Zodring

الفترة هذي أحس العالم كله طايح بالخواتم طيحة مو شينة، بس قوية، و أنا وحده منهم، الخواتم حلوه، و لبسها مريح و ما أعرف ليه بس أحسها أكثر شي تعبر عن الشخص .. المهم الفترة هذي أشوف خواتم على الناس مره حلوه، لدرجة ودي أسرقها ...

قبل ما أحط لكم باقي التدوينة هذا مقطع من فيلم My Girl

(source)

الشي الي فكرت فيه إني أختار خاتم على حسب البرج، يعني يشبه هذا الخاتم حق المزاج حق البنت الي فوق... يعني أنا مو مره أي شي ينقال بالبرج أصدقه، بس قلت يالله خليني أقرى الأبراج و أشوف على حساب صفات البرج أختار خاتم أظن أنه يناسب للبرج ... إن كان الخاتم يناسب برجك أكتبوا لي، أو حتى إذا أنت من برج معين و حسيتي فيها ثاني هو أقرب لقلبك (قصدي بهذا الكلام كل الناس الي تقرأ إلا خواتي لأنهم غشاشات بس يبغون يخربون علي شغلي P:)

الدلو

الحوت

الحمل

الثور

الجوزاء

السرطان

الأسد

العذراء

الميزان

العقرب

القوس

الجدي

Cheap Winter

أرجع لكم ثانية بموضوع ملابس من الهاي فاشن، و أشياء تشبه لها من الهاي ستريت. أحب هذا الشي كثير، لأنه فيه ذكاء، الذكاء يكون لما تلبس ملابس رخيصة و يطلع شكلك حلو ... يعني هو تعزية، مو بس تعزية إثبات أنه مو كل لبس غالي يحلي، و لا كل لبس رخيص يشين ... و شوفوا الدليل كيم كرداشيان بفيرسيز (إلى الآن محترقة:).

اليوم باجيب لكم ثلاثة أشياء أعجبتني بقوة بفترات مختلفة، و كلها من الأشياء الرائجة بقوة هذا الشتاء ... و النسخ الرخيصة منها ...

رقم واحد عندنا هو الفستان الزيتي هذا، قلت لكم قبل إني حابة الزيتي. اللون هذا حبيته يمكن بسبب المجموعة هذي من بوربري بريزيوم بالذات (مجموعة خريف 2011) ... البالطوات و الجاكيتات الجيشية مع الفساتين الزيتية الدانتيل برمت لي راسي ... حبيتها قوة حبيت اللون، و أظنه لون مطواع، راح يمشي مع أشياء كثيرة زي الذهبي، الفضي و حتى الأنيمال برينت.

ما أعرف تتذكرون هذا الشي أو لا .. فترة كنت راح أموت و أحصل آذان الأرنب هذي، حتى كان عندي استعداد اشتري الأصلية هذي الي من لوي فيتون لو لقيتها، من رحمة ربي ما لقيتها، علشان ما أتهور و أشتري إكسسوار شعر بشي أكيد أنه فوق 100 دولار. و لو تتذكرون قلت لكم إن أختي سوت لي وحده دانتيل و أنا مبسوطه فيها مره، و لبستها بحفلة و كنت باطير من الفرح. كالعادة لما ألقى الشي أو يطيح من راسي ألقى مليون نسخة منه، و هذي وحده من النسخ الي عجبتني قوه، و لو ما عندي كان شريتها.


إن كنتوا بعد تتذكرون قائمتي لأحسن الأشياء من نيويورك الي سويتها بعد أسبوع الموضة، تكلمت عن البوت المسترد هذا من إليكساندير وانق، و بعد قلت لكم قبل إني أحب اللون الماسترد ... مع الجو الي عندنا، قصدي الحر أكثر أيام السنة، ما يصير لنا نلبس بوت إلا بالشتاء، و هذا الشتاء أكثر من أي شتاء قبل، البوت عنصر أساسي بالموضة فيه تلقاه بكل شكل بكل طول.

زي دايم أي شي تبغونه من هذي بس أكتبوا رد أطلبوه مني (ترى كتابة الرد سهلة، اضغطوا تعليق و أختاروا يا زائر أو إن كان عندكم حساب على قوقل و بس و صلى الله و بارك) المره هذي الي يرد و مهتم قوة بالشراء أونلاين و خصوصا من asos يكتب لي بالرد وراح أرسله كود تخفيض %20 صالح إلى ديسمبر).

شي أخير، لأنه التخفيض من asos و لقيت أكثر من مره بحث عن الشنطة الي على شكل مجلة، الشنطة موجودة عند أسوس ب 250 ريال، و فيه أشكال كثيرة منها، بس أدخلوا على Bags و راح تلقونها و هذا رابط وحده

No don't even think to touch Versus ever again

دايم أقول للي متابعيني من زمان تعرفون أنه كنت أسب كثير، بجد أحن أسب بعض الناس، بس بيني و بين نفسي قررت أنه ما أكتب إلا عن الأشياء الي ممكن تفيد. يعني من الآخر مين راح يستفيد من السب ...

