The Kids wears Prada

الإسبوع الي فات كان إسبوع الأوت كتو ... ما كتبت عنه، أولا ما لقيت عرض مميز، كان فيه فساتين حلوة، بس مو عرض كامل مميز، و جا موضوع جدة، فقررت إني ما أكتب شي الفترة الي فاتت، بس أكيد بيكون فيه كلام عن فساتين الأوت كتو الفترة الجاية، خصوصا مع موسم الجوائز.
و على طاري أمس موسم الجوائز، أمس كان فيه ساق، و الساق هذي المرة أساسا ما جاه ناس (كشخة)، فاللبس كان عادي، أكثر وحده عجبتني هي هايلي ستينفيلد.

قلت لكم قبل إن هايلي هي البزر الجديد الي طالع على الساحة، و أنه وارد إني أكتب عنها. أمس هايلي جاية للساق، و لابسة برادا من مجموعة الربيع لعام 2011. هايلي بعد إيل فانينق جت تثبت لنا أنه ما يحتاج الواحد يكون بالثلاثين و فوق علشان يلبس فستان من برادا، أو أوت كتو من فالنتينو. عجبني شكل هايلي مرة، ألوان الفستان و قصته، شعرها، الخاتم اللي كأنه طالع مع حلو (مصغرها، عمرها بس 14). و بعد المناكير الفوشيا.
مو أول مرة تلبس هايلي لبس حلو، بالقولدين قلوب، للي لسا ما شاف الصور كاملة، أو ما شاف الحفل، هايلي كانت جاية، و لبست بعد من جموعة الربيع لباربل قرونق، و شايلة معها كلتش فيروزية، و شعرها مسرح تسريحة صغار. 

Pearl Necklace

قبل أسبوع تقريبا كنت ما أدخل موقع إلا ألقى إعلان موقع أسمه Charm and Chain بكل مكان، طبعا، رحت أشوف وش سالفة هذا الموقع، و لقيت عنده مجوهرات متنوعة، كثير منها حلوة ... (طبعا الحين يوم بغيت أوريكم الإعلان ما لقيته:).

أنا ما أشوف أنه ستايل ماندي مور حلو، بس انتبهت لهذا العقد اللي لابسته. لأني كنت أفتش بالموقع طول الإسبوع الي فات (يعني من باب الاستكشاف)، و الشي الثاني لأنه وحده من صديقاتي بتتزوج، و تبغى لها عقد لولو، فانتبهت لهذا العقد ... العقد  الي لابسته ماندي للفوتو كول لفيلمها الجديد Tangled بالضبط موجود زيه بالموقع، ما أعرف ماندي طلبته منهم، أو هم عطوها إياه، أو إنها شرته من مكان ثاني، بس طالع عليها حلو. العقد تقريبا بـ 2450 ريال، بس ما أعرف بيعجب صديقتي أو لا، لأني لسا ما وريتها ...
للي عاجبة العقد تلقونه هنا.

Clean Gangs

من عدد فبراير الي كان غلافة كيرستين ستيوارت بشعر أشقر و حواجب غامقة (تعجبني هذي الحركة، و حبيت الغلاف). المهم فيه إيديتوريال أسمه Gangs of New York أو (عصابات نيويورك). أسم الإيديتوريال زي اسم فيلم قديم ما أتذكر كل شي بالضبط، بس أكيد أنه كان شكل الناس مخيس، و ريحتهم طالعة :) الغليلم حلو بس الناس كانوا مخيسين.

لما كانت فيه عروض نيويورك لربيع 2011 ما حسيت إن عرض رالف لورين كان مميز، فيه أشياء حلوة بس مو مميزة. بالإيدتوريال هذا فيه أكثر من مصمم بس أكثر واحد حبيت الشغل حقة كان رالف لورين. من فترة طويلة و أنا حابة الفساتين الطويلة البيضاء ، المشرشحة. فيها نعومة و أناقة، و لا أحس يحتاج لها شغل كثير، يمكن بس حلقات كبيرة، و مايك آب مناسب و بتكونين جاهزة لأي مناسبة، أهم شي لا يكون فيه مبالغة بالشكل.

ما أعرف صراحة، موقع يبيع رالف لاورين (قصدي أونلاين) ... بس فيه بوتيك لرالف لورين بالمملكة، بالرياض للي يبغي شي من عرض رالف لورين الي موجود بالإديتوريال أو بالعرض هنا. بس أنا من فترة طويلة، حتى من قبل التخفيضات، الي كانت عند أي نيت بورتيه، و أنا حاطة عيني على هذا الفستان من آنا سوي، عاجبني مرة، عاجبني طوله، و أنه أبيض، و خرابيطه الكثيرة ... ميزت الأبيض أنه مهما كثرت خربيطة ما يطلع بشع، و جلف علشان كذا حبيت هذا الفستان، زي ما أنتم شايفين الفستان عليه تخفيض الحين و صاير بحوالي 2700 ريال.

