الثلاثاء، 19 أغسطس، 2008

فاصل إعلاني ..



جاستن تمبيرلايك، أبو صوت رجولي جنان، يقولون أنه مو بس موهوب بالغناء فاجأ الي جايين لعرض ويليم راست بأسبوع الموضة بنيورك و طلع موديل (بس لا تخوف) ..

جاستين أنضم لقائمة المشاهير يآالي صاروا وجه لوليم راست (على إيه؟ و تلقوه يآخذ ذاك المبلغ) مثل صديقته الشينه جاسيكا بيل و جاسيكا سيمبسون الحلوة الثانية. المهم تلقون جاستين على الصفحة الرئيسية للموقع حق ويليم و كمان صورته هي الي تودي لمجموعة الرجال p: .



الاثنين، 18 أغسطس، 2008

2008 ALMA Awards

مثل ما قلت قبل ع الريد كاربيت هنا ينكشف كل أهل هوليوود، و كل ما صار الحدث أهم كل ما صار التعب أو الفضيحة أكبر .. هذي صور من جوائز ألما .. صراحة مو كثيرة بس بنعلق ع الي نقدر وزي ما قلت لكم قبل لحد ما نعرف ماركات الملابس.


(تحديث أسماء بعض المصممين)
إيفا لونغوريا باركر

إيفا بالنسبة لي هذي أحسن طله لها من بعد ما قصت شعرها بوب، طبعا ما أقول إنها صارت قروية بس القصة كبرتها. الفستان مو متأكده أظنه "أوسكار دي لا رينتا".

سيلينا قوميز (١٥ سنة) هذي البزر تشب لي كبدي، ما أدري متىتعرف تلبس لبس بعمرها حتى لو شفتوا لبسها بالتينز أوارد كانت الجزمة أكبر منها. الحمد لله أن الجزم متغطية اليوم D:. لبسها أظنه من مارشيسا (طلع صح) (;.

قايلة لكم إني أرحم أمريكا فريرا أكثر شي بالعالم تتعب و النتيجة زيرو .. اللبس و الله مو شايفه فيه شي بس أختي تقول إنه حلو المشكلة منها .. إذا اللبس حلو ما أعرف وش مشكلتها مع الجزم صراحة الجزم مو لابقة هي مو شايفة أن الفستان مايل ع العاجي و هي لابسه جزم بيض؟!!! عجزت أحزر الفستان من تصميم مين بس الظن أنه مصمم أمريكي أو ممكن ماثيو وليمسون (ثلاثة بالمية). (طلعت المصممة الأمريكية ديان فون فوريستنبرق)

آشلي تازديل اللهم طولك يار روح ع الناس الي قاصة خشومها .. اللبس من أوله لآخره مو عاجبني أولا الفستان ما أشوف فيه أي فكرة، شعرها غلط .. و الإكسسوار الي مع الفستان (الجزم - الشنطة) مو لابقة لأن الأصفر هذا الليموني يلبق ع الألوان الساطعة أو الفاتحة (أبيض - فوشيا) . (برالي بايو)

و الله ما أدري وش أقول يا جاسيكا من ولدتي و أنت مو على بعضك الفستان صراحة ما يواجه لا موديل و لا خياط و لا قماش .. بس أشفع لك راجع لك الألق شوي .. كان شكلك يفشل ..شكلها حاطه كل فلوسها بالحلق الحق حلو ما أدري هو ألماس وردي أو سافير مع أن لونه لون ألماس .. إذا هذي كلها ألماس فأنا أشهد أن لا إله إلا الله D: (تصميم نرسيسو رودريقز، لو أنا منتبه شوي كان شفت اللون زي لون عطره P:)


يعني المحصلة ما في لبس إلى الآن بكل الحفلات الواحد يول واااااااااو بجد مع أن المصممين ما قصروا السنة هذي مجموعات توجع القلب .. بس أظن من كثر الفلوس اتشتتوا ما يدرون وش يشترون.





الأحد، 17 أغسطس، 2008

Brit Men .. (3(

هذي الحلقة الثالثة معانا اليوم روبيرت فريند صديق كايرا نايتلي، و للي شاف Pride & Prejudice هو مستر ويكام. اللوك حقه دايم خفيف و مريح، و ألوانه حلوه، الرجال نحيف يعني ما في عذر للي يقولون ما عندنا أجسام p: .. طبعا الرجل حلو و كثيرة مرة على كايرا :)

قلدوا لبسه بس رجاء لا تسون أي شي يسويه بشعرة، يعني لا تطولون شعوركوم و لا تصبغونها :)

روبيرت فرايند

اللوك كامل حلو، طبعا هو الي ع اليمين p: بس النظارات لا تشترونها، تعرفون مو كل شي ممكن يلبق على كلن، مو عاد نظارات زي الشكل هذا، يعني أعرفوا أنه ساعات اللبس من لباسه.

