In Mood: Chainmail Purse

من يومين أو أكثر شفت صورة للورين دومنيقو (محررة بمجلة فوق) ما أعرف وشي المناسبة، و لا مهتمة أعرف صراحة، بس لورين كثير مرات تطلع بلبس حلو (دوروا على صور زواجها بالنسبة لي فستانها كان خرافي). المهم إن لورين كانت شايلة شنطة صغيرة فيها مكياج (أعتقد إنها كانت منتشرة بالعشرينات، أكيد من القرن اللي فات). 

لأني ما لقيت (أو ما دورت بضمير) عن نفس نوعية الشنطة اللي مع لورين (متأكدة إن اللي معها فينتاج)، فقررت أجيب أشياء ممكن تكون "بديل" لها (أهم شيء الفكرة)، خصوصا و إنه من زمان عاجبتني الشنطة اللي من هاوس أوف هارلو. حاولت قد ما أقدر إني أختار أشياء أسعارها معقولة، أو قصدي خيارات أسعار أكبر. أعرف أنه حتى أرخص وحدة مو رخيصة مرة، بس أعتقد إنها ظريفة :) الشنطة الأولى أو الأرخص من نالي على شكل نجمة تلقونها عند أيسوس هنا، فيه عندهم أكثر من لون، شخصيا هذا اللون هو اللي أعجبني. 

الشنطة الثاني من هاوس أوف هارلو، أعتقد من تشكيلة السنة اللي فاتت، بس لقيتها بأكثر من مكان تنباع، و نفس الموضوع فيه أكثر من لون (مو رخيصة بس حلوة). 

آخر وحدة من جيمي تشو أعجبتني الشنطة كثير، ما عادا شيئين ما عجبوني فيها سعرها أكيد (ما أشوفه طبيعي). و أنه مكتوب عليها جيمي تشو.

شرايكم بالشكل هذا من الشنط مع ملابس السهرة؟

Glitter

يمكن من شهر أو أكثر نزلت الحملة الدعائية لميو ميو خريف 2011، ما أذكر إني قلت هذا الشيء هنا، بس يمكن قريتوا بمكان ثاني أنه هايلي ستاينفيلد اللي مثلت ترو قريت، و رشحت للأوسكار هي وجه الحملة. بشكل عام مو كل صور الحملة أعجبتني، بس الحملة نفسها نبهتني على شيء أظن أنه راح يصير من أهم موضات خريف و شتاء 2011 الجاي.

تقريبا من أربعة مواسم، و أنا ملاحظة إن ميو ميو تلعب دور كبير بتحديد الموضة، من الياقات المنفصة، لموضة الستينات و قبل موسم ألوان النيون، و هذي المرة أعتقد مع موضة الأربعينيات الأشياء اللي عليها قليتير بتلعب دور كبير.

بصراحة لما كنت أشوف صور العرض قبل ستة شهور تقريبا (إذا ما كنت مخطية بالحساب)، ما انتبهت للجزم، خصوصا أنه الملابس و الشعر و المايك آب سحروني. مع الوقت و مع كثر ما أشوف صور مختلفة للعرض على تمبلر انتبهت للجزم، بس تأكدت أنه القلتير بيكون بكل مكان لما شفت صور الحملة الدعائية حقتهم، و تركيزهم على الجزم بأكثر من صورة.

Glitter by alorwa featuring chunky jewelry

Jimmy Choo wheel shoes, €249
Christian Louboutin mini handbag, $795
Chamak by Priya Kakkar chunky jewelry, $70
Miu Miu glitter belt, £160
Deborah Lippmann Glitter Nail Polish, $18

صراحة مع مرور الوقت، و تقليبي للمواقع و الصور، أحس إني ودي أشتري إكسسوار قليتير، ما أعرف ليه أحسه يعطي حياة لأي لوك (شيكوا على الحزام اللي من ميو ميو بنيت آي بورتيه). يعني بالنسبة لي ممكن تغير اللبس 180 درجة، من ملابس عادية، للبس سهرات. من أكثر الأشياء اللي علقتني بالقلتير أكثر (غير حزام ميو ميو) و الجزم اللي من جيمي تشو (عاجبتني من زمان) هي صورة شفتها بتمبلر لأظافر محطوط عليها مناكير بشكل مرة حلو. أنا من الآخر حدي بالمناكير إني أقدر أسوي يدي اليسرى صح، و بعدين أطلب أحد يسوي لي يدي اليمنى، بس هذا ما يمنع أن الواحد يحاول، أو أٍقل شيء يشارك الناس فيها، يمكن أحد يعرف يسوي هذي الأشياء (الصورة هنا). 

I ♥ 90's

ما أعرف وش شعوري تجاه ريانا (خصوصا ستايلها)، بس أعرف إني أحب ذكرياتي بالتسعينات خصوصا و إنها تقريبا الفترة الي عرفت فيها وش أنا جالسة ألبس أو وش أمي تلبسني. بعد بالتسعينات أعطتني أمي لقب أحتفظ فيه لنفسي لأنها تقول أني أحوس الملابس، بالتسعينات بعد قلت لخالتي و لعمتي بعد (عندي كثار) بس ثنتين منهم طلبت منهم إني آخذ ملابسهم لا كبرت، ما أعطوني شيء يوم كبرت، و لا أدري أساسا وش صار على أغلب ملابسهم اللي كانت تعجبني.

The 90's by alorwa featuring clutch bags

Acne twist dress, £150
Zara heel pumps, $60
Jimmy Choo clutch bag, $1,295
Chan luu jewelry, $420

شفت الصورة اللي فوق لريانا أمس بعد واحد من حفلات الجوائز الإمريكية للموسيقى، و اللي ما أدري كم عددها، أو أصلا هم حتى يعرفون هذي الحفلات، و إلا فجأة يدق عليها مدير أعمالها و يقول لها فيه حفل جديد. ما علينا، بس لما شفت هذي الصورة لريانا، أعجبني شكلها مرة، فيه طعم تسعينيات بقوة، خصوصا الفستان الفضي هذا (ما أعرف من وين)، شكله بساطته، كلها تعطيه هذا الشعور، بعد ما أعرف ليه حسيت أنه كيري برادشو (جيسيكا باركر بسيكس آن ذا سيتي). 

المهم قررت إني أسوي سيت عن لبسها، أو لوك التسعينات هذا. أول شيء أخترت هذا الفستان من أكني، من فترة عاجبني خصوصا من ورا شيكوا عليه. 

بعد أخترت معاه هذا العقد الأحمر، لأنه من فترة طويلة من مجموعة Lanvin for H&M و فكرة إكسسوار أحمر عاجبتني. 

بغيت كلتش فضية مع اللبس، و كعب أسود ببوز (أعرف إن بعض الناس يسمونه كذا)، الكعب هذا أعجبني مرة، شكله حلو و غالي، مع إن سعره جدا معقول و من زارا، يعني لو عاجبكم شوفوا يمكن تلقونه بوحده من الفروع. الكلتش الفضية من جايمي تشو، شفتها ببوتيكهم بسنتريا قبل فترة، فيه وحدة ذهبية زيها، أظن كلتش زي هذي، ممكن تمشي مع أي لبس سهرة.