It's a Jungle

انتصف التيريم و من الحين جالسة أشم ريحة سفرة محترمة مع إنه عندي أحساس كبير إني باجلس بحر الرياض :) ما يهم كالعادة ألف يمين و يسار أدور لي عن شيء أكتبه أو أتكلم فيه، و جاني اليوم إميل من أسوس أنه عندهم تخفيضات، و جلست أفتش بالتيشيرتات لأنه عندي نقص حاد فيها.

بمجموعة برادا للربيع 2011 كان فيه قطع كثيرة جوها جو غابات موز و قرود :) و سبحان الله يعز من يشاء و يذل من القرود اللي ما كان أحد يحترمها، صارت على ملابس برادا و الحين مطلوبة :) الموز من الأساس ما عندي مشكلة معاه،و يمكنه الفاكهة الوحيدة اللي علاقتي فيه ثابته من يوم كنت صغيرة إلى الآن، لأنه سهل ينوكل و سهل يقشر و ما يبقى للواحد إلا يشيل هم الموز ناضج أو لا.
عجبتني كثير من القطع بالمجموعة، و طبعا ما أفكر فيها أبدا مو علشان القرود أو الموز، طبعا كالعادة السعر هو الرادع الأساسي لأي نية شراء.

أحسن شيء بالهاي ستريت أنهم يعطونك إحساس أنه فيه أحد يحس بالفقراء و المساكين، و أنا جالسة أقلب بـ asos شفت التانكين يعني المثني من (Tank) و على طول جا ببالي مجموعة برادا حقت صيف 2011 القرد و الموز ... كل القطعتين عليهم خصم، و الحين تقريبا سعرهم بـ 85 ريال سعودي. 

بالنسبة لي هالقطعتين بتكون شيء حلو لملابس الصيف، و بالنسبة لي بيطلعون حلوات مرة مع هذي التنورة المقلمة أو هذي الجينز، خصوصا أنه التقليم و الجينز كلها من موضات الصيف، و بتلقونها تقريبا بكل محل. 

Be Bold

قليل أكتب عن ملابس الرجال، و أعترف إني مو مهتمة، يعني ما أشوف أنه مهم الرجال يلبس لبس حلو، يكفي نظيف و مرتب، و مو من القرن اللي فات :) بس من أمس جاي ببالي إني أكتب بوست عن اللبس الرجالي و ممكن السبب Mr Porter

فبل فترة مو قصيرة يمكن بداية السنة الميلادية هذي جاني إيميل من net-a-porter.com يقولون أنهم راح يسوون موقع لملابس الرجال، و يعرضون على عضوية تسمح لي إني أطلع على القطع اللي بتنباع قبل الناس، (يعني يقنعوني إن الأشياء بتطير، و لازم أشتريها قبل الزحمة). قلت لكم ما تهمني كثير ملابس الرجال، بس اللقافة هي اللي خلتني أسجل خصوصا إن أخوي ذيك الفترة طلب مني إني أشوف له بلايزر، طبعا مستحيل أشتري له من عند Mr Porter بس كان بخاطري أتلقف.

للحق ما ندمت إني اشتركت معاهم، خصوصا أنه النشرات البريدية حقاتهم خفيفة دم، و فيها اتكار مو بس إيميل فيه عروض، و تشوفون فوق أنا حاولت أقلدهم، علشاني راج أتكلم عن الألوان الزاهية أو الفاقعة للرجال.

أعرف إن الشباب السعوديين جدا تقليدين بخياراتهم بس حبيت أوريكم أنه ممكن تلبس ألوان زاهية من دون ما يكون شكلك مهرج. و بغيت أقولكم إني أخترت الصورة اللي علي اليمن و أنا ما أعرف مين العارض اللي فيها بس أهم شيء لون فاقع، و الجزمة البراد اللي لابسها لأني حابتها من زمان، و لو أحد يعرف أحد ببرادا وودهم يعطوني إياها بس ما يعرفون مقاس رجلي، بس ردوا على و زعطيكم المقاس و لا تشيلون هم.

الملابس كلها من Mr Porter، بس لا تشلون هم، أنا ما بغيت أحط لكم رابط أو أسعار القطع، لأنه فيه خيارات كثيرة ممكن للشباب يشترون منها ملابس زي كذا بأسعار معقولة: 

• Express 
• H&M 
• TopMan
• River Island

كلها عندها خيارات كويسة، من اللبس اللي جمعته حاولت إني أختار لوك ممكن يلبس، الشيء الوحيد الغريب هو البنطلون الأخضر، علشان كذا أخترت له لبس كلاسيكي جدا: بلايزر كحلي ... جزم ديربي أو إكسفورد أفضل إنها تكون تان و ممكن بعد تلبس صندل جلد، أي لون ثاني أحسه بيضيع و يصير باهت قدام الأخضر. و قميص أوف وايت عادي جدا. مع شنطة كروس بودي أو شنطة سبورت و نظارات شمسية بيكون لوك سفر للصيف بامتياز. 

كالعادة لو تبغون رابط لأي شيء، بس أكتبوا برد وراح أعطيكم إياه. 

Bride's Stuff

ما أعرف ليه أتحمس لأغراض الزواج، أحب أشوف الزواجات الحلوة (طبعا مو بالسعودية) بالأفلام. ودي لو مرة أسوي شيء حلو لو بسيط زي اللي أشوفه بالأفلام. ما يهم برا قاعة جوا قاعة أهم شيء يفتح النفس.

التاج اللي أنا حاطة صورته من تصميم جواهرجي بريطاني أسمه لويس مارييت، المهم لما جيت أتزوج عجبني من عنده هذا التاج كنت مصممة إني أشتريه حتى مع سعره (داخلة جو إني من أسرة مالكة، و أنه عيالي بيتوارثون هذا التاج) المهم الكريديت كارد ما اشتغلت معاي و الحمد لله. الفكرة إني لما تورطت و جلست أدور هنا بالرياض ما لقيت شيء، و بنفس الوقت كانت صديقتي بتتزوج، و دورت لها طرحة، و لا لقت و آخر شيء فصلت، و كمان خربت و قبل الزواج بيوم شحذت من أخت زوجها اللي كانت توها متزوجة بالإجازة اللي فاتت طرحتها و خلصت أمورها. 

