Best Dressed: November 2013

زي ما قلت لكم اليوم راح يكون عن أحسن لبس لشهر نوفمبر. إلى الآن أفكر بطريقة لترشيحات أحسن لبس، أعتقد إني بأخليها بالأسبوع الثالث من يناير، و طبعا بيكون فيها الفساتين الإثناعشر اللي فازت بترشيحات الشهور اللي أخترتوها. 

ما علينا من أحسن فساتين السنة، خلونا نشوف فساتين نوفمبر. 

أولا خلوني أقولكم إني مبسوطة، فستانيين من اللي قلت إنها راح تكون بالريدكاربيت انلبست، فيه فساتين ثانية انلبست بس النتيجة ما عجبتني، المهم هنا اليوم معانا روني مارا ببلانسياقا و شو كي بفالنتينو كتور. كل الثنتين أعجبوني مرة. بعد أعجبتني كايت بيكنسيل بالقوتشي، من زمان ما أعجبتني هذي الطريقة باللبس "هوليوود قلامور" بس مع لون الفستان أحس شكلها طالع مرة حلو. من زمان عن ليتون ميستر، بس عجبني شكلها هنا، أحسه مرة مرتاح، لكن لو سألتوني وشو اللوك المفضل عندي (اللي ممكن ألبسه على طول) من دون كلام أليكسا شونق (مو مفاجأة إني صايرة أحبها أو أحب ستايلها مرة). 

أنتم وش اللبس الأحسن عندكم؟ الأسماء محطوطة عكس عقارب الساعة. 

Create your free online surveys with SurveyMonkey , the world's leading questionnaire tool.

Best Dressed: October 2013 Winner

بصراحة توقعت أنكم ترشوحون اللبس اللي رشحته، مو لأني أنا اللي رشحته ولازم تطيعون كلامي، لكن ما أعرف ليه كنت أعتقد أنه هذا اللي بيعجبكم أكثر. اللبس اللي كان ببالي هو أنيا ريبوك بإيلي صعب، بس أنتم أخترتوا أشلي ميداكوي بزميرمان. 

لبس آشلي كان من أول الأشياء اللي شفتها بشهر أكتوبر، و على طول عرفت أنه لازم أدخلها القائمة، غير لون روجها اللي أعطى اللبس فخامة و جو "شتوي شوي"، ألوان اللبس مع فكرة أنه كروهات، أحسها مرة مناسبة للبس شتاء اللي ما عنده شتاء. مع أنه شيفون و خفيف، و قصير و من دون أكمام، إلا أنه أعطاني شعور أنها متدفية، وبنفس الوقت إن الجو برد. مرة عجبني شكلها، أنيق و جديد (على الأقل علي)، و أهم شيء أحس أي أحد ممكن يسوي هذا اللوك. فستان من زارا، و روج عنابي و صندل. مع شعر سلييك. 

أنتظروا بكرا ترشيحات شهر نوفمبر، إن شاء الله بتكون حلوة. و متنوعة. 

The Eyebrows Kit

لازم أوضح بالبداية إني شخصيا ما أعتقد إني مؤهلة للكلام بالحواجب، لأني ما عمري سويت حواجبي عند أي شخص "متخصص" و لا قد رسمتها أو غيرت شكلها بحياتي، لكن هذا البوست باكتبه عن الأشياء اللي أعرفها، و لأن ليلى سألت هنا عن الحواجب، فيمكن تلقى شيء مفيد، مع إني أشك. 

قبل لا أبدأ عندي أحساس أنه هذا أطول موضوع راح أكتبه، بنفس الوقت أحس أنه أكثر موضوع بيكون مو مفهوم. بس ما علينا، باجرب و إن شاء الله يخيب ظني. 

زي ما قلت لكم قبل ما عمري خليت أحد يلمس حواجبي، بالنسبة لي الحواجب أفضلها "طبيعية" ما أحبها مرسومة بحدود و زوايا واضحة، علشان كذا أظن إني أحسن من بيفهم حواجبي. زي ما قلت لكم ما قد رحت لأحد، لكن كل الكلام اللي باكتبه هنا سمعته من مايك آب أرتيست مختلفين، و جمعت منهم الأشياء اللي عجبتني، و اللي أنا أسويها، و أعتقد أنه مناسبة للطريقة اللي أحب حواجبي تكون عليها. 

