الخميس، 27 سبتمبر 2012

Tartan is Back

قصتي مع اللبس الكروهات حزينة، يعرفها الناس اللي حولي، لأني ذبحتهم بقصتي عن تيور "اسكتلندي" مثل ما كانت أمي تسميه لما نوخذ مني، و لبسته وحدة غيري، و أنا جلست بالبيت لأني ما عندي شيء ألبسه. شفتوا إنها قصة حزينة :). ما أعتقد فيه أحد كبر بالتسعينات ما كان عنده تنورة كروهات لكن هذا ما يعني إني مرتبطة فيها وجدانيا، يمكن الشيء اللي تعلقت فيه فترة هو جاكيت الجينز، لأني بديت أوعى على فكرة الملابس، وش ودي ألبس وش اللي ما أبغى ألبسه، طبعا أمي ما كانت تعطيني فرصة بحجة إني "أخلقن" لكن كان خاطري فيه (ما أعرف حصلته أو لا). 
ما يهم نرجع للكاروهات قلت لكم ما يعني لي كثير غير القصة الأليمة، لكن لما شفت وش سوا دريس فيه، أبغى الحين ألبسه. 

ما أعرف ليه بس دايم أحس أنه ثقيل، يمكن لأن تنورتي كانت ثقيلة، و يمكن لأن أمي كانت تسميها اسكتلندية، و لأني أحب الأشياء الخفيفة، حسيت بشيء مختلف لما شفت كيف دريس فان نوتين خلاها مرة خفيفة أحسها مو بس هي بتطير، إلا اللي يلبسها بيطير بعد.

(كبروا الصورة لو بغيتوا تشوفون أكثر)

بصراحة ما أعرف من وين أبدأ، اللي أعرفه إني احترت وش اختار و وش أخلي. بس اللي كنت متأكدة منه إني لازم أحط اللوك الأول من اليسار، لأني أعرف إني أختي بتحب القميص مرة، ثم تقول لي "ترى عادي تشترينه لي". ما يحتاج أقول إني حبيت حتى كيف حاط اللوك على بعض (بس دريس يعرف يجيب طبعات من كل مكان و يخليها تمشي على بعض)، حبيت بعد العقد اللي لابسته العارضة مع القميص. باللوك اللي بعده أعرف أنه بياخة إني آصف كل شيء، لكن راح آصف فكرة كروهات تصير لبس سهرة الحالة فكرة عبقرية، لكن الطريقة اللي سواها فيه، أنه حط التنورة السوداء الفخمة هذي فوق الفستان الكروهات اللماع تخليني ودي أقلده الحين، باطلع مناسبة من زي مكان ما يحتاج أعلق على كيف خلى الكاروهات "ميتاليك" تأثير الميتاليك كان تقريبا بكل العروض، بس ما أقدر أنتهي و أنا ما تكلمت عن الفستان الأخير، أو الأول من اليمين. ما كنت أتخيل أنه ممكن أستخدم قماش كروهات بطانة لفلورال شفاف و تطلع النتيجة بهذي العظمة. ما أعرف ليه أنا كل موسم أشوف ملابس دريس علشان أصيح عليها؟

شرايكم بالكروهات، تحبونها أو ما ودكم تشوفونها أبدا بملابس الصيف الجاي؟

الأربعاء، 26 سبتمبر 2012

From Russia with Love

من أول الأفلام الفرنسية اللي شفتها فيلم كان اسمه "الدمى الروسية"، ما أعرف من متى و أنا أعرف الدمى الروسية (العرائس الخشبية اللي تدخل ببعض). لكني أعرف إني من عرفتها و أنا أحبها. و ما أعرف حبيت الفيلم علشان أسمه و لا هو كان ظريف :). 
بالتدوينة اللي قبل هذي، تكلمت لكم عن ستريت ستايل خصوصا وقت أسابيع الموضة، قبل أسابيع الموضة ما كنت متحمسة إني أشوف نفس الناس اللي يجون و يستعرضون بأشكالهم، لكن شفت كلتش من شارلوت أولمبيا، و انتظرت أشوف يكمن أناظرها مع وحدة من "Russaian Pack" خصوصا يوليانا سيرقنكو، لكن شكل يوليانا عرفت إني جالسة أنتظر و قررت تعاند، و لا تطلع بكل مكان زي كل مرة. 