طبعا إذا تشوفون السعر غالي، بسو ودكم تجربون هذا اللوك الي مسمينه ببداية الإيدتوريال فيكتوري، أو ودكم بفستان أبيض طويل حلو، بس رخيص ... فيه موقع أسمه Free People يبيع أشياء مرة حلوة، صح مو رخيصة مرة، بس أسعارها معقولة، و أعتقد أنه كثير من الأشياء الي عندهم تستاهل سعرها.
فيه خيارين للبس هذا واحد أنا حبيته أكثر من عندهم، و الثاني خيار أختي. قلت لكم سعرهم مو رخيص دايم، بس أرخص من غيرهم، تقدرون تفتشون باقي الموقع علشان تصدقوني :). 

What about giving her a dress?!!

ميشيل أوباما كتبت عنها أول ما فاز زوجها بالإنتخابات، هذي المرة باكتب عنها علشان شي ثاني ... قبل تقريبا يومين، كان فيه عشاء بالبيت الأبيض جاية الرئيس الصيني، و طبعا كانت فيه ميشيل.

المهم ميشيل زي ما تشوفون بالصورة لابسة فستان أحمر للعشاء ... شكلها طالع فيه مرة حلو . الفستان من إليكساندير ماكوين مجموعة الريزورت لعام 2011.  إلى الآن كل الأمو تمام، بس أمس طلع لنا أوسكار دي لارينتا (المصمم أمريكي) أصله كوستاريكي شاره عليها ... هي مو أول مرة يشره عليها، على نفس الموضوع إنها لبست فستان لمصمم مو أمريكي، بالمرة الي فاتت كانوا طالعين بجولة رسمية بأوروبا، و لبست ميشيل لأكثر من مصمم أوروبي زي إيترو، موسكينو و عليا.

هذا الكلام كان قبل سنتين، و بذاك الوقت أوسكار دي لا رينتا قال عن أوباما أنه حتى لو كانت رايحة لأوروبا كان لازم تلبس لمصممين أمريكان، علشان تسوق لهم برا ...

المهم أمس عاد الأسطوانة نفسها بعد ما لبست لماكوين بالعشاء، طبعا تعرفون أنه ماكوين بريطاني فشكله غار أوسكار.

طبعا أنا أقترح على أوسكار بدل ما يشيل بخاطره عليها، أنه يعطيها من فساتينه، لأنه ما أتوقع إن الفساتين هذي على حساب الحكومة الأمريكية، و إلا كان صارت علوم، يعني هم مو زينا، الواحد لا مسك فلوس الناس صار حلاله يسرق له و لعياله و لزوجته، و عيال أخت زوجته، و يالله و العداد يمشي :)

طبعا جا ببالي إني أسهل على أوسكار وش يعطي ميشيل أوباما، طبعا الخيارات الي فوق هي المفروض تكون بدل الماكوين ... فاخترت لها هذي الفساتين الطويلة، و إلا أوسكار عنده ملابس كثيرة تلبق لميشيل.

من اليسار الفستان من مجموعة الخريف لـ 2011، الفستان أكيد يصلح للطوال، و ميشيل ما يحتاج تقدرون تشوفونها بالصورة اللي فوق، الفستان عجبني كثير، أنه مطبع، غير كذا نافش عند منطقة الحوض يعني يعطي ميشيل جسم خصوصا أنه جسمها مستطيل.

الفستان الثاني عجبني لونه مره، أختي ما تحب أنه ميشيل تلبس ستاربليس، أعتقد الفستان لو أختارته لازم ما يكون ضيق عند منطقة الصدر، لأنه يكبر كتوفها (و هي كبيرة خلقة)، و بعدين تطلع سفطات ورا عند عظمة الكتف.

الفستان الأخير من مجموعة الربيع، حبيته، لونه مره يصلح لها، خصوصا إنها لبست فستان يشبه لونه من جايسون وو لبسته بالقسم. الحلو بالفستان أنه له كتوف، و ممكن يغطي على كتوفها، و بالنهاية هو شكله يدخل ضمن أشكال الماكوين اللي لبسته.

Who gave Annette a Tom Ford dress?!

ودي أرجع فيكم للقولدين قلوب من جديد، زي ما قلت لكم هذي السنة بالنسبة لي ناس كثير لبس لبس حلو، و لأنهم كانوا مر كثار، سويت تصفيات قاسية، علشان أطلع بشي عن الحفل ...
الشي الي حبيته بهذا الحفل، أنه كثار فوق الأربعين كانوا لابسن لبس حلو زي ما كتبت قبل تيلدا سونتين.

آنيت بينانق كانوا من المرشحات، و الي جايات للحفل، آنيت عمرها 52 بس كانت حلوة مرة بهذا الفستان الي من أول مجموعة للملابس النسائية لتوم فورد. من الكلام الي قريته عن من وين وصل هذا الفستان لآنيت، بعضهم حزر أنه جوليان مور و اللي كانت جاية و لابسة لبس بعد حلو و وفوشيا من لانفين (عجبني العقد) هي الي عطتها، خصوصا أنه علاقتها بتوم فورد زينة، لكن اليوم شفت هذا الإيديتوريال من مجلة W  و انتبهت أنه آنيت لابسه نفس الفستان، فتخميني أنه الفستان كان من المجلة.
هذا الشي يخليني أتمنى إني أكون معروفة، علشان غير أنهم يصوروني صور حلوة، لما أكون متورطة و أبغى فستان لمناسبة يسلفوني إياه :).