1. أولا، أبلل حواجبي بموية كل بين فترة و فترة، و أمشطها، بالمشط أبو وجهين (ما أعرف وش أسمه) على فوق و الشعرات اللي تطلع برا حدود الحواجب أقصها، أعرف الوصف صعب بس يمكن تفهمون من هذي الصورة. طبعا لازم يكون المقص صغير و حاد. (هذي الخطوة تساعد على ترتيب حواجبك بشكل ما تتخيلين، و يسهل عليك تطلعين الشكل الأنسب لرسمة الحاجب اللي تصلح لك. 
2. الشيء اللي بعده أسويه، أنظف أي شعر زايد خارج المنطقة اللي المفترض تشكل الحاجب و هي واضحة بهذي الصورة. إذا ما تعرفين من وين المفروض يبدأ حاجبك و وين ينتهي، خوذي أي قلم أو كحل، و حدديها زي مو واضح بالصورة، أي شعرات زايدة من الجهتين أشيلها بالملقط. فيه ناس يستخدمون هذا الموس، بس أنا عندي مشكلة من استخدام الموس على الجسم بشكل العام، لو كنتوا تفضلونه بكيفكم، بس هو شيء نفسي. اللي دايم أسمعه أنه لا تشيلون أبدا من فوق، إذا بتحددون شكل حواجبكم اشتغلوا عليها من تحت أو من الجوانب. 
3. ما عمري شريت قلم، و لا قد جربت، يمكن لأني زي ما قلت لكم ما أحب أرسم حواجبي، لكن الفترة الأخيرة قررت إني أجرب "أغمقها" بشادو. النصيحة اللي دايم أسمعها، لا تستخدم لون قلم أو شادو زي لون شعرك، دايم خذ لون أفتح، علشان كذا دايم استخدم شادو رصاصي، مع فرشة لها زاوية صغيرة، و شعرات الفرشة مرة متراصة، لكن آخر شيء قريته من واحد ما أعرف منه هو بس أظنه يسوي مكياج بنات أولسين، أنه بدل تستخدم شادو باودر، استخدم كريم أنه يعطي شكل أكثر طبيعية. عندي هذا الشادو من مايبلين "كلور تاتو" اللون Tough as Taupe، أعتقد أنه لون مرة مناسب، و أهم شيء أنه مات، يعني ما فيه لمعة، و ينشف على طول و لا يتحرك من مكانه. 
4. بعد ما أرسم خطوط بالشادو بالأماكن اللي أعتقد أنه تحتاج أغمق لون الحواجب فيها، أخذ الشيء اللي ما أعرف وش اسمه (الفرشة اللي تشبه فرشة الماسكارا) علشان يصير شكله أكثر طبيعة. 

هذا اللي أنا أسويه، ما أعرف إذا عندكم شيء تعتقدون أنه المفروض أجربه أو أسويه، أو حتى لو أنتم عندكم طريقة ثانية لا تنسون تكتبون عنها تحت بالتعليقات. 

Red by Valentino

بالصدفة عرفت عن عرض خاص لفالنتينو بالصين، كان مع افتتاح بوتيك لهم بشنقهاي. العرض شفت فيه أشياء ما قد شفتها بأي مجموعة لفالنتينو و المجموعة كلها أحمر. و ما يحتاج أتكلم أكثر لما يكون الموضوع أحمر، و فالنتينو. أظن أنكم كلكم تعرفون أنه أحسن من يسوي فساتين حمراء هو فالنتينو. 

المهم المجموعة ما أعرف إذا بتنباع بالصين لحالها، أو بكل العالم، أو حتى لو كانت أصلا بتعرض للبيع من الأساس. لكن الشيء اللي صدق أتمنى يصير، أنه أشوف قطع من هذي المجموعة على الريدكاربيت. بالذات الجمب سوت أو ما أعرف هي بنطلون و توب منفصلات (الثاني من اليسار) بس بجد ودي أشوفها على أحد. فكرة أنه كيب أو رداء شيفون طالع من التوب أعجبتني مرة. 

