20s Redo

ما أعرف كم مرة تكلمت عن الفلابير و العشرينات بهذي المدونة، بس أكيد كثير، لو بحثتوا "عشرينات". أبشركم أظن إن هوسي فيه قل، لكن بعد ما شفت صورة لأوليفيا كوك ببريمير قبل أمس (الصورة تحت، الأولى من اليمين)، تذكرت لوك عجبني قبل فترة لكارولينا كاركوفا، فقررت أكتب زي طريقة المود بورد، اللي كتبها قبل بهذا الموضوع. 

ما أعرف إذا كنتوا متابعين لردود و النقاشات اللي تصير تحت المواضيع، بس بنقاش مع Elegant Always سألتني عن ذوقي، بالغالب، الأشياء اللي أسويها هنا، هي ذوقي، و طريقتي بكيف أنسق لبس معين، أو موضة معينة، لو قررت ألبسها كيف ألبسها. 

نرجع للبس للمود بورد مرة ثانية، صراحة ما أعجبني مرة لبس أوليفيا، لكنه مختلف عن لبسها بالعادة، و ذكرني بلبس كارلوينا قبل كم شهر (بالمناسبة كارولينا 98 بالمية من ملابسها مرة حلوة، فلو أنتم من الناس اللي يحبون يتابعون أشخاص يلبسون بطريقة حلوة، تابعوا كارولينا). المهم، من أكثر الأشياء اللي ما عجبتني بلبس أوليفيا إني حسيت أنه مرة شتوي، و أنا صراحة مرة قرفانة من الحر P;، فأول شيء فكرت فيه، إنه الروج العنابي بالنسخة اللي سويتها لازم يصير أحمر/ برتقالي. علشان كذا فكرت بهذا الروج من سيفورا (ترا جودة الروج مرة كويسة لو جالسين تدورون على روج كريمي مات) المهم الدرجة اسمها 10 Mandarin Muse. مع إني أحب الترتر، و الأشياء اللماعة، إلا إن أكثر النسخ اللي شفتها لقصة تشبه فساتين فلابير كانت مرة مملة، و ما فيها شيء جديد، فحسيت هذي النسخة "الجديدة" مع قماش الميش اللي فوق. نسيت أقولكم وش الشيء اللي حبيته بلبس كارولينا، هو إن اللبس ما فيه حوسة كثيرة، بعدين لابسة جزم مرة مثيرة، اللي فكرت فيه، إني أحول هذا اللبس لنسخة صيفية، و لأنه صنادل الجلي راجعة من كم صيف، و أنا مستظرفتها، و لأن كعب ماري جاين كان منتشر مرة بالعشرينات، خصوصا مع رقصة الشارلستون، حسيت هذي الجزمة من صوفيا لوبستير مرة مناسبات، و يعطون اللبس روح. زيادة على كذا، أعتقد جزم صوفيا من أرخص الماركات الهاي إيند. الشيء اللي عجبني بلبس أوليفيا، هي إنها لبست حلق ستايتمنت، ففكرت بحلق ملونات و كبار، و يضيفون للجزمة و الروج. 

وش رأيكم؟ تفضلون الفلابير تقليدي بروج غامق و ترتر؟ أو أصلا ما تحبون موضة العشرينات؟ 

Something Old

خلص مهرجان كان، بغيت أكتب عنه، بس عنه، بس أكثر الفساتين اللي عجبتني لونها أزرق، و أنا تكلمت عن الفساتين الزرقاء بعشاء مراسلين البيت الأبيض، و لا للأسف ما فيه أحد لبس من الملابس اللي بغيتها تلبس للمهرجان (اللي تكلمت عنها بهذا الموضوع). 

المهم هنا نرجع لبعض مجموعات الريزورت اللي صارت تطلع الفترة هذي، و منها مجموعة أوسكار دي لا رينتا. و إذا تتذكرون أوسكار قبل لا يموت، سلم مهمة التصميم لبيتر كوبينق. اللي كان يصمم لنينا ريتشي. 

مجموعة الخريف ما أعجبتني مرة، فيها فساتين حلوة، بس حسيتها كأنها فساتين قديمة من أوسكار دي لا رينتا و تصاميم كأنها من نينا ريتشي. بس قبل لا أتكلن عن هذي المجموعة، بأعطيكم معلومة عني، هو إن أوسكار دي لا رينتا يمكنه من أول المصممين الأمريكان اللي عرفتهم، و بسببه صرت مهتمة بالفاشن، أتذكر كنت مبهورة بملابسه، الكلام هذا له شيء عشر سنين، أقل شوي. المهم الفكرة اللي أبغى أوصلها، إني لما شفت بعض القطع من هذي المجموعة، تذكرت الشعور اللي حسيته أول مرة عرفت فيها أوسكار دي لا رينتا. 

عجبني مرة خلط الألوان مع بعض، الفستان الأول من اليمين أحس لازم بيكون على الريدكاربيت، أحسه بيكون حلو على كيري واشنطن، بس عندي إحساس إيمي روسم بتلبسه. الفستان اللي بعده (الفوشي مع الأسود) ذكرني بفستان من جايسون وو لبسته دايان كروقر بمهرجات كان قبل خمسة سنوات (هنا الفستان). أحس هذا الفستان بيطلع حلو على مرة على جيسيكا ألبا. الفستان اللي بعده كان لازم أدخله، أحس فيه كل المقومات اللي تقول أنه فستان هوليوودي، أتمنى أشوفه على لوبيتا مع روج أحمر. الفستان الأخير، أحسه موجود لمهرجان سنمائي صيفي، صح خلص كان، بس فيه كثار، أحس بيكون حلو على جيسيكا شستاين. 