ما أدري إذا تعرفون هذي الحقيقة أو لا ... بس تختار لأحد ملابس أصعب بكثير ما تتخيل ... الفترة الأخيرة كثير من صديقاتي كان عندهم مناسبات ... و كانوا يسألوني عن ملابس سهرة، كنت أعتقد أنه بسهولة باحط ببالي شي معين، و أول ما يشوفونه بيطيحون بحبه، مو لأني أخترته، لا لأني أشوف أنه حلو و بيناسبهم، بس صرت واهمة :).

لكن بهذي الشهرين الي فاتوا، من كثر ما جلست مع بنات نتنقى لهم فساتين (كأنه) كأنه بديت أفهم وش اللبس الي ممكن يلبسونه، و راح يعجبهم ... من الماركات الي كان لبسها مقبول بالنسبة لهم هي هولستون هيرتيج.

مو بس البنات الي وريتهم حبوا هولستون ساره جيسيكا باركر تحب هولستون كثير، و قد صممت لهم مجموعة. و بالسنة الي فاتت بالميت قالا لبست منهم بعد. الفستان موجود عند نيت اي بورتيه، بالسعر الي تشوفونه ... الفستان مو رخيص، بس تفريبا هذا أغلى فستان موجود. شوفوا البقية هنا ... و بعد هذي أشياء عليها تخفيضات.
بشكل عام فساتين هولستون هيرتيج، حلوة و أسعارها معقولة. و كثير من ملابسهم تمشي على أشكال مختلفة من الأجسام.
باختصار، إذا عندكم زواج أحد قريب، أو قريب هذا الفستان حلو، و بعد من ميزات فساتين هولستون إنه يعطيك خيارات كثيرة تسوينها بشعرك، حلو لحالة، و حلو مع مجوهرات .. مع هذا الفستان أقترح ويفز كبيرة، و إكسسوار فيه فيروز (خاتم كبير بيكفي) مع سلسال طويل.

Burberry's trademark

قبل يومين كان فيه القولدين قولب، و زي ما شفتوا أكثر شي أعجبني كان لبس ليتين الي من مجموعة قبل الخريف لبوربري ... الفستان حلو مر، بس الفستان مو أكثر شي عجبني بالمجموعة، أول ما شفتها قبل أكثر من شهر.

طبعا قلت مليون مرة إني ما أتابع أبدا، أبدا GG، بس أكيد أهتم باللبس الجديد لبلايك لايفلي ... فشفت هذي الصورة لها و أثرها صورة لها من سيت المسلسل. بلايك لابسة بالطو من من مجموعة قبل الخريف، عجبني شكلها مرة بس مو هذا البالطو المفضل عندي بالمجموعة لما شفت المجموعة أول مرة.

إن كان فيه شي يسوونه بوربري أكيد أحسن من أي أحد ثاني هي البالطوات، و خصوصا الترينش. قبل فترة جاني بحث مكتوب فيه: موديلات بالطو ماركه، علشان كذا إذا عندك فلوس أول شي ممكن أقترحه بوربري. أكثر شي عجبني من كل المجموعة هو البالطو الي على اليمين، صحيح أنه ما ينلبس بأي مكان خصوصا مع لمعة قماشة و الكريستالات الي فوق، بس حلو مرة. البالطو الثاني بالبداية ما عجبني، ما أعرف ليه بس ما أحب كثير لما يكون فيه بس رقعة خفيفة فرو، يعني أحب الفرو كامل بس رقعة خفيفة ما تعجبني كثير، لكن لما شفته على بلايك عجبني.

Golden Globe: the winners list

أدري إني متأخرة شوي، و أنا أكتب عن القولدين قولب، بس المشكلة إني جالسة أفكر وش أكتب، و المشكلة الثانية هي إني أدور صور محترمة ...
و أخيرا بعد أكثر من 24 ساعة على الموضوع جتني الفكرة ... بشكل عام صراحة اللبس الحلو كان كثير، شي ثاني الوردي بعد كان موجود و كان بعد حلو بالحفل بس ما فيه أحد لبس دريك لام الي قلت عليه.
ما أعرف هذي أول مره، بس أنه هالمرة التريند شغال قوة، يعني اللون الأخضر، اللون الوردي، المينليزيم و الأكمام الطويلة ... من بين هذي الأشياء فضلت شيين الأكمام الطويلة، و المينليزيم.

