الأربعاء، 23 أكتوبر 2013

Flashback: Maroon

تتذكرون الموضوع اللي كتبته عن لوك "حاولت أسويه" قبل على إن الفكرة كلها كانت إني تذكرت شيء قد عجبني، لكن أعجبتني فكرة إني أجيب لكم صور من عروض و صور قديمة (ملابس و مكياج) عجبتني و حاولت أسوي زيها بمناسبات مختلفة، غير إنها تذكرني و توريكم ذوقي بالفترة هذي، أظن إنها فرصة حلوة إني أتكلم لكم عن وش صار وقتها. 


طبعا ما شريت الفستان هذا، لكن خيطت يشبه له، الفستان هذا من نوعية الفساتين اللي مو تعجبني لدرجة ما أقدر أشيل عيني عنها، لكنها تعلق براسي. كنت مع أمي بمحل أقمشة بتشتري لها قماش، و لمحت قماش عنابي/بيذنجاني تافتا عليه طبعة وحدة كبيرة أعجب أمي (و أعجبني) و أقنعتني أشتريه لأنه كان فيه مناسبة كبيرة لازم أحضرها (زواج أقارب) أول ما شريت القماش، أول شيء جاء ببالي هذا الفستان من لانفان. لما جا الزواج قررت أسوي مكياج يشبه هذا اللي بواحد من عروض جان بول قوتييه (كان مرة عاجبني) المهم من سوء حظي هذي كانت مرة من المرات الثلاثة اللي طول عمري فيها خليت أحد يسوي لي مكياجي (ما أعتبر نفسي فنانة بالمكياج، بس أعتقد أني أعرف وش أسوي لنفسي) المهم رحت لذاك المكان و لما وريت "المايك آب آرتيست المكياج" قالت لي لي: هذا مرة نااااعم ما يصلح، أصريت عليه لكنها خلت عيوني باندا من شدة السواد اللي حواليه. ما يحتاج أقول إني صحت منه، بس ما كان فيه وقت أمسحه، و لا جبت معاي مكياجي (كنت مسافرة) و كنت مزكمة، و علشان تعرفون سوء شكلي (على الأقل بالصور) أصحاب الزواج لما كانوا يوروني صور الزواج مشوا صورتي بسرعة (شكله خايفين أنجرح). 

كيف تجاربكم مع مكياج المشاغل أو المايك آب آرتيست؟ قد سويتوا سموكي آيز؟ 

هناك تعليقان (2):

  1. أهلاً
    احس مجازفه اروح لأحد اول مره اجربه بمناسبه، لازم اسوي بروفه ولا اشوف احد من خواتي مسوي عندها واسوي
    حتى على السمعه ناس كثير ماخذين سمعه "واو" على الفاضي
    اتخذت هذا القرار بعد ماصارلي تجربه نفسك، بس حمدلله ماكانت مناسبه كبيره بقد ماكنت كارهه شكلي شعر وميك اب
    وكنت انتظر متى اطلع مع اني مسحت كثير منه، لكن امي كانت تقولي لاتسوين عند احد ماجربتيه بمناسبه وانا ماسمعت :p
    بس بعدين صرت ابخص وصرت ارتاح لناس اجيبهم او اروحلهم
    بالنسبه للسموكي ايز قد سويته وكان حلو بس ماعتقد قريب رح اعيد التجربه :D
    مشتاقين

    ردحذف
    الردود
    1. المشكلة ما أعرف أحد بالشرقية، و كنت أجامل الناس اللي حجزوا لي موعد، ما بغيت أسوي نفسي قليلة أدب، و لا أنا مقدرة أنهم حجزوا لي.

      حذف