Russian Doll


ما عندي فكرة إذا تعرفونها قبل، أو قد مرت عليكم، لكن إذا كان عندك تمبلر، أعتقد أنكم شفتوها على الأقل مرة. أعترف إني أول مرة شفتها انبهرت فيها، لكن مع الوقت حسيت إنها من مجموعة الناس اللي جاية علشان تقول للناس أنا غنية شوفوني. حتى و أنا أتضايق منها (و من كثير من اللي بالفاشن)، ما زلت أعتقد إن ستايلها حلو، حتى لو كان شوي مصطنع. ما علينا لكن لو كنتوا تحبون لوك كلاسيكي أروستقراطي، دوروا على يوليانا Ulyana Sergeenko. يولينا الحين عندها خط أزياء (ما أعرف أنه ينباع برا روسيا). بعد عرضت بأسبوع الأوت كتو الماضي بباريس أول مجموعة أوت كتو لها، لو مهتمين تلقونها هنا.
نرجع للسيت، اللي قلت لكم أهم شيء فيه بالنسبة لي هي شنطة شارلوت أولمبيا ما أعرف وش قصتي مع شناطهم (الكلتش) بس كل وحدة تصرخ بوجهي تقولي أشتريني أنا. من فترة طويلة و أنا عاجبتني هذي التنورة من صوفي كوكوسلاكي أعرف بعض البنات مسخوها بالتنانير الشفافة هذي، لكن بالنسبة لي فيه أشياء مالي شغل بالناس وش قاعدين يسوون بالأشياء، زي الكوب كايك، مالي شغل إذا الناس يعتبرونها موضة و تلقينها بكل مكان، أو بطلوا يعتبرونها، إذا قررت إني باشتري كوب كايك، باشتري بأي نكهة أبغى (بالمناسبة نكهتي المفضلة فستق من كوب من الكايك :). الجزم من نيكولاس كيركوود أحب جزمة أحس أنه أذكى مصمم جزم (آسفة للي يحبون لابوتان أو جيمي تشو) ما عندي مشكلة مع الإثنين بس أحي كيركوود أكثر، و قررت أختار هذي الجزم، لأن اللوك كله سادة، حتى مجوهرات ما اخترت علشان الكريستال الموجود على القميص من ميو ميو و النظارات قررت إني أختار بعد شيء كلاسيكي نظارت "بسة" أو cat eye ما أعرف ليه بس حسيتها تمشي مع باقي اللوك. أعرف أن كل الأشياء الموجودة غالية مرة، السيت هذا مو شرط أنك تشترين الأشياء اللي فيه نفسها، أعتقد فيه كثير من الأفكار اللي فيه موجودة بالهاي ستريت، بس أنا عجازة ما ودي أدور (طبعا إلا الشنطة :). 

شرايكم بستايل يوليانا سيرقينكو؟

الأحد، 23 سبتمبر 2012

Bomber Jacket for Night

من أكثر الأشياء اللي لاحظت إنها موجودة بعروض ربيع 2013 هي جاكيت بمبر (له مليون اسم: بمبر، ليترمان، بايسبول) و لا أعرف إذا فيه فرق بينهم، لأنهم بالنسبة لي واحد :). ما علينا، من فترة و أنا حابتها و كان خاطري باللي سووه فيرساتشي لآتش آن إم، بس ما قدرت أحصله :(. 
ما زال عاجبني، و أعتقد أنه "كول" لكني بنفس الوقت أشوف أنه لبس نهار، يعني مستحيل أتخيله لبس سهرة، إلا إذا شخص مو فارقة معاه بيلبسه أي وقت. 

(اضغطوا على الصورة للتفاصيل)

أمس مع مجموعة العروض، كان فيه عرض بوتشي ... بالعادة ما أحب بوتشي، و لا أكرهه (كثير من لبسه يكون حلو على الريد كاربيت). لكنه بشكل عام مو مزاجي. لكن و أنا أقلب العرض، انتبهت للبمبر اللي مسويها بيتر دونداس. أول واحد أعجبني (و أكثر واحد) هو الفستقي (أحب الفستق، بس مو هذا هو السبب) :) السبب أنه أعجبني كيف حوله من جاكيت لفستان تقريبا. بعد أعجبني الأزرق كأنه جاكيت صيني، بس إلى الآن بمبر :). 