عندي صديقة ثانية بعد بتتزوج، و نفس الشيء شايلة همها، طبعا عناء الطرحة و التاج تجدد. هالمرة ودي لو أعرف منكم إذا تعرفون محل بالرياض أو بالسعودية بشك عام يبيع أشياء زي كذا و خيارت كثيرة و حلوة، الله لا يهينكم إذا تعرفون ردوا على. 

أما للي يقرون لي بتمبلر إذا تعرفون بعد أدخلوا المدونة و ردوا (تلقون عنوانها فوق أعلى صفحة التمبلر حقي) و إذا ما تعرفون بأكون مشكورة لو سويتوا للبوست ريبلوق يمكن يقراه أحد يعرف و يعلمنا. 

Dolls for Evenings

قلت لكم قبل عن الموقع اللي يعرض أشياء للبيع قبل ما تنزل للأسواق، المهم اليوم جاني إيميل منهم أنه وصلتهم المجموعة الأخيرة من جوديث ليبير، للي ما يعرف مين هذي هذي مصممة شنط غالية مرة (أغلبها كلتش) أمريكية. 

قبل لا نتكلم مرة ثانية عن جوديث، بس ببدأ أكلمك عن سالفتي الأصلية و هي الشنط اللي على شكل دمية. يمكن السنة اللي فاتت أخرها إلى بداية السنة هذي، كانت المرة اللي على اليسار (إسمها كارولين سيبير)، و هي ستايلست نمساوية و عايشة بلندن، و زي ما يقولون إنها ستايلست للنجوم كثار، أنا ما أعرف منهم إلا إيما واتسون. أهم شيء كارولين كانت تشيل معاها شنطة على شكل عروسة صينية. شكل العروسة كان كيوت مرة، بس هي مو من جوديث، الشنطة من شانيل (إذا تبغون تشوفون الشنطة بشكل أوضح هنا).

نرجع مرة ثانية لجوديث ليبير، و هي زي ما قلت لكم مصممة شنط، أول مرة عرفتها يمكن السنة اللي فاتت أوي اللي قبلها، شفت لها شفت لها كلتش عليها تفاحة و عليها ظلال عماير و مكتوب عليها New York طبعا كله كريستال (تلقونها هنا).
كنت أكسر الخاطر و متحمسة لها، و لما شفت السعر حسيت كأنه فيه يد طلعت من شاشة و عطتني كف. بعدها و أنا ما أفكر بالماركة بس للأسف صارت تطلع لي بكل مكان.

أتذكر إني شفتها بحلقة من حلقات Sex and the City لما مستر بيق أهدى كيري برادشو شنطة على شكل بطريق (على ما أظن)، و كلها كريستالات فعلشان كذا خمنت أنه منها (ما لقيت الصورة). بس لقيت صورة لشنطة من جوديث بعد على شكل كوب كايك كانت أظن بـ SATC الثاني.

ننقز للمرة المليون لسالفتنا بالأول عن موقع مودا أوبيراندي اللي اليوم وصلت لهم مجموعة جوديث ليبر الأخيرة، و بيعرضونها عندهم لثلاثة أيام.

من بين المجموعة كان فيه هذي الدمية الروسية، و ما يحتاج أقول إنها حبست أنفاسي، أصلا هي لحالها تكفي من دون أي ملابس P:. بس قبل لا أقرر أشتريها ما وقفني إلا شيء واحد مو سعرها اللي تقريبا بـ 18700 ريال، لكن ما فيها سلسة يعني كيف راح أشيلها؟ P:

وشرايكم بشنطة على شكل دمية؟

Fruity or Floral

هذا الموضوع كاتبته تحت ضغط طفش رهيب، من الصبح و أنا أدور شيء أسويه أو أكتب عنه، و أخيرا قبل ما أروح أنام طلعت معاي هذي الفكرة، إني أكتب عن موضة الصيف، خصوصا الأسبوع اللي فات احترقنا بالرياض، و للتذكير توه ما جا الصيف الصدقي بعد.

الصورة اللي فوق هي من عرضين لمجموعات الربيع 2010 و علشان ما تخبطون، إيه الموضوع قديم جايبة لكم صور من عروض الربيع اللي كانت بسبتمبر اللي فات. أهم شيء العروض كانت مليانة طبعات، يعني بيكون عندنا صيف بملابس فيها طبعات أشكال و ألوان. طبعا زي تقريبا كل مجموعة ربيع نلقى فيه طبعات ورود كثيرة، بس هذي المرة ستيلا طلعت بمجموعة عليها حمضيات، أعترف إني أول ما شفتها حسيتها شوي كأنها شيرت من هاواي، بس مع الوقت جالسة أحبها، الصورة اللي على اليسار هي من عرض دي آن جي ببنطلون و توب كلهم ورود.
بعيد عن الموضوع كان فيه غير دي آن جي عندهم ملابس بطبعات ورود بس اشتهيت أحط صورة لدي آن جي مو بس لأنه اللوك عجبني بس لأنه قبل فترة طويلة شوي بتويتر قابانا كان يتكلم مع صديقه و قاله صديقه أنه يحب ستيلا رد قابانا مين ستيلا. أنا شرهت شوي، فجيت الحين على بالي إني أقهر قابانا و أحطه جمب ستيلا.

نرجع للموضوع: وش تحبون تلبسون للصيف، ملابس بطبعات ورود أو فواكه؟

Fruit or Flower?
	Fruit
	Flower
pollcode.com free polls

Collar Still Alive

الصيف اللي فات طلع عرض ميو ميو اللي كله عصافير و بسس، الشيء اللي ميز ذاك العرض هو القبات. طبعا الشيء الأميز بالقبات إنها كانت منفصلة عن الملابس، يعني تشترى لحالها، نفس الشيء بالعرض اللي بعده عرض الخريف 2010 كانت القبات منفصلة.

اليوم شفت إيديتوريال من مجلة i-D (تعجبني مرة المجلة هذي) و تحمست أكتب عن القبة.

لو شفتوا باقي الإيدتوريال (هنا)، بتشوفون أنه كل القطع و اللي أساسا مالها قبة حطوا لها هذي القبة الدانتيل. ما أعرف من وين هذي القبة بس عجبتني، و عجبني إنها تمشي على أشياء كثيرة و تخليها كيوت و بناتيه قوة، من أكثر الأشياء اللي أعجبتني عليها هو الشيرت دريس الجينز اللي من ستيلا مجوعة ربيع 2010، ما كان عاجبني قوة لحالة بس مع القبة حبيته.

