من أكبر عروض أمس دولتشي آن قابانا، دولتشي آن قابانا من خمسة مواسم أو أكثر، قرروا أنه كل مجموعاتهم بتدور حول صقلية، و أكله، لبسه، خرافاته، و هذي المرة قصصه الخيالية، ما أعرف ليه، مع أنه إلى الآن أشوف دولتشي آن قابانا بالمجموعة، أحس إنه فيه شيء جابوه من يوليانا سيرقينكو، بالمناسبة هي تحبهم، و تقول أنه مثل ما هم يقدرون يسوون مجموعات كله فكرتها صقلية، أنا باسوي تصاميم فكرتها كلها روسيا. فيمكن هذي المرة هم اللي قلدوها.
زي ما قلت لكم فكرة تدور حول القصص الخيالية بصقلية، ما قد رحت لصقلية، بس ما أعرف أحس السناجب و الوز شيء ماله علاقة بجو متوسطي، يعني أحسه شيء شمالي بغابات صنوبرية (يعني ألماني مثلا)، ما علينا يمكني غلطانة، و فيه سناجب بصقلية، أهم شيء نتيجة الملابس وش صارت. من فترة و أنا أحس دولتشي آن قابانا كأنهم يسوون نفس الملابس من جديد، أعرف أنه فيه دي أن آي للماركة، بس بعض المرات اللي أشوفه مو دي إن آي، أحسه مكرر، هذي المرة، أحس "الدي إن أي" موجود، بس فيه ملابس جديدة. مثلا اللبسين اللي بالوسط، يشبهون أشياء سووها بمجموعات قبل، بس فيها روح جديدة، حبيت مرة الفستان الأسود، شكله من فوق مرة حلو، أعتقد بنشوفه على مونيكا بالوتشي، بس ودي أشوفه و مو بحملتهم الإعلانية، على بلانكا بالتي، الفستان الأول من اليسار ذكرني بمجموعات لهم من بداية الألفية، مع ذلك فيه طبعات تشبه طبعات النجوم إذا تتذكرونها، بس هذي المرة مفاتيح. الكنزة المخمل اللي على اليمين بعد عجبتني، حسيتها من الملابس، اللي تلبس معها واشيد جينز تصير كاجوال و لبس صباحي، و تلبس معاها تنورة بنسيل و تصير جاهزة للريد كاربيت.
أنتم وش رأيكم بعرض دولتشي آن قابانا هذي المرة؟
ليست هناك تعليقات:
إرسال تعليق