وش رايكم بالبمبر؟ متحمسين تشوفون وش ممكن تسوي محلات الهاي ستريت بهذي الموضة؟

السبت، 22 سبتمبر 2012

Would You Wear ... ?

أخترت هذا العنوان علشانه ما أعجبني اسمها بالإنجليزي، لأني كنت أسميها شيء مختلف. والشيء الثاني لأني أتذكر أول شيء عرفته عن الموضة بالنت كان على موقع مجلة people المهم و كان عندهم استفاء كل فترة له نفس العنوان :). ما علينا ندخل بالموضوع الأساسي أصلا ما أظن فيه أحد منكم قد اهتم بالعناوين أصلا D:.

ما فيه كلام أنه جزء من الموضة الآن هو street style خصوصا وقت أسابيع الموضة، و الأشياء اللي تلبسها أو يلبسها المحررين و العارضين و العارضات، و الناس اللي عندهم فلوس و يترززون بهذي المناسبات. صحيح خف اهتمامي فيهم، لأنه كثير منهم صار ينرفزني بالاستعراض اللي بعض المرات يآصل لمستوى مستفز، و لا حد الله إني أشوفهم و أتنرفز :). المهم، من فترة لاحظت هذا الشيء اللي راح أتكلم عنه (إلى الآن ما تكلمت :) و هو النظارات الشمسية اللي كأنها مرايا، (كنت أسميها العدسات اللي تعكس) (أعرف مشوار). 
بصراحة أنا ما أحب هذي العدسات، ما أعرف ليه تذكرني بالرياضيين، و أحس الرياضيين اللي يلبسونها يحسون أنفسهم كشخة، و الواقع أنه أشكالهم مو حلوة فيها، خصوصا فيه نوع مموج مرة، و نوع ثاني عدساته صغيرة و تجي كأنها لبس فضائي.
لما شفتها تتكرر على أكثر من شخص، كأني بديت أستظرفها شوي (ما يعني إنها عجبتني)، و لا أعتقد إني أفكر بوحدة زيها لكن أعترف إنها مو بمستوى القبح اللي كنت أحسه.

هنا لقيتها عند نيت آي بورتيه icon باسم عدسات المرايا. 

الخميس، 20 سبتمبر 2012

Skincare

طلبت مني خولة إني أقول عن كريمات طبيعية، بصراحة أعتقد إن روتين العناية بالبشرة حقي جدا متواضع بالنسبة لبعض الناس. بشرتي مو أحسن بشرة بالعالم الحمدلله مافيها حبوب، لكن لونها مو واحد. فكرتي الوحيدة بالعناية بالبشرة، لا تخلينها تنشف و لا تتركينها من دون تنظيف. 


