فاصل إعلاني ..

ريانا صراحة لبسها فيه جلافة الكون .. بس على قولة بعض الي متابعين من دخلتها مجلة People قائمتها لأحسن الي يلبسون و هي صايرة تحاول :) ...

من مجموعة Gucci خريف 2008 على العارضة سنيانا أومبوكا و ريانا ..

حصاد الإسبوع P:

راح نبدأ سلسلة جديدة كل أسبوع تنزل عن أحسن القطع الي أنلبست طول الإسبوع .. بنحاول تركز على القطع مو على اللوك العام .. و الأشياء الجديدة و المميزة مرة..

أكثر شي عجبني هالإسبوع شورت كايتي .. ذووق خصوصا الساتان الي على الكمر .. الكيلون معاه عاطيه شكل غير و الجزمة كمان حلوة .. الشورت خلاها تستاهل المركز الأول بالنسبة لي


فيكي .. فيكتوريا بيكام (مرشدة كايتي بالأزياء) لابسه كيلون أو بنطلون غريب بلمعة كأنه جلد أو شكله بوت طويل لأنه واضح أنه متصل بالجزمة .. فكتوريا للحق صح إني ما أحبها بس تراها تورمومتر للأزياء .. يعني أنا أتوقع راح يطيحون فيه ..



ريتشيل بولسون .. ما في شي غريب بس للحق لبسها كاجول أحسن من الحفلات يعني أحسن لها لا تحضر حفلات، الشنطة شينه، و النظارة حقتها مو راضية تدخل مزاجي .. بس الباقي حلو


جاسيكا بيل مو عادتها تلبس لبس زين، هذا اللبس مو مميز بس لوك بسيط يناسب ناس تتسيح (الصورة بروما)

هيلاري دوف ما أحبها و لا أحب شي فيها، و لبسها يد النفس بأكثر الأوقات .. بس الألوان الي مجمعتها أشوف إنها حلوة بس مانيب فاهمة ليه معها شنطتين ؟!!!

J-Lo copy paste style

جنيفير لوبيز ما أدري وش صاير فيها، ما تشوف لبس على أحد إلا تقلده، و ما في إلا سببين إما مصاريف المدرب الي جالس يشتغل عليها عشان تنحف من الولادة خلاها تبطل عن منسق الأزياء و تقرر تقلد (أريح)، أو إنها مرة مبسوطة على حالها إنها جالسة ترجع لجسمها الأول، و ودها توري كل الي تقدر توريه شوف تراه على أحسن ؟!!!! بس تراه صدق مو كل شي عليها أحسن يعني مثلا لبس لوغان موغيه كان على هايدي أحلى و لبسته بعدها بيونسية و لار سبينسر حقت the insider و كان عليهم أحلى، هي مو أحلى إلا من العارضة :) لأنه طالع على العارضة مشرشح (عشان تعرفون إن مقاس زيرو ممكن يخلي شكلك زيرو).
بعدين ماهيب ملاحظة أن ثلاثة أرباع الموديل بالكم ... كيف تلبس شنطة بسير ع الكتف ؟!!!

في فستان أوسكار دي لارينتا ريزورت الأحمر لبسته قبلها كاميرون دياز و على كاميرون أحلى ..

ميني دريس حق جيفنشي حتى لو مادونا لابسه فرو و مكثره خرابيط بس معليش طالع على مادونا أحلى، و بعدين وش هالتسريحة أحسها بنت متوسط باليوم المفتوح D: ..

فستان دولتشي آن قابانا لبسته مو بالضبط قبلها بينالوبي كروز و جانوري جونز بالإيمي بس التوب نفسه، هو أصلا حقها أحلى من الثانيات، بس ولو التقليد عيييب.

فاصل إعلاني

لو سألتوني وش مشكلة جليان مور بأقولكم مشكلتها بس إنها "مشكلة" يعني متورطة بنفسها إنها لو تلبس قطعة قماش زينتها، و الشي الثاني أكره فيها إنها ما تحترم شي لا التمثيل، و لا اللبس أجل بذمتكم كذا الواحد يعامل فستان لفالنتينو .. و بعدين عجزت تفهم أنه السر بالجزمة .. جزمتها تفشل ع الآخر .. و شعرها كأنها مشردة

فاصل إعلاني ..

كاثرين زيتا جونز خاشة جو الكلااااس مرة، ما في مشاكل خصوصا إذا كانت تلبس لبس حلو، بحفل مع ساكوزي و كارلا كانت لابسة من تشكيلة الخريف 2008 J. Mendel .. اللبس عالعارضة آلانا زايمر صراحة حلو يمكن عشانها طويلة، و يمكن عشان الإضاءة ، بس معليش زيتا عليك مو ذاك الزود خصوصا مع العقد الي طالع منه سلسال طويل متعدي الفتحة المربعة، يعني كان لبستي عقد كلاسيكي من دون تعليقات طويلة.

