أعرف من فترة ما كتبت هنا، و من زمان ما تكلمت عن فيلم و الملابس اللي فيه. ما أعرف ليه؟ هم بطلوا يسوون أفلام بملابس حلوة؟ ما يهم، اللي بأقوله أمس شفت فيلم قديم (خارج الموضوع، أول كنت أشوف أفلام قديمة أكثر من الحين، ما أعرف ليه، بس صرت أحس لازم لها مزاج خاص). المهم الفيلم اسمه للي ما عرفه من الصور All About Eve، بالمناسبة الفيلم حلو للي يبغى يشوفه.
طبعا بعيد عن الفيلم و كان هو كويس أو لا، الملابس بالفيلم مرة حلوة، و حسيت بأحيان كثيرة إن كثير من المصممين يآخذون أفكار من الملابس اللي فيه. أعترف إن بحثي عن ملابس تشبه الملابس الموجودة، و اللي حسيت إنه فيه تصميم حديثة تشبه له كان كسول شوي، جزء منه إني من زمان ما كتبت هنا، و لو كنت بأدور أشياء بالضبط تشبه الموجود بالفيلم، أعتقد ما راح أخلص الموضوع إلا بعد أيام، و أنا متحمسة أكتب عنه اليوم. السبب الثاني و هو الأهم إني عجازة بأغلب الوقت.
كثير من الملابس اللي لبستها وحدة من البطلات (إيڤ) حسيت كأني شفت أشياء كثير يشبه لها عند ڤالنتينو و أونر. فيه لبس لبسته بطلة ثانية (مارچو الأولى من اليسار الصف الثالث)، ما أعرف ليه أحس إني شفته بمجموعة قديمة لإيڤ سان لوران (لما كان هو المصمم)، بس لأني مرة كسلانة، قررت إني ما أدور على اللبس.
فيه أكثر من لبس (لكل البطلات) أعجبوني، بس ما حطيتهم هنا، لأنهم أحلى بالحركة، و لأني ما بغيت أخرب عليكم كل الملابس، لو تبغون تشوفون الفيلم.
ليست هناك تعليقات:
إرسال تعليق