طبعا لازم تعرفون إن بشرتي تميل للدهنية، يعني ممكن الأشياء اللي أقولها ما تنفع لك أبدا. الأشياء اللي موجودة بالصورة هي اللي الحين أستخدمها بشكل أساسي. يمكن الشيء اللي أعتقد إنه المفروض كل وحدة تسوية هو رقم (1) هي تستخدم شيء ما أعرف وش يسمونه، لكن اللي عندي اسمه softining lotion أو كريم تنعيم. اللي عندي الآن من إيستي لودير، صراحة ما أتذكر سعره لأني شريته من قبل سنة لكن لما بحثت عنه علشان أكتب لكم عنه لقيت أنه ب 50 دولار (أعرف مو رخيص) لكن مو هو الوحيد بالسوق. كنت قبله استخدم كلنيك (ما تركت كلينيك علشانه سيء، لكن ما لقيته لما بغيت أشتري من جديد، و كنت مستعجلة شوي) المهم فيه بعد عند كلارينز، كلها تتراوح بين 12 و 20 دولار (لسا مو رخيص) لكني للأسف ما أعرف ماركات أرخص تسوي هذا الشيء (اللي هو اللوشين السايل) مرات يسمونه toning lotion. ما أبغى أطول عليكم بموضوع اللوشن هذا، لكن أقولكم ما أعرف مين أحسن، ما فرقت معاي كثير بين أستي (اللي فيه ذهب) و بين كلنيك، بس ريحة أستي لودير عجتني أكثر. طبعا كل اللي تسوينه تحطينه على قطنة (موجودة بكل صيدلية) و تمسحين وجهك فيه قبل لا تنامين أو قبل المكياج، بعد المكياج و بتتفاجأين من حجم القذارة اللي بتطلع من وجك (كل مرة بتتفاجأين) :) الشيء اللي بتحسينه غير النظافة إن بشرتك نشفت. 
رقم (2) بعد من إستي لودير قد تكلمت لكم عنه، ما أظن كل وحدة تحتاجة لكن أنا أحتاج شيء زي كذا، هو كريم المفروض أنه يوحد لون البشرة (بشرتي زي ما قلت لكم فيها مناطق أغمق من مناطق). ما أشوف أنه أبدا فادني، لكن ما رميته لأنه غالي، بس أكيد بأشوف شيء غيره لما أخلص منه. 
بعد كذا رقم (3) استخدم mousrizer لأن زي ما قلت لكم البشرة تنشف بعد اللوشين السايل. و على تعليمات حق توحيد لون البشرة لازم أستخدمه قبل الموسترايز، لأنه يبدو إن الموسترايز يسوي طبقة فما تستفيد البشرة من الأشياء اللي تنحط عليه. الموسترايزر اللي عندي (بعد ما عجبني مرة) يمكن ريحته هي السبب من جيرجينز اسمه natural glow ما أعرف وصل السعودية أو لا، كنت أسمع عنه قبل ما أجي هنا لأمريكا، و اعتقدت أنه بيكون أعظم اختراع بالعالم، لكن لما جربته أشوف أنه جدا عادي، كنت أدور على موسترايز، بنفس الوقت فيه SPF (واقي شمس) علشان ما أكثر حوسة و هذا الشيء الجيد فيه، لكن أنه يعطيك لون زي ما يقولون، أبدا ما أعطاني أي لون. 
قبل كنت أستخدم بعد من استي لودير (سامبل) اسمه DayWear مرة خفيف، ريحته حلوة، و فيه SPF بس غالي (السامبل كان هدية) فقررت أجرب غيره. 
آخر شيء رقم (4) (مو دايم أحطه) لو كان الجو حر، أو كنت أحس المكياج ثقيل على وجهي أبخ على وجهي (عند بعد شوي) من هذا البخاخ اللي فيه موية ورد مخففة بموية. 

باختصار هذا اللي أسويه، من فترة لفترة ممكن أسوي لوجهي قناع كنت أستخدم قناع من soap & glory لما باعوه عندنا لفترة مرة قصيرة أسمه scrub your nose أعرف إن أسمه ما يشجع، بس أنه ينظف من الحبوب السوداء، ما أعرف رجع أو ما رجع بس فيه عند نزيه ماسكات كثيرة، لو بغيتوا تجربون. 

آي شيء أجربه و أعتقد أنه مميز راح أقول لكم إن شاء الله عنه. أتمنى إن اللي كتبته مفيد، ولو تعرفون شيء ممكن يفيدني بدل الأشياء أو مع الأشياء اللي عندي قولوا لي. 

الأربعاء، 19 سبتمبر 2012

Pastel/Neon

مثل ما أنتم شايفين من التدوينة اللي قبل هذي، إن أسبوع لندن للموضة بدأ، تقريبا من ثلاثة أيام أو أكثر قلت لكم إلى الآن مو مستوعبة أكثر العروض، شيء يحسسني الخريف، وشيء يحسسني إني شفته من قبل، وشيء ثالث يحسسني أنه الملابس ما كأنها ملابسهم، كأنها من عروض ماركة ثانية. ما علينا، قبل عرض ميديم كيرشوف يمكن بيوم كان فيه كالعادة مجموعة عروض من بينها كان فيه إيرديم. على أنه كثير عروض كانت رايحة لألوان أقوى أو من دون ألوان (إذا اعتبرنا الأسود و الأبيض مو ألوان) إيرديم كانت مجموعته نيون (فسفورية)، بس شوي باستيل (ما أعرف كيف آصفة) لكنها أعجبتني. 