لكن للأسف إن كيم كرداشيان سوت شي ما ينسكت عنه و هو إنها لبست فستان من فيرسيز، أكره إني أكون سخيفة بس come on كيم نعرف أنه حتى لو أنت الي جايبته من وين جبيته يعني ما شاء الله ما عرفت أحد غيرك يسوي نود بعد ما عدا الثلاثين ؟!!! تسوين نود كيفك أنت حره، بس تلبسين فيرسيز لا ... هذا مو لبسك، يعني إلبسي ماركيزا ... ماكس أزريا عادي أسكت، بس فيرسيز لا ...

طبعا تبغون مبرراتي إني أقولها لا ما تلبس فيرسيز أولا جسمها، يعني أنا عمري و لا أحب أقول أنه الحل لكل شي العصاله، بس يعني الواحد يحترم نفسه من صغر جسمك يوم تلبسين فستان زي كذا يعني لا إله إلا الله من كل جهه متنفخة ... الشي الثاني لون التان حقها مقرف ... شعرها يحوم الكبد، وجهها الي متروس صبغ!!! ... و أهم شي شوفوا كيف مرخصة اللبس مع هالإكسسوار البايخ الي زي وجهها ... علشان تعرفون إني ما ظلمتها شوفوا الفستان على الموديل و أحكموا. كلمة أخيرة التايت غلط ...

Red like Valentino

ناس يسألوني من وين تجيبين أفكار للملابس الي تتكلمين عنها، أو حتى الي تلبسينها ... أفكار اللبس تجي من كل مكان، من صور ... لبس ناس، مجلات، أفلام ... من أي مكان.

اليوم جاني إيميل من THEOUTNET عن أنهم عارضين ملابس لفالنتينو تاصل التخفيضات عليها %80 فتحت الرابط، و شفت أشياء مختلفة كثيرة، بس شي واحد كان ببالي هو إني اشوف لي فستان أحمر ... ما أعرف مريتوا بهذي المرحلة أو لا بس فترة كنت أموت و أحصل فستان أحمر من فالنتينو. صراحة كنت أحس أنه مافيه أحمر أحسن من أحمر فالنتينو ... أظن إلى الآن لو فكرت بفستان أحمر أكيد بيكون شي من فالنتينو.

لما أخترت الفستان أول شي طرا ببالي هو اللوك الي فوق لريتشيل بيلسون، أعرف إني ما تكلمت عن هذا اللوك، بس لو باختار أحسن فساتين السنة، أكيد هذا الفستان من روبيرتو كافالي بيدخل القائمة ... علاقة هذا الفستان باللوك الي أخترته هو اللوم الأحمر مع طبعات الحيوانات ... أنفتت بالكلوتش الحمراء الي شايلتها ريتشيل مع الفستان ... فلما جيت أختار شنطة قررت إني أطلع شي بأنيمال برينت ... و جت هذي الشنطة الفظيعة من كريستيان لوبتين ... لما آصل للمجوهرات دايم أرتبك، لأني ما أحب الوحده تمشي كأنها بمعرض مجوهرات، لدرجة ننسى كيف وجهها أو لبسها ... بعد أكثر من نظرة قررت إني أختار حلقات بدل عقد، عندي اعتقاد أنه لبس حلقات و عقد من نفس الطقم يخرب على الفستان، و يخرب على العقد و الحلقات، طبعا ما فيه ببالي غير حلق طويل و جا هذا الحلق من أوسكار دي لا رينتا، الي بالبداية ما لقيت منه إلا أزرق بس كنت مصره ألقى لون ثاني و لقيت هذا الذهبي ...

آخر شي الجزم، كرهت أنه يكون مره تقليدي، يعني الفستان الأحمر خيار تقليدي، و موديله بعد ... فقلت أختار له بوت بدل كعب عادي، بس كنت أبغى شي ما يكون ملفت لدرجة أنه يشتت فدورت شي نود و أخترت هذي الكعبات من جوسيبي زانوتي.

زي دايم إذا بغيتوا رابط زي شي ردوا عشان أحطه.

Inspiration

قلت لكم عن بوتيكز من قوقل ... لسا بوتيكي ما كبر (تراي حطيت رابط على جنب) بس بأحاول أحط فيه كل شي أقترحه ...فكرة بوتيكز هو أنه بدل ما تدورون بموقع كامل تدورن أشياء على حسب تصانيف معينة مثلا مصممين، سلبرتيز، ستايل معين أو حتى بحسب أشخاص ... قوقل للأفتتاح جابت سلبرتيز للحفل من الي جو كيري موليقان، بنات أولسين، إيما روبيرتز و نسيت الباقين لأنه المهم اليوم آشلي أولسين.

