السبت، 2 مارس، 2013

The New Mondrian Dress

ما أعرف إذا راف سيمونز شاف فيلم لا آمور فو، باختصار الفيلم وثائقي عن إيف سان لوغان و من المعلومات اللي تعرفها لما تشوف الفيلم إن إيف كان عنده وحدة من اللوحات موندريان اللي هو سوا فساتين "أيقونية" زيها، المهم شريكة يقول لما سوى الفستان، ما كان يملك هذي اللوحة و لا يحلم. أظن راف بمجوعة ديور الأخيرة و بالفساتين هذي يبغى يمتلك رسمه لآندي ورهول. 



ما يحتاج إني أقول إني حابة مرة الشغل اللي جالس يسويه راف مع ديور، يكفي إني مختارة 4 من 8 من الملابس الأحسن لشهر فبراير كانت من تصميمه. (أكثر شيء حابته إنها تطلع أحلى "أوف رانواي") هذا يعني إنه فاهم أجسام النساء. 
الشيء اللي أحبه أكثر فيه، أنه ما يخاف يصمم لماركة مثل ديور "عريقة" تصاميم أبدا موب متوقعة و لا تشبه كثير الخط اللي كانت ماشية عليه الدار. 
بس من الأشياء اللي أبغى أقولها إن إيف سان لوغان هو صار مصمم ديور بعد ما مات ديور، و كان له علاقة بآندي ورهول، حتى إن آندي رسمه. السؤال الحين هل فساتين ديور/ورهول هذي هي بتكون فساتين موندريان بس للقرن الجديد؟ شخصيا أعتقد إن هذي المجموعة بتكون المجموعة المفضلة عند محررين الفاشن، لكن ما أقدر أجزم إنها بتكون المجموعة المفضلة للسلبرتيز. 
أكثر شيء متحمسة أعرفه هو مين أول من راح يلبس هذي الفساتين؟!!

شيكوا على باقي المجموعة هنا، و لا تنسون تناظرون التفاصيل هنا، الشنط فتنة. لو فيه شيء بقوة أبغاه بتكون وحدة من هذي الشنط.