بعض الناس ما يعرف قيمة أختيار الجزمة المناسبة، الجزم الحلوة تخلي اللبس لو كان عااااادي يجنن، بس حتى الجزم الحلوة لازم تعرف تلبسها مع إيش، قلت لكم قبل كيف إن كل لبس SATC كان حلو و أنا أقصد كيري برادشو لكن الجزم كل مرة تخرب .. اليوم شفت صورة لماريا كاري و أنبسطت أنه أخيرا طلعت بلبس يواجه، مع أن الخامة حقت اللونق شورت مو ذاك الزود يعني ممكن لو كان جينز أسود كان صار أحلى، بس بالعموم أعتبرته قفزة، قبل ما أقرر أتذكرت إني لازم أشوف الجزم عشان تكتمل الصورة، و ما خيبت ظني ماريا لابسه جزم تجيب الصرع صراحة، و خربت وناستي فيها ..

المهم بأوريكم كيف بيكون شكلها لو إنها ما لبست هذي الجزم ..



الي ع الجنب هذي إقتراحات لكعبات كان ممكن تلبسها ماريا .. الفوشيا الي من ألكسيندر ماكوين حلوة مرة تصلح سواريه و تصلح كاجوال لونها حلو شكلها حلو و جلدها حلو ..

الثانية الصفرا من أوسكار دي لارينتا صيفية، و تناسب مطارات (صورة ماريا بالمطار) لأني أنا صراحة ما أحب اللبس يكون مبالغ فيه بالمطار. طبعا أنا ليه أخترت ألوان ما أخترت أسود أو أبيض .. الموضة الآن it's all about color يعني لما تدخل لون تعطي حياة للوك تبعك ..
بالنسبة لي لو لبست لبس يشبه هذا باختار ألبس جزم فلات .. أريح و أنسب لمطار .. بس كعب مو مشكلة لعشاق الكعبات :).

Mischa Barton (زمان يا فن)

تتذكرون ذيك الي كلمت ال LBC و تقول: "الهلال بوه عين" .. أنا أقول ميشا بارتون به عييييين .. و عين قوية، الممثلة هذي قبل سنتين كانت كل يوم مفاجأتني بلبس أحلى من الي قبله، بلا مبالغة كانت تلبس أحلى شي من بين كل المشاهير .. ما أدري وش صار لها .. يإنها صدق جتها عين، أو غيرت منسق الأزياء حقها :).

ميشا كانت سابقة العالم بالموضة الأشياء الي توهم يلبسونها، لبستها قبل.


أوكي يعني فستان ماركيزا هذا حلو بس لي الشعر كذا متروك .. ؟!!! شوف الفرق بين الصورتين، أول تحس إنها لو تمشي بالظلام أنتبه لها كل الناس .. الحين لو تمشي بالنور الواحد لازم يصد عنها لا يتأذي ..


البوت حكاية.. ؟؟؟؟ شوف الشورت بالصورة الثانية، و شوفوا كيف الشعر ملموم و طالع اللوك حقها بجد يفتح النفس إنك تشوفها طول اليوم.

أول لما تجي الحفلات أعرف إن أحسن لبسه راح تلبسه ميشا، الحين من وين أجيبها من الجزم أو الشعر (أنا الغرة هذي مسببة لي أزمة) أو من الجاكيت الي لابسته يعني بذمتها هذا إيفنينق كوت ؟

لا تعليق بجد .. لو إننا بنوفمبر كان قلت ممكن هذا اللبس التنكري حق الهلاوين ،، بس للأسف إحنا بسبتمبر ربطة الهيبي هذي قرفتني بها مع إني كنت أحبها، المايك أب يا ربي سترك، .. نجي للصورة الثانية .. هذا الفستان لما شفته أول مرة جاب لي صداع كل شي فيه متكتك السير .. فتحة الظهر، الوردة، يعني طالع قودنيس دريس و لهو بعد شي بجد ذووووووق.

أوكي بأعدي الشعر و أنرل على تحت .. بلوفر حلو .. الإكسسوار حلو .. و أنا معاك راح ألبس معاه هاي ويست جينز، بس إسمحي لي اللون قرف و شكله قرف كأنها أخذته من صندوق أمها لما كانت حامل فيها بالثمانينيات .. الكعب عاد حكاية خصوصا إنه ماشي قوة مع اللبس .. وش ممكن أعلق ع الصورة الثانية إلا الله يعيد ذيك الأيام.

لا يا ميشا لا ... مو لهاذي الدرجة بعدين إيش حكاية اليدين الي متروسة سلاسل و أساور ؟!!! وش أقول بس كأنه فستان كوكتيل خمسينات لبست عليه بنطلون تسعينات .. و عشان تتأكدون شوفوا كيف متنفخ :) ... الصورة الثانية هذي من الأشياء الي تبكي على حالها الآن .. شوف الشنطة مع الونيفورم الكامل و الصندل ما أقدر أتكلم أكثر.


