أمس كان فيه جوائز سبيريت للأفلام المستقلة. بالنسبة لي ما كان فيه أحد مميز من الجايين، حتى أكثر وحدة أعجبني شكلها كانت جينفير لورانس مع إني أشوف اللبس أنسب لجوائز MTV أكثر من سبيريت أواردز. خصوصا إن عندي هذي الصورة عن الحفل، إن الناس تلبس فيه فساتين و ملابس مريحة (كأنها رايحة لحفلة بحديقة بالصيف).
أكثر من اللبس أعجبني وجهها (لابسة لانفان). طبعا ما يحتاج أقول إن جنيفير خلقه حلوة، لكن ما قد شفتها أبدا بمكياج حلو زي كذا. ما أدعي إني أعرف كثير بالمكياج، لكن أعتقد زيي زي أي إنسان بالعالم، لما يشوف وجه و مكياج حلو، يعرف أنه حلو.
بصراحة ما أظني قد شفت مكياج بهذي النظافة، على أنه نمش واضح، ما قد شفت بشرة صافية زي كذا (كأنها ما حطت عليها أي مكياج).
يمكن من أكثر من 5 سنوات ما قد حطيت قلوس على شفايفي (قد قلت لكم وش أحس كأنه). لكن بعد ما شفت شكل جينفير، أعتقد إني باراجع قراري، لأني بجد أبغى أحد يسوي لي مكياج زي كذا (أو لو حتى تصير عندي موهبة و أقدر أسوي لنفسي هذا المكياج).
بكرا الأوسكار 24 فبراير (طبعا بأمريكا) لأنه عندنا بيكون بدأ اليوم الثاني اللي هو 25، و جينفير مرشحة لأوسكار أفضل ممثلة. صراحة مو متحمسة إني أشوف وش بتلبس لأني أعتقد إنها بتلبس ديور خصوصا إنها وجه لشنطة ميس ديور. مع أنه ودي تلبس جامباتيستا فالي (اللي قلت لكم عنه). لكن إذا تقدر بكرا تطلع بشكل زي هذا الشكل أكيد باتحمس أشوف وش بكرا بتلبس.
متحمسين للأوسكار؟ من أكثر شخص أو فستان متحمسين تشوفونه بكرا؟
ليست هناك تعليقات:
إرسال تعليق