بداية الأسبوع هذا مريت على سيفورا (زيارة روحية) معناها إني ما ببالي شيء أشتريه، بس أمتع نفسي بالمكياج و مستحضرات التجميل :). المهم كان بالفرع فيه ستاند كامل للمناكير، لفت نظري ألوان الصف الأول منها لما قربت طلعت إيلاماسكا (ما أتذكر إنها موجودة بالسعودية، بس لو حصلتوا عليها شيكوا على المناكير). بجد ما عمري شفت ألوان زي كذا كانت فسفورية بشكل غير طبيعي، حتى لما رجعت وشفت صور لها بالنت، ما لقيت صور تعطيها حقها.رغم إني للمرة المليون أقول لكم إني ما أشتري مناكير، لأني أساسا ما أحطها، أظن هذي المناكير أغرتني، و أحس من دون وعي (يمكن و أنا نايمة، بامشي لسيفورا و أشتري واحد منهم).  المهم سعر القارورة 14 دولار تقريبا 50 ريال يعني بسعر أنقلوت. هنا تلقون فيديو عنه شوفوا كيف ألوانه وشكله. و هنا باقي مجموعة إيرديم ربيع 2013.
طبعا وش العلاقة بين إيرديم و إلاماسكا، ما فيه علاقة بس كلهم ألوانهم فسفورية حلوة :). 

شرايكم بالألوان الفسفورية؟ متحمسين تشوفونها بصيف ثاني أو طفشتوا منها؟



Once Again It's Meadham Kirchhoff

أعترف إني إلى الآن أحاول أفهم هذا الموسم، ما أقول أنه سيء، بس ما أعرف وش الفكرة اللي قايمة عليه أكثر المجموعات. أحاول أطلع معنى للموسم لحد الآن مو لاقية أي شيء :( مرة عاشرة يجي عرض ميديم كيرشوف و يخليني أنسى باقي العروض، و أفكر ليه يسوون أشياء حلوة و أنا فقيرة، و أعرف إنه ما فيه أحد راح يسوي شيء يشبه له؟!!. 


بالعادة أختار من 3 إلى 4 من "اللوكز" اللي بالعرض، هذي المرة قررت إني ما راح أحط هنا إلا هذا اللوك و أعتقد أنه يكفي، على الأقل بالنسبة لي، لو ما مشت إلا هذي العارضة بكل العرض كان قلت أنه أحلى عرض شفته بحياتي. هذا ما يعني إن الباقي مو حلو، لكني مفتونة بهذا اللوك. من السويتر الخفيف اللي عليه مطرز yes، للون التنورة، و شكلها، للشريطة اللي كأنها الحزام، و حتى البنطلون اللي تحت التنورة. ما أعرف وش أقول أعرف إني جالسة أوصف الصورة اللي قدامكم، لكن للأسف أحس لساني معقود. ما راح أطول عليكم بالكلام الفاضي، هنا تلقون باقي المجموعة. 

الأحد، 16 سبتمبر 2012

Contrast Shirt: A New Take

علاقتي بالملابس الرجالية جيدة جدا، ما أتذكر إني قد كرهتها، ما عندي مشكلة ألبسها، و لا أشوف أبدا إنها مملة. المهم الشيء اللي باتكلم عنه اليوم من عرض ألتزورا (يمكن من أول عروض نيويورك) هو القميص اللي لونه سماوي أو بعض المرات مقلم سماوي و أبيض و ياقته تكون بيضاء. 
ما أتذكر أول مرة شفت هذي النوعية من القمصان صراحة، بس أكيد شفتها على رجال (يمكن مهمين)، و أظن أني كنت صغيرة، أو كنت ما أدري :) لأنها ما أعجبتني كنت أقول كيف القميص لون و الياقة لون ثاني؟!!.

(كبروا الصورة لتفاصيل أوضح)

مثل ما أتذكر متى أول مرة شفتها و لا حبيتها، ما أظن أتذكر متى عجبتني، مع إني الحين أفكر إني شفتها بفيوتشراما بحلقة عن وال ستريت و عجبتني (أعرف إن الموضوع محرج إني أحب شيء من كرتون، بس لازم أعترف إن أفلام الكرتون حددت كثير من الأشياء اللي أحبها و يمكن اللي ما أحبها) :). 
ما عندي قميص زي كذا، مع إني قلت لكم أنه يعجبني، بس أختي أعتقد إنها ممكن تسوي دولاب خاص بالقمصان اللي كذا :). المهم أعجبني كيف ألتزورا "صممها" من جديد، مع إني بالأغلب ما ألبس أشكال الفساتين اللي سواها و لا أحب كثير التنورة البينسل، لكن أعتقد إني مستعدة أجرب شيء زي كذا. بعد أعجبني أنه حاط عليها كريستالات، كل الفكرة أنه أخذها من شكل الجدي، لشكل أكثر أنوثة، بس إلى الآن بجدية. (المجموعة فيها أشياء حلوة ثانية، لو حبيتوا شيكوا عليها هنا). 