الفستان الأول من اليمين ذكرني بفستان من برادا لبسته ميشيل دوكري بحفل الإيمي، مع إني أحس أنهم متشابهين، ودي أشوفه على الريدكاربيت، صحيح أنه يشبه بعد واحد من مجموعة أوت كتور الأخيرة، كان عاجبني بعد، لكن أحس هذا خفيف و بيكون حلو بريدكاربيت لحدث مو كبير مرة. 

If a Tailored and a Jogger Had a Baby...

قبل يومين إيما ستون كانت بمناسبة تخص الجزء الثاني من فيلمها The Amazing Spider Man. كالعادة كان شكل إيما مرة مرتب، صحيح بالنسبة لي مو مثير، بس ما أعتقد إن الحدث بستاهل لأنه فوتو كول مو بريمير. المهم أنه إيما كانت لابسة بدلة رسميه رصاصية، يمكن أكثر شيء مثير كان الكعب الأحمر، بعدين لما ركزت، انتبها لشكل بنطلونها. 

ما عمري حبيت و لا أظني باحب السويت بانت، ما أعرف ليه، بس أعتقد أنه لا هي بجامة، و لا هي لبس رياضة، و لاهي شيء أظنه يواجه للبس برا البيت. هذا رأيي فيها. الشيء المختلف بهذا أنه مو سويت بانت سويت بانت. هذا نتاج تزاوج سويت بانت و بنطلون رسمي. بعد ما عرفت أنه من بوي، باند أوف أوتسايدرز رحت أدور عليه و اكتشفت سعره اللي ما أعتقد (بحسب ميزانيتي) أنه معقول على شيء زي كذا. شوي جاني أحباط لأني كنت أحسب أنه شيء خاص بباند أوف أوتسايدرز. 

بعد أكثر من بحث لقيت أنه فيه نسخ "رخيصة" من البنطلون. أول واحد لقيته عند توب شوب، و يمكنه يشبه باند أوف أوتسايدرز أكثر، من فوق بنطلون رسمي (و قماش بنطلون رسمي) و تحت فيه ما أعرف وش هذي تسمى كفز، بعد لقيت نسخة عند إيتش آن إم بعد، بس نسخة شوي مختلفة، يمكن الشيء اللي يشبه الملابس الرياضية أو السويت بانت هو الحبل اللي فوق. 

وش رأيكم بالبنطلون؟ أنا عاجبني. ممكن تشترونه أو تلبسونه؟ 

Mixed Metals

من فترة، ما أعرف متى بدأت بس توي أنتبه لنفسي، إني صايرة أحب المجوهرات اللي مخلط فيها الذهبي و الفضي سوا (أنا مو مرة مع القولد روز) بس ما يمنع أنه يكون موجود مع الباقين. 

زي ما قلت لكم ما أعرف متى الهوس هذا بدأ، بس بعد ما شفت صور من عرض رودارتي لخريف 2013 تذكرت إن المجوهرات كانت عاجبتني، و إنها بعد مخلطة، فيها ذهب أصفر و أبيض و وردي. بعد ما أعرف إذا كان هذا هو السبب أو لا، بس يوضح لكم إن المشكلة بتكمل سنة، فلازم نناقش الموضوع هنا سوا. 

و لأني طيبة و ما أبخل عليكم بهوسي، هنا جمعت لكم مجموعة من المجوهرات اللي مخلطة، و أعجبتني مرة. حاولت إني أختار من كل تصنيف شيء. يعني خاتم، سوارة، حلق و سلسال. 

الأشياء روابطها هنا الترتيب عكس عقارب الساعة (1) حلق من أنثربولجي ب 75 ريال تقريبا (2) سلسال حصان من مجوهرات أوديت ب 405 ريال (3) خاتم عين تقريبا ب 200 ريال (4) سوارة فيها قلب ب 430 ريال تقريبا. 

أكيد بتلقون أشياء أرخص لو بغيتوا، بس أنه حطيت هنا الأشياء اللي أعجبتني بجد. و لو ما أعجبتكم الأشياء اللي اخترتها، بس أعجبكم أغراض رودارتي، هنا تلقون الإكسسوار و المجوهرات بآخر الصفحة.  