بنات أولسين بشكل عام عندهم سويترات حلوه مره (ودي أسرقها) بس ما فيه شي زي هذا السويتر الخربزي أو المشمشي (الخربزي اسم قديم لهذا اللون أتذكر لما كنت صغيره عرفته من أمي الي كانت خايطه لها تيور "خربزي" بنقاط سوداء). السويتر الي لابسته آشلي من بلانساقا مجموعة الخريف ما أعرف وش أقول فيها بس لونها و شكلها يجنن، و الخيوط الصفراء أبدا ما تساعد، يعني تخليني أتمناها أكثر.

علشان هذا السويتر رحت أدور على أشياء مو مترابطه كلها بهذا اللون، لأنه شكلي بانتهي جايبه شي بهذا اللون ... ما أعرف عندكم بس أنا يجيني هوس ألوان غريب يعني أتذكر أنهبلت بالأصفر الماسترد، بعدين الزيتي و الحين جا وقت الخربزي ... الله يعقل علي بس.

الأشياء بالمجمل مو غالية بس مو رخيصة ... طبعا ما يحتاج واضح لكم الأشياء مع أسعارها ... لو ما كان لي خيار إلا شي واحد أظن إني باختار الجاكيت الي من ميس سيلفرج، مع أنه جاكيت يعني ما راح أقدر ألبسه وقت طويل، لكنه أميز قطعة بالنسبة لي، و الشي الثاني  الي عاجبني فيه، ما أعرف بس دايم أحس الخربزي لون صيفي، حلو إني أشوفه على شي شتوي ...

البرا أخترتها لأنه بخاطري من زمان لانجري حلو، ما لقيت أنتم تعرفون مكان؟ هذي عجبتني لقيتها و أنا أدور على لانجري لونه خربزي، ما لقيت، و لقيت هذي الصفراء، قلت نحطها مادامها حلوه، و مادام السويتر حق آشلي فيه خيوط صفراء خفيفة.

زي دايم أي شي يعجبكم، ردوا و قولوا لي أعطيكم رابطه.

My Boutique

قوقل افتحت خدمه لها جديدة لها دخل بالفاشن ... محلات تنباع فيها ماركات من كل مكان، المهم أنا سويت بوتيك لي راح أعرض فيه كل الأشياء الي تعجبني لو بغيتوا تشترون ... ماراح ياصلني شي من فلوسها، بتروح لأصحابها أنا بس أجمع الأشياء و أحطها بهذا البوتيك الي أونلاين ... بأحاول أحط فيه كل سيت سويته، أو كل شي تكلمت عنه الحين لسا ببدايته، فما فيه شي كثير، و أكثر الموجود غالي، بس بأحاول أضيف بعد ... اليوم هو موجود هنا، لكن إن شاء الله راح أحط رابط ثابت على جمب قريب.

My Boutique

The new black

بمقابلة لجيمي فالون مع مارك جايكوبز، جايمي يسأل مارك يقوله وشوا الأسود الجديد؟ What is the new black? فيرد عليه مارك: 48 ... طبعا مارك يستهبل، جوابه ماله معنى .. لأن سؤال جايمي بالأساس ماله معنى :) ... أنا أقولكم الحين الأسود الجديد هو الجلد :)!!! أمزح

الأسبوع الي فات كنت لابسه ليقنيق شكله كأنه جلد، هو مو جلد ... قالت لي بنت البنطلون الجلد الي عليك حلو :) انبسطت و لا علمتها أنه مو جلد، و لا قلت لها أنه حق أختي P: سألتني قالت لي الجلد بيرجع صح ... جاوبتها إيه، هو أساسا كان كثير بعروض الخريف اللي الحين بالسوق، بس أظن أنه بيطول (إجابتي كانت بس إيه، الباقي لكم) البنت كانت متضايقة بزعمها أنه البنطلون الجلد ما يصلح لجسمها. الحلو الحين أنه الجلد مو بس بناطيل ... فيه فساتين و هذا يصلح لكثير أجسام، فيه توب جلد، و فيه الشي الي ما قد راح أبد الجاكيت الجلد.

لما شفت هذا الإيديتوريال من فوغ شاينا، قررت إني أكتب عن الجلد ... أنا من فترة حابة الجلد، وحابة مره فساتين كريستوفر كين مجموعة الخريف (غاليه و ما تناسب أي وقت بالسنة) هذا السبب الي يخليني ما أشتري منها ... بس زي ما قلت لكم مع هذا الإيديتوريال أكتشفت أنه الجلد ممكن يكون حلو مره مع الدانتيل (قماشي المفضل). الدانتيل يعطي الجلد نعومة حلوه مره (أكيد راح أجرب إني أخلطهم مع بعض).

باقي الصور هنا.

أعرف أنه جا العيد، يعني ممكن هذي النصيحة مالها فايدة، بس فيه مناسبات ثانية ... التوب هذا موجود عند H&M أنا صراحة ما شفت منه إلا أسود ... عجبني مره مره مره، و قبل ما أشوف الإيديتوريال حق فوغ شاينا، كنت أشوفه أنسب شي لخلط الأشياء الثانية مع الجلدو يعني الجاكيت ما ينلبس كل وقت، التنورة تضايق كثير من الناس، و مو كل الناس يحبون يلبسون تناننير قصيرة (ما أظن فيه تنورة جلد طويلة و حلوة)، و البنطلون قلنا مشكلته أول. غير موضوع الخلط، التوب أحسه لأنه جلد، بيعطي شكل محدد للجسم، مهما كان فيه عيوب بتخفينها .