زي العادة رحت أدور على مواقع تبيع قبات، و زي كالعادة طلع لي أسوس المنقذ يبيعون قبة كروشية مرة حلوة و ناعمة بتقريبا 60 ريال. أعجبتني سعرها معقول، و تصلح مع أشياء كثيرة و أهم شيء تشبه الإيديتوريال.

أما إذا ميزانيتكم مفتوحة ففيه هذي القبة من فيونيه تنباع منفصلة، زي اللي كانت بالإيديتوريال حق الألوان الطبيعية. عند ماتشز بـ 1100 ريال. 

What Nina Ricci dress Nicole would wear ?

السنوات الأخيرة ما يحتاج بالذات السلبرتي ينتظرون شهور لحد ما ينباع بالأسواق، فمثلا أمس كليت وينسلت طلعت بفستان من مجموعة الخريف الأخيرة لستيلا مكارتني، ما عجبني كثير الفستان أساسا، بس شجعني إني أكتب عن موضوع من فترة بخاطري، بس أتعيجز.

الفكرة اللي خطرت ببالي أول ما شفت العرض الأخير لعرض نينا ريتشي: هو وشو أول فستان راح تلبسه نيكول كيدمان من المجموعة؟ ليه جا ببالي هذا السؤال، لأني أظن بالسنوات الأخيرة ما فيه مجموعة لنينا رتشي، إلا و لبست منها نيكول كيدمان فستان واحد على الأقل.
طبعا لو سألتوني وش ودي تلبس أكيد الأول اللي على اليسار الوردي، أحس أنه بيطلع عليها مرة حلو، خصوصا إنها تقريبا نادرا ما تلبس هذا اللون، أما خياري الثاني بيكون الأسود حبيته من فوق، حبيت المخمل و الدانتيل ... أما خياري الأخير فهو السماوي، اللي أحسه أنه هو الأقرب اللي ممكن تلبسه (طبعا على حسب أهمية الحفلات اللي راح تحضرها الفترة الجاية)، الفستان بالأول ما أعجبني، بس حسيته يشبه فستان من شانيل لبسته قبل سنوات للأوسكار، لما شفت الفستان بالموقع اللي قلت لكم عليه اللي يبيع القطع مباشرة من الرانواي كان أحلى على عارضة الموقع.

What Nina Ricci dress Nicole would wear ?
	Pink
	Light blue
	Black
pollcode.com free polls

Now in Tumblr

بهذا البوست ماراح أتكلم لكم عن زي شيء بالفاشن، بس ودي أجيب لكم خبر، طبعا كجزء من سياسة الموقع التوسعية P: بعد Boutiques اليوم راح أقولكم الخبر اللي من فترة و أنا أحاول أشتغل عليه، هو أنه حطيت الموقع على تمبلر. 

ففضلا لا أمرا، لو كان عندكم تمبلر، أتبعوني، ودي أشوفكم هناك.

Kate's shoulder bag

فيه بعض المرات يجي شح بالأفكار، و ألقى نفسي أتكلم عن نفس الشخص مية مرة بالشهر :) مرة ثانية شفت صور لكايت بوسورث تتمشى بالشارع، و و حبيت شكلها، خصوصا الشنطة اللي تلبسها من فترة.

بغض النظر عن أي شيء ثاني، يعني الورود مع الجيشي، و الأبوات بس حبيت أتلكم عن الشنطة. من فترة طويلة و أنا حابة الشنط الشولدير هذي اللي شوي صغيرة، و أي أحد يسألني وش أجيب شنطة أقترح عليه وحده من الشنط  اللي على هذا الشكل (طبعا فيه كثار، من كل الماركات). بس اليوم ما بغيت أجيب شيء غالي، و فكرت أشوف لكم من ماركات الوسط.
قبل ما أحطها صراحة ما أعرف شنطة كايت من وين، بس أشك إني قد شفتها بموقع Topshop مع إني ما لقيتها يوم جيت أدورها اليوم (لو تعرفون علموني).

الأولى من توب شوب، سعرها بـ 290 ريال تقريبا، الشنطة من برا تشبه حقت كايت، بس من جوا شكلها شوي غريب، يعني كأنها دوسية، حلوة مرة، بس ما أحس تشيل أشياء كثيرة خصوصا لوحدة زي ترمي كل شيء بالشنطة.

الثانية أرخص، لقيتها عند asos هي أساسا من ريفير آيلند، سعرها تقريبا 152 ريال. حبيتها مرة، خصوصا و هي على العارضة. (شيكوا على الرابط). 

Fringed Earrings

قلت لكم راح أتكلم عن الأوت كتو كل ما جت فرصة. إن كنتوا تتذكرون أسبوع الأوت كتو بباريس كان تقريبا قبل أسابيع الموضة لخريف 2011 بإسبوعين، أو شيء زي كذا.

من فترة لاحظت حركة الحلقات الطويلة اللي متفرقة كذا، ما أعرف وش أسميها بالعربي، بس إذا مهتمين بها، تلقون إسمها بالإنجليزي موجود بالعنوان.

أول ما شفتها، شفتها عند أوسكار دي لا رينتا بمجوعة ريزورت (المنتجعات) 2011، ثم بعرض شانيل لربيع 2011، و بعدين آخر مرة شفتها بعرض أليكسي مايبيل بعروض ربيع2011 الأوت كتو ... بعرض مايبيل يمكنها أكثر شيء عجبني، حبيتها و حسيت إنها من الأشياء اللي تستاهل إنك تشتريها... اللي عجبني فيها أنه ممكن تلبسها و شعرك مشدود أو شانون، و ممكن تلبسينها و شعرك مفكوك، و بكل الحالتين بتطلع حلوة إن شاء الله.

المهم الشيء اللي بأقوله لكم هو إني رحت أدور شيء يشبه لها عند Charm & Chain، و قد قلت لكم عن هذا الموقع اللي ما يبيع إلا مجوهرات قبل (مجوهرات من كل الماركات).