أنتم وش رأيكم بلبس مجوهرات بألوان مختلطة؟ أو تفضلون لون واحد مع كل لبس؟ 

Pastel Got Cozy

شفت قبل كم يوم هذا الإيدتوريال لسيقريد أقرين. بصراحة ما أعرف لأي مجلة المهم أنه حمسني أكتب عن شيء من زمان ودي أتكلم عنه. هو ألوان الباستيل للشتاء. صراحة الفكرة اللي ببالي كانت اللون الوردي الباستيل للشتاء، لكن الإيدتوريال خلاني أفكر أتكلم عن كل الألوان مو بس الوردي. 

من شفت عرض توب شوب يونيك و أنا عاجبني اللون الوردي كلون لملابس الشتاء (الصورة اللي تحت يمين من العرض)، أعرف أنه بالعادة الناس تختاره للربيع أو الصيف، بس أحسه أنيق مرة للشتاء. بصراحة ما انتبهت أنه فيه ألوان باستيل غير الوردي بالعروض (كان موجود اللون الوردي بأكثر من عرض غير توب شوب). يمكن السبب أنه الوردي كان عاجبني مرة، فما ركزت على الألوان الثانية. لما شفت الإيدتوريال، ما زلت أفكر بالوردي، لكن تذكرت إني شفت بكم عرض ألوان باستيل ثانية. أعجبني كيف بالصورج اللي فوق من عرض روشا، كيف قطعة شتوية كلاسيكية زي الكارديقان الصور مع الأكمام الفرو، نسقت مع هذي التنورة اللي لونها منت قرين. أحس أعطتها روح جديدة، و لا طلعت كأنها قطعة من الأربعينات، بنفس الوقت أعطت تأثير مرة أنيق.
زي ما قلت لكم أنا عاجبني فكرة اللون الوردي للملابس الشتوية، أنتم وش رأيكم بموضوع ألوان باستيل للشتاء، أو تحبونه زي ما هو دايم، مع الملابس الخفيفة الصيفية؟ 

Sample #6

أظن من بديت سلسلة العينات هذي، ما كتبت شيء عن له شغل بالمكياج. تعرفون إني أحب المكياج، خصوصا المكياج الزين، و أعتقد أكثر شيء خسارة إن الواحد يدفع فلوس على مكياج بالنهاية ما يطلع زين، خصوصا لما يكون غالي، علشان كذا أظن إن العينات للمكياج شيء مهم جدا. 

الفترة اللي فاتت كنت أدور لي على أساس خفيف، بس يعني يعطي درجة معينة من التغطية (ما أنتظر يغطي آثار الحبوب، لأني تأكدت ما فيه شيء راح يغطيها إلا كونسيلر) لكن أبغى يعطيني لون حلو، و متواسي، يعني مو كل جزء من وجهي درجة. 

المهم أخذت لي عينة من بوشكا بي بي كريم، أولا خلوني أقولكم إني ما أصدق بالبي بي كريم، جربت لوريال و لا أعجبني، جربت ديور (أعرف كثير يمدحون بي بي ديور و بعد ما أعجبني) على الأقل درجاته ما عجبتني و لا شفته أعطى وجهي أي إضافة. بعد جربت د. براندت مات بي بي كريم و لا شفت أي شيء مميز. 

لما شفت عينة بوشكا، قررت إني أجربها (بس عن قولة) خصوصا أنه مكتوب عليه أنه ما فيه زيت (أنا بشرتي دهنية) و أنه يآخذ لون البشرة. 

بكل أساس جربته بعد فترة، خصوصا لما يكون الجو حار يطلع وجهي يلمع بشكل مثير، و لما يكون الأساس "مات" أو مطفي، ألاحظ أنه يختفي بسرعة من وجهي، ما أعرف كيف. جربت أحط بودرة بس ما تفرق كثير، و لا عندي استعداد أحط بودرة طول اليوم، أنا الشيء الوحيد من المكياج اللي ممكن أشيله معاي، و بس إذا كنت رايحة لمناسبة هي الروج. المهم جربت بوشكا، أعتقد أنه يعطي لون حلو، و متساوي على كل البشرة جلست فيه تقريبا أربع ساعات (ما أجلس بالمكياج أكثر من كذا) و لا أعتقد أنه شكله طلع بايخ، و لا صار وجهي يلمع (صحيح كنت حاطة بودرة) بس مرة قبل جربته لفترة أقصر و لا لمع وجهي. 