إيل يو إس، تعطي فرصة أنك تجمع الملابس الي هم عارضينها بالعدد على بعض، و تسوي اللوك الي تبغاه، أخترت التوب الجلد هذا (مو حق H&M) هذا من كالفن كلاين، بس لأنه أسود يشبه الي قلت لكم إني شفته ب H&M، و سويت منه لوكين واحد بتنورة، وحد بنطلون علشان تشوفون كيف يطلع حلو (آفتحوا الصورة بإطار ثاني علشان تشوفونها أكبر).

AMAZING

أعرف إني كثرت عليكم من كيرستن دونست، بس أكيد أنكم توافقوني التكثير منها مو شين، و لا مضر بالصحة ... أمس أو قبل أمس كان فيه حفلة للفن الحديث بمتحف لوس أنجليس، و كان جايين له ناس كثار ... كنت أقدر أكتب عن الجايين بشكل عام، بس لما شفت كيرستن قلبي ماطوعني إني أحطها مع الثانين :)

تأخرت يوم كامل عن إني أحط البوست هذا كنت مصرة إني ألقى من وين هو، ما فيه ماركه ما شكيت فيها إلا نبشتها من الأول للأخير، و لا لقيت شي حتى يشبه له، طلعت الأخبار و قالوا أنه من شانيل ... من زمااااااان ما خلاني فستان من شانيل أقول وااااااو، بس هذا خلاني ... الفستان من مجموعة الريسورت (منتجعات) الأخيرة ما لقيت شي يشبه له بالعرض إلا هذا (أدري وش دخله، بس هو الوحيد الي ياقته تشبه ياقتها، و القماش شكله نفس النوعية)، فما أعرف هذي نسخة مسويه خصيصا لكيرستين و إلا بتصير بالمحلات موجوده؟!! لو كانت لها لحالها تستاهل، و لو كانت بتنزل بالبوتيكات أعتقد إنها تحفة، لو تقدر على فستان شانيل، هذا ما يتفوت.

طبعا ما فيه شي باللوك مو حلو ... الشعر نظيف، من فترة طفشت من اللوكOld Hollywood glamour بس كيرستن أظن إنها ساحرتني، شعرها حلو، مو لاصق مره زي شغل كثير من الي يسوون ريترو (إليسا مثال) الفرقة حلوه، طول الشعر حلو ... المايك آب حلو صارخ بس مو ثقيل ... الحلقات آه بس وش أسوي فيها؟ فيه أحد أحلى من كذا؟!!

قلت لكم قبل ناس كثير لبسوا لبس حلو ... هذي صورهم هنا رفعتها لكم، الغريب أنهم كلهم معاهم كلتش سوداء

Tiny Shiny Thing

بعض المرات شي صغير مره، ممكن يغير شكلك كله. غره ... حواجب، حلق إلخ

كالعادة كل ما طفشت رحت أقلب بمواقع الملابس، أنعم بصري بإبداعات العقل البشريP: ...

كنت أشوف net-a-porter.com ما أعرف ليه؟ يعني أنا فاقدة الأمل إني ألقي فيه شي حلو ورخيص ... بس لقيت هذا الحزام من جي كرو ب 88 ريال، مو مره رخيص، بس مراح أتحسف عليه، أولا لأنه حلو ... الشي الثاني يصلح مع أشياء كثيرة (مع فستان، كارديقان، جاكيت، سويتر ....) أهم شي أنه من نوعية الأشياء الي لو لبستها كثير ما راح ينتبه أحد أنك (حللتها).

بالعادة أنا ما أحب الأحزمة كثير، لكن حزام عن حزام يفرق، هذا الحزام أحسه يقرب لفئة المجوهرات أكثر من الإكسسوارات. أكثر شي ما أحبه بالأحزمة هو لبسها بداعي أو من دون داعي، زيها زي أي إكسسوار ثاني، إذا لبسته من دون سبب يكون بايخ.

لما كنت أكتب هذا الشي، كنت أفكر كيف أوريكم أنه الحزام ممكن يطلع حلو على أشكال كثيرة من الفساتين (أهم شي لا يكون الفستان معقد من أصله). كنت راح أقص و ألصق على فساتين، بس تذكرت عرض فالنتينو الأخير لربيع 2011، صح العرض ما عجبني قوه، بس تذكرت أنه كان فيه أحزمة صغيرة كانت لطيفة مره، جبت لكم صورها، علشان تشوفون كيف شكلها مع الأحزمة.

فيه لون ثاني من الحزام بس ما أعجبني كثير.