بوب بالفلانتين (ما أرفض واحد زي كذا أبد ) :) لابس جينز غامق مع حزام و جزم بيض تي شيرت مقلم تقليم عريض (اللبسين كلهم يصلحون لأماكن كثيرة، و صبح و مسا، بشرط أنها ما تكون حفلة رسمية، أو اجتماع رسمي)

لبس شتوي، كمان ينفع لكل وقت، بس لو بغيته يكون أكثر رسمية و احترام لا تلبس جينز مشقق. و لاتلبس شال مادامك ما تعرف تعقد.

روبيرت بقميص فاتح مشجر صغير، و بنطلون جينز باهت وسيع، مع شبشب لبس صيفي و يصلح للناس الي تتسيح الحين.

ما أعتقد إن اللبس يحتاج شرح، لبس صيف برمودا، شباشب و قميص فاتح شنطة، بس بأكد على الشعر، لا تقربون منه D:.

إذا فيه بالسلسلة هذي جائزة لأناقة البسيطة أكيد يتروح لروبيرت، مو زي الي بجنبه واضح إنها متعبه حالها عشان تطلع باللوك هذا. زي ما قلت لكم الشال دايم يسوي فرق و يخلي الواحد شيك. و بعد لبس قميص تحت الكنزه صح رنها حركة تقليدية بس أنيقة، و دايم أختار القميص الصح، يعني لا يكون مشجر أو مقلم، يا كروهات أو سادة حسب الي يمشي مع الكنزة.

ما يغير كثير بلوكه، نفس الجينزات الباهته، و سعيه مع حزام بس الشي الغير بهذي الصورة هي القميص الضيق، لا تلبس القميص الضيق و أنت عندك مشاكل بالجسم يعني لله و للناس D: و مو لازم عشان يطلع شكلك حلو تكون كأنك مخنوق بملابسك يعني الوسع زين. :).


ما يستفاد من روبيرت: الملابس مو لازم تكون غاليه أو رسمية عشان تطلع حلوه، يعني لبسه ممكن ببساطه تلقاه عند ماركات سعرها متوسط زي "دبنهامز" و لا لازم تلفلف أكثر من مكان يعني يكفيك مثلا جينزين غامق و فاتح ضيق و وسيع. ما يحتاج يكون عندك جزم كثيرة جزمتين بالكثير و أطلع بشباشب، بس مو كل مكان تروح فيه بشبشب p:.


مواضيع ذات صلة:

Brit Men .. (1(

Brit Men .. (2(




السبت، 16 أغسطس، 2008

فاصل إعلاني ..

هذي المخلوقة كارثة متنقلة، الي يسوي فيها جريمة مأجووور .. ما أعرف مين الي عاطيها وجه، يعني عندك فلوس معناها تفهمين و إلا حلوة ؟!!! :) ..
أنا صرت أحب هذي العائلة، من بعد ما قرر جدها أنه يحرمها من الورث :) و الله أنه رجال. عشان كذا المرة مشتغلة بقوة تحصل فلوس و صارت بجد I work very hard :P .. المهم رايحة لكوبينهاغن عشان تطلق خطها الجديد من الشنط. اللهم طولك يا روح.


مواضيع ذات صلة:

فاصل إعلاني .. (باريس و خط الجزم الخاص).

الجمعة، 15 أغسطس، 2008

Brit Men .. (2(

الثاني مو بريت بريت، بس نقدر نقول، يعني هو إيرلندي، و الإيرلنديين علاقتهم تاريخية مع الإنجليز، و جيران :) كمان عايش بلندن، و خاطب بريطانية :)

جوناثان ريز ماير

الرجل هذا واااااو عليه وسامة لا حول و لا قوة إلا بالله، أول مرة شفته بـ Match Point و كانت شخصيته توجع القلب بعدين أكتشف العالم وسامته و صار وجه لهوغو بوس طلع بإعلان ما أشتهر قوة زي xx-yx الثاني هذا هو الإعلان:



هذا الممثل ممكن تلقاه لابس لبس Bad Boys جلود و جنينزات، و ممكن تشوفه بدلة رسمية تآخذ العقل، بس دايم في لمسته ع اللبس.

