الاثنين، 20 سبتمبر 2010


من عروض أمس بلندن كان عرض أنتطونيو بيراردي ... أنتطونيو بشكل عام مو مودي مره، بس عنده أشياء حلوة، و شكله عارف طريقه لهوليوود، العرض الأخير أعجبني تقريبا كله، إلا كان في مجموعة فساتين فوشيا ما عجبتني، و حسيته داخله عرض يعني أنتطونيو حاول يكسر العرض الي كله أبيض و أسود و رمادي، و شوي شوي ترابي ...
ما أعرف وش فيني هذي السنة بس شكلي كارهه السيلبرتي ما فكرت فيهم أبدا، أول ما شفت الفستان، عجبني الجزء الفوقي منه، فكرت بجيسيكا ألبا، يمكن عشانها لبست مره لبيراردي و كان حلو، بس ماش ما حسيت هذا بيطلع عليها حلو، حسيت بيكون ماصل ... بس حفظته عندي، كالعادة زي كل شي و أنا أصلي المغرب اليوم جت على بالي كيرستين و هذاني سويت الست لها.
كيرستين من الناس القلال الي لما يلبسون أسود و أبيض يكون حلو عليهم، مو قصدي إن هذولي اللونين شينات، بس قليل ما تبرز الواحد، خصوصا لما يكونون سوا، هم لونين آمنين بس مو مميزة، يعني على طول تعطي شعور أنه الجامعة ... بس بقدرة قادر كيرستين تخليهم حلوين مع بعض.

ليست هناك تعليقات:

إرسال تعليق