وش رأيكم بالفساتين؟ عجبتكم قد ما عجبتني؟ 

Cannes Approved

اليوم يبدأ مهرجان كان 2015، و بالأسبوعين اللي فاتت 3 من أهم دور الأزياء الفرنسية عرضت مجموعاتها ريزورت 2016، آخرها ديور بمدينة كان نفسها. كل سنة تقريبا أحط بعض عروض ريزورت على إنه ممكن تلبس بالمهرجان (خصوصا شانيل)، بس الواقع يقول إن الناس بكان تفضل تلبس أوت كتور على إنها تلبس آخر مجموعة طلع فيها المصممين. 

من بين الثلاثة مجموعات: شانيل، لوي فيتون و ديور، ديور كانت الأفضل بالنسبة لي، و أعتقد بنشوف منها كثير على الريدكاربيت، لكن بشكل عام، أعتقد كل الثلاثة عروض كان فيها شيء يصلح للمهرجان للفوتو كول أو حتى للبريمير. حطيت الملابس على حسب الترتيب اللي أشوفه أحسن، علشان كذا أخترت ديور يكون بالأول. 

أظن لو ماريون كوتيارد بتحضر المهرجان على الأقل بتلبس لو لوك واحد من المجموعة هذي، أتمنى أشوفها باللبس الكاروهات، لأني أعتقد التنورة مع التانك الفضي/رصاصي بيكون لبس تلبسه جنيفير لورنس. 

الصف اللي بعده من عرض شانيل اللي كان بسيول، كوريا. نفس الشيء ما أعرف من راح يحضر المهرجان، بس أحس ملابس شانيل تصلح لكلامنس بوسي أو كيري موليقان (مع إني ما أتذكر كيري بشيء من شانيل). 

الصف الأخير من عرض لوي فيتون اللي كان ببالم سبرينجز كاليفورنيا، يمكنه أقل العروض مستوى بالنسبة لي أحسن ما في العرض كانت الهوت بانتز، لكن باقي الملابس حسيتها كبيرة على العارضات، ما أعرف إذا المقاسات كانت خطأ، أو كذا راح تنباع للناس، بس صراحة ما أتمنى أشوف أحد من الممثلات اللي بالعادة يلبسون لوي فيتون، يلبسون هذي المجموعة و هي هذا حجمها. بس لو كنت ودي أشوف أحد بهذي الملابس أعتقد الفستان اللي على اليسار بيطلع حلو على إيدل إكساكوبليس أو يمكن اللبس اللي على اليمين على فان بينق بينق، مع إن فان بالعادة ما تلبس إلا أوت كتور بكان. 

أنتم وش رأيكم وش أكثر شيء أعجبكم؟ 

MET Gala Red Carpet (The Version I Dreamed of)

مو قلت لكم أنه مو عاجبتني أكثر ملابس اللي حضروا أمس، يمكن أكثر شيء قهرني أنه ما فيه أي أحد لابس من مجموعة دريس فان نوتين الأخيرة، مع إن فيها كثير تأثير صيني، من الأقمشة لتصاميم الملابس، صراحة ما أعرف وش المشكلة، هي مشكلة دريس ما عنده فريق يتواصل مع السلبرتي و الستايلست صح، أو إن الناس اللي حضرت أمس ما عندها ذوق و لا فكرت تلبس ملابس أكثر صينية من اللي شفناها. 

أحس كثير قرروا أمس أنهم يختارون مكياج "صيني" أكثر، مع الروج الأحمر، أو الكات آي، و الحلق تاسل، ما أعرف مين اللي طلع الفكرة، لكن أعتقد المعرض عن الملابس، و المفروض فكروا بالملابس قبل المكياج. من أكثر الأشخاص اللي عجبني شكلهم أمس (مكياج و إكسسوار) أوليفيا وايلد، بس حسيت حرام الشغل هذا يروح على فستان برادا، ما فيه أي شيء صيني، مع إن شكلها بشكل عام كان حلو. الشيء الثاني اللي بعد تمنيت أنه يصير مادام ثنتين جو بلبس من جيفانشي (جوليان مور و أماندا سيافيرد، ليه ريكاردو ما لبس أحد من المجموعة اللي كأنها أوريقامي (أعرف الأوريقامي ياباني، بس كان ممكن النقشات تغير شوي). علشان كذا اخترت ببالي هذا اللبس من المجموعة لجنيفير كونللي، اللي كانت لابسة لبس سخيف من لوي فيتون. 

نفس الشيء ما أفهم ليه فالنتينو ما لبسوا أحد من المجموعة اللي سووها بشنقهاي قبل سنتين تقريبا، أخترت هذا الشورت مع الكايب الأحمر لكايت مارا، اللي كانت جاية بلبس مرة عادي. 

MET Gala 2015

أمس كان  ميت قالا، عنوان معرض هذي السنة: الصين من خلف زجاج العرض. علشان أقصر عليكم المقدمة، صراحة أكثر اللبس مخيب للأمال، أولا مرة قليل المصممين الصينين (أعتقد ريانا هي الوحيدة اللي كانت لابسة لمصممة صينية)، حتى المصممين الإمريكان من أصل صيني أو تايواني زي جايسون وو، فليب ليم، أليكساندر وانق، فيرا وانق، ديريك لام و جوزيف ألتوزارا كلهم كان حضورهم يا معدوم أو ضعيف.