الكريم زي ما قلت لكم من دون زيت، و يآخذ لون البشرة (أعتقد أنه ميزة مهمة خصوصا لما يتغير لون بشرتك، فما تضطرين لآساسين) و فيه إس بي إف 27. 

سعر العلبة اللي فيها تقريبا 50 مل 38 دولار يعني 142 ريال، بالنسبة لي مقارنة ب بي بي ديور اللي فيها تقريبا 30 مل و سعرها 44 دولار يعني 165 ريال، أظن إني أفضل بوشكا، حتى لو ما جربت ديور بي بي لفترة أطول. 

Abu Dhabi Film Festival by Guest Editor: Reemito

اليوم مرة مبسوطة و أنا أقولكم إنه اللي كاتب موضوع اليوم Reemito، لو ما كنتوا شفتوا النقاش اللي صار على موضوع أحسن لبس لشهر أكتوبر (هنا) ريم قالت لي أكتب عن مهرجان أبوظبي، و صراحة ما تابعت المهرجان و لما بحثت ما لقيت صور.
ريم قررت تكتب الموضوع، بعد ما اقترحت إنها تكتبه هي. و إذا أي أحد يبغى يكتب موضوع يقول لي، بأكون مبسوطة أنه فيه أحد يشارك معاي هنا. خلونا من الكلان الفاضي، و نروح لتغطية ريم لمهرجان أبوظبي. 

بالعادة ما نسمع بالمهرجانات السينمائية العربية إلا لما نعرف بوجود نجوم هوليوود، ومن أسبوع تقريباً كان فيه مهرجان سينمائي بأبوظبي من أبرز النجوم العالميين الي حضروه فوريست ويتكير. طبعاً على مستوى الفاشن ما يحتاج نقول أن الريد كاربت كان كارثي، والسبب طبعاً استضافة فنانات الخليج والعالم العربي.. شخصياً ما تابعت المهرجان ولا عرفت إلا من هاشتقات تويتر، ،لما اطلعت على صور الممثلات عرفت سبب الضجة. كمية التلطيخ بالميك أب والتسريحات الكارثية هذا غير الفساتين المطرزة "قريت بتويتر تعليق لمدري مين: أخيراً عرفنا وين تروح فساتين المتنبي" والمتنبي للي ما يعرفه من أقدم أسواق الرياض ومعروف بفساتين جاهزة لكنها النظام القديم مليانة شك وتطريز إلخ إلخ..  القاعدة بالفاشن يا فستان يا شعر يا ميك، يعني إذا التركيز بيكون على الفستان خلي شعرك والميك أب ناعم أو العكس، ميك آب ثقيل على فستان وتسريحة ناعمة. المصيبة إن الخليجيات يبون كل شي ثقيل وهذا الي يخرب على كثير من اختيارتهم. 

ما أدري أبدأ بإيش وإلا بمين.. ع اليمين نيفين ماضي ممثلة سورية تمثل مع الخليجيين، جربت تغامر بس النتيجة النهائية توو متش. من هنا  اللوك كامل، برأيي لو تشيل الأكتاف والذيل بيطلع نايس، كمان الشعر والشوز اختيار سيء. 

ميساء مغربي الي سمعته أنها بالعادة تلبس لمصممين كبار، ما أعرف لمين الفستان بس كأني قريت أنه لأوسكار دي لا رينتا (مش متأكدة) الكثير اختاروها بيست دريسد، أشوف العقد أفضل ما في اللوك. يحسب لها ما رفعت شعرها وإلا بيكون توو متش.