شرايكم بالقميص هذا؟ تحبونه من قبل أو ما يهمكم؟ شرايكم باللي سواه ألتزورا؟ 

السبت، 15 سبتمبر 2012

Entering the World of Candles

ما أعرف إذا تهمكم هذي المواضيع أو لا، من البداية، إذا ما عجبتكم فكرة إني ممكن أتكلم عن شيء ماله شغل بالفاشن أو المكياج (على الأقل بشكل أساسي) لكن إني جربته و ممكن أقولكم رأيي فيه. 
ندخل للموضوع، ما أتذكر إني قد كنت مهتمة بالشموع، ما أكرهها لكن بالنسبة لي أعرف ممكن يكون سبب تافه أشوف إنها تحترق و تخلص. أما الشموع اللي تطلع ريحة، أتذكر فترة طاحوا فيها الناس، وصلتني أكثر من وحدة، و لا عجبوني أحس أنهم يخنقون. 
قلت لكم إني نقلت. أنا الحين بأمريكا، و لأني أعرف إن شققهم فيها كاشفات دخان، ما جبت معاي بخور: معمول أو عود أي شيء من الأشياء هذي، و بعد تقريبا أقل من شهر اقتنعت إن البيت يحتاج ريحة حلوة :). المهم ما أعرف كثير عن الشموع، لكن لأن أكثر شيء أحبه بالنت إني ألقى رأي الناس بالأشياء، يعني ممكن يوفر علي وقت و فلوس (ما أشتري شيء بايخ) سمعت أكثر من مرة عن Body & Bath Works (أتذكر شفته بالبحرين أكثر من مرة، و أظن فيه بالمملكة). لكن ما قد جربت أدخله للأمانة. بالمكان اللي أنا فيه دخلت بودي آند باث وركز و بعد جولة طويلة طلعت، رحت لمحل أسمه Yankee Candle و شمت بعد وش عنده و طلعت بهذا القرار. 


طبعا لقيت روايح غريبة، ما أعرف أحسها حقت أطفال، يعني كل اللي أبغاه من البيت أنه تكون ريحته نظافة مو مارشميلو و فطيرة تفاح و أشياء مرة ما عجبتني. 
لأنها أول مرة لي (أشتري فيها شموع) أخترت للبيت من يانكي كاندل الشمعة اللي على اليسار ريحتها زي ما هم واصفينها مريمية و حمضيات. لما شمت الريحة مرة أعجبتي و قررت أني أجيب الشمعة اللي حجمها 411 قرام بتقريبا 26 دولار (أعرف مو رخيص) بس قلت راح أجربها و أشوف كم تقعد. 
أخترت للحمام من بودي آند باث شمعة هم مسمينها خيزران طازج، ريحتها كأنك بمنتجع مره منعش. حجمها 113 قرام بتقريبا 10 دولارات. طبعا كلهم مالي إلا يومين تقريبا شاريتهم، يعني ما أعرف متى يخلصون لكن من اليومين هذي أقدر أقول إني ماراح أشتري من يانكي كاندل مرة ثانية، مو لأنه ما عجبتني ريحتها لما احترقت، لكن ريحتها مرة ضعيفة، زيادة على كذا سعرها أغلى من بودي آن باث وركز. 

هذا هو موضوع اللي ما أدري يهمكم أو لا؟ إذا تبغون أتكلم بين فترة و فترة عن أشياء جربتها، و لا لها علاقة "واضحة" بالفاشن قولوا لي :). 

بالمناسبة جالسة أجرب مكياج رخيص هنا، بعضه يآصل السعودية، بعضه ما أعتقد، بس لو مهتمين راح أقولكم عن هذي الأشياء :). 

