الخميس، 22 أغسطس 2013

Logorama

أعرف من زمان ما كتبت هنا، بس رمضان و عيد و سفر، أظن حتى أنتم مالكم خلقي. علشان كذا ما راح أتكلم بشيء جاد لكن الأسبوع اللي فات شفت هذا الموضوع الظريف عن ملابس مسلسل سيكس آند ذا سيتي اللي صارت "موضة قديمة". فيه صورة بالذات عجبتني ، و عجبني التعليق عليها، و بغيت أتكلم فيها و أشوف رأيكم، لو عندكم رأي بهذا الموضوع. 



ما أعرف عنكم أنتم، بس من عرفت الماركات (الماركات الغالية) و أنا بالنسبة لي الشنط اللي عليها مونوقرام (حروف الماركة) أقل الشنط اللي تعجبني، ما أعرف ليه، يجيني إحساس إنها حركة رخيصة. 

بعدها بفترة (فترة طويلة) أتذكر قريت لواحد (نسيت مين) بس أتذكر أنه رجل، قال أنه ما يحب يلبس ماركات واضحة، بالذات لما تكون غالية، لأنه يقول أنا دفعت فلوس كثيرة عليها، ليه فوق كذا أسوي لهم دعاية؟!! أعجبتني فكرته (لو تعرفون من اللي قال هذا الكلام قولوا لي). 

المهم حتى بعد كلامه إلى الآن ما أعرف ليه ما أحب طبعات المونوقرام، بس قبل فترة قصيرة كنت أكلم أختي عن هذا الموضوع، عن الأشياء اللي شعارها واضح، و أتذكر قلت لها ما عندي مشكلة مع شعار شانيل على الشيء اللي يفتح الشنطة مثلا (ما أعرف وش أسمه)، بس ما عندي استعداد ألبس سي سي حلق على أذاني، لأني ما أشوف إن شكلها حلو. 
اللي عجبني بالصورة اللي فوق، أحس أنه أقرب تفسير لي ليه ما أحب لبس شعارات الماركات الغالية (أفضل ألبس تي شيرت عليه شعار كولا على إني لبس شيء عليه شعار دي آن جي أو دي كي إن واي). صحيح أحس اللي يلبس شيء عليه شعار كبير كأنه جالس يقول شوفوني أنا عندي فلوس، مو أنا أنيق، أو أنا أعرف ألبس أو لبسي حلو، بالنسبة لي هدفي من اللبس مو علشان يعرف الناس كم حسابي بالبنك، بس علشان أكون راضية عن نفسي. 

ليست هناك تعليقات:

إرسال تعليق