي أسويه، كل الناس تسويه. بس هذي بعض الأساسيات اللي (أن أعتقد إنها من أساسيات العناية بالبشرة).
- أولا: أي بشرة من أي نوع، جافة أو دهنية، تحتاج مرطب بشرة.
- ثانيا: قبل استخدام أي منتج عناية بالبشرة (كريم ترطيب، سيريم، أو زيت) لازم البشرة تكون نظيفة. اشتري لك كلنزير أو غسول وجه مناسب لبشرتك، المفترض الغسول ما يخلي بشرتك تتحسس، أي منتج عناية بالبشرة، يخلي بشرتك تطلع حبوب، أو بقع حمراء، أو أي نتيجة تحسين إنها سلبية، وقفي تستخدمينه، إذا شيء زين لبشرتك المفروض ما يأثر عليها بشكل سلبي حتى لو قال لك أحد إنه دليل إن المنتج قاعد يتفاعل مع بشرتك، صحيح يتفاعل بس بشكل سلبي.
- ثالثا: التونر مو كلنزر و لا هو منتج لتنظيف البشرة، التونر من اسمه "معالج أو مناغم". إذا كنت بتستخدمين تونر (هو فقرة جيدة) استخدميه بعد الكلنزر أو الغسول، لأنه يساعد بمعالجة البشرة بعد ما غسلت عنه كل هذي الأشياء اللي كانت عليها.
- رابعا: ما يحتاج يكون عليك مكياج علشان تغسلين وجهك بكلنزر أو غسول، (أكيد لما يكون عليك مكياج لازم تشيلينه). بس الغبار و الدهون الطبيعية اللي يطلعها الوجه و العرق، و كل الأشياء الموجودة بالجو لازم تنظفين وجهك منها.
- خمسة: واضحة من الفقرة اللي فاتت، بس أبدا، أبدا لا تنامين بمكياج، وجهك يحتاج يتنفس، و المكياج مليان مركبات كيمائية ما أظن تبغين تتركينها على وجهك أكثر مما تركتيها قبل.
- ستة: تنظيف الوجه بالكلنز مو بس بالليل، حتى الصباح بعد ما تقومين، و نفس الشيء لا تنسين مرطب للبشرة (لما تآخذين كل هذي الزيوت من بشرتك، بشرتك تحتاج رطوبة أو بيصير غيه ردة فعل عكسية و بتنتج دهون مضاعفة و ممكن تطلع حبوب أكثر).
- سبعة: أشتري قناع وجه (طيني) على الأغلب علشان تنقين وجهك من هذي الحبوب لو طلعت، لا تحرشينها و بنفس الوقت لا تتجاهلينها.
- ثمانية: شوفي لك كريم تفتيح بقع ينفع لبشرتك، لا تفقدين الأمل إنك بتلقين واحد، و لو لقيتي شيء يصلح، لا تستخسرين فيه فلوسك، لأنه بيساعد بإزالة آثار الحبة.
- تسعة: حطي على وجهك واقي شمس، غير إن الشمس تهلك البشرة، و فيها أشعة ضارة ممكن تسبب سرطان الجلد (و فيها ڤايتمين دي بعد يعني مو سيئة)، بس مع الشمس البقع اللي بوجهك (آثار حبوب، أو أي تبقيع) تغمق زيادة مع الشمس).
- عشرة: حتى واقي الشمس يحتاج يغسل بآخر اليوم بعد. و أهم شيء أعرفي بشرتك، أعرفي وش ينفع لها ووش ما ينفع لها، لا توقفين تجربين، و دايم اسمعي للناس اللي حولك و تعتقدين إن بشراتهم تشبه بشرتك.
بالمناسبة، الصورة الي فوق غلاف مجلة فوق البريطانية، للعارضة الأمريكية كريستي تالينقتون. صراحة الغلاف من فترة عاجبني و أدور سبب إني أحطه. عاجبني إنها حلوة و وجهها و بشرتها حلوات من دون ما تحاول تصير أصغر. علشان كذا أعتقد إنها صورة مناسبة للموضوع.
لكن أهم شيء إني أكون قلت لكم شيء مفيد، و يمكن جديد، و إذا مو جديد على الأقل مو ممل.
ليست هناك تعليقات:
إرسال تعليق