Milano Wish List

ميلان كان حلو، يعني لندن بعدين ميلان نستني خيبتي بنيويورك ... أمس انتهى أسبوع ميلانو، و اليوم إن شاء الله داخلين على آخر آهم أسبوع الي هو إسبوع باريس.

باختصار أقدر أقول ميلان جايبه معاها للصيف الجاي ملابس بخطوط واضحة، ورود قليلة، و خطوط كثيرة، قصدي تقليم و كروهات.

Gucci's Leather Pants

بشكل عام أنا مو من محبين لوك المتروسايكل، (يعني جلود، و أسود و أبوات) لكن يمكن تأثير فريا بيها، و هذا المايك آب من غوتشي حبيت هذا البنطلون الجلد قوه، هو تقريبا أول لوك شفته و حبيته (يعني لنفسي) من أسبوع ميلانو، لأنه أول عرض شفته من ميلانو كان عرض غوتشي، و أظن أنه هذا أول لوك جلد بالعرض . الجلد شكله حلو مره خصوصا من الجوانب، ما قد جربت ألبس بنطلون جلد، بس يعني قد لبست ليقنق لماع لأختي و كانت أموري ماشية، حتى و أنا ما عندي سيقان طويله زي سيقرد (العارضة).

Prada's Shoes

بالنسبة لي عرض برادا، يا إما تحبه أو تكرهه، أعتقد أني حبيته، و شوي شوي أحس أني بأحب الأشياء الي منه، الأشياء كانت أكثرها كأنها شيرت من هاواي، يعني قرود و موز على أكثر الأشياء ... من أكثر الأشياء الي حبيتها هذي الجزمة المقلمة، أحس لها شخصية (قصدي الجزمة) يعني أحس مع أي لبس ممكن تبرز هي من نفسها، بالنسبة لي يكفي اللون الأخضر، و أكيد شعار برادا الذهبي.

D&G Lace Top

مو شي غريب إني أحب شي دانتيل. و على أنه عرض دي آن جي كان مليان أشياء حلوة (أكثرها ورود) لكن هذا الشي الدانتيل عجبني مره، خصوصا لو أنلبس، زي العرض، يعني تحته شي فلورال و أحس أنه مع تنورة أو بنطلون أي شكل بيطلع حلو مره.

Jil Sander's Dress

لو سألتوني من كل بين كل الأشياء الي شفتها بالثلاثة أسابيع وشو الفستان الي ودي أخذوه و ألبسه الحين، بيكون هذا الفستان من جل ساندر ... فيه كل شي أحب، شيفون، فستان طويل، و ألوان يعني شي مو بس أسود. غير كذا التقليمات فيه عاطيته شكل مره حلو.

Dolce & Gabbana's Bag

عرض دولتشي آن قابانا كان المره هذي ماراح أقول خرافي، يعني ما أحب استخدم كلمات كبيرة بس أنه صدق كان حلو، أكثره أبيض، بس مو ممل ...

و مرات كثيرة قلت إني ما أحب كثير أشيل شنط، بس الفترة هذي خاطري بشنطة بسلسال يعني تحط كروس بودي. سلسلة هذا الشنطة حلوه، مره ... و أحلى شي فيها بعد هذا الشي الي يشبه الأبواك القديمة موجود بمقدمة الشنطة ... باختصار كيوت.

Salvatore Ferragamo's Short

من السنة الي فاتت و أنا حابة هذا الشكل من الشورتات، الي يشبه الملابس الرياضية بالسبعينات، بس فراقامو سوا نسخة حتى أنا ما حلمت أنه أحد يسويها، مع اللون الكامل هذا، و حرير أحس أنه الشي الي صدق صدق ودي فيه من كل هذي المجموعات ما أعرف وش أقول عنه، بس ذووووق.

Missoni's Hat

قلت هنا أكثر من مره إني أحب القبعات، و لا أمل من شراها ... فمو شي غريب أنه أختار من عروض هذا الصيف قبعة، خصوصا عروض كثيرة كان فيها قبعات ...

الشي الي ميز هذا الصيف هي القبعات الفلوبي، عندي وحده شريتها الصيف مو هذا الي قبله، صح أقدر أقول تقريبا إني ما لبستها بس يعني القبعات شي ما أقدر أقاومها ... زي ما قلت لكم على كثرة القبعات بصراحة ما فيه شي عجبني، يعني خلاني أتمني ألبسه، إلا هذي القبعة المربعة من ميزوني، بصراحة القبعة هذي تخليك تتمنى أنه الصيف يطول بعد مع إني طفشت منه خصوصا هنا في الرياض.

