السبت، 20 نوفمبر، 2010

Inspiration


قلت لكم عن بوتيكز من قوقل ... لسا بوتيكي ما كبر (تراي حطيت رابط على جنب) بس بأحاول أحط فيه كل شي أقترحه ...فكرة بوتيكز هو أنه بدل ما تدورون بموقع كامل تدورن أشياء على حسب تصانيف معينة مثلا مصممين، سلبرتيز، ستايل معين أو حتى بحسب أشخاص ... قوقل للأفتتاح جابت سلبرتيز للحفل من الي جو كيري موليقان، بنات أولسين، إيما روبيرتز و نسيت الباقين لأنه المهم اليوم آشلي أولسين.


بنات أولسين بشكل عام عندهم سويترات حلوه مره (ودي أسرقها) بس ما فيه شي زي هذا السويتر الخربزي أو المشمشي (الخربزي اسم قديم لهذا اللون أتذكر لما كنت صغيره عرفته من أمي الي كانت خايطه لها تيور "خربزي" بنقاط سوداء). السويتر الي لابسته آشلي من بلانساقا مجموعة الخريف ما أعرف وش أقول فيها بس لونها و شكلها يجنن، و الخيوط الصفراء أبدا ما تساعد، يعني تخليني أتمناها أكثر.
علشان هذا السويتر رحت أدور على أشياء مو مترابطه كلها بهذا اللون، لأنه شكلي بانتهي جايبه شي بهذا اللون ... ما أعرف عندكم بس أنا يجيني هوس ألوان غريب يعني أتذكر أنهبلت بالأصفر الماسترد، بعدين الزيتي و الحين جا وقت الخربزي ... الله يعقل علي بس.

الأشياء بالمجمل مو غالية بس مو رخيصة ... طبعا ما يحتاج واضح لكم الأشياء مع أسعارها ... لو ما كان لي خيار إلا شي واحد أظن إني باختار الجاكيت الي من ميس سيلفرج، مع أنه جاكيت يعني ما راح أقدر ألبسه وقت طويل، لكنه أميز قطعة بالنسبة لي، و الشي الثاني  الي عاجبني فيه، ما أعرف بس دايم أحس الخربزي لون صيفي، حلو إني أشوفه على شي شتوي ...
البرا أخترتها لأنه بخاطري من زمان لانجري حلو، ما لقيت أنتم تعرفون مكان؟ هذي عجبتني لقيتها و أنا أدور على لانجري لونه خربزي، ما لقيت، و لقيت هذي الصفراء، قلت نحطها مادامها حلوه، و مادام السويتر حق آشلي فيه خيوط صفراء خفيفة.
زي دايم أي شي يعجبكم، ردوا و قولوا لي أعطيكم رابطه.