و أنا أشوف الصور، أنتظرت كثير فان بينق بينق، صراحة عصبت شوي لأني أعتقدت أنهم ما دعوها، يعني وش دخل بيونسية مثلا تجي و لا تجي فان بينق بينق؟ (بالمناسبة، أعتقد أنه واحد من الفساتين اللي قد لبستها لمهرجان كان، معروض بالمعرض) لكن على آخر الليل لمحت صورة لها من ورا، و أنتظرت شوي، و لا طلع زيادة، و قررت أنام و أشوف بكرا. طبعا ما خيبتني فان بينق بينق حضورها كان جدا حلو، و ماشي مع ثيم الحفل/ العرض. 

أكثر وحدة عجبتني أمس هي كلوي سافني بهذا الفستان من جي دبليو أنديرسون، ما أعجب كثير، لكن أنا أعجبني مرة، كل شيء حلو، من تصميم الفستان و ألوانه و طبعاته، للإكسسوار و التسريحة، مرة عجبني شعرها بالفنقر وايفز عجبني لون الجزمة، و عجبني الشوكر اللي لابسته، و أهم شيء الإسوارة نفسها بكل اليدين. أعجبني إنها أخذت الثيم من جانب مو صيني، عطاني إحساس كأني أشوف وحدة من الجالية الإنجليزية وقت الإستعمار البريطاني بشنقهاي، أعتقد إنه إختيار مرة ذكي و مناسب للمناسبة. 

الشيء اللي عجبني بلبس ريانا، غير أنه جدا مبالغ فيه (هذا المطلوب بميت قالا)، إنها أختارت مصممة صينية قو بي (بالمناسبة قو بي مسوية تعاون مع ماك التغليف مرة أنيق). بس كنت أتمنى لو شوي طلعت البلاي سوت الفوشي أكثر على الأقل من فوق. 

زي ما قلت لكم مرة ما عجبتني أكثر الإختيارات، كان فيه ملابس أكثر صينية موجودة عند مصممين مختلفين، ما أعرف ليه ما فيه أحد لبسها، أعتقد راح أتكلم عن هذي الملابس بموضوع ثاني. 

Blue-ish

أمس كان حفل مراسلين البيت الأبيض، الصراحة بالعادة هذي مو مناسبة أكتب عنها هنا، و لا أهتم فيها، بس و أنا أقلب الصور أمس، أنتبهت أنه كثير من الحاضرات لابسات درجات الأزرق للتيل (أزرق مخضر). و أكثر من لبس من هذولي الملابس عجبوني، فقررت إني أكتب عنهم هنا.

ما أتذكر إني قد لبست لبس سهرة بهذا اللون (أي درجة للأزرق حتى الكحلي) ما أعرف ليه، مع إني ما عندي مشكلة مع الأزرق، يمكن أنساه بين  اللون الأخضر و الأسود.

من أكثر الملابس اللي أعجبتني أمس، هو لبس هناه دايفز بجورج شقرا (تحت يمين)، مرة أعجبني بالذات عند منطقة البطن، أحسه أعطى الجسم شكل (ساعة رملية)، أظن اللي ما عندها خصر واضح، هذا اللبس بيعطي شعور إن عندك خصر للي جالس يشوفك. 

قلت لكم السبب اللي ما يخليني أنتبه للأزرق لما أفكر بملابس سهرة، يمكن علشان الأخضر و الأسود (اللي أعتقد إنهم أكثر لونين ممكن تكونين متأكدة إن فستانك بيكون حلو). لكن أعتقد إن الأزرق هنا تغيير، و أكيد لو فكرت بلبس سهرة باحطه ببالي بالمرات الجاية. 

أنتم قد لبستوا أزرق و درجاته؟ أو تفكرون فيه لمناسبة جاية؟ 

Lilac & New Thing Added to My Wishlist

أعرف إني من زمان ما كتبت متواصل، و أعرف أني بطلت أطلع أعذار، لأن فعلا ما عندي عذر، إلا أنه ما جا ببالي أي شيء أكتبه، اليوم قبل لا أنام جا ببالي أكثر من صورة / لبس عجبوني بالفترة الماضية و حسيت أنه طلع معاي فكرة موضوع أتكلم عنه.

أول صورة بهذا الوكلاج قد شفتها، و عجبتني و علقت براسي هي صورة فيرونيكا هيلبورنير (ستايلست ألمانية)، بهذا الفستان الليلكي من كريستوفر كاين (تحت وسط)، الصورة قديمة، يمكن قبل سنة أو أكثر، بس علقت ببالي، لأنه مرة عجبني اللونين اللي اختارتهم مع بعض، و أحس إن جلست طول هذي الفترة أنتظر فرصة إني أخلط هذا اللون ( لون البالطو) اللي ما أعرف وش أسميه، (أعتقد كونياك) مع ليلكي. الصورة الثانية اللي علقت ببالي هي الصورة الأولى فوق من اليمين من عروض الخريف اللي كانت قبل شهر و نص، اللبس من لوك بوك سي باي كلوي، اللبس مو مميز، لكن أعتقد التنسيق مرة أنيق، و أول ما شفت التنورة/ البنطلون الوسيع من زارا (يسار فوق)، على طول جا هذا اللبس ببالي، و فكرت إني أنسق حولها لبس، بوحي من هذي صور، و أشياء شفتها و أعجبتني زي السنيكير الأديداس من تعاون فاريل وليمز اللي أسمه سوبر كلور. المجموعة تقريبا كلها سولد أوت على الموقع، بس إذا كانت موجودة بالمحلات، أعتقد هذا اللون و اللي أسمه mauve tint لون يمكن قليل يشوفه مميز، لكني أحسه مرة حلو و أنيق، بالذات مع لبس كله ألوان محايدة. التوب بغيت قميص رسمي و لا هو رسمي بنفس الوقت، و حسيت هذا القميص من مونكي بيكون حلو مع اللبس. آخر شيء و أغلى شيء، كنت أدور إكسسوار يكمل اللبس، و جا ببالي "شوكر" و طحت على هذا الشوكر من جينفير فيشير، و للأسف أنه الحين دخل قائمة الأمنيات حقتي، سعره مو مرة غالي (قصدي مو شيء فوق العشرة الآف أو شيء زي كذا، بس 495 دولار تحتاج له واحد كريم، يعرف يعطي هدايا حلوة (لا تستحون تطلبون رقم حسابي للتحويل P;). 