الجلود

هذا الممثل من أكثر الممثلين الي أشوفهم لابسين جاكيتات جلد، و صارحة كلها ذوووق، و تحسه جلد حقيقي.

جاكيت جلد، و بنطلون سبور بخطين ع الجنب، اللبس يصلح لطلعات يعيني بالعربي (كشتات أو سفرات بالسيارة)

هذا اللبس يطلح للتمشي، كمان تقدر تلبسه للجامعة، بس رجاء فتحة الصدر خلها أصغر، كمان تقدر تلبسه للمطار.

هذا اللبس وااااااو خصوصا الأبوات، مع الأبوات اللبس مو مقبول للجامعة، و لا لمولات و سينما، تقدر تروح فيه لحفلة موسيقية أو شي زي كذا.

نص رسمي/نص كاجول - كاجول

لبس جوناثان بالعادة لما يكون كاجوال، لبس بسيط مو معقد، يعني ما تحسه زي دايفيد تاعب على تجميع لبسه، مع ذلك أنيق مرة.



جونثان بلبس تقليدي مرة، الي عاطيه شكل مميز الحزام و الجزم البنية، ينلبس لبسه بعض المرات للجامعة لحفلات بعد العصر و فوق بس ما تكون حقلات كبيرة، لمطاعم الغالية، للمسرح للبس هذا عملي مرة.

اللبس هذا من أأنق الملابس، الي يبي لبس زيه يلبس، للمطار، و بعض المرات للجامعة، للتمشي يعني المجال مفتوح. و أرجع أقول لا تتهور و تفتح صدرك زيه :)

اللبس هذا مريح لكل شي، مريح للمناسبات الصغيرة، للجامعة للتمشي و بسيط و لا يكلف شي.


الرسمي

هذا اللبس رسمي و فنكي مع الحدود السودا الي على البدلة، و الكرافة النحيفة مرة، هذا اللبس زي كل لبس رسمي يلنبس لحفلات، بس ما يصلح مثلا لحفل تخرج رسمي، أو مقابلة عمل لأن الجاليه يعطي اللبس فخامة زيادة، و الكرافة النحيفة مو رسمية.

هذا اللبس كان لابسه لجنازة أمه، بس يصلح بعد لو إنك تشتغل بشغل محترم أو عندك لقاء عمل رسمي مرة تلبسه، الرصاصي الغامق مع الأسود عاطي أناقة غير تقليدية. الشال نفس الشي يحسس أنه الي لابس اللبس هذا فاهم.

ما أحس أنه في سعودي بحياته راح يضطر لبدلة توكسيدو، بس نفترض أنك مثلا مخرج و طلعت لمهرجان كان، أو أنك لاعب و اترشحت لجائزة أحسن لاعب بالقارة أو بالعالم p: بدلة توكسيدو مو معقدة و من دون محنة ربط الكرافة.

هذي طريقة ثانية للبس الرسمي بالحفلات، أقل فخامة من الي فاتت طبعا قصدي البدلة، بس الجاليه و الجزم الجلد عاطيه شكل مميز.

ما يستفاد من لبس جوناثان، مو لازم تشتري قطع كثيرة و تعب راسك عشان يطلع لبسك شيك، و لا لازم تكثر ألوان، يعني هو بالكثيرة لونين أو ثلاثة. القميص الأبيض ذوووق و يزين كل شي، أعرف أختار الجينز المناسب. و الجزمة المناسبة.


مواضيع ذات صلة:

Brit Men .. (1(



الخميس، 14 أغسطس، 2008

Brit Men .. (1(

شلة البريطانيين الي بهوليوود عاملين عمايل بالأمريكيات، عاد الأمريكيات بس يكفي الأكسينت عشان تضيع علومها، مو عاد و هم قاعدين يلبسون اللبس هذا :) اليوم بأبدأ سلسلة عن لبس البريت مين، عشان عيالنا الي بكل ديرة مرزوزين يتعلمون كيف يلبسون و لا يفشلونا.

دايفيد بيكام

دايفيد يمكنه أول بريطاني العالم كله هس فيه، طبعا بعد الأمير وليم، شقار و كشخة يكفي عشان يخلي اليابانيات ينهبلون، و شعر كل يوم قصة يكفي عشان يخلي البنات هنا ينهبلون بعد :) دايفيد من تزوج من فكتوريا و هو صاير عارض أزياء مو لاعب، و لو تتذكرون طلته مع الريال كان كأنه يعرض منتج p:
دايفيد نقل لإل أي عشان المدام و طبعا ما في إنجليز بيحنون على راسه إلا يلعب زين و إلا يقولون عنه "حمار" فمآخذ راحته باللبس و الحفلات :).