Long Sleeves: Leighton Meester

ما أعرف أنا في طريقي لتقبل ليتين، و إلا هي المتعدلة ... بس ليتين من أكثر الأشكال الي أعجبتني بالحفل، و لا ترددت و لا دقيقة باختيارها للقائمة ... بفستانها المعدل الي من مجموعة بوربري قبل الخريف (خلوا أكمامه طويلة) و شنطتها الذهبية الي من إيف سان لوغان كانت قاتلة ... شعرها حلو، و للمرة الأولى أحب أختيارها للجزم بعد، ما قد تخيلت إني باحب شكل لون الجزمة و لون الفستان واحد، بس مشا مع ليتين ... أهم شي بلبس ليتين أنه يمثل موضة بتكون منتشرة بملابس الربيع لهدي السنة، و هي الأقمشة الشيفون المطبوعة.

Minimalism : Tilda Swinton 

أنا رسميا أحسد تيلدا سوينتين، ما أعرف ليه لو تلبس من أي ماركة، يطلع كأنه مصنوع لها خصيصا، الفستان من جيل ساندر مجموعة الربيع 2011. حركة القميص ينلبس لحفلة مو جديدة بالتسعينات شارون ستون لبست قميص أبيض مع تنورة من فيرا وانق للأوسكار، بس هذي المرة تيلدا لابسة لون ليموني مرة حلو (لابق على حماصتها) ... عجبني بعد لون الكعب إلي إن شاء الله يكون واضح هو لونه وردي كأنه حليب فراولة. أختي ودها تسوي زيها، أظن أن هذا اللوك ينلبس لسهرة فيه جرأة و يحتاج أتيتود علشان ما يصير اللبس المناسب، في المكان الغير مناسب. 

Underage: Justin Bieber 

ما قد خطر ببالي إني راح أكتب عن جاستين بيبر بهذي المدونة ... يعني كل الي أعرفه عنه baby, baby ... baby aaaah  ... بس أمس هو من أكثر "الرجال" الي أعجبني لبسهم، أعجتني التوكسيدو، و أعجبني أنه لابس معاهم سنيكرز (أظن أنهم من لانفين، أتذكر شي يشبه لهم). حلو أنه كل شي أسود و أبيض، الكرافاه، الجاليه، و الجاكيت ... و جتى السنيكرز . 

طبعا بتقولين مين ينافسه بهذا التصنيف، تصنيق (تحت السن القانونية)، تقريبا ما فيه أحد إلا وحده قدم معاها جائزة أفضل فيلم كرتون أسمها هايلي ستينفيلد (البنت ذوقها حلو، فيمكن تشوفونها بهذي السنة بالمدونة هذي). 

Fringe

تعرفون إني ما أحب ليتن، بس لها كم لوك طالعة كيوت، و شعرها شكله حلو ... أمس كان فيه Gala و جاي له أكثر من وحده منهم كيرستين دونست الي كانت لابسة رودارتي و طالع شكلها حلو مرة (كالعادة).

من عروض ملابس النساء الجاهزة، كان أول عرض لتوم فورد للملابس النسائية، طبعا توم قرر بذاك الوقت أنه ما يطلع صور لعرضة، فما كان فيه صور لحد يمكن شهرين بعد العرض، لما طلع جزء من الملابس ب Vogue باريس. عجبتني الملابس الي طالع منها شراشيح. قبل تقريبا شهر طلع فديو للعرض و حط صور للملابس هنا بعض الملابس الي عجبتني.

المهم نرجع للايتين الي كانت لابسه لبس مشرشح بعد بس من لوي فيتون. صراحة ما انتبهت للفستان لما اتفرجت على العرض مباشرة، بس اليوم لما شفته على ليتين عجبني مرة، المايك آب حقها و الشعر عجبوني، عجبني مع أنه الفستان مره يدخل ضمن الفساتين sexy dresses بس هي أختارت لشعرها و وجهها مايك آب و تسريحة بسيطة مرة، خلت شكلها فريش.

شرايكم بموضة الشراشيح أو علشان ما تزعل أختي فرينج؟ 

Pinky Golden Globe

الأحد الجاي جوائز القولدين قولب، ما أعرف مين راح ينقلها، إذا تعرفون الله لا يهينكم، علموني ... أكثر من مرة قلت لكم إني ما أحب كثير الفساتين الوردية (مع ذلك هذا الموضوع الثاني لي بإسبوع عن فساتين وردية:) ... لكن زي ما أنتم عارفين مجموعات قبل الخريف تطلع وحده ورا الثانية، و شفت هذا الفستان من ديريك لام و عجبني.

أول ما شفت هذا الفستان، و لأن عندي (شوي) بس شوي فوبيا اللون الودي (عجزت أشتري cover لجوالي لونه وردي مع أنه أعجبني). المهم إني أكيد ما فكرت فيه فيه لنفسي، بس فكرت أنه لازم وحده تلبسه للقولدين قلوب ...
خصوصا أنه على إني ما أحب الوردي (زي ما قلت لكم مليون مرة) لكن فيه أكثر من فستان وردي انلبس بالقولدي قلوب كانوا مره حلوات.