Versus Sheer Cardigan

هذا البلوفر من فيرسس بكون تافهه لو ما حطيته، لأنه ما فيه سبب ما أحطه، أولا إني صايره أحب فيرسس بس ليه هذا البلوفر لأني أحب لما الأشياء تخلط مع بعض يعني كاجوال مع فورمال سبورت مع لبس سهرات و هذا البلوفر فيه هذا الشي يعني بلوفر شكله شوي سبور، قماشة شفاف، لونه حلو، و الأهم أنه مصمم فيرسس هو كريستفور كين مع دونتيلا فيرساتشي،

Jil Sander's Plastic Bag

وقفت اليومين الي فاتت كانت معاي زكمة شينة، و هالشي خلاني مالي خلق أسوي أو أشوف شي ... رجعت اليوم أشوف العروض الي فاتتني من ميلانو.

ما أقول إن العروض كانت بايخة و لا تستاهل أنه ينكتب عنها، بس لاحظت بميلانو أحسن القطع هي الفساتين السوداء، و ما أعرف شي داخلي يحسسني أنه ما فيه داعي أعرض فساتين سوداء لأني أحس أنه أكثر الفساتين السوداء حلوه أساسا، و لا تثيرني لما أشوفها، تطلع حلوه، و الي يعرف يلبسها صح يطلع ما أعرف بس ما جت ببالي إلا كلمة فخم.

من العروض الي أعجبتني و ما كنت فساتين سوداء هو عرض جيل ساندير. بس بعيد عن الملابس لفتت نظري الشناط الي حاطتها بأكثر من لوك.

الشنط زي ما تشوفون كأنها أكياس بلاستيكية، بصراحة أعجبتني خصوصا السوداء و الحمراء أحس فيها بساطة و أناقة بنفس الوقت. مشكلتي معها بتكون سعرها، أعرف أنه سعرها بيكون غالي، و مع إني حابتها بس يعني للحق ما راح أدفع فيها أكثر من 15 دولار، و لأني أدري أنه ما راح تكون بهذا السعر، أتمني أنه يكون فيه نسخ منها عند ماركات الهاي ستريت، و بألوان و نقشات أكثر ...

شرايكم أنتم بالشنطة، يعني ممكن تشترون شنطة كأنها كيس بلاستيك؟ ولو كنتوا مستعدين تشترونها وش السعر المناسب لكم؟

Gucci: Ready for the Red Carpet

ما أتذكر مره إني انبهرت بقوتشي بس هذي المره شكل فريدا جينيني خلتني أقول وااااو، كل شي حلو المايك آب التسريحة، الألوان شي ما توقعته من غوتشي أبدا ...

و أنا اتصفح العرض كل ما طلع فستان طلع ببالي أحد يلبق عليه، بالبداية احترت أسوي لمين، لكني انتهيت بفكرة أنه العرض كله مخلوق للريد كاربيت، و أنا أعتقد أنه كثار راح يلبسون منه، بس خلونا ننتظر.

Blake Lively

أنا مو ذاك الحب لحقات قوسيب قيرل، يعني ما عندي مفضلة، بس بين بلايك و لايتون، أفضل ستايل بلايك، الحلو بعد أنه آنا وينتور مصادقتها، و من حطتها جنبها و ستايل بلايك متحسن.

أول ما شفت الفستان على ناتشا بولي حبيته كثير خصوصا من ورا، الفستان من دون كلام فستان ريدكاربيت.

الفستان هذا أحس أنه بيلبق على بلايك ، هو نفسه من دون ما تغير شي فيه (طبعا هي بتنبسط على فتحة الصدر)، الي ما أحبها لما تسوي هذا الإكسبوز، بس الفستان أحسه بيلبق عليها قوة.

Evan Rachel Wood

ريتشيل إيفان وود هي وجه لعطر غوتشي الجديد غلتي (الحين هو موجود بالمحلات، للي يحب عطور غوتشي) ، يعني وارد بشكل كبير إنها تلبس منهم، لو كانت بتلبس غوتشي لأي مناسبة أتمنى أنه يكون هذا اللبس لأنه بألوانه هذي أحسه بيلبق عليها كثير، خصوصا مع شعرها الأحمر.