الحلقات مو طويلة مرة زي اللي موجودات بعرض أليكسي مايبيل، طولها 7.5 تقريبا يعن ما تنزل على الكتوف (هنا بتلقون باقي التفاصيل)، طبعا ودي أقول لكم سبب البوست هذا. أولا أنا جربت أشتري من الموقع، لسا ما وصل الطلب علشان كذا ما أقدر أعطيكم رأيي، بس حتى الآن كل شغلهم محترم على الوقت و ما فيه تأخير، بس أمس وصلني منهم كود خصم %20 مدة صلاحيته إلى نهاية هذا الشهر مارس، و أنا ما فيه ببالي إني أشتري أي مجوهرات إن شاء الله هذي الفترة، فقلت أكتب موضوع عن هذا الشيء و اللي يبغى الكود يكتب رد و يحط إيميله و أرسله له. الموقع فيه مجوهرات أشكال و ألوان، و بكل الأسعار (شيكوا عليه فوق)، و أهم شيء ترا الخصم مو بس على هذي الحلقات، أنا أخترتهم علشان أكلمكم عن الموضوع.

Very Natural

كل صيف يميزه شيء معين، و مجلات الأزياء دايم تسبق الناس بحبتين، يعني علشان تعلم الناس وش يسوون (مو هذا دورها)؟. الألوان الطبيعية كانت موجودة بعروض ربيع 2011 إذا تتذكرون لما غطينا العروض، كان الأبيض بكل مكان تقريبا.
بعض المرات بالنسبة لي أحتاج أشوف إيدتوريال حلو علشان ينعش تفكيري بوش أكتب بالمدونة، و يعطيني إلهام لوش ألبس.

لما شفت صور الإيدتوريال هذا، حبيته قوة خصوصا هذي الصورة، فيها شيء من التسعينات. مو بس كذا، حبت فكرة أنه للصيف هذا يكفي تلبسين ملابس لونها أبيض أو ألوان طبيعية مع مجوهرات ستايتمنت (فضي أو ذهبي)، و خلاص هذا كل شيء ... يعني و لمزيد من الإثارة روج أحمر بعض المرات.

علشان كذا سويت سيت، ما عجبني شكله النهائي، مو تجميع الملابس فيه، بس باحطه لكم، لأنه أختيار الملابس عاجبني، و لا أبغى أزود شيء أو أنقص منه.

Natural by alorwa featuring oversized handbags

Stella McCartney print dress, 1,465 GBP
Donna Karan platform wedge heels, $750
Heidi Mottram oversized handbag, $378
Mawi cameo jewelry, $1,125

زي دايم كل المعلومات موجودة تحت الصورة، لما شفت الإيدتوريال، تذكرت هذا الفستان من ستيلا مكارتني، عاجبني من فترة و ودي أسوي فيه شيء (عاجبني شكله من ورا) شيكوا عليه من الرابط اللي موجود تحت الصورة. 
بعيت بعد ما أختار زي ألوان فاقعة أو زاهية. الجزم بغيتها وجز بعد، بس أوان باهتة لأن الفستان يستاهل أنه يعطى وجه أكثر من أي شيء ثاني. أخترت العقد هذا بعد علشان أعطي للفستان شكل، خصوصا إن رقبته دائرية ضيقة، و بيمشي معها العقد. 

Like a Boy

من أكثر الأشياء اللي أنبسط عليها لما أشوف وحدة أحس إنها حلوة و تستاهل، بشكل حلو. أمس و أنا زي كل مرة أقلب بمواقع القوسب علشان أشوف صور شفت صور جديدة لإيما واتسون و هي تصور دعاية للانكوم.

من قصت شعرها إيما قصير مرة (بيكسي) و أنا مو كل شيء تلبسه يعجبني مرة، أحس بعض المرات قصتها تنزل اللوك بالأرض، مو دايم، بس ما أعرف وش الشيء اللي خرب عليها.
زي ما قلت لكم أمس إيما كانت جالسة تصور إعلان للانكوم، و أخذوا لها هذي الصورة، من وسط المكان اللي تصور فيه، فيعني اللبس اللي هي لابسته مو من اختيارها، هذا اللبس اللي بيطلع بالإعلان. أعجبني مرة، حسيت أنه هذا الستايل اللي لازم تعتمده لها، يعني شيء شوية ولادي. أكثر شيء حبيته باللوك، هو الشورت، عجبني أنهم ما حولها ولد جابوا شورت دانتيل كسر من جمود الفكرة، بعدين اللي خلاني أحبها أكثر، إني لما أشوف كثير من البنات اللي عندنا لما يقصون شعورهم قصيرة، يروحون يلبسون لي تي شيرتات حقات أولاد و يمشون و هم مفحجين؟!!!

اللوك الولادي أو الرجالي، كان من أهم الأشياء اللي ميزت عروض خريف 2011 الحلو بالخيارات أنه متنوعة، و فيها ابتكار كثير، يعني مو بس لبس رجال لبسناه بنات. الأشياء الموجودة تصلح للستايل اللي أقترحته لإيما.
العروض كانت مليانة بناطيل رجالية، بس زي ما قلت لكم، فيها لمسات كذا أنثوية بقوة، زي مثلا التطريز اللي على القميص اللي بعرض جايسون وو (الأول من اليسار). بعرض دولتشي آن قابانا كان اللوك الولادي هذا كثير مرة، أعجبني هذا اللوك (اللي بالوسط) مع الجاكيت الأصفر الأوفر سايز، و البنطلون الضيق (ولادي بعد)، و أهم شيء القبعة.
آخر لوك و اللي هو من عرض شانيل، و نفس الشيء شانيل كان فيه ملابس كثيرة فيها الطبع الولادي هذا، أعجبني أنه مع اللوك مختار كعب كتين، حبيت الحزام بعد، و أهم شيء فيها حبيت أنه كل شيء كأنه مبهذل.

Paris Top 3

أمس قريت بجريدة الشرق الأوسط الكلام البايخ هذا،  أحس الجريدة يعاملونا كأننا بالقرن 19 إننا ما ندري عن شيء بالعالم، ما أدري ليه حسيت كأنه المنتخب رايح لكأس العالم، حنا دلوخ ما نعرف شيء و يجون يقولون لنا المنتخب السعودي أحسن شيء. أنا ما أسب إيلي صعب، قلت لكم أكثر مصمم عربي يعجبني، بس بالنسبة لي هذي المجموعة من أضعف المجموعات من فترة، و لا فيها شيء جديد. مع ذلك متأكدة أنها بتكون كثيرة على السلبرتي هذي السنة.
و لأن الشرق الأوسط تكذب علينا، قلت راح أسوي بوست عن أفضل ثلاثة عروض بباريس بالنسبة لي.