الفستان الي على اليسار على كاميرون دياز، أظن أنه هو الي عرفني على ريتشيل زو، لما شفتها تعدل على الفستان ببرنامجها على شان تلبسه كاميرون للقولدين، طبعا كنت مبهورة، أنه فيه أحد بالعالم يقدر يقول لكارل لاغرفيلد (الفستان من شانيل) عدل شغلك :)
الفستان الي على اليمين لبسته ديان بالقولدين قلوب السنة الي فاتت، و قلت وقتها أنه يجنن، و يكفي أنه من كريستيان لاكوار، تدرون إني أحبه ...
الفستان الي بالوسط الي لابسته ماقي جولنهال من فيرساتشي، بعد لابسته السنة الي فاتت بالقولدين قلوب ... الفستان زي فساتين فيرساتشي بالعادة، لو تشوفها معلقة، تصير بايخة مرة، بس يلبسها أحد تطلع حلوه مره، كأنها مفصلة على الجسم.

نرجع لفستان الديريك لام، اللي أنا قررت أنه لازم ينلبس للقولدين، من بين كل اللي راح يجون، جا ببالي هذولي الثلاثة، الي ممكن يطلع الفستان عليهم حلو. هالي بيري، بشرتها لونها مره حلو، تطلع حلوه مع هذا الوردي، آمي آدمز، ناعمة مرة، لون شعرها و بشرتها تلبق على أي درجة وردي، و بعدين الألوان الفاتحة أحلى عليها بكثير من الألوان الغامقة.
ليا ميشيل نحيفة، و تلبق عليها الفساتين الي ما فيها تعقيد، لو تلبس هذا الفستان مع شعر متروك و أساور ذهبية كبيرة أعتقد بيطلع شكلها مرة حلو.
بجد بجد أتمنى أشوف الفستان على أحد، و لو ما كان أحد بالقولدين لو يكون بمكان ثاني، أهم شي ينلبس (آقترح كايت بسوورث) .

Interesting Minimalism

البساطة، أو المينماليزم كنت أهم ميزات ملابس التسعينات، من الشتاء الي فات رجعت من جديد مع أكثر من ماركة خصوصا ستيلا، سلين و كلوي ... الملابس هذي مو ذوقي بشكل عام، يعني ما أظن إني ممكن ألبس لبس كله كذت، ممكن تكون قطعة قطعتين، بس أكثر لا ....

الملابس هذي تحبها أحتي، بس مع عرض سيلين حق البري فول خلاني أتمنى لو عندي قطعة من هذي المجموعة.

ما أعرف من كثر مجموعات قبل الشتاء الحلوة هذي المرة، حسيت أنه موسم الخريف و الشتاء بيطلع بايخ، شكله المصممين خلصت أفكارهم. الشي الحبيته بهذي المجموعة من سيلين مع إنها مينيماليزيم إنها هذي المرة المجموعة كان فيها ألوان، و أقمشة مثيرة، يعني أنيمال برينت، و جينز ... أخضر ستان، كلها خيارات مثيرة ... مع أنه التصميم جدا بسيط، و الخطوط واضحة و ما فيها لف و لا دوران :) ... شي ثاني أعجبني تدخيل الألوان مع بعض، يعني العنابي، مع الأنيمال برينت بالبالطو الي على اليمين، قطع الجينز، الي من درجات مختلفة بالقميص الي على اليسار ... حتى اللوك الي بالوسط، أعجبني القميص، بالشي الي زي الحزام تحت ... و حبيت ألوان البنطلون، ما أعرف ليه بس حسيت أنه الألوان مع بعض ذكرتني لما كنت أو كنا (إن كنتوا قد سويتوا الحركة) أحاول أرتب ألواني بترتيب معين، الأولان الي تتشابه جمب بعض حبيته مره، أحسه بيطلع حلو مع قميص أبيض.

Going Soft: What should stars wear

مجموعات بري فول أو قبل الخريف، بالعادة تعطيك لمحة عن وش راح تكون عليه الموضة بالخريف و الشتاء، لسا حنى عن أسابيع الموضة، تقريبا باقي لينا شهر، بس لسا المصممين يطلعون مجموعات قبل الخريف حقتهم.

الشي الي أنتبهت له إن الأقمشة الناعمة كثيرة، الموضة هذي ممكن تكون صعبة على بعض الناس الي يشوفون إنه فيه عيوب بأجسامهم ما يحبون يطلعونها، بس لا تهتمون مو كل الملابس كذا، فيه بعد كثير ملابس واقفة، يعني لو تلبسينها ماراح توضح شكل جسمك. ....
يمكن تعرفون إني فيه عندي مشاعر تجاه أليكساندير وانق ما أعرف وش سببها، بس طلعت مجموعته لقبل الخريف و عجبني فيها هذا الفستان الي على اليمين (ما أعرف وشوا هذا اللون) بس عجبني مره، أحسه بيخلي أي وحدة بالعالم بتطلع تجنن فيه ... حسيته يشبه فستان قديم قد لبسته شارليز ثيرون من فيرا وانق، بس لما شفته جا ببالي ديان كروغر، و لو ما حملت مع موضة الحمل الجديدة (فكتوريا بيكام حامل بالرابع، و إن شاء الله هذي المره بنت المرة تبهذلت تبغى بنت). بيكون حلو عليها مرة.
الفستان الي بالوسط من برين، أحس مجموعة الصيف، والحين مجموعة قبل الخريف تلبق على كيرا، بذات هذا الفستان، فستان زي كذا يخلي أي وحده فلات تطلع أنثى بقوة، بس يحتاج له حزام يسوي تباين مع الفستان، و شعر حلو.
آخر شي ما أعرف هذا الشي الي من فليب ليم هو جمبسوت أو بنطلون و توب قطعتين، بس التوب أعجبني مره، خصوصا الشك الي عند الأكمام .... ما أعرف ليه، بس أشياء زي كذا أحسها تطلع حلوه على ميشيل وليمز.

