Best of LFWSS15

صراحة عكس السنوات اللي فاتت هذي المرة لندن على الأقل من وجهة نظري، ما كان فيه عروض مميزة، لكن أعتقد كان فيه فساتين مرة حلوة، و أتمنى أشوفها على الريدكاربيت الفترة الجاية، لأني أحس إنها تستاهل أحد يعطيها وجه و حياة. ما علينا من الكلام الفاضي، هذي هي أحسن الملابس/ اللي ودي أو أحس إني أشوفها على الريدكاربيت. 

من أول الفساتين اللي أعجبتني من لندن، هو الفستان الأول (فوق يمين) من ماك كيو، عجبني أنه كأنه تغليفة هدايا قديمة، لونه عجبني، و عجبتني القطعة السوداء اللي على جمب، ما أعرف وش هي بالضبط، بس أحسها أعطت الفستان شكل، مع إني ما أتوقعها تلبسه، بس أتمنى أشوفه على نيكي ميناج. الفستان اللي بعده من إيميليا ويكستيد، ما أعرف ليه أحس بوبي دوليفان راح تلبسه. 

أعرف ثلاثة فساتين أوف شولدير!! الأوف شولدير مو جديد على الموضة، بس واضح أنه الحين مزاجي مرة. الفستان الثاني من اليمين تحت، من هولي فولتن عاجبني مرة، ودي أشوفه على لوبيتا، أحسه بيكون حلو مرة عليها. أما الفستان الأخير،  تحت، الأسود و الفضي من توب شوب يونيك، أحسه بيكون حلو على إيما واتسون أو كلوي مورتيز أو كايت مارا. الفستان الأبيض اللي فوق (أوف شولدير) من أوسمان، ودي أشوفه على أليكسا شونق، أما اللي تحته اللي من بيتير بلوتو (عاجبتني ألوانه مرة) ودي أشوفه على تيلير شلينق (من أورانج إز ذا نيو بلاك). 

أنتم وش رأيكم؟ 

Sweater for MET Gala

هو فيه شيئين، يا أنا صايره نفسي خايسة على الأشياء، أو إن الأشياء صدق صايرة خايسة ... للميت قالا ما كانت الملابس خايسة، بس أقل من توقعاتي بعد.
للي ما يعرف الميت قالا هو معرض يسوونه كل سنة بعنوان معين بالفاشن طبعا، بمتحف الميتروبوليتان بنيويورك، و افتتاح هذا المعرض يكون فيه حفل يجيه سلبرتي من ممثلات موديلز و مصممين و محررين بمجلات الأزياء.
السنة هذي المعرض بعنوان "ماكوين الجمال المتوحش"، تكريم لألكساندير ماكوين.

من تابعت الميت قالا من أربع سنوات تقريبا، ما شفت عدد حضور قد كذا لا من سلبرتيز و لا من موديلز ... و على كثر الحضور، ما أحس إني انبسطت على أحد، يعني شيء يوسع لي صدري. كثير ملابسهم حلوة، بس اللي تعودته من الميت قالا أنه الناس تلبس ملابس أكثر تطرف، يعني ما تنلبس لأي مكان ثاني.
الصورة اللي فوق فيها وحدة من عارضاتي المفضلات بالوقت هذا هي أريزونا ميوز (يمين)، مع أنه عجبني مايك آب و شعر أريزونا إلا أنه اللبس ما عجبني كثير خصوصا زي ما قلت لكم من قبل أنه للقالا أنتظر شيد أكثر هبال. المرأة اللي على اليسار أثارت انتبهاي بهذي الصورة. أنا صراحة ما أعرفها من قبل، بس رحت أدور عليها و لقيت إنها المديرة التنفيذية لشركة جي كرو ...
اللي عجبني بهذي المرأة، أو جينا ليون إنها لابسة سويتير لسهرة ؟!!! و الحلو بعد إنها ما خلت الموضوع بايخ خصوصا مع المايك آب و المجوهرات و الإكسسوار، و أهم شيء التنورة الريش.
وش رايكم بالحركة؟ سويتير لسهرة؟ إن كنتوا التابعون الميت قالا مين أعجبكم؟ وش رأيكم

ناس ثانين كانوا جايين و أعجبوني بدرجات مختلفة. أدخلوا و شوفوا تراني معلقة :) 

What about giving her a dress?!!

ميشيل أوباما كتبت عنها أول ما فاز زوجها بالإنتخابات، هذي المرة باكتب عنها علشان شي ثاني ... قبل تقريبا يومين، كان فيه عشاء بالبيت الأبيض جاية الرئيس الصيني، و طبعا كانت فيه ميشيل.

المهم ميشيل زي ما تشوفون بالصورة لابسة فستان أحمر للعشاء ... شكلها طالع فيه مرة حلو . الفستان من إليكساندير ماكوين مجموعة الريزورت لعام 2011.  إلى الآن كل الأمو تمام، بس أمس طلع لنا أوسكار دي لارينتا (المصمم أمريكي) أصله كوستاريكي شاره عليها ... هي مو أول مرة يشره عليها، على نفس الموضوع إنها لبست فستان لمصمم مو أمريكي، بالمرة الي فاتت كانوا طالعين بجولة رسمية بأوروبا، و لبست ميشيل لأكثر من مصمم أوروبي زي إيترو، موسكينو و عليا.

هذا الكلام كان قبل سنتين، و بذاك الوقت أوسكار دي لا رينتا قال عن أوباما أنه حتى لو كانت رايحة لأوروبا كان لازم تلبس لمصممين أمريكان، علشان تسوق لهم برا ...

المهم أمس عاد الأسطوانة نفسها بعد ما لبست لماكوين بالعشاء، طبعا تعرفون أنه ماكوين بريطاني فشكله غار أوسكار.

طبعا أنا أقترح على أوسكار بدل ما يشيل بخاطره عليها، أنه يعطيها من فساتينه، لأنه ما أتوقع إن الفساتين هذي على حساب الحكومة الأمريكية، و إلا كان صارت علوم، يعني هم مو زينا، الواحد لا مسك فلوس الناس صار حلاله يسرق له و لعياله و لزوجته، و عيال أخت زوجته، و يالله و العداد يمشي :)

طبعا جا ببالي إني أسهل على أوسكار وش يعطي ميشيل أوباما، طبعا الخيارات الي فوق هي المفروض تكون بدل الماكوين ... فاخترت لها هذي الفساتين الطويلة، و إلا أوسكار عنده ملابس كثيرة تلبق لميشيل.

من اليسار الفستان من مجموعة الخريف لـ 2011، الفستان أكيد يصلح للطوال، و ميشيل ما يحتاج تقدرون تشوفونها بالصورة اللي فوق، الفستان عجبني كثير، أنه مطبع، غير كذا نافش عند منطقة الحوض يعني يعطي ميشيل جسم خصوصا أنه جسمها مستطيل.

الفستان الثاني عجبني لونه مره، أختي ما تحب أنه ميشيل تلبس ستاربليس، أعتقد الفستان لو أختارته لازم ما يكون ضيق عند منطقة الصدر، لأنه يكبر كتوفها (و هي كبيرة خلقة)، و بعدين تطلع سفطات ورا عند عظمة الكتف.

الفستان الأخير من مجموعة الربيع، حبيته، لونه مره يصلح لها، خصوصا إنها لبست فستان يشبه لونه من جايسون وو لبسته بالقسم. الحلو بالفستان أنه له كتوف، و ممكن يغطي على كتوفها، و بالنهاية هو شكله يدخل ضمن أشكال الماكوين اللي لبسته.