Wearing Street Art

أولا خليني أبدأ إني مو معجبة بجيرمي سكوت، و لا أغلب شغله، لا بجيرمي سكوت و لا بمسكينو، مو بس لأنه مو ذوقي، لأن حساب إنستقرام حقه بلك حساب وحدة تقوله إنه آخذ تصاميمها. أظن لو كان الموضوع بس تشابه أفكار، ما يحتاج إنه يحجب أي أحد يعطي وجهة نظره حتى لو ما كانت تعجبه. 

أعرف إني ذكرت إنه ما يعجبني، بس صراحة لو الفساتين اليوم بعرض موسكينو كانت من فكرته، أعتقد إنها مرة مثيرة، و تستاهل أحد يتكلم عنها مع كل هذا القرافيتي. ممكن تكون الفكرة جت من عرض أليكساندير ماكوين ربيع 99، لو كان من هنا جاب الفكرة، أعتقد إنه إلى الآن التنفيذ كان مرة حلو.

مع إني سمعت إن عنوان الميت قالا هذي الملابس الصينية، و الأزياء المستوحاة منها، لكن أعتقد هذي الملابس تصلح مرة للميت قالا، خصوصا الفستان الثاني من اليمين و البالطو أو ما أعرف وش يكون اللي بالأخير. اللبسين الأول و الثالث أعتقد لهم فرصة على الريدكاربيت، أعتقد الفستان الأول من اليمين بيكون مرة حلو على ريانا، الفستان الثالث أحس تصميمه من دون طبعات القرافيتي تناسب ذوق كايرا نايتلي و ديانا كروقر، لكن ودي وحدة تفاجأني و تلبسه حتى مع هذي "الشخابيط". 

أنتم وش رأيكم تحسونه حلوة، أو تشوفونها مرة غريبة ما تناسب ذوقكم؟ 

Silly Fashion

اليوم برادا عرضت، لكن الشيء اللي حسيت أنه يستاهل تعليق، هو عرض موسكينو، ما أتذكر قد تكلمت عن موسكينو قبل، بس أعتقد بعد ما شفت أول عرض كبير لموسكينو بعد ما صار مصممه جيرمي سكوت ما أقدر ما أتكلم. ما أتذكر آخر مرة (قبل هذا الموسم) نقدت عرض معين، لكن ما أعرف شكل الهرمونات مضروبة اليومين هذي. ما علينا خلونا نتكلم بالمجموعة.

قبل لا أتكلم عن المجموعة، للي ما يعرف جيرمي سكوت قبل، هو مصمم سويتر اللي عليها بارت سيمبسون و صورت فيها كارا دوليفين صور كثيرة (للي ما شاف الصورة، هنا وحدة). حطيت لكم الصورة، أو عرفتكم فيه، علشان يصير عندكم تصور عن تصاميم المصمم. صراحة ما قد أخذت جيرمي سكوت بجدية، و لا أنتظر منه شيء معين، لكن أحس مهما كانت تصاميم موسكينو شوي مهبولة، أحس فيه حد للهبال و التنكيت، على الأقل لما يكون علي ماركة ما راح أدفع بأي شيء منها أقل من 400 ريال. خصوصا الحين فيه رومواي و المواقع الصينية الثانية اللي تشبه له. بلا مبالغة، أعتقد إني اخترت هنا أحسن الأشياء، و إلا المجموعة فيها سبونج بوب، و ستيانة على شكل شنطة، و فستان كأنه (علبه بوب كورن، شوكلاته هيرشي، و شبس شيتوس). أنيا هايندمارش عرضت مجموعة شنطها للخريف الجاي و كان فيها أشياء كأنها كورن فليكس و صابون إيريل، بس أحس سوتها بأناقة بالذات توني ذا تايقر. 

أنتم ما أعرف رأيكم بهذي الأشياء تعجبكم، أو تعتقدون أنه حسافة فيها الفلوس؟ أو أشياء تعجبكم و أشياء لا؟ 

The White Tee

أمس لما وقت زي دايم بصندوق البريد، لقيت شيء أسود مغطي، و قريت مكتوب بالأبيض Net-a-Porter.com المهم شوي لأكسر الصندوق من الحماس، و لما فتحته لقيت مجلة الموقع مرسلينها لي، و أنا ما طلبتها (شكرا يا نيت آي بورتيه) هذا اللي قدرتوا عليه P:.
مع أني مو مرة مع مجلات الأزياء (يعني مطبوعة) أحسها تشتتني بكبر و كثر صورها، بس شفت هذا الشيء و عجبني.

لقيت هذي الصفحة، طبعا هذي شكلها عقب ما قصصتها، بس هي (يعني الأساسية) بس مرسوم عليها هذي البنت و هي لابسة هذا التي، و حاوليها هذي الخيارات من التنانير. و أنا أخترت هذي.
قبل لا أدخل معكم بتفاصيل اختياري، التي شيرت الأبيض السادة، صار من أهم موضات ربيع و صيف 2011 و شكرا لمجموعة جيل ساندر (اللي بنظري أظن إنها أنجح المجموعات لهذا الموسم).

نرجع لخياراتي، أخترت هذي التنورة من روكساندا لينشيشلأن لونها حلو، و شكلها حلو، بالنسبة لي بتعطي التي الأبيض شكل حلو، صحيح مو عاجبتني يعني فوشيا على فوشيا بايخ شوي، بس لو كان عندي فلوس، راح زختار هذي الجزم من عليه، من زمان عاجبتني عزالدين عليه أحسها تحفة، و هذا الكعب الصندل الرمادي بيكون حلو مع اللبس.
 نجي للتنورة الموسكينو، ودي أقول للي سواها إحلف ... يعني ببساطة، ألقى تنورة زي هذي عند Forever 21، معقولة أدفع حوالي 4000 ريال على تنورة زي كذا؟ ما أدري بس فيه مثل يقول رزق الهبل على المجانين، ما سوو شيء زي كذا، إلا لاقين أحد يشتري.
التنورة جيل ساندر، حلوة نقشاتها بس طفشت من التنانير البنسل (اللي ناس يسمونها "سكني")، بالنسبة لي أفضل الشنطة اللي زي النقشات، يعني ممكن ألبسها مع اللوك هذا.
التنورة اللي من إيرديم حلوة، بس هذا الشكل مليته شوي، و بعد أحسه بناتي على ذوقي، التنورة مو موجودة إلا على أي نيت بورتيه الأمريكي.
التنورة اللي يمكن أختارها بعد تنورة روكسندا، هي هذي التنورة اللي من كريستفور كين، لونها حلو، و يكفي إنها دانتيل، بس خلاص إنا قررت إني أبغى روكسندا، يعني روكسندا P:.

شرايكم بهذا اللبس؟ يعني بس روحي لأقرب زارا خوذي تيشيرت أبيض، و ألبسي التنورة اللي تحبينها.