Sales Time

فيه ناس يتحرون هذا الوقت من السنة علشان يضففون ملابس بوعي و من دون وعي. أنا عندي مشكلة مع بعض الناس وقت التخفيضات، أحسهم ماجانين ما يدرون ويش يشترون وش يتركون، ما يهم إن كانت الملابس حلوة أو لا بس أهم شي أنه عليها خصم 50 ٪. حتى أعرف ناس لو شافوا مثلا جينز بـ 200 من دون تخفيض، ما يشترونه بحجة أنه غالي، بعدين يشوفون جينز ثاني أخو الأول بس بالتخفيضات، و سعره بعد التخفيض 200 ريال يشترونه ؟!!!

اليوم كنت بالرياض غاليري، ومريت بعض المحلات و أخترت لكم أحسن ما شفت من التخفيضات.

الفستان هذا من ميس سيلفرج، ليلى ببوست عن اللون البرتقالي، قالت إنها تحب اللون الخربزي أكثر، مو بس ليلى كثير يدورن بهذي المدونة هن اللون الخربزي أو المشمشي ... عجبني الفستان، ناعم سهل ينلبس معاه أي شي، تحت فوق، ألوان كثيرة نقشات كثيرة، بس لو أنا لبسته ممكن ألبسه مع جاكيت ميتروسايكل جلد.

هذا الجاليه الترتر من زارا عجبني بعد مره، فيه بحث جاني كذا بالضبط "اشياء فخمة تناسب التنورة السوداء ". بالنسبة لي هذا شي فخم يناسب التنورة السوداء ... التنورة اللي ببالي ممكن تلبس مع هذا الجاليه أهم شي تكون ماكسي (طويلة)، ما يهم وسيعة أو ضيقة، لأنهم باعتقادي كلهم ممكن يكونن حلوات ... وش راح ألبس تحت الجالية؟!!! ببالي تي أبيض مطبوع عليه شي معين على حسب ذوقك.

عند ديساجول أشياء غريبة، صح ممكن ما تعجب أي أحد، بس صدقوني فيه عندهم قطع تستاهل إنك تشتريها مثل هذا الفستان ... تقريبا من أكثر من شهرين و يجيني على المدونة بحث ملابس شتوية حلوة. إذا بتسألوني هذا الفستان ممكن أقول عنه كذا؟ إيه هذا فستان شتوي حلو، و أهم شي أنه مو حق موضة، أو موسم واحد أقدر أقولكم بثقة أنه لو بتلبسينه بعد عشرة سنوات بيظل حلو.

أكثر شي أعرفه من البنات إنهم يروحون لبيرشيكا يدورون فيه بنطلونات، للحق ما قد شريت من عندهم، و لا قد انتبهت كان عندهم بناطيل حلوة أو لا ... بس اليوم طاحت عيني على هذا الفستان عجبني مره، خصوصا فيه كريستالات على الرموش ... أحس أنه مع ليقنق أسود، و برا باندو بأي لون تحبون. 

Audrey = Valentino

أحب أكتب عن وش الناس يدورون عنه أو يبغون ... علشان كذا، أحب أشوف كيف الناس وصلوا لمدونتي علشان ألقى وش الكلمات الي وصلوا فيها للمدونة ... من الأشياء الي حصلتها "فستان أودري هابيرون الوردي"، ما أعرف إلا مرتين أودري لبست وردي على الأقل بالأفلام ... الأول كان ب Breakfast at Tiffany's  و قد كتبت عنه من زمان ... و الثاني هو الي ب My fair Lady وهو هذا الي تحت.

للحق هذا الفستان ما قد حبيته، ما أحسه أحسن شي قد لبسته أودري بالأفلام ، يمكن لو ما فيه الهاي نيك كان بيكون أحلى، ما أعرف، بس الفستان دلوع، الشيفونات تحلي كل شي، و لما يكون شيفون وردي أكيد بيكون أدلع و مع رفلز و ورود.
لو كان فيه ري مايك للفيلم و الناس جداد فيه، أو إيديتوريال أحس ما فيه خيار أحسن من فالنتينو، خصوصا أنه فالنتينو كثير عنده رفلز، و شيفونات ... ما أعرف هو من زمان ما شفت وردي من فالنتينو، بس لما شفت البحث الي فيه أودري هابيرون و فستانها الوردي، تذكرت المجموعة الأخيرة من فالنتينو، و أنه كان فيها أكثر من فستان وردي، ففكرت بالخيارات الي ممكن تكون عصرية، و تشبه هذا الفستان.