الي لابسة أخضر هذي شيلاء وست، ويس هذي أختهم الصغيرة، قريت أنها ملكة جمال البحرين وشاركت في ميس وورلد ٢٠١٣. ما أدري شكلها تحسبه هالووين؟ اللوك الهندي بالغت فيه جداً. كانت تقدر تختار يا فستان يا ميك أب يا إكسسوارات أما مع بعض كذا كثير.

الي ع اليسار ما أعرفها بس بسميها (أشقر على أشقر) ينطبق عليها كل ما تكلمت عنه فوق، وأزيد فستان ذهب وشعر أشقر وتسريحة مدري كيف وميك أب عليه نقش الحنا ولا حول ولا قوة إلا بالله. برأيي هي أسوأ من شفته بلا منافس.

أريام وأختها مع فوريست ويتكر وعلى اليسار السعودية ريماس منصور ووحدة ما أعرف مين، بتكلم عن ريماس الفستان اختيار مدري إيش يبي، مبهذل مرة وزاده سوء الميك آب والشعر.

الكل كان منتظر إيش رح تلبس بدرية أحمد بعد اللوك الكارثي الي سوته العام بنفس المهرجان . طبعاً مقارنة بالعام نقول نحمد الله جت على كذا، لكن يظل فيه آخطاء كثير مثل المبالغة بالإكسسوارات والفستان ما يحتاج عقد مثل كذا. 

هيفاء حسين حلو اختيارها للون، لكن موديل الفستان مع التسريحة والميك آب ما كان موفق خصوصاً لما شفت صورها مع زوجها الممثل الإماراتي حبيب غلوم -أشوفه كيوت لأن نادر ما شفت ع الريد كاربت كبل خليجي- المهم عطاني إحساس "لوك أخوات المعرس".

وئام الدحماني ممثلة مغربية واشتهرت بمسلسل خليجي مدريش إيش اسمه، الفستان مع الكلتس مع الساعة مع التسريحة والميك آب توو متش!!

مريم حسين، للأمانة ما أعرف مين هذي لكن اللوك نظام أخت معرس بعد لكن توها متزوجة وجاية تكشخ بعرس أخوها.

ع اليمين ما أعرف مين وع اليسار سوزان نجم الدين. هذول خالات العروس ولا حول ولا قوة إلا بالله.

البحرينية فاطمة عبدالرحيم تحاول تتشبه كثير بكيم كارداشيان، ما صدقت هالكلام إلا لما شفت صور لها تنسخ لبس كيم، هنا أشوف الميك أب ملطخ ورسمة الحواجب سيئة، غير إني ما أحب هالفساتين حتى يوم آبلشتنا فيها بيونسي.

ما نقدر نجي بسيرة الخليجيات بدون ما نذكر أم المعرس "هدى الخطيب" بالخير. أوكي هو مو خير بس يعني لازم نشوف وش هببت، بغض النظر عن أي شي غلط في اللوك هي لو تخفف بس من نفخ الخدود كنا بنقدر بعدها نحكم على ملابسها.

الممثلة السورية رنا الأبيض، ما أحس الفستان ناسب جسمها خصوصاً الصدر وإن كانت تبي تبرزه بهالشكل. اللون الذهبي طالع كثير بدونه ممكن آبلع الفستان. 

زهرة الخرجي هنا مخرب عليها الويق، كأني قريت من بعد الكانسر عندها مشكلة في تساقط الشعر، بس تمنيت لو اختارت وحدة طبيعية أكثر. الفستان فيه مشكلة بالقياس طالع مو مضبوط عليها وألوانه مو حلوة.

السعودية مروة محمد، كثير مدحوها وأنا ما أول شفت الفستان من قدام بدون ما توضح التفاصيل على جنب عجبني، لو نجي للحق هو رسم جسمها بطريقة حلوة، لكن لو اكتفت هالشي بدون الأكمام الذهبية آو الأكتاف آو حتى الشرايط الذهبية الي على جنب. كل هذا مع التسريحة حقت أخوات المعرس والشي الي لابسته براسها طلع اللوك مو حلو. نعطيها نجمة على المحاولة.