شوفوا كيف وصلت حالتها هي تقريبا من أول من طاح بالجينز سكيني .. و لبس لبس يشبه موضة السبعينيات .. و أنتهت كذا سكيني جينز و ألوان سبعينيات بس شوف الفرق.

الصورة تتكلم بجد يعني و لا مقارنة ..

الله يرحم أيام زمان .. النظارات غلطين، الحزام يع .. طبعا الجزم أتكلمنا فيها قبل، بس نفس القطعة الي لابستها ما أعرف تحت أي تصنيف تدخل، لأن بيجاما كثيرة عليها خصوصا و أن ألوانها تفتح النفس مرة .. بالصورة الثانية وش بس أقول يا ميشا لا الفستان و لا القبعة كنتي ذووووق.


مو قلت لكم إنها لبست قبل الناس، الفستان الميني فلورال بس سبحان مغير الأحوال، شوفوا الشعر و تعرفون الفرق.


هنا حالتها تبكي، و إذا كانت تروح لكوافير فهي مسكينة ملعوب عليها بقوة، هذا لبس لا هو سويتهارت دريس و لا مايوه و لا لانجري .. مو تحت أي تصنيف .. بالثانية المايك أب و الشعر، و الفستان شي، لكن الجزمة شي ثاني، شوفوا بعد الفرق بين اليدين أول يكفي شي بسيط حلو و ناعم لكن الحين ما أدري مين عاقد لها بالإكسسوار هذا.


شورت جينز .. شورت جينز، بلوز عاجي و الثاني عاجي بعد، شنطة سودا و شنطة سودا لكن الجزم و الإكسسوار و الطوق الغريب الي بالصورة الأولى مخليتها غييييير قولي آمين تعقلين..



آخر شي بأختمها بهذا اللوك .. ودي لو إنك تشوفين كيف وصل حالك له .. ما عندي مشكلة أنك تعذبين الشنطة الشانيل هذي من كثر ما تلبسينها، بس رجاء إحترمي أسم الشنطة و سمعتها مع ملابس محترمة زي الي بالصورة الثانية .. شي ثاني ترا الملابس يجي معاها أزارير سبير كان خيطتي قبل لا تطلعين.

Emmys 2008

موسم الجوائز جا، و بدا بالإيمي .. طبعا زي ما قلت لكم قبل أنه هو المحك للهوليويديين .. يعاني يإما تلبس زين، و لا أسمح لنا .. أنت ما تستاهل تطلع ع الريد كاربيت و ترانا بنشرشحك .. الإيمي يبدأ بعد ما يكون أسبوع نيويورك للموضة خلص، فعشان كذا يكون أكثر الممثلات لابسين من مصممين أمريكان. اليوم بنعرض لكم أحسن و أسوء لبس بالإيمي من تصميمات الإمريكيين في ملابس حلوه من برا زي لبس هايدي كلوم (أرماني) و ماريشا كروس (إيلي صعب)، بس اليوم راح يكون عن الإمريكان، لأنهم بالنسبة لي جالسين ياكلون الجو على مصممين عواصم الموضة التقليدية (باريس، ميلانو) ..

إيفا لونغوريا طلعت بلس حلو مرة، من ماركيزا، الماركة هذي صايرة موجودة بكل حفل تقريبا، رغم إن مجموعتها مو كبيرة مرة ..

كريستينا أبلغيت، للي يتذكرها بفريندز كانت أخت جنيفير أنستون (ريتشل غرين) لابسه من ريم عكرا .. اللبس حلو مرة .. و كمان أوليفيا ويلد لبست من ريم و اللبس حلو برضو .. صح ع العارضة أحلى بس يضل حلو .. و التسريحة ماشية، لأنه صراحة أكثر الي جايين كأنه ما نين علينا بتسريحات محترمة.

سنثيا نيكسون .. لابسه من كالفين كلاين .. شغله نظيييف .. و لونه حلو و بعد الإكسسوارت ذووق أشين شي شعرها :(

miss .miss. miss

الحين نجي للمصايب :)
بروك شيلدز بلبس من Badgley Mischka اللبس شييين ألوانه و موديله قديمه (غريبة على بدلي) .. مو مناسبها، لأنها مو ملاحظة أن أكتوفها عريضة ..
تيري هيتشر لابسه لبس من مونيك لولير (نفس السي تصاميمها بالعادة حلوة) حكايته نفس حكاية بروك (قدييييم)..
آخر وحده جوليا لويس دريفوس إذا تذكرونها إيلين بسينفيلد .. لابسه من نرسيسو رودريجيز .. صراحة إكسااااااات عليها.



هذولا مو أشين شي .. بس أشين شي من المصممين الإمريكان .. كايت والش لابسه من زهير مراد، ما أدري الفستان بايخ و الي مخربه الي لابسته .. بعد إيفانجلين لايلي لابسه من إيلي صعب و صراحة من أشين فساتينه الي شفتها بالثلاث السنين الأخيرة ..