وش رأيكم بالمجموعة، و تفضلون أكتب كذا كل فترة شيء زي المود بورد، مع إقتراحات لملابس و إكسسوار ممكن تشترى؟ 

Who Wear What FW 2014

بما إنه خلصت عروض خريف 2015، و خلصت تخفيضات خريف 2014. جا الوقت اللي أتكلم عن الملابس اللي توقعت إنها تنلبس و إنلبست، و أحسن الأشياء، و أسوأ الأشياء، و الملابس اللي تمنيت إنها تلبس و لا لبست.  أول شيء 14، وحدة لبست من الأشياء اللي توقعتها، و زي المرة اللي فاتت نبدأ بأحسن شيء بالنسبة لي، بس أول شيء هنا رابط للملابس اللي انلبست: 

اللبس الأحسن بالنسبة لي كان من دون منافسة ليتون ميستير بإيميليو بوتشي، من قائمة ميلانو (هنا)،  ليتون مو الوحيدة اللي لبست هذا اللبس، العارضة البرازيلية إيزابيل قولارت لبسته (زي ما راح تشوفون بالألبوم)، لكن أعتقد ما فيه وجه مقارنة، أعتقد التنسيق بالذات الشعر و المكياج و أهم شيء إنها لبسته من دون عقد، خصوصا إن العقد اللي لبسته إيزابيل أحسه مرة خشن، يمكن أحسن شيء سوته إيزابيل هو الجزمة اللي إختارتها. 

أسوأ شيء بالنسبة لي هي كورتني لوف بفيفيان ويستوود. من اختيارات أسبوع باريس، أسوأ شيء بالنسبة لي إن الفستان مبطن أسود، و هي لابسة جزمة كأنه جزء من الفستان. بعد من باريس ثنتين لبسوا من ستيلا مكارتني، لكن أحسن الثنتين بالنسبة لي أمبير هارد مع إنه كل الثنتين ما أعجبتني اختيارهم للجزم. من عرض إيرديم إذا تتذكرون أعجبني الفستان الأكثر كثير، لبسته كيرا نايتلي بس أكثر شيء ما عجبني باللبس هو إنها غطت الشيء الذهبي بشعرها. من عرض رودارتي إنلبس فستانين كلهم إنلبسوا بالميت قالا، واحد أعجبني، اللي لبسته كيرستين دونست، و اللي ما أعجبني شكل شايليين وودلي. 

PFWFW 2015

خلص شهر الموضة أمس بعرضين، الأول للوي فيتون و الثاني لميوميو، مع إنهم يعجبوني بكثير من الأوقات، ما حسيت إني مبسوطة على اللي شفته فيهم، أحس كلها أشياء قد شفتها قبل، من دون ما يكون فيها أي شيء جديد أو مختلف. لكن بشكل عام أعتقد إن أسبوع باريس كان مرة كويس، و فيه ملابس مرة مختلفة. 

أولا خلوني أبدأ بالفستان الثاني من اليمين تحت من فيكتور أن رولف، ما أعرف ليه هذا الفستان كل ما ناظرت له أكثر، كل ما أعجبني أكثر، مع إنه فيكتور أن رولف ما يلبس كثير على الريدكاربيت، بس أتمنى أشوفه على الريدكاربيت، يمكن علي زوي كرافيتز أو نيكول بليتز. الفستان اللي بعده من شانيل، أعرف إنه شكله ممكن مرة ممل، و أعرف إنه ذوق آنا وينتور، بس أتمنى أشوفه على تيلدا سوينتون، إذا فيه فستان متأكدة إنه راح يلبس على الريدكاربيت، هو الفستان جيفانشي، العنابي، أتمنى تلبسه زوي سالدنا، مع إنه بيكون يشبه فستان جيفانشي كتور أبيض لبسته قبل كم سنة. الشيء اللي ما توقعت إنه يعجبني مرة، هو الجمب سوت الرمادية (فوق الأول من اليسار) من ستيلا مكارتني، مرة أعجبتني، أعجبني الكم الأوف شولدير، و أتمنى اللي يلبسه ما يرفعه، ودي أشوفه على ثاندي نيوتون أو وزموند بايك. إذا فيه فستان بعد جيفانشي أعتقد بنشوفه على الريدكاربيت، هو الفستان فيونيه (الأول من اليمين فوق)، مرة أنيق، و بنفس الوقت فخم، مع إني مرة محبطة من ملابس فليستي جونز بموسم الجوائز اللي فات، بس لو تبغى تخليني أنبسط، تلبس هذا الفستان. 

*باقي الملابس: السويتر اللي عليها جمجمة من أشيش أرورا، أتمنى أشوفه على ريانا، اللي بعده من نينا ريتشي، أحسه بيكون حلو على جوليان مور. الفستان الأبيض اللي تحت من جامباتيستا فالي، أتمنى أشوفه على لوبيتا. 