الجمعة، 14 سبتمبر 2012

Semi

أعرف إن بداخل أي وحدة (بنسب متفاوتة) فيه مدمنة جزم :). شخصيا أصنف نفسي مستهلك طبيعي للجزم (أعرف ما فيه أحد بيقول أنا مدمن جزم)  :) لكن هذا اللي أعتقده عن نفسي، أظن إن الجزم اللي تعجبني أكثر بكثير من اللي أشتريها :) علشان كذا أقدر أقول إني "مستهلك طبيعي للجزم". 
و أنا أشوف عروض نيويورك شفت عرض فيكتوريا بيكام. صراحة تصاميم فكتوريا مو مزاجي، ما يعني إنها سيئة، لكنها مو الشيء اللي ممكن ألبسه. لكن كالعادة التفاصيل هي اللي ممكن تخلي رأيي يتغير بشيء معين. 


شفت هذا الصندل البوت و أحس إني ودي ألبسها الحين. يقولون هذا أول جزمة فلات تصممها فيكتوريا، صراحة ما عندي فكرة، لكن الشيء اللي متأكدة منه إن فكتوريا ما تلبس فلات أبدا، حتى يوم صار عندها ديسك. أنا شخصيا ما عندي شيء لا ضد الفلات و لا ضد الكعب، لكن ألقى نفسي بالفلات أكثر مو لأنها أريح (بعض المرات أبدا ما تكون مريحة)، لكن بالنسبة لي لأنها أكثر قابلية للبس. 
ما أعرف كم هي أسعار جزم فيكتوريا بيكام، بس اللي أعرفه أنه أسعار شنطها مو رخيصة، و أعرف إني ما عندي استعداد أشتري هذي الجزمة بسعر غالي. بس عندي أمل إني راح أشوف شيء يشبه لها عند زارا قريب :). 


الخميس، 13 سبتمبر 2012

Incredible India

الموضوع اللي راح أتكلم عنه اليوم شوي عائلي :)، مو مرة شوي ... بالصيف أختي و أمي شروا ساري (يعني قماش ساري). للحق ما تورطوا فيها، لأنهم ما أظن فكروا فيها كثير. بس لما شفت أمس عرض ماركيزا (اللي بالمجمل ما أعجبني) و اللي كان مستوحى من الهند (عرض شانيل بري فول 2012 كان بعد مستوحى من الهند بالخصوص البنجاب). ما علينا قلت لكم العرض مو مرة أعجبني، بس حسيت فيه أشياء ممكن تعطي فكرة لأحد زي أمي و أختي، عندهم ساري، أو ودهم يشترون ساري بس ما يبغون يلبسونه مثل "الساري" علشان ما يطلع شكلهم كأنهم بحفلة تنكرية :). 

(اضغطوا على الصورة، علشان تشوفونها أكبر)

قلت لكم أكثر من مرة ما عجبني العرض مرة (هنا تلقون الباقي). صراحة نسيت أشكال الساري حقات أمي و أختي، بس كأني أتذكر أنه فيه واحد ألوانه تشبه الثاني من اليمين. الثالث من اليمين عجبني (أعرف أنه التصميم مو جديد) بس أعجبني إنهم سووا الساري بشكل أكثر عصرية (أعتقد لو كنت تحت 30) أو تحسين إنك تقدرين تلبسين شيء زي كذا، و عندك قماش ساري، أعتقد أنه خيار مرة حلو، آمن و أنيق. 
أعجبني بعد الفستان الأبيض، أعرف أنه مو لأي أحد، بس لو كان عندي ساري من لون واحد، بالنسبة لي أكيد بأروح للفستان الأول من اليمين.

شرايكم أنتم بلبس الساري؟ ممكن تلبسونه زي ما هو؟ و وشرايكم بعرض ماركيزا؟

The Unbearable Lightness of Being

أعرف إني قلت لكم أكتب عن أسبوع الموضة بنيويورك، بس ما أعرف وش جاني، أحس أني كل شيء أشوفه (إلا قليل) ما يبهرني أبدا. مو شين، لكن ما أحسه جديد، و أهم شيء أحس كأنها ملابس خريف مو صيف. ما علينا أوعدكم إني راح أتكلم عن واحد من عروض نيويورك اليوم (وقت ثاني من اليوم). بس أول اسمحوا لي أحط هذي الصورة هنا علشان أقدر أقفل المتصفح :).