1- Givenchy 

جيفنشي مع ريكاردو تيسشي صاير شيء يجنن، المجموعة كان الوصف الوحيد اللي أقدر أقوله عنها so much fun، كل قطعة تجنن، فيها روح و ظرافة، ما أعرف ليه حسيته كأنه مجلة مصورة أو شيء زي كذا، من العرض حبيت أشياء كثيرة، بس هذا الجاكيت ما أعرف وش أقول عنه وااااو بس يكفي. أتمنى ما ينقل لديور، لأني أحسه فلته مع جيفنشي. 

2. Miu Miu 

ميوميو هو العرض اللي دايم أعول عليه أنه يرد الروح :) صدق حتى لو كان بملابس من الستينات زي مجموعة الخريف اللي فات، أو الثلاثينات زي مجموعة هذي الخريف. 

تعرفون إني أحب اللون هذا لون الماسترد، طبعا مو بس هذا السبب اللي يخليني أحب هذا اللوك، اللوك هذا فيه تريند للسنة هذي قلت لكم عنه و هو الأوفر سايز، و مو بس الأوفر سايز الملابس اللي كأنها منحوتة، يعني لها شكل جامد زي البالطو، مو ميوتشا هي الوحيدة اللي سوت كذا، فيه لوي فيتون، مارك جايكوب، فيه ستيلا، إيف سان لوغان، و كثار بس ميوميو هو الأفضل بالنسبة لي.

3. Dries Van Noten

دريس فون نيتون، يجي بالمركز الثالث بالنسبة لي ... عند نيوتين الشيء الوحيد اللي كان منظم، الحلقة اللي حطها بالشعر زي ما قلت لكم من قبل، الأقمشة من كل نقشة، فوق لون تحت لون يمين لون يسار لون، حتى الأكمام شيء قصير و شيء طويل، و أهم شيء أن اللوك اللي أخترته فستان طويل :). 

إن كنتوا متابعين أسبوع الموضة بباريس أو أي أسبوع موضة، وش أكثر شيء أعجبكم؟ 

Boudoir

ما أظن فيه بنت مو بالعالم، على الأقل بالسعودية أو يمكن بالرياض علشان ما أكبر الموضوع، إلا و مرت بهوس الملابس الداخلية، اللي يشوفها و هي تشتري تحس إنها ما تمشي إلا بملابس داخلية :) طبعا تجاوزت هذي المرحلة بس الحين بخاطري قوة لانجري أشكالها قديمة، غيرة ما أبغى :).

هذي الصورة، أو صورة من إيديتوريال قديم يمكن 2009 أو شيء زي كذا، بس أول مره شفته عجبني قوة، و هو أول شيء عرفني على كلمة بودوا الفرنسية، اللي بعدين عرفت إن معناها غرفة نسائية، يعني ما يدخلها إلا نساء، ملابس نسائية، و حفلات نسائية، و أشياء دلع زي فيلم ماري إنطوانيت (للي ما شافه إلى الآن شوفوه يجنن). 

المهم و لأنه أكثر الصور يعني فوق 18 ففضلت إني بس أحط صورة وحدة، بس أرجع للانجري من جديد، و قت لكم إني من فترة و أنا منهبلة بالملابس اللي شكلها قديم، و لا لقيت شيء أبدا، اليوم شيكت على الموقع الرسمي لرفعة الضغط Net-a-Porter :)، و شفت الشيء اللي تحت. 

الرومبر هذي قتلتني، الساتان، و الدانتيل اللي تحت يخلي كل شيء فيني يحقد على كل شيء حلو طبعا بعد ما شفت السعر كرهت نفسي مرة يعني بذمتك مين المهبول اللي بيشتري رومبر بـ 4181 ريال؟ و التعب النفسي زيادة لما شيكت على باقي الماركة وشفت باقي أغراضهم، بالضبط، بالضبط زي الشيء اللي ببالي شوفها هنا، طبعا الأسعار من اللي فوق و أردى.
زي كل مرة، أعرف أنكم مستحين بس لو تبغون تجيبون لي هدية ما عندي مانع، أو على الأقل لو تعرفون مكان يبيع أشياء زي كذا بس سعر معقول علموني.

Trends

قلت لكم من ميزات الموضة السنوات الأخيرة، أنه قيه خيارات كثيرة للموضة، ما عجبك هذا، تقدر تجرب غيره، الخيارات مالها نهاية.

فيه أشياء ما توقعت إنها تطول بالفاشن، و فيه أشياء مبسوطة إنها رجعت وصار لها أشكال كثيرة نقدر نختار منها اللي نبغى. يعني مثلا بالصورة اللي فوق و اللي كانت من عرض نينا رتشي، تشوفون البالطو الأوفر سايز، أحب الأوفر سايز مرة، صح على بعض الناس لما يلبسونها يطلعون كأنها أوفر سايز، يعني فيه ناس أحلى عليها الملابس الماسكة. بس شعور الخلقنة و الحوسة يعجبني بالأوفر سايز، تحسين أنك ضايعة، و أهم شيء تحسينه شيء شتوي، شيء يذكرني بالفروة.

الشيء الثاني اللي راجع بأشكال كثيرة هو المخمل، بمجموعات الخريف اللي فات شفنا كثير مخمل، بس ما شفت الهاي ستريت ما أستخدموها كثير، فما أتوقعت أنه المخمل بيرجع من جديد، بس شكل المصممين مصرين عليه، و جايبين له خيارات كثيرة مرة، تدرون أني أحب اللون الأخضر، و لأني أحب الأوفر سايز، فأكيد باحب هذي القطعة مرة، و يمكنها أكثر شيء خاطري فيه من كل العروض. 

شرايكم بالمخمل؟ و بموضة الأوفر سايز؟

Not very romantic

الموضة بالسنوات الأخيرة ما صارت شيء واحد، يعني تلقى موضات كثيرة، يعني مثلا الستينات، و الثمنينات، البساطة، و ليدي لايك، أشياء كثيرة مرة و منها رومانس، إلا هي الفساتين و الملابس إلي شيفونات و وردو و أشياء زي كذا.

أحب كثير من ملابس كايت بوسورث، فيها أناقة بشكل غير طبيعي، و بعد حبيت مرة مجموعة الربيع لـ 2011 حقت دولتشي آن قابانا، كانت راقية بشكل غير طبيعي، و أهم شيء إذا كنا بنصفها مع أي موضة، بتكون أكيد رومانسية.