مو بس هذولي الفستانين هما الوحيدات الورديات، فيه واحد ثالث بس ما أعجبني مره، و من بين الإثنين هذولي أنا حبيت أكثر الي على اليسار، بس أخترت اليمين بعد لأني حسيت أنه بعد يشبه الفستان أكثر، مع الشيفونات و الرفلز الي عند الياقة ... زي ما قلت قبل أكثر عجبني بالعرض هو الحزام النحيف مره، بس الفساتين كانت مره ناعمة، و دلوعة (فالنتينويه) مره ... و زي ماقلت لكم قبل يمكن هالفستانين هم أكثر فستانين يلبقون إنهم يكونون بالريميك أو بإيدتوريال عن My Fair Lady. 

Chanel Love

يمكن من شهر و أكثر كان عرض شانيل pre-fall من فترة ما حبيت مجموعة لشانيل بس هذي حبيتها مره، ألوانها و تصاميم الملابس نفسها كلها حلو ... اليوم شفت هذا الفديو لديان كروقر تتكلم عن العرض، و قررت إني أحطه لكم خصوصا أنه فستانها المفضل من المجموعة، هو الفستان المفضل لأختي.

هنا حطيت لكم ترجمة كلامها هنا:

• إنها حميمية جدا، جميلة و غنية. الألوان في هذه المجموعة ملهمة فعلا، أظن إنها فائقة الروعة.

• إن فساتين شانيل التي أقع بحبها على الفور بالعادة هي القطع التي فيها تطريز و ريش.

• كانت الألوان هنا كاللعبة. هناك فستان واحد أحببته بالفعل هو هو الفستان البنفسجي، ذو الأكمام التي تغطي ثلاثة أرباع الذراع. فيه الكثير من التطريز، قصير من الأمام و طويل من الخلف.

• كارل دائما ما يختار فتيات لديهن من الأناقة و الرقي الكثير. العارضات الليلة هذه كن أنيقات و و راقيات بشكل خاص.

• فتيات مختلفات كثيرا يرتدين شانيل، و شانيل تناسب كل الأشكال. فنيسا براديس هنا الليلة هي تختار ملابس تميل للروك آكثر. أما آنا موقاليس أختيارتها جدا كلاسيكية من شانيل. أظن أنني أميل أكثر للذوق البناتي. أحب التطريز، و المظهر الناعم. زهور الكاميليا، الريش. أظن أن كل امرأة ستجد نفسها في شانيل.

• لقد تعرفت على كارل منذ أن كان عمري 16 عاما. جلست التصوير الأولى لي كانت في بيته بباريس. منذ أن صرت ممثلة، كان هو أول من صنع لي فستان أوت كتو. أتذكر أول بريمير كبير لي كان في مهرجان كان لفيلم تروي. و لقد قام كارل بتصميم فستان أحلامي.

طبعا مادامت ديان أختارت البنفسجي، و خلصت، و لا زعرف كارل راح يعطيها إياه أو لا، فكرت إني أختار بعد لوكين ثانيات حبيتهم من العرض ...

من الثلاثة هذولي ما أتذكر إلا ديان كروقر تلبس من شانيل، بس ما فيه مانع الواحد يتخيل ... من اليسار أعجبني هذا اللوك مره، الجاكيت و البنطلون الصوف حبيتهم، بس ما جا ببالي إلا كايت بلانشيت، تقريبا هي الممثلة الوحيدة الي أشوف إنها ممكن تلبس بدل لبريمرات، دايم تطلع عليها حلوة، هي طويلة، و شكلها مميز، أعتقد أنه هذي البدلة بتطلع عليها حلوه، خصوصا لون الجاكيت الذهبي مع شعرها. بالوسط ديان كروقر قلت لكم إنها قالت إنه عجبها هذا الفستان فاخترته لها شكل الفستان مو غريب على ذوق ديان، بس لونه، ما أتذكر إني قد شفتها، بهذا اللون، بيكون حلو لو نشوفها بشي غير. آخر شي هذا الفستان العاجي و الأسود، بالنسبة لي هذا المفضل بالمجموعة ... و جلست أفكر فيها، ما طلع ماعي إلا ماغي جولنهال ممكن يطلع عليخا، حلو، مع إني ما أتذكر إنها قد لبست شانيل، بس ماغي عندها شي مميز، تقدر تخلي الملابس الغريبة حلوة عليها، خصوصا لما تكون ألوانها مو غريبة. 

Straight Orange

من فترة ما تكلمت عن ملابس أحد، جت الأعياد و رأس السنة، و دخلوا الناس ببيات شتوي. بس أمس كان فيه جوائز اختيارت الناس people's choice award كان فيه ناس لابسه لبس حليو، بس قررت إني أكتب عن درو باريمور اللي كانت جاية لحفلة ثانية لمجلة Covergirl لابسه برتقالي من جيل ساندر.