وش رأيكم بباريس، و بموسم خريف 2015 بشكل عام؟ 

On a High Note

اليوم كان فيه عرض لفالنتينو و شانيل أليكساندير ماكوين، مع إنه شانيل أكثر مجموعة ملونة بين الثلاثة مجموعات، أعتقد إني أفضل عرض فالنتينو و ماكوين من هذا اليوم على عرض شانيل حتى لو كان السيتينق حقه كأنه كافيه. بما إنه ما بقى إلا يوم على نهاية أسبوع باريس، راح أخليهم ببوست واحد، بدل ما أكتب تدوينتين متفرقات. 

من مسك بيرباولو بايشولي و ماريا قرازيا كيوري فالنتينو و هذي أقل مجموعة ألوان، و أكثر مجموعة كأنها أوت كتور من وجهة نظري. الفستان الأسود أكثر شيء عجبني، أتمنى لو لبس على الريدكاربيت يكون التبطين مناسب لشكل الفستان، يعني مثلا ما يصير أسود، أعجبني مرة الكريستالات اللي عليه، و شكل الأكمام، أحس فستان زي كذا بيكون حلو على فان بينق بينق أو يوليانا سيرقينكو، الفستان اللي بجمبه (الثاني من اليمين) متحمسه أشوفه على الريدكاربيت، أحسه بيكون حلو، ممكن على أحد زي جينا مالون (مع إني ما أتذكر إنها تلبس فساتين مو ماسكة عند الخصر. الفستان الأحمر، أتمنى لو لبس على الريدكاربيت ما تحط تحته بطانة، يلبسه أحد مع ستيان تراينقل ناعم أسود أو عنابي. الفستان الأسود و الأبيض أحس بيكون حلو إيمي آدمز، أتمنى أشوفه عليها، أحس من فترة ما شفت عليها شيء مثير. 

نسبة المجموعات اللي أعجبتني من أليكساندير ماكوين من صارت ساره بورتون مصممته مرة قليلة، هذي المجموعة من هذي المجموعات القليلة، أحس فيها شغل ساره بورتون واضح، بس بعد أكثر مجموعة تشبه تصاميم أليكساندر ماكوين، و أهم شيء أعتقد إنها بتكون أكثر مجموعة لساره بورتون نشوفها على الريدكاربيت من فترة. مرة عجبني اللبس اللي كأنه روب آسيوي، أحس مكانه لجنة تحكيم بمهرجان، أحد زي كاترين دينوف أو هيام عباس. الفستان اللي بعده أحس بيكون حلو لوبيتا أو إيمي روسم. الأخير أحس بيكون حلو على كايت بلانشيت، أو نايومي كامبل. 

أنتم وش رأيكم بكل العرضين؟ فيه شيء أعجبكم؟ كلهم أو و لا واحد؟ 

As Beautiful As it is in the Store

مع إني أحب سيلين كماركة، و دايم أنبسط لو دخلت محل لهم. قليل أشوف عروضهم مثيرة، يسوون أشياء حلوة و أنيقة، بس وجهة نظري إن عرضهم قليل ما يكون شيء يستاهل الواحد يكتب عنه. هذي المرة الموضوع مختلف. ما زلت أحس إنه بيكون حلو بالمحلات، لكن العرض أعجبني، و أحس فيه قطع بتكون حلوة على الريدكاربيت. 

أولا خلوني أتكلم عن الأشياء اللي مو واضحة، أو مو موجدة بالصورة، مرة عجبني المكياج، أعرف ما فيه أحد بالواقع (يمكن) بيحط شادو أزرق كذا بحدود واضحة، بس حبيته، الشيء الثاني اللي مو موجود بالصور و عجبني، هو جزمة من الجزم اللي كانت بالعرض، هنا، أعجبني شكل الجزمة من دون المجوهرات اللي عليها، زي الموجودة بالصورة الثالثة من اليمين، بس هذي ذوقي أكثر. أما عن الملابس، أعجبني مرة اللبس الأول من اليمين و الثالث، لكن الثاني أعتقد لازم يكون على الريدكاربيت، أحسه بيكون حلو على فريدا بينتو أو ماريون كوتيارد. البالطو الأخير مرة عجبني، من زمان و أنا ما أحب الجاكيتات الكويلتيد بوف، شفتها كثير على الرانواي بهذا الموسم، كثير منها كانت حلوة (يمكن أتكلم عنها بعدين بشكل منفصل)، بس لذوقي، أعتقد هذي أحلى نسخة، و لو كنت أقدر أشتريه، راح أشتريه. 

وش رأيكم بالمجموعة؟ أو أصلا سيلين ما تعجبكم؟ 

My Sister in My Mother's Clothes

شفت اليوم عرض أليساندرا ريتش، تعرفون إنها تعجبني، يمكن قليل أتكلم عن مجموعة كاملة، لأن مجموعاتها دايم صغيرة، لكن هذي المرة عجبتني مرة، على إنه الملابس بالمجموعات اللي فاتت ذوقي أكثر من هذي المجموعة، لكن اللي عجبني إنها جالسة تستوحي من فترات ثانية زي هذي المجموعة اللي كأنها من بداية التسعينات، مع ذلك ما زالت بالخط حقها، الدانتيل و الملابس الأنيقة. 

