خلص شهر الموضة أمس بعرضين، الأول للوي فيتون و الثاني لميوميو، مع إنهم يعجبوني بكثير من الأوقات، ما حسيت إني مبسوطة على اللي شفته فيهم، أحس كلها أشياء قد شفتها قبل، من دون ما يكون فيها أي شيء جديد أو مختلف. لكن بشكل عام أعتقد إن أسبوع باريس كان مرة كويس، و فيه ملابس مرة مختلفة.
أولا خلوني أبدأ بالفستان الثاني من اليمين تحت من فيكتور أن رولف، ما أعرف ليه هذا الفستان كل ما ناظرت له أكثر، كل ما أعجبني أكثر، مع إنه فيكتور أن رولف ما يلبس كثير على الريدكاربيت، بس أتمنى أشوفه على الريدكاربيت، يمكن علي زوي كرافيتز أو نيكول بليتز. الفستان اللي بعده من شانيل، أعرف إنه شكله ممكن مرة ممل، و أعرف إنه ذوق آنا وينتور، بس أتمنى أشوفه على تيلدا سوينتون، إذا فيه فستان متأكدة إنه راح يلبس على الريدكاربيت، هو الفستان جيفانشي، العنابي، أتمنى تلبسه زوي سالدنا، مع إنه بيكون يشبه فستان جيفانشي كتور أبيض لبسته قبل كم سنة. الشيء اللي ما توقعت إنه يعجبني مرة، هو الجمب سوت الرمادية (فوق الأول من اليسار) من ستيلا مكارتني، مرة أعجبتني، أعجبني الكم الأوف شولدير، و أتمنى اللي يلبسه ما يرفعه، ودي أشوفه على ثاندي نيوتون أو وزموند بايك. إذا فيه فستان بعد جيفانشي أعتقد بنشوفه على الريدكاربيت، هو الفستان فيونيه (الأول من اليمين فوق)، مرة أنيق، و بنفس الوقت فخم، مع إني مرة محبطة من ملابس فليستي جونز بموسم الجوائز اللي فات، بس لو تبغى تخليني أنبسط، تلبس هذا الفستان.
*باقي الملابس: السويتر اللي عليها جمجمة من أشيش أرورا، أتمنى أشوفه على ريانا، اللي بعده من نينا ريتشي، أحسه بيكون حلو على جوليان مور. الفستان الأبيض اللي تحت من جامباتيستا فالي، أتمنى أشوفه على لوبيتا.
وش رأيكم بباريس، و بموسم خريف 2015 بشكل عام؟