Sport Night

فيه أشياء ما تهب فيها على طول، لكن تلصق ببالك فترة طويلة، و فيه أشياء ثانية على إنك خلاص تركتيها كل بين فترة و فترة تجيك من جيدي ... من حول السنة تقريبا و أنا أسترجع هذي الصورة من عرض ديسكويرد، و على إني من زمان موقفة كورة، و ما عدت أهتم بالرياضة بشكل عام ... إلا إني أحس مرات إني أحن لها.

الشي الي بهذي الصوره حابته، هو الكاب علي لبس سهرة، و العقد الكبير. ما أتخيل نفسي مسوية هذا الشي بزواج، بس يمكن، يمكن بحفلة ... ما أعرف ليه في أشياء لما تشوفها رانواي تكون حلوه، بس مجرد تحاول تسويها بالواقع تحس إنها بايخة ... المهم أنا ما رحت أسويها بالواقع، رحت لبوليفور (بوليفور مو ماركه، بوليفور موقع تصمم عليه تصاميم تعجبك، و فيه جوا الموقع صور لملابس و أغراض ثانية).

Sport Night by alorwa featuring alexander mcqueen shoeAlexander Wang Asymmetric satin-jersey knit dress, $895

Isabel Marant Jeams baseball-style jacket, $1,005
Alexander McQueen 227122WA2B3 (Red/White) - Women's Couture Shoes, $1,155
Elie Tahari Vivian Crystal Bib Necklace, $348

حتى بهذي عجزت أحط كاب P:، يمكن علشاني ما لقيت شي حلو، أو يمكن لأني أفكر باللبس هذا على إنه بينلبس :) المهم نجي لتفاصيل اللبس ... أول شي أبغى أقول لكم إني ما أحب البايسبول و لا أعرف شي عنها، يمكن أعرف عن الكروكيت أكثر من ما أعرف عنها :) بس أخترت البايسبول ثيم لهذا اللبس الي أحاول أدخل فيه شي رياضي من لبس سهرات علشان الجاكيت ... بدل عن الكب، فكرت بجاكيت بايسبول،، مادام أختي ودها بشي زي كذا، أخترت هذا الجاكيت من إيزابيل ماغو، كنت أفكر بشي أكثر قرب لجاكيت البايسبول الصدقي بس ما لقيت شي حلو ... الفستان هو أول شي أخترته من أليكساندير وانق، المجموعة هذي قاعدة تتخمر براسي، ودي أجيب منها فستان، طبعا كنت أظن إن صديقتي بتتزوج قريب، و يستاهل الموضوع إني أشتري فستان، بس ما أظن ... ما علينا، الشي الثاني الي خلاني أختاره هو أنه راح يناسب مع عقد كبير ...

للجزم ببالي من قبل ما أفتش أنكل بوت، ما أعرف وش بالضبط كان ببالي، بس شفت هذي الماكوين، و أظن إنها ضابطة مره، فيها حس رياضي شوي، و مع اللون الأحمر و الثنيات أحس كأنها بدلة رياضية (لا تسألون كيف).

آخر شي رسيت عليه هو العقد، العقد من بديت و ببالي عقد كبير، بس ما لقيت الشي المناسب على طول، لما اخترت كل شي، و جعت أدور على عقد، طلع لي هذا، يناسب مع الفستان، و يناسب مع الجاكيت، و أهم شي أنه ألوانه من صارخة (كنت ناوية أحمر) بس بيطلع بايخ مع الجزم الحمراء

Luella, and other stuff

Reemito قالت لي أكتب عن London Look، أتمنى إني فهمتها صح ... لأني ما أعرف إلا لندن لوك (ملابس الناس هناك) و فيه معرض عن هذا الشي ... و صح إعلان روميل لندن :)

المهم إني باكتب على أنه ملابس الناس هناك، و قولي لي إن كان صح أو خطأ :)

أولا مو شي جديد إني أحب كثير مصممين إنجليز، و أكيد أنه المصممين هذولا ما جوا من الفضاء، هم جايين من الشارع الي هم فيه، و من شكل التصاميم الي يطلعون فيها، تقدرون تعرفون كيف الناس تلهم المصممين ... الي يميز لندن عن أي مكان ثاني (يمكن إلا نيويورك) إنه فيها ناس من كل العالم، فراح تلقى أشكال و ألوان عجيبة ... و أهم شي الناس هناك ما تخاف تلبس أي شي. أتذكر كنت أناظر برنامج يعرض على BBC الحين وقف بس للي بيدور عليه بالنت أسمه The Clothes Show ... من الفقرات يدورن بالشارع و يسألون الناس وش لابسين ... و من جد المذيع يوقف ناس تلبس لبس مره حلو، مو منسوخ، يعني كل واحد له شكله.

غير المصممين، بلندن أعتقد أكثر محلات الفنتاج فتلقى الناس مو بس ملزومة بملابس الموسم هذا، ناس لابسه خمسينات، و ناس لابسه ثمانينات و ... و ... و ... شي ثاني، إذا كانت لندن فيها أفخم الماركات بالعالم، فلندن بعد هي الي طلعت لنا الهاي ستريت من بدري زي ماركات توب شوب، ريفير آيلند و دبنهامز و ... و ... و ، باختصار ما أقدر أعدد مآثر لندن علي الموضة.