Kate Hudson

كايت هادسون ظريفة، و أحبها، مو دايم لبسها يعجبني، بس لما تلبس لبس حلو يعجبني مره. ما أحب عليها اللبس المعقد، و أظن هذي الجمب سوت الذهبية بتطلع عليها مره حلوة، خصوصا أنه لما تسوي مايك آب قلامور يطلع شكلها مره حلو. أنذكر إنها تصور فيلم، مو متأكدة، بس أتمنى أشوفها لابسته بواحد من البريمرات.

Victoria Beckham

فكتوريا بيكام حتى بعد ما طلعت لها ماركة، ما وقفت تلبس لمصممين ثانين. فكتوريا على أنها مو دايم تلبس أسود، إلا إني أحس اللون الي يطلع عليها حلو هو اللون الأسود، أما يكون أسود و جلد، فمضمون أنه يكون حلو، مو هي اشتهرت هي وزوجها بالصورة الي كانوا كلهم لابسين فيها جلد أسود.

Rachel Weisz

مع إني ما أشوف ريتشيل وايسز كثير على الريد كاربيت، إلا إنها كثير تلبس لبس حلو، من دون ما أشرح أحس أنه هذا اللبس بيطلع حلو عليها، و لا حتى فكرت بأحد ثاني، بس إني حسيت أنه يصلح مره ريد كاربيت :).

Leighton Meester

لايتين ما أحبها، ما أعرف ليش أحس إنها شايفة نفسها بزيادة، بس للحق أنه الملابس الي تكون زي ما يقولون edgy تطلع عليها مرة حلوه، هذا الفستان الأخضر، لونه و شكله كلهم يصرخون أنه يكون فستان ريد كاربيت، أتوقع لو لبسته لايتن، و لبس معاه إكسسوار مضبوط بيطلع عليها مره حلو.

London Wish List

يا سرع ما خلص إسبوع لندن، و إن شاء الله اليوم يبدأ إسبوع ميلانو، للحق لو أنا ما سويت تصفيات على الأشياء الي شفتها بلندن، كان كل شي دخل بهذي القائمة، لأنه صراحة لندن كان مره، مره، مره حلو ... بس حاولت أحط الأشياء الي ودي فيها صدق ...

فيه عروض كاملة أعجبتني بلندن، و عشان ما أتعب نفسي بالتفكير فيها حاولت آخذ الشي الي عجبني من أول نظرة :)

Unique's

هذا الفستان من يونيك، الي ما يعرف وشو يونيك، يونيك هو عرض لتوب شوب ... ما أعرف هو فستان أو تنورة و توب بس المهم كله عاجبني، أتمنى أنه ينباع بمحلات توب شوب، لأنه بالعادة مو كل شي بالعرض يبيعونه ... الفستان ألوانه حلوه، بعد لو تكبرون الصوره (كبروها برابط لحاله عشان ترجعون تقرون كامل الموضوع:) نرجع لو كبرتوا الثوره بتشوفون أنه التنورة أو الجزء التحتي يلمع، اللون عاجبني، و التخريمات الي فوق حلوه، و حتى أنه كل شي وسيع حلو.

Antonio Berardi's Earrings

أول ما شفت عرض أنتطونيو حبيت الحلقات أكثر من أي شي ثاني (ما أعرف هي من تصميمه أو من ماركة ثانية)، بشكل عام أنا ما أحب الحلق الكبير بشكل دائم، بس هذا عجبني لونه حلو، و أحس أنه خفيف مره، و شكله يشبه الإكليل الي يحطونه على رووس القياصرة الرومان ... أحسه بيكون إكسسوار حلو للصيف، و يصلح لحفلات، و بعد لطلعات عادية، أظن أنه هذا الحلق بيغير النظرة الي ببالي للحلق الكبير أنه يخلي الواحد كأنه غجري، لأن تصميمه و ضربه، فيه خطوط جديدة.

Vivienne Westwood Red Label Skirt

التنورة هذي من فيفيان ويستوود ريد ليبل أعجبتني مره، أعجبني قماشها، و لونها، أعجبتني عفطاتها أو ثنياتها ما يهم و يمكن الي خلاني أدخلها قائمتي للأشياء الي أتمناها، هي طريقة عرضهم لها، أعجبني شكلها قوه مع القميص، خلوني أفكر بشي يشبه كذا، يعني تنورة فخمة زي هذي مع قميص عادي و ألوانه باهتة، أتمنى أشوف اللوك هذا على أحد ثاني أحس أنه بيطلع مره حلو.

