تعرفون إني أحب أعرف عن ماركات و مصممين ما أعرفهم من قبل، ما أتذكر إني إلى الآن بهذا الموسم انتبهت لمصمم جديد لحد اليوم. و أنا أشوف صور بعض العروض اللي ما شفتها من اليومين اللي فاتت، انتبهت لماركة اسمه "أنديركوڤير"، ما أعرف الاسم اللي شدني أو أول صورة من العرض؟. يمكنها مو جديدة عليكم (هي أكيد مو جديدة)، بس توي أنتبه لها.
اللي عجبني فيها حسيتها مرات كأنها ملابس بالية، و مرات حسيت كأن الملابس عرايس من ورق، ما أعرف إذا قد مر عليكم و أنتم صغار كذا كرتون عليه رسمة بنت و جمبها ملابس لها، المفروض إننا نقصصها و نلصقها على البنت؟ كذا حسيت بالذات باللبسين اللي بالوسط. و جزء من الملابس حسيت كأنه أحد أخذ ملابس بالية، و ركب الريش و التول على ملابس بايكرز و مغنين روك. المهم إني حبيت مرة الملابس، بالذات البالطو الأزرق. الفستان اللي بالأول أحسه شيء ممكن تلبسه ساره جيسيكا باركر، أو إيل فانينق (مع إني أفضل الثانية). متحمسة أشوف أكثر من الماركة.
أنتم وش رأيكم بالملابس؟ كنتوا تعرفونها قبل؟
ليست هناك تعليقات:
إرسال تعليق