طبعا لما تكون سلبرتي تقدر تحصل فستانين من دولتشي آن قابانا بالراحة، و هذا بالضبط اللي صاير مع كايت، قبل فترة بمهرجان سن دانس كانت كايت موجودة، و لبست الفستان اللي على اليسار، اللوك رقم 42 بالمجموعة. المهم إنها لبست عليه جاكيت شيرلينق إيفييتور من بوربري و بوت (مو واضح بالصورة هذي). والمرة الثانية لبست من نفس المجموعة اللوك رقم 78، و تقريبا سوت نفس الشيء يعني حاولت تزيد قطع "خشنة" شوي على الملابس. بكل المرتين ما أعجبني الشكل مرة، بس بشكل عام عجبتني الفكرة، بس حسيت التنفيذ مو مرة، مثلا أعتقد باللوك الثاني الأبوات حلوة و لو لبست معاه الجاكيت اللي لبسته مع الأول كان أحلى.

شرايكم بخلط أكثر من تريند مع بعض زي كذا؟

Wedding .. Wedding .. Wedding

ما أعرف ليه فجأة صرت أهتم بالزوجات، مو يعني أحبها ودي أروح لها، بس صارت عيني تلقط الأشياء اللي ممكن تمشي لزواج،  فساتين، ورود مجوهرات ... إلخ .

الفستان هذا من جامبتيستا فالي أعجبني مرة، أول ما شفته، ما فكرت فيه لريد كاربيت أو علي أي أحد ثاني، فكرت أنه يصلح فستان زواج، طبعا مو باللون الأحمر، أنا من الناحية هذي قصدي لون الفستان فكري تقليدي مرة، يعني ما أحب الفستان إلا بالألوان اللي كلنا نعرفها يعني الأبيض ودرجاته، كانت مايلة للذهبي أو للفضي.
يمكن لأول وهلة بتقولن أنه فستان عادي، يعني وش اللي خلاني أحبه، بالنسبة لي مو عادي خصوصا الجزء الفوقي، الجزى الفوقي كأنه منحوت نحت، حتى تشوفون كيف شكله عن الكتوف، ما أعرف وش مستخدم، بس لاحظوا أنه الكتوف مرتفعة شوي، كأن القماش محشي، بنفس الوقت جسم العارضة يوضح أنه مو محشي.
أعجبني بعقوة من ورا، دورت كثير لصورة له من ورا و لا لقيت إلا هذي الصورة، الذيل و نهايته، أساسا الفستان كله الجزء العلوي و الجزء السفلي بينهم تضاد، ما تتقعها مع بعض، يعني ممكن لو شفتوا الصورة بس من فوق بتتوقعون تحت فستان قصير مع تنورة بنسل تحت الركبة بشوي، و لو شفتوه من تحت ممكن تتوقعون شيء شيفون و أوف شولدير بس الفستان مفاجأة.

وش رايكم بالفستان؟ و وشرايكم فيه كفستان زواج؟

Bright Winter

لو تسمحون لي بأرجع شوي، يعني مو شوي بس بارجع لأسبوع الموضة بلندن، و خصوصا عرض جونثان ساندرز، اللي أعجبني كثير أكثر من مجموعة الربيع حقت سنة 2011، يعني اللي قبل هذي.

العرض أعجبني مرة أول ما شفته، زي ما قلت لكم حبيته أكثر من عرض الربيع و الصيف، صحيح ألوانه فاقعة، بس الأقمشة و النقشات مرة شتوية.

طبعا حبيت النقشات اللي تقريبا من أهم مميزات ملابس الخريف لـ2011. صحيح فيه ملابس كثيرة تعجبني من الرانواي، بس يعني الواحد زي ما يقولون يمد رجوله على قد لحافه، علشان كذا ما أفكر إني أبغى كل شيء يعجبني، أقصي تفكيري أو أمنياتي تكون أنه ألقى بالمحلات الهاي ستريت شيء حلو زيها. اللي وصلتني دعوة لموقع جديد أسمه Moda Operandi، المهم لما قريت مكتوب أنه بيعرض اللوكز اللي بارانواي للبيع على طول، يعني ما يحتاج الواحد ينتظر شهور لحد ما تنزل المجموعة للمحلات، و بعد قريت أنه الدعوة محدودة، فكرت ألبي هذي الدعوة أو لا، خصوصا إني أعرف قيمة هذي القطع، و الحمد لله ما وصل فيني الهوس إني أبغي الأشياء أول ما أشوفها بالرانواي زي آنا ديل روسو، آخر شيء قبلت الدعوة أولا لقافة، أبغى أشوف إيش عندهم، و ثانيا قلت الواحد ما يدري يمكن يوم من الأيام أصير مليونيرة، و أشوف فستان و خاطري فيه علشان مناسبة أو شيء، و لا أقدر عليه و تفوت المناسبة قبل لا ينزل (أعرف دراما). المهم لما دخلته لقيت الكوليكشين هذا لساندرز موجود، و لرحت أشوف اللوكز اللي عجبتني أكثر شيء و اللي حطيتها فوق، طبعا ما انصدمت، كنت متوقعه أسعار زي كذا، شوفوا بانفسكم الأسعار، هذا برينت سكرين للشاشة. (الأسعار شوفوها فوق على اليمين للتوب و التنورة، للوك اللي بالوسط).

Not very well done: finger waves

أعرف أكثر التسريحات اللي تكون بالرانواي تكون شوي إيكستريم، يعني مو سهل أنه تسوى بالواقع، بس فيه أشياء حلوة، و أحس ممكن تطلع مرة حلوة و مميزة لو سويت، خصوصا أنه التسريحات يمكنها من أقل الأشياء حظ بالموضة، يعني ما تطلع لها خيارات كثيرة زي المايك اب و الملابس.

من موسم الشتاء اللي فات حبيت الشعر اللي بعرض أليكساندير وانق، اللي اسمه glorified comb-over و من كثر ما حبيته سويته بزواج ولد خالتي، صح فيه ناس تطنزوا تعليقات من نوعية وراه شعرك لاصق؟ و راه ما تشيلين شعرك عن عينك، بس أهم شيء إني كنت مبسوطة :). السنة هذي بنيويورك أعجبني الشعر بعرض باربل قرونق (يسار) أعجبتني هذي حركة التمويجات اللي بالبداية، ثم الشعر موقف بالأخير، و بعد أعجبني الخصلات الوردية اللي أضافها.