Meadham Kirchhoff's Collar

يمكن كثير لو شافوا هذي الصورة يتذكرون قبات المدارس، يعني قصدي العجز زيي اللي لحقوا على ذيك الفترة ... بس بجد بخاطري بقبة أو ياقة وش ما تبغون تسمونها، اللياقة المفصولة جت موضتها مع مجموعة ميو ميو للصيف الي فات (المجموعة الي مطبع عليها، سوو سيرش داخل المدونة على ميو ميو و بتشوفونها) كانوا يبيعون ياقات منفصلة ... الياقات راجعة بقوة بكل أشكالها و منها هذي الدائرية الي يسمونها بيتر بان ... ودي بهذ الياقة يمكن ألبسها مع كثير أشياء يعني أعتبرها شي زي العقد.

Paul Smith's Briefcase

قالت لي shosha أنها تبغاني اتكلم عن الشنط، للحق أكثر العروض ما كان فيها شنط، إلا الماركات الي أساسا عندهم خط شنط زي بوربري مثلا ... قلت الكلام هذا قبل، بس الشنط ما عادت سالفة زي أول، و أكثر الشنط الحين صارت كلاسكية أكثر.

أحب أنا الماسنجر باق حقت بول سميث و شي ثاني أحبه هو اللون الكونياك أو التان، الشنطة هذي من بول سميث هي الشنطة الي ودي أشيلها الحين لو أنا اتحمل أشيل شناط :) شكلها الي يعطيك جو إكسفورد بالثلاثينيات و لونها، و الأهم الشي الي سوا فيها بول و هو دخل عليها هذا الخط النيون الأصفر أعطاها روح جديدة، حبيتها.

Christopher Kane's Jacket

الحين قلبي توقف عن الشغل، كريستفور كين كل مرة يقتلني بالأشياء الي يطلعها، ما أكتفى بالدانتيل الي أنا أحبه قوه، سوا ملابس شي كأنه جلد بس ما أظنه جلد زي الدانتيل. الجاكيت هذا من مجموعة أشياء مسويها بالطريقة نفسها، الألوان تذبح الفكرة أساسا مجنونة، و أنا باكون مجنونة لو ما دخلت قطعه من هذا الدانتيل البلاستيكي من قائمتي، ما يحتاج اتكلم أكثر (تأملوا أنتم).

Erdem's Hairdo

بذات هنا أحس إني أكسر الخاطر، من كثر ما تعقدت وش بالضبط أكثر شي ودي فيه من مجموعة إيرديم الأخيرة، و لا لقيت حل، من كثر الأشياء الي توجع الراس، قررت إني أوقف على ابسط شي أقدر عليه، و إن شاء الله أختي بتتعلم كيف تسويها.

مع أنه راسي و طبيعة شعري ما يطلع عليها حلو السف (هذا الي أحسه) إلا إنه هذا الشعر من إيرديم عجبني قوه، الواحد وده يسويه و ما يوقف إلا بكوخ بمكان نائي بالسويد، كيف جت الفكرة هذي ببالي ما أعرف بس الشعر هذا فيه كل شي يحسه الواحد بالصيف و الريف حلو مره.

Fashion East's Summer Coat

البالطو الصيفي شي أحبه مره، و لا ألقى منه أشياء كثير تفتح النفس، الصيف الي فات تعبت و أنا أدور و انتهيت شاريه واحد من نرسيسو رودريقز و بالأخير نسيته و لا لبسته :).

ليه أحب البالطو الصيفي؟ أولا لأنه يخليك غير عن كل الي بالشارع يمشون يعني كل العالم تانك من دون أكمام، و أنت لابسه شي مشرشح كأنك وحده من بنات أولسين. أحبه ما أعرف ليه، و هذا البالطو من فاشين إيست حسيته كأنه جكيت شايب معدل :) أدري وصف غريب بس حبيته، أحب الأشياء الي كأنها مطلعة من صندوق قديم، شي زي الي يصير بالأفلام.

اكتشفت إني ما عاد استمتع بالحركة هذي زي المرة الي فاتت، يمكن عشان كان فيه أوسكار قريب، و كان الموضوع زي مو اختبار، أنا أكره الاختبارات بس زي مسابقة (أحب المسابقات) طبعا بيني و بين نفسي يعني تشبه لعبة نلعبها أنا و أختي، هي لعبة سخيفة بس أنا أحبها ما أعرف عنها هي، يعني مثلا نشوف لما تستضيف قناة و بالغالب القناة هذي هي الجزيرة واحد أجنبي الي تخمن أسرع وشي اللغة الي راح يتكلمها تفوز، طبعا من دون جوائز من دون شي بس شي يسبب ازعاج بالمكان.