قلت لكم المجموعة مو ذوقي، أول ما شفتها على طولي جا ببالي أختي، و جا ببالي ملابس أمي بالتسعينات، بالذات الإكسسوار (الشنط و الأحزمة). و باعتبار إن أختي أكثر وحدة تأخذ من أغراض أمي القديمة، أعتقد خلاص كل قصة المجموعة أقدر أختصرها بهذي الجملة: ملابس أختي اللي أخذتها من أمي. زي ما قلت لكم اللي أعجبني بهذي المجموعة إن أليساندرا محافظه على خطها، بس من دون ما تكرر نفسها. مرة أعجبني الفستان اللي فيه فتحة جهة البطن (الأول من اليمين) أحسه بيكون حلو على ريانا. أعجبتني الجمب سوت، الفستان اللي أظن إن لونه أخضر، مع إنه ممكن يكون أسود بس الإضاءة في اللي تعطيني هذا الإحساس. اللوك الأخير اللي أعجبني فيه إن أعتقد بهذي المجموعة أول مرة أليساندرا تسوي بنطلون، بس مع التوب و الحزام، ما زال اللبس يصلح لسهرات. أحسه بيكون حلو على أولقا كوريلنكو، أو حتى الفستان اللي قبله. 

أنتم وش رأيكم؟ أو تفضلون المجموعات اللي فاتت لأليساندرا؟ 

Renaissance

بعض المرات يصير صعب الواحد يلحق على عروض باريس، لأنه بكل يوم فيه على الأقل 3 عروض مهمة. و على ما بال أنتظر صور بدقة عالية تنزل صور عروض جديدة، و يصير صعب أقرر وش أكتب ووش أترك. لكن أليكساندر وانق مع بلانسياقا، يبدو إنه راح يخلني أكتب عن عرض بلانسياقا كل موسم (أعتقد من بدأ مع الدار و أنا أكتب عن كل عرض)، و هذا المرة مو استثناء. 

أغلب العرض كانت ألوانه مونوكروم (أسود و أبيض، و بعض درجات الرمادي). بس أكثر شيء عجبني بالعرض، إني حسيت التصاميم كلاسيكية (أعتقد لو فتشت لأرشيف بلانسياقا، راح ألقى تصاميم زيها بالضبط)، المختلف بنظري، إن الأقمشة نقشاتها و تقنيتها جديدة. أولا أغلب الفساتين طولها ميدي، زي ما أنتم شايفين. أعجبني مرة اللبس الثاني من اليمين اللي على أجاك. الفرو البني مع نقشات الأبيض و أسود أعطى للفستان روح، أعرف إني الفساتين الأخيرة (الثالث و الرابع، و فيه واحد زيادة ما حطيته) هي اللي بتكون على الريدكاربيت، لكن أبغى أشوف الفستان الأبيض على الريدكاربيت، على كارمين إجيقو، أو أي أحد يمكن مع كلتش ذهبية. الفستان الأول أحسه بيكون حلو على كايت بلانشيت، مع إني أحس إنها قد لبست شيء يشبه له. أعتقد واحد من الفستانين الأخيرات بتلبسه: جوليان مور، إيما واتسون، أو نيكول بليتز. 

وش رأيكم بالمجموعة، أو طفشتوا من قلة الألوان بملابس الشتاء الجاي؟ 

The Birds

روشا دائما عنده أشياء مميزة، ما أعرف ليه مع إني حبيت المجموعة هذي هذي المرة، حسيت بشيء كأنه من ميو ميو (بذات طبعات الطيور)، مع إني بنفس الوقت، أعتقد الطيور فكرتها جاية من فيلم لهيتشكوك، لأن كل المجموعة كذا غامقة، و فيها ريترو. أصلا ما أعرف ليه هذا الموسم أحس كثير مصممين آخذين دور مصممين ثانين. يمكني أنا أتخيل، و ممكن صحيح كل واحد طفش من أسلوبه، و راح يدور على أشياء جديدة عند مصممين ثانين. 

تعجبني كثير الملابس اللي فيها أكثر من قماش، مع أكثر من ملمس، علشان كذا أكيد كان لازم يعجبني أول فستان على اليمين، أحس بيكون حلو على كايت بلانشيت، الفستان اللي بعده، أحسه بيكون حلو على إيما ستون، مو سهل تخلي فستان أسود مثير، بس إيما تعرف تختار فستان أسود مثير. مع إن الفستان اللي بعده ما فيه أي شيء مثير أو جديد، لكن أعجبني إنه مرة كلاسيكي و أشوف إنه جدا أنيق، صح أنه لبس ممكن تلبسه وحدة فوق الأربيعن مثل جولييت بينوش أو صوفيا كابولا، لكن أحس أحد زي داكوتا جونسون، ممكن تخلي لبس زي كذا أنيق و شاب بنفس الوقت. آخر فستان (السماوي) أحس بيكون حلو على قوقو مبثا رو. 

وش رأيكم بالملابس؟ أعجبتكم أو تحسون إنها مرة مملة بألوانها الغامقة؟ 

Glamorous Adventure

مو شيء جديد إني أكتب هنا عن عرض دريس فان نوتين. علشان كذا ما يحتاج أطول بالتقديم له. شخصيا، لو ما لي إلا مصمم واحد ألبس منه طول الوقت، بيكون دريس. باختصار يسوي كل شيء أحبه، من دون ما أقدر على تخيل الفكرة قبل. بس بالنهاية يجمعها كلها بملابس حلوة. بالنسبة لي لو حتى كانت توقعاتي لأسبوع باريس منخفضة، بعد ما نزل الريتم بعد ميلانو، عرض دريس يرفع التوقعات من جديد. 

