الثلاثاء، 10 مايو، 2011

Chanel in Cannes

أمس كان عرض شانيل ريزورت (منتجعات) ... المكان كان حلو مرة بالريفيرا الفرنسية، (طبعا من الصور) ما كنت هناك P: ... المهم توي أربط، بس ما أعرف إذا تربيطي صحيح أو تخريف، أنه شانيل يطلعها بدري، قصدي مجموعة الريزورت علشان تنلبس بكان، اللي أظنه بيكون هذا الأسبوع.
المهم السنة اللي فاتت إن كنتوا تتذكرون كيرستين دونست لبست من المجموعة بآخر يوم من المهرجان، السنة هذي كيرستين لها فيلم، فأتوقع إنها بتجي، و كلنا نعرف إنها من حبايب كارل لاغرفيلد :). مبسوطة إني باشوف كيرستين، خصوصا أنه العام طلعتها بكان كانت بعد غياب طويل، كيرستين ما راح تكون لحالها أكيد.
شيكت على بعض المواقع عن الأفلام اللي بتشارك، و لقيت أفلام فيها ناس ودي أشوفهم، المهم هذولا الناس تخلتهم بقطع من المجموعة الأخيرة.


فيلم الإفتتاح هو فيلم لوودي الآن أظن أسمه midnight in Paris أو شيء زي كذا، ما يهم المهم لقيت أنه من الكاست ليا سيدو (ما أعرف راح تجي أو لا) بس أتمنى ... ليا ممثلة فرنسية، ما قد شفت لها شيء، و لا أتذكر إني شفتها بشانيل، بس يكفي إنها فرنسية، علشان تلبس من شانيل.
ليا عاجبتني مرة، شكلها حلو، جسمها حلو (حلو إننا نشوف أجسام مليانة شوي، خصوصا و كل العالم صايره هياكل) قلت لكم جسمها حلو، أعجبتني السنة اللي فاتت بمهرجان فينيسيا لما لبست لوي فيتون وردي، حبيتها ... و دخلتها من قائمة أحسن الملابس.
أحس هذا الفستان بيلبق عليها خصوصا مع نوعية جسمها.


سمعت مو متأكدة أنه ليزي أو إليزبيث أولسين راح تحضر المهرجان بفيلم لها (أظنه أول فيلم لها)، إليزبيث هي الأخت الصغيرة للتوأم أولسين، مرة حلوة، و "فرش"، ذوقها مرتب مرة. ما قد شفتها بأي مناسبة صدقية، ما شفتها إلا أظن ببريمير مسرحية كانت مشاركة فيها. يعني لسا ما صار لها علاقات بمصممين، بس يكفي سمعة خواتها، و خواتها صديقات لكارل، يعني لو يأشرون له بيسمع كلامهم :).
الفستان اللي أخترته لها، قلت لكم من المرات القليلة اللي شفتها فيه، أحسها غير مرة عن ذوق خواتها، تميل كثير للأشياء البسيطة، و ودي أشوف شكل غير عن أخواتها.


قلت لكم كيرستين على الأغلب إنها راح تكون هناك، خصوصا مع فلمها اللي متحمسة أنا له، أحسه حلو، الفستان اللي أخترته لكيرستين، أحسها لبسته قبل، علشان كذا أخترته لها، ذبحتكم أنا بكيرستين، و أتوقع الحين شبعتوا منها (أنا ما شبعت)، بس يعني عرفتوا ذوقها، و لو لبست بالمهرجان لشانيل، ماراح تكون المرة الأولى، أو مفاجأة، زي ما قلت لكم بالبداية كيرستين لبست لشانيل مرتين بالمهرجان اللي فات التركواز اللي فوق، والأسود اللي هنا، و كثير تلبس لهم، بس ودي أشوفها بهذا علشان أنبسط.

المجموعة مليانة، و لما أقول مليانة، فيعني إنها صدق مليانة فساتين حلوة مرة (شيكوا هنا)، من الأشياء اللي أعجبتني رقم 56 و رقم 58 و أشياء كثيرة، بس ما بغيت أمسخها معاكم.
آخر شيء ودي شارلوت جاينسبورق اللي تشارك كيرستين نفس الفيلم، لو جدت تلبس رقم 58.