قبل سنة تقريبا، سويت هذا السيت، ما أعرف قد حطيته قبل أو لا ... أنا شاكة إني حطيته، بس لما سويت عليه سيرش داخل المدونة ما طلع معاي شي ...

LONDON Gorgeous LONDON by alorwa featuring a leather handba

من شكل السيت تقدرون تخمنون أنه سويته قبل سنة .. يعني الألوان الفاقعة ... و نظارات القيك ، مع إنها لسا موجودة و شفنها بعرض ديسكويرد، بس أنا صرت أقل حماس لها، حسيت كثير ناس بيخوها ... أخترت القبعة هذي حسيتها تشبه كثير لبس الشرطة هناك

أعرف الكلام كثير بس Reemito، حمستني إني أكتب عن ماركة كنت أحس إنها هي تمثل كل شي بلندن وهي Luella، الماركة هذي من سوء حظي إنه صار لها زي الي صار لكغستيان لاكوا، مع الأزمة المالية، أفلسوا ... ما أعرفت عن هذا لاشي إلا أمس، كنت أنتظر عرضهم ما طلع، و لا دورت أكثر، أمس أشتهيت أشوف ملابس لهم، فدروت ليه ما سووا عرض لا خريف، و لا ربيع 2011 و لقيت أنهم أفلسوا ...

زي ما قلت لكم أنه الماركة خلاص وقفت، ما أعرف إن كان فيه خطط لمصممتها إنها تسوي ماركة ثانية أو لا زي لاكوا ... بس رجعت أقلب بملابسها و تذكرت أول مجموعة خلاني أنتبه لها (الموف الي على اليمين) حبيتها قوه، عجبني الكركبة و عجبني الفنكينيس (كرهت هذ الكلمة من السعوديين) بس وش أسوي بجد هذا الي حسيته لما شفت العرض، الألوان على القصات مره حلوه ...

لو كنت باسوي سيت جديد للندن و لوك لندن خصوصا هذا الوقت من السنة، مع البرد و الأعياد، أظن إن اللبس الي بالوسط هو الشي الي ممكن يآصف اللبس بلندن، ألوان الخريف، بنفس الوقت شيفون كثير، و قطع لامعه (ميتلايك) و إكسسوار غريب (زي القبعة)، الشي الوحيد الي ممكن أضيفه له بهذا الوقت من السنة، هو بالطوا طويل.

Lace Night

من قصت إيما واتسون شعرها، و أنا أنتظر أشوفها بحفلة، أو شي تلبس فيه لبس حلو علشان أقرر إن كان شعرها أحلى طويل أو قصير ... جا هاري بوتر الجزء السابع، و كويس أخيرا شفتها بشكل حلو.

هذا ثاني لوك تطلع فيه إيما واتسون بعد القصه و يعجبني، الأول كان بداية الأسبوع بفستان من فونيه أسود بعد ... المره هذي ببريمر هاري بوتر بلندن لبست لبس من رافاييل لوبيز ... الفستان كأنه من ماركيزا، مع الريش و الدانتيل، بالعادة هذا الشكل من الفساتين ما يعجبني مره، بس إيما قدرت تخليه مره حلو، الباكسي و المايك آب و الجزم كلها ماشية مع اللبس، و حتى الوردة الحمراء هذي (تراها مو زينة البريطانيين يلبسونها كل سنة بنوفمبر بذكرى الحرب العالمية) بس أنه طلعت اللبس حلو.

البنت الثانية الي كانت جاية البريمير و لابسه دانتيل بعد هي كلامنس بوسي ... ما أتذكر إني قد تكلمت عنها قبل، بس إنها من زمان عاجبتني ... شفت لها قبل سنتين فيلم، و من ذاك الوقت و أنا أتابعها، غير إنها حلوه، ذوقها حلو، و لبسها مرات كثيرة يعجبني ... أمس لابسه زي ما قلت لكم دانتيل زي إيما واتسون من مجموعة شانيل أوت كتو الأخيرة ... الفستان ما عجبني مره، خصوصا من فوق، بس طوله، و الجزم، و التسريحة الي مسويتهم كلامنس خلته مره حلو ...

فيه وحده ثالثة كانت لابسه دانتيل بعد، و هي جي كي رولنق (الي كاتبة رواية هاري بوتر)، الشي هذا يوضح أنه الدانتيل مو بس موضته مره ماشية بفساتين السهرة هذي السنة، لا و تصلح لكل الأعمار.

What's next?!!

تعرفون إني أحب إيرديم مره، و أقدر كثير اللي يلبسون منه ... ما أعرف ليه بس أحسهم فاهمين.

بشهر الموضة الي خلص إيرديم كان واحد من العروض الي تقريبا حبيت كل قطعه فيها، و العرض زاد تولعي بالماركة (لولا أسعارها الي أشوفها شوي مو منطقية، كان من زمان جبت لي شي منهم.