قبل أمس بعرض ديور بباريس (و اللي ما اختمه جون قوليانو، علشان السالفة اللي قلناها) الشعور كانت تشبه الشعر بباربل قرونق، من فوق هذي الحركة القديمة اللي كانوا يسوونها بالأصابع علشان كذا سموها finger waves، و من تحت أكثر واقعية من شعر بربل، يعني وايفز بس سايحة شوي. باختصار عجبني مرة الشعر، ودي أسوية، و بعد ودي أشوف أحد مسوية بالريد كاربيت، ننتظر كان و نشوف يمكن أحد يسويها بكان.

أنتم شرايكم بالتسريحة؟

When the west meet the east

هذا مو شعار إسطنبول P: ... بس فكرت فيه لما شفت الصورة اللي تحت، طبعا أنا صايرة إدقق على الحفلات اللي تكون موجودة فترة العروض، خصوصا أنه الحفلات هذي يجيها ناس لبسهم حلو، بس مو مشاهير، فهذي فرصة نشوف بعض الناس وش عندهم :)

الرجال اللي بالوسط و اللي ما أعرف من هو كان حاضر حفلة لشانيل بنيويورك، غير أنه مسوي شيء من أهم موضات ربيع وصيف هذي السنة و اللي هي الألوان الفاقعة، عجبتني القطعة اللي تحت شيء تشبه قمصان البيت حقات الرجال، و من تحت، كأنها زري، فجأ ببالي ليه ما نجيب شيء عربي زي الجلابية (اللي أحب بعض أشكالها)، بس ما أحب أشتريها لسببين، الأول اللي يلبسها يصير كأنه شعبيات، حفل ما بقى فيه إلا نلبس مخنق، و أحسها حقت أمهات، و مسلسلات خليجية، الشيء الثاني إنها مو رخيصة. 

Arab by alorwa on Polyvore.com

Tory Burch kaftan top, 425 GBP
Sandro biker jacket, $820
RAPHAEL YOUNG suede pumps, $845
Handbag, $85
MNG by Mango nautical jewelry, $48

قلت لكم الفكرة الأساسية أنه أسحب الجلابية أو الدراعة من جو القرف حق الشعبيات، و بالنسبة لي الحل الوحيد هو أنه يلبس مع الجلابية كل شيء ما يقرب للجلابية أبدا، فأول شيء جا ببالي إني أختار معاها جاكيت جلد و خصوصا بايكر اللي صاير بعد تريند، و تلقونه بكل شكل من جلد إلى قبل فترة قريبة شفت منه ساتان عند ريفير آيلند. طبعا بغيت جلد لأنه أبعد شيء عن أي شيء عربي. لا تلوموني على الجلابية اللي مختارتها أعرف أنه فيه أشياء أحسن بكثير، بس وش أسوي العرب لما يصورون شيء أو يعرضونه ما يعرفون يسوون شغل نظيف، يعني لازم على عارضة تارسه وجهها مايك آب، بس أهم شيء تاصل لكم الفكرة. أخترت مع اللبس شنطة كلتش، و بغيت لونها يكون فاقع أو برايت، يعني شيء دارج اللحين، نفس الشيء الجزم بغيتها مميزة، و لا بغيت كعب، فاخترت وجز، بيكون حلو أنك طويلة بس مو كعب أحسه بيصير مسلسل خليجي مع كعب. آخر شيء رجعنا للعرب من جديد و أخترت هذا العقد اللي ذكرني بسلسال خرزات أحمر مع فيروز لجدتي الله يرحمها ما كانت تفسخه أبدا. 

Cover Girl

نبعد شوي عن العروض، و نرجع للسلبرتي من جديد ... من فترة كنت من مؤيدين بلايك لايفلي، الفترة الأخيرة حولت شكلي على لايتين ميستير، ما أعرف عاجبني شكلها من فترة أحس فيها شيء فرش ما أعرف وشو.

لايتين طلعت علي غلاف مجلة لوفيسال اللتوانية. بالنسبة لي هذا أحسن غلاف شفته من بدأت أعداد مجلات الأزياء الي تطلع ملابس الربيع. يعني الغلاف مو بس أهم شيء إننا جبنا لايتين ملبسينها ملابس حلوة. أساسا من زمان أحب اللون الأخضر بس الأختيار اللي أختاروه للبس كامل طالع حلو، يعني هذي التنورة الخضراء من جيل ساندر و التوب من لانفين مع الشعر المشدود و الحزام الجلد و المجوهرات الفخمة عاطي اللوك فخامة أنيقة و راقية تحسون فيها برجوازية. لما كان كل شيء لحال التنورة لحال و التوب لحاله ماكانوا كذا فخمات بس مع هذا الإكسسوار الغالي (الحزام جلده كويس) و المجوهرات صار بهذا الشكل من الفخامة من دون جفاسة. 

للي يبغى يشوف باقي الإيديتوريال، هنا صور بس سكان مو ذاك الزود. و كله على نفس الطريفة ملابس بسيطة، و إكسسوار و مجوهرات فخمة.

Ring in the Hair

أحب أنتبه لتفاصيل العرض، مو بس الملابس، لأنه بالتفاصيل بعض المرات تلقين أشياء مرة حلوة و مميزة، يعني ما تصير تريند بكل ماكن، و تقدرين تلقين أشياء تصلح مع طابعك الشخصي باللبس.

بعرض داريس فون نوتين أتبهت للشعر و أعجبني مرة الشيء اللي حاطينه فيه. بشكل عام و إن شاء الله أتلكم عنه بعدين المايك اب و الشعر للموسم هذا كله يعتمد على الطبيعية. بس باتكلم اليوم عن هذي الحلقة الذهبية اللي حاطها بالشعر. صراحة ما أعرف بالضبط كيف شكلها يعني من ورا مطاط أو كيف تتقفل على الشعر؟ أو بعد كيف تآخذ حجم الذيل، يعني مو كل الناس شعورهم كثر بعض. بس إنها إكسسوار يستاهل الواحد يحط عينه عليه و أتمنى أشوف منه نسخ بالمحلات عندنا، طبعا اللي عاجبني فيها إنها ممكن تكون لكل يوم و ممكن تكون لسهرة بس سوي ذيل مشدود بقوة مرفوع و تطلع مرة حلو خصوصا لما يكون اللبس بسيط يعني من دون نفشات و أشياء حوسة كثيرة. الحلقة هذي ذكرتني بأيام الثنوي يوم كنت مهبولة إكسسوار شعر، الحين شعري يا مفكوك طول الوقت، أو كماشة من كماشات أمي اللي دايم تهاوشني إني أسرقها منها و لافة شعري و رافعته.

