الأربعاء، 20 يوليو، 2011

Next Red Carpet Looks: HC Fall 2011

تقريبا كل موسم أحفظ مجموعة من الفساتين اللي كانت بالعروض، و اللي أتوقع إنها راح تنلبس. طبعا ما فيه أحد يشوفها إلا يمكن خواتي، فيعني لو لبست صدق، بيني  و بين نفسي أقول: و الله كنت متوقعة، و علشان ما أنقهر قلت راح أحطها بألبوم تشوفونه، و إن شاء الله نشطب سوا الفساتين اللي لبست. 

قبل لا أحط لكم رابط الألبوم، باحط لكم صور للملابس اللي أنلبست لحد الآن. 


راح أحط الصورتين بالترتيب من اليسار لليمن، على مين أول لبسها. قبل أسبوع الأوت كتو بزواج خالها بالحفل الراقص لبست شارلوت كاسيراقي هذا الفستان السماوي و اللي تقريبا ما فيه أحد عرف من وين، و بعضهم توقعوا أنه يكون لأمها أو جدتها (قرايس كيللي). لما عرض جامبتيستا فالي عرضه الأول طلع الفستان موجود بالعرض، بس بلون أحمر. 
لو ما لبسته شارلوت كان أكيد حطيته بالألبوم لأنه فستان ما يمكن ما يكون على الريد كاربيت :) 


بعد عرض شانيل أوت كتو خريف 2011 الأسبوع اللي فات على ما أظن، أعتقد بيوم واحد طلعت آنا وينتور و هي لابسة هذا التيور بمراسم منحها وسام شرف في فرنسا. أكيد ما راح أتوقع أنه هذا اللوك راح ينلبس مو لأنه شين، بالعكس عاجبتني لمعة هذا التيور، بس ما أتوقع ممكن أحد يلبس تيور أوت كتو بحياتي، إلا إذا كانت فلوسة كثر رمل البحر، أو كان رئيس تحرير أهم مجلة أزياء زي آنا وينتور :).


أظن ملابس جيفنشي بعد ريكاردو تاستشي كلها مرشحة تنلبس للريد كاربيت، بالألبوم اللي حطيته، ما حطيت كل الكوليكشين، بس حطيت الأشياء اللي أنا ودي أشوفها. الفستان هذا ما عجبني على كارين رويتفيلد، لأني أظن أنه فستان ما يناسب عمرها، لكن بالمجمل، أكثر فساتين جيفنشي الأوت كتو كانت حلوة على اللي لبسوها. 

لا تنسون تشيكون على الألبوم لأن بعض الصور تحتها تعليق، لا تنسون بعد تعطوني رايكم، أو إذا شفتوا المجموعات وش الأشياء اللي عجبتكم أو تتوقعون تلبس؟

تحديث:
راح أحط الرابط بقائمة ثابته على اليمين اختصارها NRCL