دايفيد رايح لحفلة، ما عندي فكرة أي حفلة بس لابس نفس الجزم الي لبسها للتين شويز، مع جينز غامق باقي، و جكيت رمادي مع قميص أبيض .. (اللبس يناسب حفلات صباحية - طلعة غدا شبه رسمية - أو إذا رايح تتمشى بالداون تاون و بتخلي نفسك كشخه) :)


إذا جا الموضوع ع اللبس الرسمي، ما في أحد يعرف يلبس زي الإنجليز، بدلة كحلية رسمية مفصلة تفصيل عليه مع كرافه نحيفة سودا و جزم جلد بني (حلوه لحفل التخرج) هذا إذا كنتوا تدرسون أصلا p:.

دايفيد بحفل توقيع عقد دعائي مع أرماني، لابسه بدلة رسمية رمادي أرماني، مع كرافه ستان فضي، و جزم سودا (اللبس ينفع لحفلة رسمية)

للبس أي يوم دايفيد عليه نفس الجزم، بس هذا اللبس ممكن تلبسه لكل شي السينما، الجامعة السوق طبعا لا تروح فيه لحفلات رسمية أبدا p:.

يمكن بعض اللبس ما يلبس زي هذا، بس إذا كنت جريء و تعتقد أن جسمك يواجه ألبسه، طبعا نصيحة للسعوديين مو أي لبس يلبسه إنجليزي أو إيطالي معناه أنه هو يقدر يلبسه، يعني ما ودي تصيرون مهرجين، فيعيني لو توفرت فيك الشروط السابقة أنه جسمك رزة رجاء لا تلبس الكرفته .. و تقدر تلبسه مع جينز فاتح و جاليه مقلم. (ينلبس في حفلات صباحية كبيرة، يعني ما تعرف كل الناس الي فيها، يلبس لمسرح، لا تتجرأ و تلبسه للجامعة لأن شكلك بيكون غلط)


هذا نفس الشي لبس كل يوم للجامعة للمولات، للسينما و لاحظ مصر ع الجزم، السكارف دايم يعطي شكل، بس لازم تعرف إيش الصيفي و إيش الشتوي و مع إيش تنلبس .

مواضيع ذات صلة:

كوفية/شماغ ..
Teen Choice Awards




الأربعاء، 13 أغسطس، 2008

فاصل إعلاني ..


نعرف لورين كونارد لما كانت بـ "Laguna Beach: The Real Orange County" و الحين ببرنامج الواقع الثاني "The Hills" .. لورين يقولون إنها تحتفل بنجاحها باطلاق مجموعتها الجديدة، وراح تصمم فستانين لحفل جوائز الإيمي الجاية (ما أعرف مين الي راح يلبسها) المهم من كل الي شفته من ملابسها ما شفت شي يواجه صدق، الفستان هذا الأبيض الي لبسته بحفل اللبارح هذا اللبس .. طبعا مو من تصميمها D:. من تصميم BCBG Max Azria

الثلاثاء، 12 أغسطس، 2008

فاصل إعلاني ..

يا ثقل دمهم هالثنتين، عليهم غلاسة غير طبيعية ، و يتسبحون بالفلوس و هو مو باين، قال إنه عندهم خط أزياء قال، يا عالم ألبسوا زين مو دايم ملابسكم شراشيح، و شعوركم طايرة، بس مسوين look خاص. كل ما شفتهم الحين اتندمت على أستظرافي لهم يوم كانوا يمثلون بـ "Full House" . المهم .. بنات أولسون أطلقوا مجوهراتهم ... يا عيني بس و هذا نموذج شيء كأنه من الثقافة الإفريقية:




.

الاثنين، 11 أغسطس، 2008

The Sun is Shine ..*_* (pilot) style


رجعت موضة نظارات البايلوت بعد ما كانت موضة بالستينات و السبعينات، النظارات حليوه ما عليها بس طبعا مو كل موديلاتها، ما أتجرأ أشتريها بس لسبب واحد هو إني أحس إنها على طول راح تنكسر أو تنعفج.