مو أول مرة يصمم دريس عرض فيه عناصر صينية، يمكن لأنه من أنتويرب، و أنتويرب كانت ميناء مهم لأوروبا لكل العالم. ما يهمني صراحة وش السبب، المهم إن النتيجة تطلع حلوة، و مو مباشرة و لا مكررة أبدا. قليل أشوف دريس على الريدكاربيت، يمكن الثنتين الوحيدات اللي يلبسونه هم أماندا بيت و ماقي جولينهال. إذا كان فعلا عنوان الميت قالا الجاي الصين زي ما قلت قبل، أتوقع أو المفروض (طبعا أنا اللي أحدد وش المفروض P:) ينلبس من دريس للميت هذي السنة. أعجبتني مرة فكرة التنانير المربوطة كإنها مريلة بس على ورا، أعجبني مرة أنه مدخل قماش السفاري الكاكي هذا على ملابس فخمة، الأقمشة وهي تتحرك مرة شكلها حلو (لو حصلت فيديو راح أحط رابط له هنا). عجبني بعد الفستان الأبيض، أحسه يصلح مرة لماقي جولينهال. اللبس الثاني من اليمين التوب فيه حكاية ثانية، و كيف الجزء الترتر خلى القطعة كأن السحاب حلم (أعرف بالغت).

باختصار المجموعة مرة حلوة، أنتم وش رأيكم؟ 

MFWFW 2015

من بين الثلاثة أسابيع اللي خلصوا، أعتقد إن الملابس بميلانو كانت الأقل إثارة، فيه مجموعات حلوة، بس من المجموعات اللي اللي ما تكلمت عنها، الملابس اللي أعجبتني فيها قليل، يمكن الإستثناء كان برادا و بوتشي، عجبني فيها أكثر من لبس، بس مو أكثر من أربعة فما شفت إنها تستاهل موضوع لحاله.

ما أعرف ليه من ميلانو أختار أكثر لبس بالعادة مستحيل ألبسه، أو حتى أفكر، زي الفستان اللي كأنه شرايط (فوق الثاني من اليمين) من إيميلو بوتشي، مع إنه أبدا مو ستايلي، لكن أحس إذا لبس الشخص المناسب بيكون حلو، يمكن زوي سالدنا، أو سلينا قوميز أو كايلي مينوق، يمكن الأشخاص اللي ما ودي يلبسونه: بيونسية، جي لو، و كيم كرداشيان، بس خلونا نشوف.
من أكثر الملابس اللي أعجبتني هو اللبس اللي من فاوستو بولقيزي (تحت الأول من اليمين)، عجبتني مرة الألوان الصارخة، و عجبني البروش أو ما أعرف وش تكون القطعة اللي بالوسط، أحس اللبس هذا بيكون حلو على زندايا. أعجبتني البدلة اللي فوق من أكويلانو رايموندي، ما أتذكر إن روني مارا تلبس بدلات، بس أحس هذي بتكون حلوة عليها، أعجبني القطعة الترتر اللي طالعة من تحت. الفستان اللي بعده من جورجيو أرماني، أحسه ذوق ممثلة كبيرة (نايومي واتس أو جوليان مور أو حتي جودي فوستر)، لكن أحس بيكون حلو على إيما واتسون.
البدلة برادا تحت (صفراء ليموني) أحسه مصنوعة لإيل فانينق، بس ما عندي مانع أشوفها على أيد أحد على الريدكاربيت، اللوك اللي بعده من روبيرتو كفالي، أعجبني إن الجاكيت من دون أكمام و مبطن بقماش مشجر، أعرف إن لبس زي كذا ما يكون كثير على الريدكاربيت، بس أحسه بيكون حلو على بوبي دوليفان.
* باقي الملابس الجاكيت اللي فوق الأول من اليمين من No. 21 و اللبس الأخير تحت من جست كافالي. 

Mother's Day Gift; Sorted

اليوم كان فيه عرض دولتشي آن قابانا فكرته كانت الأم، أعتقد الفكرة جت من حمل بيانكا بالتي (عارضة إيطالية ووجه لدولتشي آن قابانا). و بعض الملابس خصوصا اللي عليها رسومات، كانت مأخوذة من فستان أنجلينا جولي هنا. صراحة على إني حسيت الفستان اللي حطيت رابطه مافيه أي ابتكار، أعتقد المجموعة بشكل عام حلوة. 

أشكال الملابس ما تغيرت عن مجموعات دولتشي آن قابانا بالسنوات الأخيرة، الشيء المختلف زي دايم النقشات. صراحة من المجموعة اللي فاتت اللي كان فيها تأثير إسباني، عرفت إن فكرة دولتشي آن قابانا بإنهم يسوون ملابس كلها مستوحاة من صقلية ما راح تطول. خصوصا إن أشكال الملابس ما راح تتغير، كل اللي يشتغلون عليه هي الطبعات. على إني أشوف بعض الأشياء كأنها من روموي (اللي ما يعرف روموي، هو موقع يبيع ملابس صيني)، لكن بشكل عام أعتقد إن المجموعة ظريفة. القطعة المفضلة عندي هي الفستان الأول من اليمين، أعجبني الذهبي مع العنابي، أعجبني بعد بروز الوردة. الفستان اللي أظن أنهم فيه قلدوا فستان أنجلينا جولي، ظريف، صح مو مبتكر، بس للي يدور فستان زواج يشبه فكرة فستان أنجلينا، أعتقد هذا فستان مناسب بسعر أرخص. 