من يوم ما شفت الصورة هذي قبل يمكن يومين أو أكثر، و أنا مو قادرة أسكرها، كذا غصب علي. أعرف إني المفروض إن كايت هادسون ما تشكل عندي مرة، و أعرف أنه المفروض يكون "فستان أسود عادي". لكن المشكلة إني عجزت أشوف أنه عادي. عاجبني مرة، من الطلات اللي لا شفتها أصير زي الطفل، أبغى زيها.
أعترف إني من فترة و أنا أعتقد أن كايت صايرة مرة حلوة، بس مو هذا السبب، مع أنه ما عجبتني الجزم، لكن كل ما شفت سيور الفستان ودي أصيح، أو على الأقل أبغى زيه فيه شيء تسعيني فيه (يمكن قوينث بالترو أو كايت موس لبسوا زيه بالتسعينات).

أمس شفت هذا اللقاء لكايت، ما أعرف ليه أحس إنها خفيفة، و دايم مبسوطة، ذايم لقاءاتها حتى لو كنت لحالي أبتسم و أنا أشوفها. أهم شيء إنها كانت لابسة وينتر كايت (ماركة نيكول ريتشي). و عندها أكثر من قطعة منها.



بالحديث عن وينتر كايت و نيكول ريتشي (بالمناسبة كلهم على الأقل فترة كانوا زباين لريتشل زو). نيكول مسوية تعاون مع مايسيز إيمبولس و المجموعة طلعت. لو تقدرون تآصلون لمايسيز و عجتكم الأشياء، لا تفوتونها (هنا تلقون الممجموعة). 

الخميس، 6 سبتمبر 2012

Warm-Up

أعرف إني من زمان منقطعة، بس بجد كنت مشغولة الفترة اللي فاتت (ما أعرف باظل أو لا :) لكن قلت راح أكتب اليوم، لأني باحس بتأنيب ضمير لو بدأت عروض صيف 2013 و أنا كنت خارج الفورمة :). ما علينا، هذا موضوع صغير و قصير، من فترة حسيت إن شراء أرواج من ماركات هاي إند خسارة :) ما عمري خلصتهم و أسعارهم مرة غالية، و ألقى ألوان (على الأقل بالنسبة لي) أحلي منها بمحلات الدرق ستور. 

من فترة طويلة كنت مسافرة للشرقية، وجت مناسبة فجأة، و بغيت روج، و صادف إني كنت بالتميمي. مريت على ستاند المكياج اللي عندهم و شفت هذا الروج اللي بذاك الوقت ما أعرف حتى وشي ماركته، بس عجبني لونه، كان أحمر على فوشيا شوي، بس موب ثقيل، يعني لو تحطينه، كأنه لون شفايفك الأصلي، أو يعطي شفايفك لون على لونها الأصلي، بس بغنى. ما أعرف كيف آصفة، بس يعطي شعور حلو. 

بعد فترة من استخدامة، و لما سألني أكثر من شخص وشو الروج اللي حاطته، هنا "تكرمت" على الروج و لفيته من تحت، و لقيت أنه من مايبلين أسمه Hollywood Red. للحق أسمه أكبر منه :) مو لأنه مايبلين، لكن قلت لكم الروج مو ثقيل يعني لو جينا لتصنيفات المكياج، هو يعطي تغطية شفافة، إلا إذا حطيتي أكثر من طبقة. 

ليه أكلمكم عنه الحين؟ هو لأني اضطريت للتخلي عن أغلب مكياجي (حبا فيه) لأني كنت راح أنقل و لا أقدر أشحنه، ولو شحنته معاي بالطيارة أخاف يتكسر و يخرب، أو يخرب الشنط، فقررت أتركه لخواتي :) الروج هذا كان من القائمة الصغيرة اللي كنت أخطط إني  أخذها معاي، لكن للأسف نسيته (شكله بنفس أختي). 

الحين أفتش بالمواقع. (لسا ما راحت أشوف بأي محل أو سوبر ماركت) عليه، و لا لقيت اللون هذا. تعرفون لما يحصل لك الشيء يكبر بعينك زيادة، هذا هو وضعي الحين معاه :) حتى لو سعره ما تعدي 20 ريال. 
باختصار إذا تبغون أرواج تعطي تغطية خفيفة، يعني بس لون خفيف للشفايف أظن مجموعة مايبلين "كلور سينسايشنال" جدا حلوة. و أسعارها حلوة، و على إنها خفيفة ما تنمسح بسرعة من الشفايف.