مايا دياب ما تعجبني، أحياناً يعجبني لبسها بس مشكلتي معها طول شعرها. مرة مبالغ فيه واللون بعد ما أحبه. المهم فستانها ما أعرف لمين بس أكيد مصمم لبناني، الكل قارن بينها وب فستان أنجلينا أبو ساق المشهور.

جدة المعرس "أبلشتكم بهالتشبيه واضح إنه متعوب عليه :d " الأماراتية زكية طارش وأشوفه مناسب لعمرها وثقافتها مثل مالهنديات يلبسون ساري ع الريد كاربت ليش مالخليجية تلبس عباية. 

طبعاً هذي الأشياء الي شفتها.. فيه أشياء كثير ما تكلمت عنها، بس مجملاً فيه ناس لبسها معقول وأغلبهم لبسوا أسود مثل  كندة علوش وإن كان الشعر مو مرة، رزان جمال  كان ممكن أمشي لها لولا البرا مبينة وكمان لونها أبيض :\، جوانا كريم و مايا دياب.

الألوان الي تكررت كانت الأزرق: ميساء مغربي، جوانا كريم، هدى الخطيب

والأسود: كندة علوش، مروة محمد، رزان جمال، أريام ومايا دياب

أشوف جا الوقت الي نعلن اننا محتاجين فيه لستايلست. لعل وعسى تقل فشايلنا عند العالم، عارفين كان مفروض جينفير أنيستون تجي المهرجان! الحمدلله يا رب ما جت. القاعدة الي يحتاجون يتعلمونها ببساطة:

Let the dress do the talking

صوتوا مين برأيكم أسوأ لبس؟

Create your free online surveys with SurveyMonkey , the world's leading questionnaire tool.

بالنهاية دوركم تحشون.. برأيكم مين كانت أفضل لبس؟ وهل فيه لبس أبشع من كذا بس ماذكرتهم؟

New Classic

قبل فترة شفت فيلم بلو جازمين (معلومة جانبية: عجبني) المهم بعد ما شفته قررت إني أروح أشوف فيلم I Am Love، الفيلم للي ما يعرفه هو فيلم إيطالي لتيلدا سوينتين. الفيلم من زمان نازل (مو بلو جازمين)، و أتذكر إني لما شفت الستيل حقات الفيلم تحمست له (تحمست حتى للملابس)، المهم بعد فترة شفت التريلير و خف حماسي و بعدها كل مرة أأجل المشاهدة . ما أعرف ليه كان ببالي أنه الستايل تيلدا سونتين و كايت بلانشيت بالفيلم متشابهين. بس طلعوا ما يتشابهون. الشبه الوحيد كلهم ثريات. 

Chic by dejavuar featuring a print pencil skirt

Carven print pencil skirt / Semi Couture sweater / Burberry ankle strap heel sandals / Yves Saint Laurent shoulder bag, $1,700 / Tom Binns pearl chain necklace, $785 / Tom Ford fragrance

بس الفيلمين أعطوني فكرة هذا السيت و هو لبس "الكلاس" أولا لازم أحط توضيح أنه لبسي مستحيل يكون كذا (مو أسعاره) صحيح ما أقدر على الأسعار، لكن قصدي حتى الشكل. و لأني ما أقدر أسوي شيء "ممل" قررت أحافظ على الفكرة نفسه، يعني مثلا أحس عقد لولو و تنورة بنسيل و كنزة كشمير، شيء أساسي بهذا اللوك. أول شيء جا ببالي هذي التنورة من كارفين اللي على شكل جلد غزال، من زمان عاجبتني و لقيتها فرصة إني أحطها بهذا السيت. الشيء الثاني قررت أختار هذا العقد اللولو اللي محيوس، أحس تعطي لمسة غير على هذا اللوك اللي مرة سلييك. قررت إني أختار ألوان خريفية و كلاسيكية و أهم شيء لقيتها فرصة إني أختار هذا العطر من توم فورد اللي اسمه "جازمين مسك" (ترا ما قصدت إني أربطها ببلو جازمين :P) بس لو ما حصل لكم أي شيء من هذا السيت روحوا و شموا العطر هذا عند باريس قاليري ريحته مره حلوة و يصلح هدية. 