وش رأيكم بالملابس و رسومات الأطفال، طبعات الورود على ملابس دولتشي آن قابانا بهذا العرض؟ 

Made for Keira

أمس كان فيه أكثر من عرض (زي دايم) أشهر العروض: روبيرتو كفالي، فيرساتشي، و بوتشي. أعتقد إن بوتشي كان أحسن هذي الثلاثة عروض بالنسبة لي كان بوتشي، لكن العرض المفضل عندي هو عرض أنتطونيو ماراس (أظني تكلمت عنه قبل). 

ما أعرف ليه أول ما شفت الملابس جت ببالي كيرا نايتلي، أعتقد كل الملابس اللي حطيتها تصلح لكايرا، يمكن ما عادا الثاني من اليمين (المفضل بالنسبة لي)، أعتقد إنه مرة يصلح على ميا فشكوفسكا. الفستان الأخير (أقصى اليمين) مع إني أشوف كيرا نايتلي فيه، أحس ممكن سوسي بوبل تلبسه (مدونة فاشن بريطانية). غير الفستانين الأول و الأخير، اللي تقريبا هم واحد بس الألوان و الأقمشة مختلفة، أكثر شيء عجبني بالفستان الثالث من اليمين، إنه إلى الركبة تقريبا فستان عادي، بعدين عاجبتني القطعة اللي تحت، كأنها تنورة منفصلة. 

أحس من فترة ما شفت مصممين جدد بميلانو، مبسوطة إني مرة ثانية أعجب بتصاميم الماركة، و هذا يعني إن شاء الله إنه بيكون على قائمة المتابعة للمواسم الجاية. 

أنتم وش رأيكم؟ عجبتكم الملابس؟ أو تفضلون عروض معروفة أكثر زي كافالي و فيرساتشي؟ 

That's More Like It!!

عقلي يقول لي إني قد كتبت عن جيامبا من جامباتيستا فالي، بس بنفس الوقت أتذكر إن مجوعته الأولى (اللي كانت ربيع 2015) ما أعجبتني مرة، علشان كذا ما أحس إني تكلمت عنها. ما يهم إذا ما تكلمت هنا أقولكم إنه جامباتيستا فالي طلع ماركة إسمها جيامبا (هذا ثاني عرض لها)، و أظن فكرته إنها تكون أقل رسمية من ماركته الأساسية جامباتيستا فالي. 

المهم خلونا نتكلم عن هذي المجموعة، أولا خليني أقول إن كل قطعة بهذي المجموعة أعتقد إنها مصممة ليلينا بيرمينيوفا (للي ما يعرفه من هذي، هي عارضة روسية، و صديقة فالي بعد). أعرف إن يلينا تميل للأوت كتور من فالي، بس ما يمنع إنها تلبس من خط الملابس الجاهزة. بعيد عن يلينا اللي أتوقع إنها راح تلبس أكثر من قطعة من المجموعة هذي، أعتقد هذي المجموعة بيكون له تواجد على الريدكاربيت أكثر من مجموعته الأولى. الفستان الأول من اليمين، ودي أشوفه على ديان كروقر أو كيرينن شيمبكا. الفستان الأسود أحسه بيكون حلو على جنيفير كونللي، مع إنها صايرة ما تلبس إلا لوي فيتون. الفستان الأومبريه، أحسه بيكون حلو على إل فانينق، و أتمنى أي أحد يلبسه، أو يلبس أي لوك عليه هذا الحزام السرج (كان فيه أكثر من واحد)، إنه ما يشيله، لأنه مدخل حدة شوي، على هذي الملابس الناعمة، و الأخير أتمنى أشوفه على لوبيتا أو بوبي دوليفان. 

وش رأيكم بالملابس، و لو كنتوا شايفين المجموعة الأولى (اللي فاتت)، أي وحدة تفضلون؟ 

Wearing Street Art

أولا خليني أبدأ إني مو معجبة بجيرمي سكوت، و لا أغلب شغله، لا بجيرمي سكوت و لا بمسكينو، مو بس لأنه مو ذوقي، لأن حساب إنستقرام حقه بلك حساب وحدة تقوله إنه آخذ تصاميمها. أظن لو كان الموضوع بس تشابه أفكار، ما يحتاج إنه يحجب أي أحد يعطي وجهة نظره حتى لو ما كانت تعجبه. 

أعرف إني ذكرت إنه ما يعجبني، بس صراحة لو الفساتين اليوم بعرض موسكينو كانت من فكرته، أعتقد إنها مرة مثيرة، و تستاهل أحد يتكلم عنها مع كل هذا القرافيتي. ممكن تكون الفكرة جت من عرض أليكساندير ماكوين ربيع 99، لو كان من هنا جاب الفكرة، أعتقد إنه إلى الآن التنفيذ كان مرة حلو.

مع إني سمعت إن عنوان الميت قالا هذي الملابس الصينية، و الأزياء المستوحاة منها، لكن أعتقد هذي الملابس تصلح مرة للميت قالا، خصوصا الفستان الثاني من اليمين و البالطو أو ما أعرف وش يكون اللي بالأخير. اللبسين الأول و الثالث أعتقد لهم فرصة على الريدكاربيت، أعتقد الفستان الأول من اليمين بيكون مرة حلو على ريانا، الفستان الثالث أحس تصميمه من دون طبعات القرافيتي تناسب ذوق كايرا نايتلي و ديانا كروقر، لكن ودي وحدة تفاجأني و تلبسه حتى مع هذي "الشخابيط". 

أنتم وش رأيكم تحسونه حلوة، أو تشوفونها مرة غريبة ما تناسب ذوقكم؟