طبعا في شروط للبسها هي:

- الوجه ما يكون دائري جدا و لا يكون طويل مرة ..
- تكون الوجنات بارزة (طبعا للي يبغى تكون حلوة عليه) .
- ما يكون خشمه صغير مرة أو طويل مرة لأنه ع الأول بيصير كأنها بتطيح، و ع الثاني يطلع شكلها funny (وشوفوا الصورة الي فوق)، بعني أكثر شي تلبق ع الي خشومهم صغيرة و مرتفعة.



الأمورة لندسي خشمها مثالي، بس جبهتها يعني شوي مخربه الوضع :) و سمة وجهها مو مرة

جيسيكا ألبا وجهها دائري عشان كذا مو حلوة .. غير أن خشمها صغير مرة، و أصلا هي من رجعت من الحمل و هي متنفخه، و مشينها أكثر إنها مو منحنية، يعني مو آخذه شكل الوجه.

أظرف بنت بالكون (هانا مونتانا) مايلي أصلا النظارات وعه الفريم بايخ لونه غير إن الفم واااااو p: مايلي رسوب.

مايك صديق هيلاري دوف ما عليها النظارة لولا أنه وجهه طويل مرة من تحت و عريض كمان، غير إني ما أحب القزاز العاكس.

النظارات حلوة ما في كلام، خصوصا القزاز حقها، بس معليش جينيفر لا الخشم، و لا رسمة الوجه موفقة.

زازا حق High School Musical النظارات تقليدية مرة، بس مرة لابقة خصوصا و هي طايرة فوق p:

بريجيت موينهان نظارات كمان تقليدية، و هنا شوفوا عيب الخشوم الطويلة و الخدود (مو الوجنات)..


يمكن نيكول كيدمان أكثر وحده لابق عليها النظارات .. بس الزين ما يكمل نظارتها شينة و شكلها رجالي، الفريم الأسود قبيح، و حتى لون القزاز قبيح، يعني أقترح عليها لو تآخذ حقات جينيفر أنستون تراها حلوة D:.








.


الأحد، 10 أغسطس، 2008

فاصل إعلاني ..

بار رافييلي صديقة ليوناردو دي كابريو لابسه عقد يجب الروعة من كثر ما هو وااااااااااااااااو بالاحتفال السنوي لشوبار بماربيا في إسبانيا. يا رب إنها بس لابسته عشان الحفل مو حقها. الخبر الي إن شا الله يفرحنا إنه لها كم شهر ما شافوها هي و ليوناردو سوا .. :) تغثني هاليهودية. أفرح بك يا ليوناردو مع وحده تفتح النفس، يعني يوم كنت أنت وجزيل سوا كنتوا حلوين.



السبت، 9 أغسطس، 2008

Suri .. kidz elegants



لو تدورون إلى بكرا، ما في بأولاد المشاهير أحلى و لا أأنق من سوري كروز (للتذكير أكره أبوها كره)، بس تكفي أمها، و في كلام أنه مو أبوها البيلوجي، ما علينا .. نرجع لسوري و أناقتها، طبعا لما أقول أنيقة و كيوت ما أقصد إنها أحلى طفل بالعالم، بس لحد الآن هي أحلى أطفال المشاهير، لبسها أنيق و أحيانا كثيرة كلاس مرة، لدرجة أستكثر على أهلها يودونها لبارك بفستان عليه إيفيل و شريطة فوشيا ... :) البنت دلوعة و تشبه أمها كثييير.

سوري بفستان عاجي بدوائر كبيرة كحلية، و جزمات باليه ذهبية (مو تشبه يارا فيلم الكرتون) :) ؟!!

سوري مع أمها (حلوة زيها)

دلوووعة
بفستان قطني أبيض مع نقشات سوداء ناعمة، و نفس جزم البالية.

يااناث ع العناد

نفس الجزم، مع فستان فوشيا و أسود

سوري مع أبوها الكريه، بفورث إوف جولاي، فستان بسيط مقلم ببني و سماوي

سوري مع ماما بفستان أحمر، الشبيه هنا مرة كبير و جزم ذهبية بس غيير D:

سوري بفستان لونه أحمر فالنتينو

فستان بوتشي (لبسته أكثر من مرة)


هذي الفساتين ..


الفستان المخمل و البالطو الي مبطن بساتان و يوضح أنه ملابسها مو مدفوع أبدا عليها :)


الي مجنني بعد كل هذا البنت كيف اتعلمت تمشي، و أنا ما أشوفها ع الأرض .. :) بس كيوت و تستاهل الدلال الي يجيها. ترا حفلة ميلادها عشان صار عمرها سنتين كلفت 10.000 دولار 0_0


مواضيع ذات صلة:
كايتي و الجينز !!!!!