الأحد، 9 يناير، 2011

Sales Time

فيه ناس يتحرون هذا الوقت من السنة علشان يضففون ملابس بوعي و من دون وعي. أنا عندي مشكلة مع بعض الناس وقت التخفيضات، أحسهم ماجانين ما يدرون ويش يشترون وش يتركون، ما يهم إن كانت الملابس حلوة أو لا بس أهم شي أنه عليها خصم 50 ٪. حتى أعرف ناس لو شافوا مثلا جينز بـ 200 من دون تخفيض، ما يشترونه بحجة أنه غالي، بعدين يشوفون جينز ثاني أخو الأول بس بالتخفيضات، و سعره بعد التخفيض 200 ريال يشترونه ؟!!!

اليوم كنت بالرياض غاليري، ومريت بعض المحلات و أخترت لكم أحسن ما شفت من التخفيضات.


الفستان هذا من ميس سيلفرج، ليلى ببوست عن اللون البرتقالي، قالت إنها تحب اللون الخربزي أكثر، مو بس ليلى كثير يدورن بهذي المدونة هن اللون الخربزي أو المشمشي ... عجبني الفستان، ناعم سهل ينلبس معاه أي شي، تحت فوق، ألوان كثيرة نقشات كثيرة، بس لو أنا لبسته ممكن ألبسه مع جاكيت ميتروسايكل جلد.


هذا الجاليه الترتر من زارا عجبني بعد مره، فيه بحث جاني كذا بالضبط "اشياء فخمة تناسب التنورة السوداء ". بالنسبة لي هذا شي فخم يناسب التنورة السوداء ... التنورة اللي ببالي ممكن تلبس مع هذا الجاليه أهم شي تكون ماكسي (طويلة)، ما يهم وسيعة أو ضيقة، لأنهم باعتقادي كلهم ممكن يكونن حلوات ... وش راح ألبس تحت الجالية؟!!! ببالي تي أبيض مطبوع عليه شي معين على حسب ذوقك.


عند ديساجول أشياء غريبة، صح ممكن ما تعجب أي أحد، بس صدقوني فيه عندهم قطع تستاهل إنك تشتريها مثل هذا الفستان ... تقريبا من أكثر من شهرين و يجيني على المدونة بحث ملابس شتوية حلوة. إذا بتسألوني هذا الفستان ممكن أقول عنه كذا؟ إيه هذا فستان شتوي حلو، و أهم شي أنه مو حق موضة، أو موسم واحد أقدر أقولكم بثقة أنه لو بتلبسينه بعد عشرة سنوات بيظل حلو.


أكثر شي أعرفه من البنات إنهم يروحون لبيرشيكا يدورون فيه بنطلونات، للحق ما قد شريت من عندهم، و لا قد انتبهت كان عندهم بناطيل حلوة أو لا ... بس اليوم طاحت عيني على هذا الفستان عجبني مره، خصوصا فيه كريستالات على الرموش ... أحس أنه مع ليقنق أسود، و برا باندو بأي لون تحبون.