أمس كانت أول حلقة لبرنامج كونان أوبرايان الجديد (للناس الي مهتمه بالشوز = shows) المهم و كانت لابسه من إيرديم مجموعة الخريف (الصوره الي على اليمين) أظن ليا الوحيدة الي ما لبست من مجموعة الربيع. نرجع للفستان، الفستان ما شفته بالعرض بس قماشه نفس القماش الي كان بالعرض، الفرق أنه هذا شيفون ... ما أعرف إن كان هذا مصمم خصيصا لها، أو أنه موجود بالمحلات ؟! شعرها أعجبني و المايك اب بعد ... و أهم شي طول الفستان لابق عليها.

الإيرديم هذا مو أول فستان من إيرديم تلبسه ليا، لبست قبل أشهر الأزرق الي على اليسار، من مجموعة الريسورت الأخيرة، و مو موجود بالعرض بعد، بالأول ما حبيت شكلها فيه، بس أمس و أنا أدور على الصوره، أكتشفت أنه شكلها كان حلو، يمكن المشكلة الوحيدة، الهايلايتز الي بشعرها مو حلوه

قلت لكم أنه عرض إيرديم الأخير أعجبني مره، و نفس الشي قلت أنه ليا لسا ما لبست شي من مجموعة الربيع. و مادام ليا لبست لحد الآن فستانين لإيرديم (أظن إنها أكثر سلبرتي تلبس الإيرديم) فوارد بشكل كبير أنه فيه إيرديم ثالث بالطريق، و لو كنت أنا الي باتنقى لها وش تلبس من الكوليكشين الأخير، أظن الفستان الي فوق (عجزت أشرح لونه) أنسب شي لها، طوله، لونه، فتحت الصدر، و حتى نوعية قماشه أحسه كل بيمشي مره على ليا ... و أهم شي لا تغير فيه، أحسه كذا حلو.

Tux on news channel?!!

من أكثر الأشياء الي يسوون الناس بحث عليها علشان ياصلون لي هي توكسيدو ... يجيني بحث أشكال و ألوان عن التوكسيدو ... من زمان فكرت أكتب عنها، قصدي من خلص شهر الموضة، بس ما أعرف وش أكتب ... المهم أمس الليل، و أنا جالسة أشوف التيلفيزيون شفت هذا الشكل لمذيعة الجزيرة ليلى الشيخلي، فقلت وجبت :)

ليلى بهذا الشكل، حسستني إنها ما تعرف وش الفرق بين قناة إخبارية، و حفلة كوكتيل ... يعني فيه أحد يلبس توكسيدو بقناة، تقدم فيها أخبار، حتى مو برنامج فني مثلا؟!! أو توكسيدو، للجامعة ؟!!! ما أعرف إذا أحد مفكر بهذي الفكرة بس تراها غلط ... التوكسيد زي الفساتين السواريه (سواريه معناه فستان سهرة، مو فستان طويل)، الفرق إن التوكسيد بالأساس كانت للرجال، و صاروا يطلعون نسخ نسائية منها (شكرا لإيف سان لوغان)، أما فساتين السواريه إلى الآن الرجال ما يلبسونها (على الأقل هذا الي أعرفه :) ...

طيب وشو الجاكيت التوكسيدو ... هو جاكيت أسود بالأغلب ... ياقاته تكون ساتان، و بالعادة يكون زر الجاكيت نازل ...

من عروض الربيع للسنة الجاية، شكله جاكيت التوكسيدو لسا جالس لسنة جاية بعد ... طبعا مو عالمة فارقة يعني أنه بيصير بكل مكان، بس يعني ماراح يصير "حركة قديمة" ...

من أكثر القطع التوكسيدو الي أعجبتني هذي السنة هي القطعة الفوقية الي مع الجمب سوت حقت حيدر أكيرمان (وسط)، ما أعرف هي جزء من الجمب سوت، و إلا شي زايد يعني بس ياقة ملبس العارضة تحته ... بكل الأحوال عجبتني ...

جاكيت إيرمس الصوف حلو (اليمين)... يعني فكرة، حلوه، يمكن عيبه أنه صوف، يعني ما ينلبس إلا بجوا بارد، و بيكون منتفخ شوي (صوف) ... ديريس فان نوتين ما عجبني مره، ما حبيت أنه كله ساتان ...

التوكسيدو الي بجد مشتهيته هو حق جان بول قوتييه من عروض الأوت كتو ... هذا الشي خاطري فيه مع فستان أخضر ترتر طويل ماسك، أموت و أسوي كذا ...

Shirt, Belt and Evening skirt

أذا كنتوا إلى الآن متذكرين، قائمتي لأفضل الأشياء بنيويورك قلت أنه بخاطري تنورة رالف لورين الفضية ... و أعجبتني فكرة الشيرت مع تنورة فخمة. الشي الي مبسوطة عليه إني لبست اللوك هذا قبل أي سلبرتي على ما أعتقد، صح تنورتي مو مره فخمه، بس يعني كنت لابسه شيرت، مع تنورة و التقدم الي سويته هو إني لبست حزام مع إني مو ذاك الزود مع الأحزمة.