The Best of Isabel

باكتب هذا الموضوع لأن بعد عشرة أيام (14 نوفمبر) المفروض بينزل تعاون إيزابيل ماران و إيتش آن إم. بصراحة ما تحمست للتعاون ما أعرف ليه بس الصور اللي طلعت للمجموعة ما حمستني. لكن شيء وحيد كنت أتمناه من هذا التعاون و اكتشفت أنه موجود يمكن بس قبل أسبوع أو أقل هو بنطلون ترتر. 

أعجابي بهذا البنطلون الترتر اللي كان بمجموعة خريف 2010 ما أعرف وش سببه، عندي قناعة أنه جزء كبير منه لأن اللوك كانت لابسته فاريا بيها. و لا أنكر أنه التنسيق حلو، خصوصا أنه فيه خلط (تعرفون إني أحب الخلط) أعجبني الكعب مع السويتر مع البنطلون. من شفت المجموعة و أنا أتمنى لو أقدر ألبس شيء يشبه له بحفلة. ما أعرف كم بتصير سعر النسخة اللي من أيتش آن إيم، بس لو كانت منطقية، و شكلها مو رخيص أكيد بافكر فيها.
الأشياء الثانية اللي كانت بمجموعات ثانية لإيزابيل و بعد أعجبتني مرة، بس لحد الآن ما شفت أي علامة أنه فيه نسخ منها بتكون بهذا التعاون. الأول البمبر اللي عليها طبعات ويسترن، المجموعة هذي كلها أعجبتني، بس بمبر+ طبعات غربية أكيد نسخة فايزة عندي. قد سوت إيزابيل بمبر قبل، و أعتقد أنها هي اللي جابت موضة البمبر، بس هذي بالنسبة لي اثنين في واحد.
الشيء الأخير هي هذي الصنادل، اللي بعد حسيت فيها كأنها نسخة الصنادل من أبوات الكاوبوي (ما أعرف كيف أفسر أكثر) لكنها عاجبتني مرة من أول ما شفتها.

متحمسين على تعاون إيزابيل ماران و إيتش آن إم؟ وش أكثر شيء متحمسين له لو كنتوا شايفين اللوك بوك؟ و وشيء الأشياء اللي تحبونها عند إيزابيل ودكم تشوفونه بالتعاون؟ 

Like a Fairytale

الشيء الحلو بكتابة هذا الموضوع إني ما أحس إني تحت ضغط إني أكتب عن حدث معين أو موضة معينة لا تروح، أقدر أكتب عن أي لبس أحبه، و أحس أنه بيعطيني ألهام أو يحمسني إني أسوي شيء جديد. طبعا أكيد أتكلم من ناحية الملابس.

أول شيء أسمحوا لي أقولكم قصة قصيرة حزينة، مو حزينة مرة، بس حزينه. كمبيوتري خرب و ضاعت معاه صور الشهور اللي كنت أستخدمها مع هذا الموضوع. القصة اللي غير هو أنه الحمدلله من زمان و أنا تقريبا حولت كل الأشياء اللي مهتمة فيها (مواضيع، صور) كلها أحفظها أونلاين، فما خسرت شيء كثير.

نرجع للبس. اللبس هذا عاجبني من أول مرة شفته، أحس حمسني ألبس لبس كذا، ما أعرف كيف آصفه، بس كأنه رسمة من قصص أطفال، بسببه تحمست بعد لو عندي سكارف حرير أو حتى جزمة عليها نقشات إيرميس (بالصدفة شفت تعاون قديم بين شركة "فانز" حقت جزم سنيكيرز و إيرميس "هنا صورة") و أول سؤال جا ببالي؟ وين كنت يوم هذا صار؟ ليه فاتني؟!!! ما علينا. الشيء الثاني اللي ملاحظته على نفسي، كل ما برد الجو قلت لنفسي ليه ما عندي شيء كاميل أعرف أنه ما عاد موضة زي ما كان قبل كم سنة، بس لون زي كذا ما أعتقد له موضة، على الأقل بالنسبة لي.

للي عاجبة الفستان و يقدر عليه، هو بالصورة على مصممته، مصممة روسية إسمها فيكا قازنسكايا، و موجود عند نيت أي بورتيه هنا .