نرجع للصورة الي حاطتها، قلت لكم ما عاد صرت استمتع زي الموسم الي فات، بس لو لقيت شي حلو بافكر فيه. أمس كان عرض لبيتير بلوتو، و لندن صراحة كل عرض يفتح النفس أكثر من الثاني، العرض كان حلو و أشك أنه ممكن أحد من السليبرتي يلبسه، بس رجعت أعطيه نظرة ثانية و أفكر وش ممكن يلبس منه ... الفستان الي حطيته مو أحلى المجموعة، بس أكثر الخيارات منطقية إني أشوفه على الريدكاربيت ... أخترت كايت بلانشيت، علشانها طويلة، و هي بشرتها فاتحة قوة، بتطلع حلوة مرة نع هذي الدرجة من السماوي، أهم شي أنه عاجبتني بزيادة بعد القصة الجديدة (مو جديدة مرة يمكن لها شهر أو أكثر) و قلنا نحتفل فيها هنا بفستان ما راح تلبسه، بس لو لبسته بيطلع حلو عليها أكيد.

Rodarte for Target in High Fashion Version

الحمد لله ما خيب ظني كين، طبعا لما أقول الحمد لله أنا جواتي أقول الحمد لله على كل حال، يعني ما يحتاج أشكي إني ما أقدر عليه ... و عشان تعرفون قد إيش أنا مو أنانية شوفوني و أنا ما أقدر على كين انبسط أنه سوا شي كويس يقدر يشتريه ناس ثانين ماعندهم مشكلة دفع 4000 دولار على فستان منه ...
طبعا أحاول أعزي نفسي و أحط لكم اللوك الي فوق من عرضة الأخير بس ما راح أكذب و أقول مو حلو يعني على قولتهم الكذب خيبة، بس باقول أنه استوحاه من هذا اللوك من رودارتي لتارقيت .



طبعا أنا حابة مره هذي المجموعة، مو بس لأني شريت منها (تنورة العيد المسترد هذي هي) و تراها مو من الهرم للي قالي أنه شاف زيها بالهرم، طبعا هي مو غالية، مو أحبها بس لأنها مو غالية، أحبها عشان التل الي عليها، و أحبها عشانها زي الدانتيل، أنا أساسا كان خاطري بالبلوفر بس لقيته غالي 64 دولار، أدري بتقولن من وين غالي، بس أنا كان خاطري أشتري أشياء رخيصة، و أثبت لنفسي إني أقدر أشتري ملابس رخيصة و أحبها مره، و هذا الي صار ...

بس إن شاء الله الله بيعوضني بدل الرودارتي هذا بكريستفور كين ببلاش، أعرف إني أضحك، بس يالله نضحكم معاي :)

من عروض أمس بلندن كان عرض أنتطونيو بيراردي ... أنتطونيو بشكل عام مو مودي مره، بس عنده أشياء حلوة، و شكله عارف طريقه لهوليوود، العرض الأخير أعجبني تقريبا كله، إلا كان في مجموعة فساتين فوشيا ما عجبتني، و حسيته داخله عرض يعني أنتطونيو حاول يكسر العرض الي كله أبيض و أسود و رمادي، و شوي شوي ترابي ...

ما أعرف وش فيني هذي السنة بس شكلي كارهه السيلبرتي ما فكرت فيهم أبدا، أول ما شفت الفستان، عجبني الجزء الفوقي منه، فكرت بجيسيكا ألبا، يمكن عشانها لبست مره لبيراردي و كان حلو، بس ماش ما حسيت هذا بيطلع عليها حلو، حسيت بيكون ماصل ... بس حفظته عندي، كالعادة زي كل شي و أنا أصلي المغرب اليوم جت على بالي كيرستين و هذاني سويت الست لها.

كيرستين من الناس القلال الي لما يلبسون أسود و أبيض يكون حلو عليهم، مو قصدي إن هذولي اللونين شينات، بس قليل ما تبرز الواحد، خصوصا لما يكونون سوا، هم لونين آمنين بس مو مميزة، يعني على طول تعطي شعور أنه الجامعة ... بس بقدرة قادر كيرستين تخليهم حلوين مع بعض.