ما أعرف أنا توي أنتبه، أو صدق السلبرتي كاثر لبسهم لمصممين مختلفين و منهم جيل ساندر ... تستاهل جيل طلعت بمجموعة حلوه مره، و أنا وقتها تكلمت لكم عن الشنط الي كانت بالمجموعة، و فيه بعد لوك اخترته لقائمتي لأفضل أشياء ميلانو ...

الي باتكلم عنه اليوم أهم شي اللون البرتقالي اللي لابسته درو، عجبني اللون، عجبني شعرها هذا اللي كأنه مجبص، ما أعرف كيف، بس مو أول مره تطلع فيه ....

المهم اللون البرتقالي أتوقع بيكون كثير بملابس الصيف هذي السنة، و شفناه بكثير عروض لربيع 2011.

من كثير ملابس كان لونها برتقالي ... هذي أكثر الملابس الي أعجبتني، أولا مع الفستان الي على اليسار من كريستوفر كين دانتيل وردي، مع خطوط برتقالية، غير القماش، أكثر شي أعجبني طول الأكمام.

الوسط تنورة من جيل ساندر بعد، التنورة أحسها خطرة شوي، ممكن تطلع مره قبيحة، أو مره حلوه ... آخر لبس من هيدر أكيرمان، حبيت هذا الفستان، حسيته مصمم على الموديل نفسها، يعني المصمم كان يربطه و يخيطه على العارضة، مع عقد ذهبي طويل مع تعليقة كبيرة، أحسه بيطلع هيت لأي ريد كاربيت.

Do you wanna look like Kate?

فيه لوك مهما مر عليه ما يطيح من راسك ... واحد منهم هذا اللوك لكايت موس و هي لابسه قبل صيفين فستان من شانيل، لزواج بنت بوني وود (واحد من رولينق ستونز).

قلت لكم هذا اللوك عاجبني مره من شفته أول مره، بذات الروب الأزرق المخمل (تعبت و أنا أدور مثله بالنت طبعا) بس أتوقع أنه ممكن الواحد يلقى زيها بمحلات الفنتاج (طبعا ما عندنا).

الفستان مو أقل مستوى من الروب، بس كنت مسحورة (و مازلت) بالروب ... طبعا لأني مليانه أشتراكات من المواقع لما يجيني شي أحاول إني أجيب لكم أحسن العروض الي أشوفها ... أنا مشتركة بموقع أسمه gilt.com وهو موقع يعرض بضاعة من ماركات مختلفة عليها عروض لمدة محدودة لما شفت هذا الفستان (اللي ما لقيت له صورة أكبر) تذكرت شكل كايت اللي من زماااان كان ودي أتكلم عنه بس عجزت ألقى له سالفة، الفستان من فيرا وانق لافندير لايبل ب 633 ريال عجبني مره، حسيته بعد بيطلع أحلي مع حلقات هندية كبيرة و كعب أزرق ببوز (ما أعرف إن كانوا الناس يسمونه اسم ثاني).

* للي يبغى الفستان، ترا لازم تسجلون بالموقع علشان تشوفونه، و الفترة محدودة، و لا يشحن إلا لأمريكا. 

Geeks on dresses

جا نهاية التيرم و جت معاه الإختبارات و الواجبات ... و طبعا مع الأعياد (عندهم) و رأس السنة، ما فيه أخبار و لا أشياء أتكلم عنها .... بس شفت هذي الصوره لإيلاري بلازي (زوجة كريستيانو توتي) اللاعب الإيطالي ... و قلت نكتب كلام سريع عنها.

يوم أنا مهتمة بالكورة، كنت أعرف تقريبا كل شي عن اللاعبين، كنت أعرف زوجاتهم و عيالهم، و بحسب خبري، أظن إيلاري مقدمة برامج، ما أعرف هذي الصورة قديمة أو جديدة بس أهم شي باتكلم عن إنها لابسة نظارات مع فستان كوكتيل.
إيلاري زي ما تشوفون لابسه فستان ذهبي من بوتشي مع كعبات ذهبية بعد ... و لابسه نظارات، قلت لكم قبل عن عرض دسكويرد إنهم لابسين فيه نظارات، ما أعرف راح نشوف نظارات أكثر بالريدكاربيت و على التيلفزيون، بس أساسا أنا صراحة ما توقعت أشوفها أصلا، ما كرهت شكل إيلاري، و لا حبيته، و لا بعد حسيت إنه ملفق يعني إلا مسوية الحركة بالقوة، ما أعرف ممكن تكون حلوة على أحد ثاني يمكن درو باريمو (ما أعرف وش جابها ببالي) أو آن هاثوي ننتظر و نشوف وش يصير ب 2011 :)
هذي أول تدوينة بالسنة الجديدة، الحمد لله خلصنا ثالث سنة و هذي المرة عدد المواضيع أكثر من أي سنة بكثير، و تفاعلكم أكبر بكثير من كل سنة ...
أستناكم السنة الجاية، مع كل تدوينة، و كل حدث، شكرا :)