اليوم و أنا أتصفح مواقع القوسيب بشكل أساسي Jestjared.com شفت أول شي كاميلا بيل بهذا اللوك الي مأخوذ بعد من مجموعة الربيع لرالف لورين، إنبسطت أنها ما لبست تنورتي (يعني إني أنا راح ألبسهاP:) نزلت شوي بعد و لقيت بلايك لابسه شي نفس الفكرة: شيرت، حزام و تنورة فخمة، ما أعرف لبسها من وين، بس حركة الشيرت يطلع من تحت التنورة شفتها أعتقد بعرض لكلوي، و أعجبتني الحركة ... بين الثنتين أظن إني حبيت بلايك، لولا الحزام ما أعجبتني سالفة التعقيد هذي الي طايحين فيها الناس، أحس فيها استعراض بايخ.

كاميلا حسيت أنه فيه شي ناقص، شكلها باهت، و شعرها ما أعجبني، يمكن لو إنها شادته قوه ذيل ناعم يمكن يطلع أحلى، الجزم بعد ما أعجبتني، آخر شي الحزام أعتقد إني الي كان بالعرض أحلى ...

شرايكم أنتم بالحركة؟ ممكن تلبسون كذا؟

تحديث: بلايك لابسه من فيفيان ويستوود خريف 2011 اللوك كامل ما عادا الجزم.

It did clash with her hair

ما أعرف ليه مؤخرا أحس إني انبش تنبيش عن شي أكتبه ... :) ما علينا من كثر ما نبشت ضاقت فيني و قلت راح اتكلم عن لوك طلعت فيه كارين إيلسون للي ما يعرفونها هي عارضة بريطانية، ما أعرف و ين كانت رايحة، بس كارين زي كثير من السلبرتيز ما قدروا ينتظرون لآخر الشتاء علشان يشترون من ملابس الربيع حقت 2011، و علشان يعلموننا أنهم مو زينا P:


كارين كانت لابسه من مجموعة مارك جايكوبز الأخيرة فستان أساسا بالعرض كان لونه بنفسجي، ما أعرف وش قردها و خلاها تلبس الأحمر، بس شكلها ما تشوف 30 Rock، للي يشوفون المسلسل بالموسم الرابع جاك دونقي (أليك بولدوين) كان يتكلم عن جوليان مور و اسمها كان نانسي أنها لبست لانجري أحمر فهو جالس يقول لليز لمون: "بتفكرين أنه بيتصادم مع لون شعرها؟ ... بس لا"،

you would think it would clash with her hair ... but it didn't

أعرف بعضكم بيقول وش هالكلام، بس حسيته بالضبط يصلح لكارين بس بالعكس، يعني عليها الأحمر ما مشى مع لون شعرها الأحمر ... هو الفستان من الأساس مو أحسن شي بالمجموعة بالنسبة لي، بس فكرة أحمر على أحمر ما عجبتني أبدا، أتوقع أنها بتصير أحلى بكثير ببنفسجي، يعني يطلع فيه تباين باللوك ... أما الجزم حسيتها جايبتها من محل لانجري مع الريش الي عليها ... من بين كل الأحمر الي هي مختارته أظن الشنطة هي الشي الوحيد الي كان أختيار صحيح.


هذي هدية لكم جلست عليها من قمت الصباح أحاول أسويها، و يالله طلعت معي بالحجم الصغير هذا. جيف لجاك دوناقي (إليك بولدوين) و جوليان مور (نانسي دونفان) من الحلقة الي قلت لكم عنها قبل ... :) مناسبة الهدية أنه هذا إن شاء الله الويك إيند الأخير قبل الإجازة.

قبل شهر تقريبا و رتني أختي كتاب اسمه P.S. I made this الكتاب فيه أغراض سوتها صاحبة الكتاب.


شفنا الرفيوز، كان الكلام عنها كويس، و قالوا أنه الكتاب غير المدونة، طلبنا الكتاب، عشان كذا ما بغيت أدخل المدونة لحد ما يجي الكتاب و أشوف وش عندها ... وصل الكتاب اليوم و كانت فيه أشياء حلوه كثير ... قررت إني أدخل المدونة و لقيت هذا الشي:


أعجبني الشغل الي مسويته مره، بالنسبة لي يشبه مره الأصل. التوب أساسا من مجموعة بروينزا سكولير مجموعة الربيع 2010، طبعا المجموعة ما عادت بالأسواق على الأقل الطبيعية، لأني قبل شهر رحت لبعض المحلات هنا، و لقيت يبيعون مجموعات قديمة، و من دون ذكر اسماء هي محلات بالدور الثاني بالمملكة P:.

إذا عجبكم شغلها، و تحبون الكرافتز، تقدرون تشترون الكتاب، أو حتى تزورون موقعها هنا: http://psimadethis.com/