Natasha with Love

لسا حنا بأسبوع باريس، و هو آخر أسابيع الموضة الكبيرة. بس زي ما قلت لكم هذي المرة راح أتكلم عن أشياء غير اللي يصير بالعروض نفسها، يعني حتى لو كان شيء حلو و مميز بالحفلات اللي تجي مع العروض.

أحاول ما اتكلم عن العارضات، خصوصا لما يكونون بالعرض نفسه، أو بمجلة، لأنهم "موديلز" يعني مفصلات تفصيل، و كل شيء موجود علشان يطلع حلو عليهم. بس لما أشوف شيء حلو منهم بالحفلات أو بالشارع أحب اتكلم عنه.

لما يجي ذوقي العارضات كل فترة أحس أنه ماغير، يعني معايير الجمال اللي أحبها، صح فيه ناس يظلون براسي، بس يعني كل فترة تطلع وجيه جديدة و أشوفها أميز و أحلى من غيرها، بس هذا ما يعني إن القديمات صاروا شينات بالنسبة لي.

نتاشا بولي من أقدم العارضات الموجودات اللحين الي عجبوني، طاحت من عيني فترة، بس الحين أنا حابتها، مو لأني أشوفها حلوة (هي كيوت و عظام وجهها حلوة)، بس لزنه زي ما نبهتني أختي من أكثر العارضات اللي بالمناسبات يعرفون وش يسوون. يعني من الأخر زي ما نقول "فاهمة الطبخة".

أمس كان فيه حفلة بباريس و جاية نتاشا لها، كانت لابسة فستان من بالمين من مجموعة الخريف اللي فاتت. بصراحة لو أحد لبس غيرها هذا الفستان و كان قدامي كان عطيته كف، مو لأن الفستان قبيح، بس لأن الكوليكشين هذا بذات قطعوه الناس باللبس و مليته. ( إذا خاطركم بشيء من الكوليكشين تراه موجود أوتليت عند ذي آوتنيت) بس اللي خلاني أحبه عليها، هو أول شيء شعرها اللي مسرح بشكل مرة حلو، لا هو ستريت و لا ويفز شيء حلو بين الإثنين . المهم شعرها مو بس هو الحلو المايك آب حقها كان مرة حلو، و الإثنين مكملين بعضهم، ما أعرف كيف، بس ناتاشا دايم لما تتمكيج تقولي ترا السموكي آيز اللي تسوينه بايخ، و مو تراه بس عيون ملطخة بأسود :S كل مرة تسوي سموكي آيز و تقدر تطلع فيها بشكل مختلف عن المرة اليي فاتت. هذي المرة بدل ما تحط الشادو الأسود على الجفن كامل، طلعته من برا بشكل مرة حلو. ما أعرف شكل عيونها يساعد أو إيش لكن راح أجرب و أقول لكم، و أنتم جربوا و قولوا لي شلون طلعت أشكالكم بهذا المكياج؟

Fairy tale

قلت لكم راح أتكلم عن العروض على حسب مزاجي، يعني مو بترتيب، كل ما حسيت إني ودي أكتب راح أكتب. اليوم راح أتكلم عن واحد من عروض لندن، مع أنه لندن خلص و ميلانو خلص، و باريس راح يبدأ. بس يستاهل. 

 من الآخر أحب الشراشيح. أحب الملابس الطويلة الدانتيلات الحوسة، الأقمشة الخفيفة علشان كذا حبيت العرض ... ما أعرف ليه لما أشوف ملابس حلوة زي كذا أول شيد أفكر فيه إني ودي أشوفها على أحد مشهور، حتى قبل ما أفكر فيها لنفسي، مو لشي، بس أحس تقدير لشغل المصمم يستاهل أنه يشتهر. 

ما أتذكر إني شفت أحد لابس من جوليان ماكدونالد أو أني أتوهم إني ما قد شفت، بس هذي المجموعة تستاهل و بقوة إنها تنلبس. أنا هنا ما أخترت أحسن الملابس بالنسبة لي، بس أخترت الملابس الي ممكن أو تصلح نشوفها و خصوصا على هذولي الثلاثة:

• ماقي جولنهال
• إيل فانينق
• فورانس ويلش

ترتيب الأسامي، علي ترتيب الفساتين من اليسار لليمين. طبعا أنا زي قطعة بأشوفها على أي أحد ريدكاربيت بانبسط، بس لو تحقق شيء من هذولي التمنيات بأكون مبسوطة. 

باقي المجموعة شوفوها هنا. 

Nazi

قبل لا يبدأ إسبوع الموضة بباريس هذا خبر جديد أمس تقريبا صار. اللي هو أنه جون قوليانو خلاص ماراح يكون المصمم حق ديور.
من عرفت العالم ممكن أعدد المصممين الكبار اللي راحوا:

• جياني فيرساتشي واحد قتله بميامي أعتقد 98
• إيف سان لوغان إعتزل التصميم أظن 2000 و أعتقد أنه مات 2009 مو متأكدة من أي تاريخ، و لا لي خلق أرجع أتأكد
• فالنتينو له سنتين موقف عن التصميم
• كغستيان لاكوا أفلست شركته
• أليكساندير ماكوين انتحر العام.

نرجع مره ثانية لقوليانو و سالفة فصله من ديور بعد ما قال أنه يحب هتلر، أكيد أنه جون خلاص صمم مجموعة الخريف حقت 2011 بس تتوقعون مين اللي راح يطلع بنهاية العرض، و مين راح يكون مكانه و يصير مصمم ديور؟ و الشيء الثاني جون عنده ماركة لحاله وش بيصير عليها ما أعرف.

بالأخير الصورة اللي أنا حاطتها هي صورة جون قوليانو بعرض ديور أوت كتو ربيع 2011، و دي أسوي شيء زي د.فل و أوبرا و أقول أصلا واضح من الألوان أنه نازي و أفكاره حاطها بالعرض و إلا وش معنى الأحمر و السود P:؟ .